Luù 24
24
Wo Jisɛ̀ yèwà e fàaà dìì
(Maafiù 28.1-10; Mài 16.1-8; Jɔ̀ɔŋ 20.1-10)
1Ke ɗɔ̀ɔ̀ Sɔnèɛ, ke ɗɔɔ jiɛ̀jiɛ̀ɛ ke wikìɛ sùà maŋ nyiìŋ tɛ̀tɛ̀, aŋ jɔùŋ nyaŋ naŋ kɔ̀ koɓɛ̀ ke hùaàŋ, àŋ naŋ kɔ̀ɔ̀ manɛ̀ŋ dò siaŋ màŋ àŋ naŋ wa banebànè maŋ. 2Kɛɛ àŋ naŋ yɛ̀mɛ̀ ke duò gbeeɛ̀ àŋ naŋ wa ɓùwìè ke hùaàŋ yɛmgbɛ̀ yɛ kè yaà dùlo nyiŋ fàà guùŋ, 3àŋ naŋ dè ke hùaàŋ sùà, kɛɛ aŋ gòo wa mɛ̀ɛ̀ŋ è dìè Kanaà Jisɛ̀ɛ. 4Àŋ naŋ wa sìè koɓɛ̀ wii maŋ jii die sùà, ko fɛɛ̀feìŋ àŋ naŋ yɛ̀mɛ̀ aŋ fèlàà tìyèe àŋ gɔaa maŋ deè fùà pepe àŋ naŋ nyiŋ sìè kɔɔ. 5E jùùɛ naŋ wa nyɛ̀nɛ̀ŋ aŋ jɔùŋ nyaŋ, yèè àŋ naŋ gbùwò maŋ dewà nyiŋ maŋ dììnaŋ. Kɛɛ aŋ felaa nyàŋ naŋ nyiŋ wa dawè nyààŋ, “Wèè kiìŋ nìŋ yaà yɛ̀mɛ̀ anyuùŋ fàa nyàŋ tɛɛ wèè wo nyùnɔ̀ɔŋ yaà wɔŋ nyiiŋ gèeɔ̀ sùà wɔ? 6Wo Jisɛ̀ fè kià! Wo Dayà wòuŋ gè e fàaà dìì wɔŋ nyiiŋ gèeɔ̀ sùà. Jàaìŋ jii e yèɛ wò naiŋ woò e teengaà wò yààìŋ wa tɛɛ ko Galaliì lɛ. 7Wo naiŋ wa woò wààŋ, ‘Miàim wo Jɔ̀àfèlàà Nyuùŋ Kpùnɔɔ̀ŋ do nàŋ nɔ̀ŋ kìlaim koɓɛ̀ anyùùŋ maŋ jùumù, e kìlà aim jìwìà wɔŋ vànèkpaaà diɛŋ. Yèè sèè e gɔ̀ɛ̀ɛ̀ taai maaŋ ka ɓɛìŋ kɛ̀ɛ̀ wɔŋ nyiiŋ gèeo sùà.’ ”
8Aŋ jɔùŋ nyaŋ naŋ ngàà jàà maŋ mìè gbòauŋ màŋ jii. 9Àŋ naŋ yèwè koɓɛ̀ ke hùaàŋ, aŋ ka aŋ niŋ wòò anyùùŋ màŋjɛ̀wɛ̀ zììyà jɛ̀wɛ̀ guùŋ gbànaŋ nyàŋ gbiŋ. 10Aŋ jɔùŋ bi nàŋ yaà wa wo Mèèle e yìwìà ko jawaì àŋ nyaaŋ Màŋdalà, wo Jòanàŋ yèè wo Mèèle wo nààŋ Jìiɔ̀ŋ. Nyiŋ yaà aŋ jɔùŋ gbànaŋ nyàŋ yàa nyiìŋ wa maŋjɛ̀wɛ nyàŋ naŋ wa wòò maŋ keì mɛɛ̀ŋ koɓɛ̀ aŋ keela tàeɗùù nyaŋ. 11Kɛɛ aŋ keela tàeɗùù nyaŋ naŋ wa gongò kɛ̀ e yèɛ aŋ jɔùŋ nyaŋ naŋ wa woò lɛ è yaà wa ɓàaɓàa, àŋ gò wa hààwè àŋ jɔùŋ nyaŋ. 12Kɛɛ wo Pììlɛ naŋ wa yèwè dìì wo dùàŋ wo kà koɓɛ̀ ke hùaàŋ. Wò naŋ wa gbuwo wo yɛ̀mɛ̀ maŋ dèè kasange màŋ miiŋ guùŋ màŋ hawa ke hùaàŋ sùà. È nauŋ wa foonò yèè wò naŋ dùɔ̀ŋ wo kɛ̀ɛ̀ ko gboouŋ noo ke jii die sùà e nyaàiŋ dè e keìɛ naŋ kaaìŋ lɛ.
