Luka 24
24
Yesu wa Ji nu̱ Viɗi mbe Mu̱ti
(Mat 28:1-10; Mar 16:1-8; Ykh 20:1-10)
1Nang ɗo, ye fu̱ɗa Laaji nu̱ke nang ke fu̱ɗar nu̱ gumapaali mbu̱ qaandi mut nu̱ zhuzhumi tu̱ nusukwang a da ɗye zhi mu̱nkandiku nu̱ daasakyang tu̱ ɗu̱ ku she ku̱jipang. 2Tu̱ gwa wa tu̱pa ndogdi zar me ku̱jipang ɓara. 3Nu̱ viiki nu̱ mbu̱ ku̱jipang ku nu̱ gwa man var Zhinerem gwaanji Yesu ɓa. 4A mbu̱ damtarku ku̱men, ba fan ndu̱ fan tu̱ na nduki rap mbu̱ luktiku nu̱ke a wuti garit garit chingndan wudle wora. 5Tu̱ sa ɗyin wor nu̱ yaghai ku ku̱me tu̱kti sawa, tu̱ yang ndukyang ze wor za, “Tun a laɓ nu̱ nyifiri mbu̱ mu̱tikwang ku̱me nu̱ma? 6A nje fan ɓa, wa ji mbe mu̱ti, kor ma ɗyi nu̱ zu̱ki ye nu sarchi nu̱ke a Galili. 7‘Ai wa ze nu za, a ma vu̱r Yi ɓu̱ nduk nu̱ mbu̱ khar nu̱ solarku, ka kaatli nda ku, yang ye qaandi nu̱ kunung ka ji mbe mu̱tang tu̱k.’ ” 8Kom tu̱ kor ɓalar ɓaranang ku.
9Nu̱ njigki ye maa nu̱ke ku̱jipang a si ku tu̱ ɗu̱ ku ta nda su̱ ɗyiku nang ye pudeku gwaanggu̱m dandang ndu̱ ɓeena nu̱ mburindakwang. 10Nusuku nu̱ zu̱ki ɗyiku nang ye pudekwang ɗya Maryam Magadaliya, ndu̱ Yuwanna, ndu̱ Maryam man Yaqub ndu̱ nusuku nggur nu̱ke a su̱yen ndu̱ wora. 11Tu̱ yang Pudekwang gaɓ nu̱ ɓalar ɓu̱ nusuku nang ma ɓalar bamndi, tu̱ zhang maitaran gha ku. 12Tu̱ Biturus qu̱n ɗari, tu̱ ɗu̱ she ku̱jipang, nu̱ kurumki gha tu̱ yingga mbanang tu̱ na kapar linenang du̱ngndan gha ye maa da, tu̱ ɗa gaɓ a lazham ɗyi nu̱ ɗatlki.
Yiti Njiv ma Yir Imawus.
(Mar 16:12-13)
13Ba ye fu̱ɗaran, tu̱ rap chele ɓu̱ nu̱ mbu Yesu kwang ku̱s njiv ma yir mbu̱ gure nggur dlu̱man za Imawus, ɓakh ɓaran ndu̱ Urshalima wa khu̱l kilomite gwaanggu̱m da. 14A mbu̱ yir a pijiri ku ɗyine ɗyiku nu̱ ɗatlki nang. 15Ba nu̱ke a mbu̱ ɓalarku nang a kwaari ku ɗyine ɗyiku nang, tu̱ Yesu nu̱ ɗyinan song nu̱ she wor tu̱ zu̱m guma ndu̱ yir ndu̱ wora. 16Yang wa za yiti wor nu̱gha nu̱ke nu̱ ɗu̱ma saida nda ku ɓa.
17Tu̱ yang zham wor za, “Tun a zu̱kya nyi pooni ɓalarku chele ɓaanu nu̱ke tun a yira na?”
