Yokhana 15
15
Yesu ke Qu̱far Anap Yelndi
1“Nga ke qu̱far anap yelndi, Zhinkir ɓang ke nu̱ ghutang. 2Aa nyi me bu̱n qu̱far nu̱ke nu̱ kha woi mbya ɓa, ka ku̱rta nu̱ gha. Aa nyi bu̱n nu̱ khaki woi, ka shaata kwaɗa nda nu̱ gha ma ku̱ shaata khar woi. 3Aa leendang tun shakhshakh ku̱me ɓalar nang zu̱ki ye nu. 4Kha ma nu̱ mbya, tang khan mbe nu. Ba wa nu̱ke bu̱n qu̱far anap ɓu̱ ɗu̱ma kha woi waare man qu̱far anapang ɓa, wanang tu̱k tun ɓu̱ ɗu̱ma kharan ɓa kope tun wa khan mbya.
5“Nga ke qu̱far anapang tun ke me bu̱n qu̱farang. Njif nu̱ khaki nu̱ mbya nga mbe nda, chin ka khaki qusonggi khang. Jiwa mbu̱ tun a su̱yen ndu̱ nga ɓa, tun ɓu̱ ɗu̱ma shi aa nu̱m ɓa. 6Kap njif nu̱ke nu̱ khan mbya ɓa, a shipa bu̱n qu̱far nu̱ ɗatlki tu̱ mbuk gha tu̱ ghwari. Nduki ka taba poonan tu̱ gu̱n ɓai nu̱ si, tu̱ va wor nu̱ gha. 7Mbu̱ tun wa khan mbya, tu̱ ɓalar ɓang khan mbe nu, tun ka khuɗ ɗyi nu̱ke tun a shimndan kap, ka shi ye nu. 8Shi ma ɗyi nu̱ke Magham a shimndan, ma wut nu za tun nu̱ mburi nga, ku̱me nang ke ɗyi nu̱ke kaɗa ɓa ki ndu̱ zhaaji ye Zhinkir ɓanga.”
9“Ba wa nu̱ Zhinkirang ndolaki nga, nga ndola nu wanang tu̱k. Kha man mbu̱ ndolar nang wutki ye nu. 10Nga mbu zu̱r ɓu̱ Zhinkir ɓang tang khan mbu̱ ndolar ɓaran tu̱k. Wanang tu̱k mbu̱ tun wa mbu Woparku ɓang tun ka khan mbu̱ ndolar ɓanga. 11Nga zu̱ wanang ma ku̱ kashar ɓang khan mbe nu, tu̱ kashar ɓaanu kha nyeedlan tu̱k. 12Zu̱r ɓang ye nu, na ke, ndola ma yen wa nang ndolaki nu. 13Ndolar a nje nu̱ dukki nang ɓa, ku̱ nduk vu̱r nyifi ɓaran ku̱me raptan. 14Tun rapta mbu̱ tun wa shi ɗyi nang zu̱ki ye nu. 15Ngam ɓu̱ qaanu ye rafa tu̱k ɓa, ku̱me ye rafa nu̱ zu̱n ɗyi nu̱ke nu̱ rafti ɓaran a shiran ɓa. Yang nga qa nu raptaku, ku̱me nga zu̱ ɗyi nang tu̱kki she Zhinkir ɓang kap ye nu. 16Tun datki nga ɓa, nga datki nu, tang sa nga za ɗu̱ nu tun a tlu̱na ɗyiku mbarkandi, qusonggi nu̱ke ka khaki koɗokhsi ɓa. Kom Zhinkirang ka vu̱r ɗyi nun khuɗki mbu̱ dlu̱ma ye nu kap. 17Ɓalar nang zu̱ki ye nu chin ke ndola ma yen.”
Zhangndi ɓu̱ Larji
18“Mbu̱ larji wa zhangndo nu, zu̱n ma nu̱ ɗyine wa zhangndi nga me ku̱ zhangndo nu. 19Mbu̱ tun ɓu̱ larji tu̱ga larji wa shim ɗyi ɓaran, yang ku̱me tun ɓu̱ larji ɓa. Nga daato nu mbu̱ larji, nang ke ɗyi nu̱ saki tu̱ larji ki zhangndo nu. 20Kor ma nu̱ ɗyi nang zu̱ki ye nu za, ‘Ye rafa nu̱ka duk nu̱ rafti ɓaran ɓa.’ Mbu̱ wa vu̱r bonye ya ku, wanang tu̱k ka vu̱r bonye ye nu. Mbu̱ wa mbu zu̱r ɓang ku, tu̱ga ka mbu zu̱r ɓaanu tu̱k. 21Ka shi ɗyikunang ye nu kap ku̱me dlu̱ma, ku̱me nu̱ zu̱n njif nu̱ ɗa ru̱kki nga ɓa. 22Mbu̱ na nga ɓa tang shi ɓalar ye wor ɓa, tu̱ga sola ve wor ɓa. Yang leendang me ve wor ɗyine solar ɓaanda ɓa. 23Njif nu̱ zhangki nga gha, wa zhan Zhinkir ɓang gha tu̱k. 24Nga shi ɗyiku khang chele ɓaanda nu̱ke sar da njif nggur a nje nu̱ shiki ɓa. Mbu̱ nang shi tlu̱nar ku nang ɓa, tu̱ga sola ve wor ɓa. Yang leendang wa woɗa na ɗyiku nang shiki, yang kap ndu̱ nang tu̱ zhangndi nga gha ku, tu̱ yang zhang Zhinkir ɓang gha ku tu̱k.” 25Ɗyina shi ma ku̱ nyel ɗyi nu̱ke a nje bu̱laran mbu̱ Woparku#15:25 Woparku nduk ka gwa mbu̱ Zab 35:19; 69:4. ɓaanda za, “Wa zhangndi nga gha ku su̱ si ɓa.”
26“Ngga sa Nu̱ shaatarang nu̱ ɗa viki she Zhinkirang tu̱ ɗa ɓa she nu. Jiimbi shakhshakhndi nu̱ zhire na viki she Maghamang chin ka saidaki nga. 27Tun saidu ɓang tu̱k, ku̱me tun a su̱yen ndu̱ nga gumapaali.”
Dewis Presennol:
Yokhana 15: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016