Wo Jisɛ̀ yaà anyùùŋ màŋjɛ̀wɛ̀uŋ nyàŋ bà ke dòmàŋ Ìmeeɔ̀ɛ diɛŋ
(Mài 16.12, 13)
13Ke ɗɔ̀ɔ̀ guùŋ bi diɛŋ anyùùŋ màŋjɛ̀wɛ̀ Jisɛ̀ nyaŋ àŋ tìyèe yaà wa kɔ̀ɔ̀yɛ̀ ko vàa bà àŋ nyaaŋ Ìmeeɔ̀. È yaà wa e sɔ̀ngɔ̀ e kààìŋ hààwà tìyèe e yìwìà ko Jùlusɛ̀làm. 14Àŋ yaà wa wòò nyiŋ bi e fèemàŋ e nyaàiŋ dè maŋ keì maŋ kinɛiŋ naŋ kaaìŋ maŋ. 15Nààŋ àŋ yaà wa wòò maŋ keì bi, wo Jisɛ̀ naŋ hnè wo nyiŋ sìè kɔɔ àŋ yaà kààìŋ koɓɛ̀ guùŋ. 16Àŋ nauŋ wa yɛmɛ̀, kɛɛ wèè esaɓù bà aŋ gòuŋ wa jàà jii. 17Nààŋ àŋ yaà wa kaaiŋ, wo Jisɛ̀ naŋ nyiŋ dawè wààŋ, “Kiìŋ nìŋ yaà weè woo nyɛ̀iŋ bi e fèemàŋ?”
Àŋ naŋ sie gìli àŋ nɔ̀ŋ ɗoomɛɛŋ. 18Kpeiŋ wo bà guùŋ wo yèɔ àŋ nyaaŋ nyààŋ wo Kiliopà wɔ naŋ dàwè wo Jisɛ̀ wààŋ, “Muàŋ guùŋ nɔŋ nàŋ yaà wo nyùnɔ̀ɔŋ ko Jùlusɛ̀làm muŋ nyimààŋ è keìɛ naŋ kaaìŋ è ɗɔ̀ɔ̀ tìyèe lɛɛ̀?”
19Wo Jisɛ̀ naŋ dawè wààŋ, “Kiìŋ màŋ keì naŋ kaaìŋ?”
Àŋ naŋ woò nyààŋ, “Maŋ keì maŋ naŋ kààìŋ wo Jisɛ̀ e yìwìà ko Naazɔ̀ɛ̀ maŋ. E yìwìà maŋ keì maŋ wò nàŋ nyɛ̀nɛ̀ŋ yèè wò naŋ woò maŋ naŋ tɔɔ̀ kɛ̀ wò yaà wo wɛ̀ijì ko fɛ̀ɛ̀fèìŋ Dayà yèè anyùùŋ nyaŋ gbiŋ. 20Aŋ kànà sìèfèìŋ zòòlo nyàŋ yaà anyùùŋ gbèègbèè fuɔɔ̀ŋ nauŋ kìɛ̀ŋ koɓɛ̀ aŋ màmàŋkùmɛŋ wi nyàŋ yèè àŋ nauŋ nimilà e kìlà auŋ jìwìà wɔŋ vànèkpaaà diɛŋ. 21È kùwàìŋ wa ke jii tùlia kɛ̀ wuŋ nàŋ hewa weè nàŋ bìlɛ̀ŋ anyùùŋ Ezɔ̀ɛ̀ nyaŋ! Kɛɛ maŋ ɗɔ̀ɔ̀ taai naàŋ màànààŋ tɛɛ̀ gbiŋ naŋ kaaìŋ. 22Eɓìèmàŋjɛ̀wɛ̀ tii, aŋ jɔùŋ bà ke gboò wiɛ̀ sùà naŋ wòò e keì e wi foonò. Àŋ naŋ kɔ̀ koɓɛ̀ ke hùaàŋ maŋ nyiiŋ tɛ̀tɛ̀, 23kɛɛ aŋ gòo mɛ̀ɛ̀ŋ è dìè Jisɛ̀ɛ. Àŋ naŋ kɛ̀ɛ̀ maŋjɛ̀wɛ yèè àŋ naŋ woò nyààŋ àŋ naŋ yɛ̀mɛ̀ aŋ màikà e gɔ̀à gò jɛ̀i sùà aŋ yè nyaŋ naŋ nyiŋ woò nyààŋ wo Jisɛ̀ kɛ̀ɛ̀ wɔŋ nyiiŋ gèeɔ̀ sùà. 24Anyùùŋ bà ke gboò wiɛ̀ sùà naŋ kɔ̀ koɓɛ̀ ke hùaàŋ yèè àŋ naŋ yɛmɛ̀ kɛ̀ e tɔɔɓaa àŋ naŋ woò, kɛɛ aŋ gòo yɛ̀mɛ̀ wò Jisɛ̀ nyiŋ pɛɛ.”
