JOHANA 3
3
Isua leh Nikodema
1Tin, Pharisaite zînga mi, a hming Nikodema, Juda-te hotu pakhat a awm: 2chu mi chu zânah Isua hnênah a lo kal a, a hnênah, “Rabbi, Pathian hnên ata zirtîrtua lo kal i ni tih kan hria; Pathian an chunga a awm loh chuan, hêng thilmak i tih ang hi tu mân an ti thei lo vang,” a ti a. 3Tin, Isuan a chhâng a, a hnênah, “Tihtak meuhin, tihtak meuhvin ka hrilh a che, mi tu pawh an pianthar loh chuan Pathian ram an hmu thei lo vang,” a ti a. 4Nikodeman a hnênah, “Mi a tar hnuin engtin nge a pian theih ang? A nu pumah vawi hnih lûtin a piang thei em ni?” a ti a.
5Isuan a chhâng a, “Tihtak meuhin, tihtak meuhvin ka hrilh a che, mi tu pawh tuiah leh thlarauva an pian loh chuan Pathian ramah an lût thei lo vang. 6Tisaa piang apiang tisa a ni; Thlarauva piang apiang thlarau a ni. 7I piangthar tûr ka tih che hi mak ti suh. 8Thli khawiah pawh a duh duhin a tleh ṭhîn, a ri i hria e; nimahsela, khawi aṭanga lo kal nge, khawiah nge a kal dâwn tih pawh i hre si lo; tu pawh Thlarauva piang chu chutiangin an awm,” a ti a. 9Tin, Nikodeman a chhâng a, a hnênah, “Chûng thil chu engtin nge a awm theih ang?” a ti a. 10Isuan a chhâng a, a hnênah, “Israel-te zirtîrtu i ni si a, chûng chu i hre lo maw? 11Tihtak meuhvin, tihtak meuhvin ka hrilh a che, keinin kan hriat chu kan sawi ṭhîn, kan hmuh chu kan hriattîr ṭhîn; nimahsela, kan thu hriattîr in âwih si ṭhîn lo. 12Khawvêla thil ka hrilh che u mah âwih lo che u a, vâna thil hrilh che u ila engtin nge in âwih ang? 13Vânah tu mah an lâwn ngai lo, vân aṭanga lo chhuka chauh lo hi chu, Mihring Fapa, vâna awm hi.
14Tin, Mosian thlalêrah rûl a khai kân ang khân Mihring Fapa hi khai kânin a awm bawk tûr a ni; #Num 21.9 15tu pawh amah ring apiangin amah avânga chatuana nunna an neihna tûrin. 16Pathianin khawvêl a hmangaih êm êm a; chutichuan, a Fapa mal neih chhun a pe a, amah chu tu pawh a ring apiang an boral lohva, chatuana nunna an neih zâwk nân. 17Khawvêl thiam loh chantîr tûrin Pathianin a Fa khawvêlah a tîr lo, khawvêl amah avânga an dam theihna tûrin a tîr a ni zâwk e.
18Tu pawh amah ring chu thiam lohvin an awm lo vang; tu pawh ring lo chu tûn apangin thiam lohvin an awm, Pathian Fapa mal neih hming an rin loh avângin. 19Hei hi thiam lohna a ni, êng khawvêlah a lo kal a; nimahsela, miten êng aiin thim an duh zâwk, an thiltihte a sual avângin. 20Tu pawh thil sual ti apiangin êng an haw ṭhîn, êngah pawh an lo kal lo; chuti lo chuan, an thiltihte a lang ang. 21Amaherawhchu, tu pawh thil dik ti apiang an thiltihte Pathian avânga ti an ni tih a lan nân, êngah an lo kal ṭhîn,” a ti a.
Isua leh Baptistu Johana
22Chûng hnuah chuan Isua chu a zirtîrte nên Judai ramah an kal a, chutah chuan Isua an hnênah a awm reng a, a baptis ṭhîn a, 23Johana pawhin Ainon-ah, Salim khaw kiangah a baptis bawk a, chutah chuan tui a tam avângin; tin, mi an lo kal a, baptisma an chang hlawm a. 24Chutih lai chuan Johana chu tân inah an la khung si lo va. #Mt 14.3; Mk 6.17; Lk 3.19-20
25Tin, Johana zirtîrte leh Juda pakhat, sil fai thûah an lo inhnial a. 26Tin, Johana hnênah an lo kal a, a hnênah, “Rabbi, Jordan râla i hnêna awm, a thu mi i hriattîr khân ngai teh, kha mi khân mi a baptis a, mi zawng zawng a hnênah an lo kal a ni,” an ti a.
27Johanan a chhâng a, “Mihringin eng mah an nei thei lo, vâna mi pêk a nih loh chuan. 28‘Kei, Krista ka ni lo ve, a hmaa mi tirh ka ni,’ ka tih kha, nangni ngei mi hriatpuitu in ni. #Joh 1.20 29Mo neitu chu a pasal chu a ni; nimahsela, moneitu ṭhian, a thu lo ngaichâng rengtu chu moneitu aw a hriat chuan a lâwm êm êm ṭhîn; hei, ka lâwmna a thleng ta a nih hi. 30Ani chu tlatlum tûr a ni, kei erawh chu lâng tûr ka ni.
Vân aṭanga lo chhuk
31Chung lam aṭanga lo kal chu mi zawng zawng aia chungnung ber a ni; leia piang chu leia mi a ni a, lei thu a sawi ṭhîn, vân aṭanga lo kal chu mi zawng zawng aia chungnung ber a ni. 32A hmuh leh a hriat apiang a hriattîr ṭhîn a ni; tu mân a thu hriattîr an âwih lo. 33A thu hriattîr âwih chuanin, ‘Pathian chu mi dik tak a ni,’ tiin, a hming nemin a ziak. 34Pathian tirh chuan Pathian thu a sawi ṭhîn; ani chuan teh kherin Thlarau a pe si lo. 35Pain Fapa a hmangaih a, a kutah engkim a pe tawh. #Mt 11.27; Lk 10.22 36Tu pawh Fapa ring apiangin chatuana nunna an nei tawh; nimahsela, tu pawh Fapa thu âwih lo apiangin nunna an nei lo vang a, Pathian thinur an chungah a awm reng zâwk a ni,” a ti a.
Dewis Presennol:
JOHANA 3: MIZOVBSI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Mizo OV - Re-edited Bible
© The Bible Society of India, 2017.
Used by permission. All rights reserved worldwide.