Tu̱ ching gha ku shiru̱m, memu̱na wor su̱bu̱rtan. 18Kom da chele ɓaanda nu̱ke dlu̱man za Ku̱liyopas tlogha yenda za, “Woɗye to runggu mbu̱ ghai Urshalima mu, nu̱ke no zu̱n ɗyi nu̱ ɗatlki mbu̱ qaandiku nang ɓa?”
19Tu̱ Yesu zham wor za, “Ɗye nu̱m ɗatlkya?” Tu̱ tlogha yenda ku za, “Ɗya ɓalar ɓu̱ Yesu khuzi Nazaret. Nu̱ke ɗya annabi nu̱ khaki nu̱ zalale mbe tlu̱nar ɓaran ndu̱ ɓalar ɓaran she Magham ndu̱ nduki kap. 20Yang tu̱ kuru rututundiku ndu̱ dlegumeku ɓaarem vu̱r nda ma tlagha nda nu̱ gha, tu̱ yang kaatli nda ku. 21Chem wa sa memu̱narem tu̱ga chin ka dliiki ɗyin Israila; yang meeni nang ke qaandi kunung nu̱ shir ɓu̱ ɗyiku nang. 22Tu̱ nusuku nggur nu̱ke a su̱yen ndu̱ chem vu̱r ɗye lazham yerem ku̱me wa ɗu̱ ku nu̱ dumaari ɗau she ku̱jipang, 23tu̱ yang ɗa gaɓ ku za nu̱ wora gwa man var ɓu̱ mu̱tang mbu̱ ku̱jipang ɓa. Tu̱ zu̱ yerem ku tu̱k za yiti wor wa na tunu, za wor wa na nu̱ ru̱ktiku ɓu̱ Magham, tu̱ yang ze wor ku za wa ji nu̱ viɗi mbe mu̱ti. 24Tu̱ yang ɓeeni nduki chele ɓaarem ɗu̱ she ku̱jipang, nu̱ ɗa na mu̱tang ku tu̱k zum ɓa.”
25Tu̱ yang Yesu ze wor za, “Ai sagharku, tun nu̱ke nun ka maita ɓalar ɓu̱ annabiku mbu̱ memu̱nanu kap ɗau ɓa. 26Alapa nu̱ ku̱s ku̱ Masiya Kuji Datkandi ɓu̱ Magham za bonyeku nang kom ku̱ Magham vu̱r zhaaji ɓaran yenda ɓa goma?” 27Tu̱ mbakh mbu̱ ɗyi nu̱ lagarkatikwang zu̱ki nu̱ ɗyine nda, nggaasan ɗyin Musa nu̱ annabiku kap.
28Na ɓa ki bing ndu̱ gure nu̱ke a yir ku njang, tu̱ shi wa chin a ma peeta varan, 29tu̱ khuti nda ku za, “Ku̱gam a gol nu̱ she rem ku̱me mugdi wa shi, wonji fu̱ɗar wa nggu̱ɗi.” Kom tu̱ ɗu̱ ta zhur nu̱ she wora.
30Nu̱ khaki gha ma zu̱m ɗye zu̱mndi ku, tu̱ Yesu da ɓurti tolir tu̱ sa barke nu̱ si, kom tu̱ ɓakhla nu̱ gha tu̱ vu̱r ye wora. 31Nang ɗo, tu̱ yiti wor qu̱n kaani, tu̱ saida nda ku; tu̱ yang Yesu sagha nu̱ me yiti wora. 32Tu̱ nggaasi ɓalar chele ɓaanda a zu̱ran ku za, “Woɗye nu̱ memu̱na rem qushumnderem sarchi nu̱ke a ɓalar ndu̱ chem yiti njiva kom ndu̱ sarchi nu̱ke a zu̱ mbu̱ lagarkati ɓu̱ Maghamang yerem de?”
33Tu̱ ji ku ta gaɓ nu̱ Urshalima ba ye sarchi nang. Ta gwa wor gwanggu̱m dandang tabaran ku ye maa da ndu̱ ɓeena nu̱ mburi nda ku nu̱ke a su̱yen ndu̱ worang. 34A ɗyin zu̱ran ku za, “Yel, Zhinerem gwaanji wa ji mbe mu̱ti shwat, wa wuɗ varan ye Siman tu̱k.”