25Kpeiŋ wo Jisɛ̀ naŋ woò wààŋ, “Wèè kiìŋ nìŋ yaà yɛi e ɓàaɓàa e kìlà nìŋ naŋ yɛi gbɔ̀mgbɔ̀ɔ̀ maŋ jii wèè naŋ hààwè maŋ keì maŋ aŋ wɛ̀ijì nyaŋ naiŋ wa woò maŋ, e nyaàiŋ dè wo yèɔ wo Dayà naŋ tàeɗùù wèè wo joeyè anyùùŋ nyaŋ e ɗuunyaàŋ wɔ? 26Niŋ nyimààŋ kɛ̀ wò Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wa wo kùwà è keì nyìnga paŋgàà wo wa nɔ̀ŋ jòòwouŋ?” 27Wo Jisɛ̀ naŋ nyiŋ kpìnìè maŋ keì maŋ gbiŋ yaà sìnga miŋ màŋ wɔŋ fɛ̀ì Dayàa sùà e nyaàiŋ dè wuŋ bi, e yìwìà maŋ Sàwà Mòòze màŋ yèè maŋ fɛ̀ì aŋ wɛ̀ijì nyaŋ gbiŋ sùà.
28Nààŋ àŋ yaà wa gbɛ̀ɛ̀ sùà koɓɛ̀ e vàaà àŋ yaà wa kɔɔyɛ lɛ̀, wo Jisɛ̀ naŋ nyɛ̀nɛ̀ŋ mààŋ wò yaà weè gɛ̀ɛ sùà e jawaà. 29Kɛɛ àŋ nauŋ pɔwɔ̀ nyààŋ, “Jawà ko nɛ̀ɛ̀ŋ wiì, esaɓù kɛ̀ e gɔɛɛ̀ naàŋ jùà fùùŋ yèè e dùùmɔɛ yaà naàŋ kuwie.” Yèè wo Jisɛ̀ naŋ jɔ̀ ko saaìŋ wèè wo jàwà ko nɛ̀ɛ̀ŋ nyiŋ niìŋ. 30Wò naŋ jɛi wèè yaà nyiŋ aŋ jènɛ̀ŋ, kpeiŋ wò naŋ ɓèmè e gbɔ̀u yèè wò naŋ niŋ zòòlò diɛŋ. Wò naŋ niŋ nyime nyìmè wo nyiŋ niŋ kiɛ̀ŋ. 31Kpeiŋ e fɛɛ̀ nyiŋ nɛ̀ naŋ gbaì yèè àŋ nauŋ jàà jii, kɛɛ wò naŋ nyiŋ jɔ̀ɔ̀nɔ̀ŋ fɛ̀ɛ̀. 32Àŋ naŋ wòò nyiŋ bi e fèemàŋ nyààŋ, “Sɔ̀ɔ̀ màŋ jii wi màŋ naŋ weè dìè zɔlɔ̀ è teengaà wò yaà wi weè gbùùyè kɔɔ kè dòmaàŋ diɛŋ, yèè wò yaà wì gbàì sùà jii e nyaàiŋ dè wɔŋ fɛ̀ì Dayàa?” 33Àŋ naŋ yèwè dìì fiò yèè àŋ naŋ kɛ̀ɛ̀ ko Jùlusɛ̀làm, ko yèi àŋ naŋ wa mɛ̀ɛ̀ŋ ànyùùŋ màŋjɛ̀wɛ̀ zììyà jɛ̀wɛ̀ guùŋ nyaŋ yaà aŋ gbànaŋ nyàŋ. 34Kpeiŋ àŋ naŋ wòò àŋ tìyèe nyàŋ e yìwìà ko vàaì nyààŋ, “E tɔɔɓaa le wo Kanaà yèwà e fàa dìì! Wò naŋ fòlò wo Saimɔ̀ŋ feìŋ.”
35Aŋ fèlàà tìyèe nyiiŋ naŋ kpɛ̀nɛ̀ŋ e nɛ̀ɛŋ naŋ kaaìŋ ko dòmaìŋ lɛ, e kìlà e nɛ̀ɛŋ naŋ nyɛ̀nɛ̀ŋ àŋ naŋ jàà wo Kanaà jii lɛ̀ nààŋ wò naŋ nyìmè ke gbɔ̀uɛ̀ lɛ.
Wo Jisɛ̀ naŋ fòlò anyùùŋ màŋjɛ̀wɛ̀uŋ nyàŋ feìŋ
(Maafiù 28.16-20; Mài 16.14-18; Jɔ̀ɔŋ 20.19-23; Nyɛ̀nɛ̀ŋ 1.6-8)
36Nààŋ anyùùŋ màŋjɛ̀wɛ̀ tìyèe nyàŋ yaà wa wòò anyuùŋ gbànaŋ nyàŋ e keì lɛɛ̀, wo Kanaà Jisɛ̀ wuŋ bi naŋ nyiŋ fòlò feìŋ yèè wò naŋ nyiŋ woò wààŋ, “Ke jii fàa nɔ̀ŋ ko nɛ̀ɛ̀iŋ niìŋ.”
37E jùùɛ naŋ nyiŋ wa nyɛ̀nɛ̀ŋ esaɓù kɛ̀ àŋ yaà wa goongo kɛ̀ wo jinàŋ àŋ yaà wa yɛɛmɛ. 38Kɛɛ wo Jisɛ̀ naŋ nyiŋ dawè wààŋ, “Wèè kiìŋ e jùùɛ naŋ yɛi diè? Wèè kiìŋ maŋ keì mɛɛ̀ŋ naiŋ dììyè jii? 39Yɛ̀mɛìŋ maŋ kuàim màŋ yaà maŋ golòim màŋ, niŋ yɛmɛ̀ kɛ̀ miàŋ bi wo, esaɓù kɛ̀ wo jinàŋ kuwà màŋ kèìŋ yaà màŋ gòà nààŋ nìŋ yààìm yɛɛmɛ lɛ̀.”
40Wò naŋ nyiŋ tɛɛ̀ woò yèè wò naŋ nyiŋ tɔ̀ɔ̀ le siwèuŋ nɛ̀ yaà maŋ golòuŋ màŋ. 41Aŋ gò niŋ wa kpɛ haawè, esaɓù kɛ̀ e zɔlɔ̀ naŋ nyiŋ wa diè e kìlà è naŋ nyiŋ wa foonò. Kpeiŋ wò naŋ nyiŋ dawè wààŋ, “Kòò nìŋ kuwa kià e nɛ̀ŋje wèè jèe?” 42Àŋ nauŋ kìɛ̀ŋ wo kɛì nyùnaŋ kpuu. 43Wo Jisɛ̀ nauŋ kùwò yèè wò naŋ nyiŋ wuŋ gbìlìè ko fɛɛ̀feìŋ.