35Kom tu̱ wor rapndang zu̱ ɗyiku nu̱ wor shiki yiti njiva ye wor kom ndu̱ saida nda nu̱ wor shiki sarchi nu̱ ɓakhlaki ɓurti tolirang.
Yesu wa Wuɗ Varan ye nu̱ Mburi nda ku
(Mat 28:16-20; Mar 16:14-18; Ykh 20:19-23; Tlp 1:6-8)
36Ba a mbu̱ ɓalarku nang, tu̱ na Yesu chingndan chele ɓaanda, tu̱ ze wor za, “Gappu̱ramma ku!”
37Tu̱ yang ku̱zha ku, var wora dlu̱rti, ku̱me a tamandan ku za wor na kya khu̱kheet. 38Tu̱ Yesu ze wor za, “Tun a tu̱k sawar nu̱ma? Nu̱m saki tun ki kwaari zum zum mbu̱ memu̱na nwa na? 39Nggu̱t ma khara ndu̱ ɗyin pili saara, ɗya nga ndu̱ vara, su̱ɓa ma tun tu̱kki, ku̱me dlu ndu̱ qu̱tl ve khu̱kheet wa ɓang nang ɓa.”
40Nu̱ zu̱ki ɓalar nang, tu̱ wuɗ kharan ndu̱ ɗyin pili saaran ye wora. 41A mbu̱ kashar ndu̱ lazham ɗyiku nang, aa nu̱ke mbu̱ wor rap rap ye wora, tu̱ Yesu ze wor za, “Ɗye zu̱m kha nu fan mu?” 42Tu̱ vu̱r dokol yurvi viikandi yenda ku. 43Tu̱ Yesu dlu̱ tu̱ nji mbu̱ yiti wora.
44Tu̱ ze wor za, “Nang ke ɓalar nang zu̱ki ye nu sarchi nu̱ke nga su̱yen ndu̱ tunwang, nga za ɗyi nu̱ Taurete ɓu̱ Musa ndu̱ Lagarkati ɓu̱ annabiku ndu̱ Zaburya zu̱ki ɗyina kap ka nyedli.”
45Tu̱ yang qu̱n ɗyin wor nu̱ gha ma ku̱ da mbu̱ ɗyi nu̱ Lagarkatikwang zu̱ki. 46Tu̱ ze wor tu̱k za, “Bu̱laran wanang mbu̱ Lagarkatikwang za wa ku̱s ku̱ Masiya za bonye, tu̱ yang ji mbe mu̱ti ye fu̱ɗar nu̱ kunung. 47Yang ka shi wopar njigti solar ndu̱ yaapar solar mbu̱ dlu̱man ye nduki nu̱ larji kap, yang ka nggaasan Urshalima. 48Tun ke saidu ku ɓu̱ ɗyiku nang. 49Wonji ngga ɗa ru̱k ndu̱ alqawar ɓu̱ Zhinkirang ye nu, yang bu ma mbu̱ ghai Urshalima, kope tun wa gwa zalale na ɓaki viɗi.”
Wa Da Yesu ma Yir Viɗi
(Mar 16:19-20; Tlp 1:9-11)
50Nu̱ Yesu viiki ndu̱ wor qu̱rse ghayang, tu̱ khu̱l ku Betani, tu̱ ghar kharan nu̱ viɗi tu̱ sa barke ye wora. 51A mbu̱ sa barke ye wor tu̱ shakh ndu̱ wora tu̱ da nda ma yir viɗi. 52Tu̱ yang ghar ghai yenda ku tu̱ gaɓ ku nu̱ Urshalima nyeedlan ku ndu̱ kashar maɗyikandi. 53Yang aakochi ɗu̱ki mbu̱ Rafti ɓu̱ Magham ku ba gor dlu̱m Magham.
Dewis Presennol:
Luka 24: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016