44Kpeiŋ wò naŋ nyiŋ woò wààŋ, “Maŋ kèì guùŋ mɛɛ̀ŋ mìŋ naiŋ woò e teengaà mìŋ yààìŋ wa e tɛɛ lɛ̀. Maŋ keì maŋ gbiŋ yaà sìnga miŋ maŋ Sàwà Mòòze màŋ sùà, maŋ fɛ̀ì aŋ wɛ̀ijì nyaŋ sùà, yèè wɔŋ fɛ̀ì Saàaŋ sùà, màŋ kuwa maŋ hɛɛnɛ̀ŋ.”
45Kpeiŋ wò naŋ nyiŋ kpuumò maŋ jii nyiŋ màŋ naŋ yilè wèè aŋ nyìmàŋ maŋ mìè gbòà wɔŋ fɛ̀ì Dayàa, 46yèè wò naŋ nyiŋ woò wààŋ, “Tɛɛ̀ nàŋ yaà sìnga niŋ wɔŋ fɛ̀ì Dayàa sùà, kɛ̀ wo Kulaìɔ, wo yèɔ wo Dayà naŋ tàeɗùù wèè wo joeyè e ɗuunyaàŋ wɔ, kuwa wo kà e keì nyìnga dìì, yèè sèè e gɔ̀ɛ̀ɛ̀ taai è maaŋ wo yèwà e fàaà dìì wɔ̀ŋ nyiiŋ gèeo sùà. 47Maŋ fɛi màŋ naŋ ɓɛìŋ woò wààŋ aŋ woò ke miè gbìaàŋ e deè mɛ̀ diɛŋ koɓɛ̀ anyuùŋ kpùuŋ nyàŋ gbiŋ e ɗuunyaàŋ kɛ̀ aŋ fè maŋ tùwo naanààŋ nyiŋ màŋ jɛwɛ aŋ kìlà koɓɛ̀ Dayài, yèè e tɔɔtù ko Jùlusɛ̀làm wèè maŋ jùumù nyiŋ màŋ nɔ̀ŋ hakɛ̀ jùùya miŋ. 48Nìŋ yaà aŋ sèì wèè maŋ keì mɛɛ̀ŋ gbiŋ. 49Mìŋ manaŋ naŋ nyìmàŋ kɛ̀ miàŋ bi nàŋ doiŋ nàŋ tùɔ̀ŋ e nɛ̀ŋ kìɛɛ̀ŋ wo Dèda miɔ̀ŋ naŋ wa jɔ̀ɔ̀ e ɗààhiì wèè wo kiɛ̀ŋ lɛ. Kɛɛ ɓɔ̀ nìŋ yèwà kò Jùlusɛ̀làm e jèèsùà e gààaŋ eiŋ dèyà diɛŋ e yìwìà ko àìjɛnɛ̀ŋ.”
Wo Jisɛ̀ jòwà ko àìjɛnɛ̀ŋ
(Mài 16.19, 20; Nyɛ̀nɛ̀ŋ 1.9-11)
50Kpeiŋ wo Jisɛ̀ naŋ gè anyùùŋ màŋjɛ̀wɛ̀uŋ nyàŋ ko jawa gbeeì yèè wò naŋ nyiŋ kɔ̀ɔ̀ ko Bɛfenè. Wò naŋ jòòwò maŋ kuàuŋ màŋ fùùŋ wò naŋ nyiŋ gbìɛ̀ŋ e zòòlo maŋjɛ̀wɛ. 51Nààŋ wò yà nyiìŋ wa gbìàŋ sùà e zòòlo maŋjɛ̀wɛ, wò naŋ nyiŋ jòò wo jòwà ko àìjɛnɛ̀ŋ. 52Anyùùŋ màŋjɛ̀wɛ̀uŋ nyàŋ naŋ dè maŋ gɛ̀ɛ̀nìŋ nyiŋ màŋ dìì auŋ zoolò, yèè aŋ naŋ kɛ̀ɛ̀ maŋjɛ̀wɛ ko Jùlusɛ̀làm e zɔlɔ̀ gbee sùà. 53Ke ɗɔɔ gbiŋ àŋ kɔ̀à wa ko jɔ̀ɔ̀lègbèè ko Saaŋ Zòòlò Dayài, àŋ yaà gììyè wo Dayà ke sɛ̀.
Dewis Presennol:
Luù 24: WFESD
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Gola New Testament Translation and Literacy Project © Bible Society in Liberia, 2019.