Yokhana 10
10
Ku̱rti Ɓalar ndu̱ nu̱ Khutlo Ndu̱ɓangku
1“Zhire nga zu̱ran ye nu, kap njif nu̱ke nu̱ vi nu̱ she ndu̱ɓangku ve me viri ɓa, tu̱ yang dla ye maa nggur zu̱m, ɗya nu̱ muuru, ndu̱ nu̱ yetar njiv tu̱k. 2Yang njif nu̱ viki ve me viri ɗya nu̱ khutlo ndu̱ɓangkwang. 3Nu̱ nggu̱ti me virang ka qu̱n yenda. Ndu̱ɓangkwang wa ka tu̱k su̱qur nu̱ khutlorang. Wa ka qa ndu̱ɓangkwang ndu̱ dlu̱m wora, tu̱ ɗu̱ ndu̱ wor dam. 4Qu̱rse wa fet ndu̱ɓangku ɓaran nu̱ dam, ka khan gume wora, ndu̱ɓangkwang a mbu gaanje nda ku̱me wa zu̱n su̱quranku. 5Ɓu̱ mbu runggu ku ɓa, ka ɗakya nda, ku̱me nu̱ zu̱n su̱qur runggu ku ɓa.” 6Tu̱ Yesu shi ku̱rti ɓalar nang ye wora, yang nu̱ da mbu̱ ɗyi nu̱ke a zu̱ran ye wor ɓa.
Yesu ke nu̱ Khutlori Mbarkandi
7Ku̱me nang tu̱ Yesu ze wor tu̱k za, “Zhire nga zu̱ran ye nu, nga ke me vi ɓu̱ ndu̱ɓangkwang. 8Nduki nu̱ ɗa ɓa ki gumera kap ɗya nu̱ muuriku ndu̱ nu̱ yetar njivku, yang ndu̱ɓangkwang nu̱ gwa dlu̱mndi wor ye wor ɓa. 9Nga ke me virang, njif nu̱ viki ku̱n sha ka gwa ɗanari, ka vi tu̱ vi nu̱ dam a khutlori. 10Nu̱ Muuru ka ɗa ɓakya ba ma muuru, ndu̱ tlaghar mu̱ti, ndu̱ su̱bu̱rti. Yang nga ɓakya ma ku̱ gwa nyifi ku, ku̱ yang gwa ndu̱ yele.”
11Nga ke nu̱ khutlori mbarkandi, nu̱ khutlo mbarkandi wa ka vu̱r nyifi ɓaran ku̱me ndu̱ɓangkwang. 12Nu̱ tlu̱nar mu̱zhindi nu̱ka daki nda tu̱ shi khutlorang ɗya nu̱ khutlo ɓa, yang ndu̱ɓangkwang ɓaran ɓa. Ku̱me nang mbu̱ wa na yiɗi gaari a ɓar ɗyin ɗa, ka njig ndu̱ɓangkwang tu̱ ɗa varan. Yiɗi gaarang kaɗa ɓa tu̱ ku̱s ndu̱ɓangkwang, tu̱ lakhta wor nu̱gha tu̱k. 13Nu̱ khutlo nang ɗa varan ku̱me a shikya tlu̱nar mu̱zhin, yang nu̱ damta ndu̱ ndu̱ɓangkwang ɓa.
14“Nga ke nu̱ khutlo mbarkandi. Nga zu̱n ɓanga ɓang wa zu̱ndi nga ku, 15ba wa nu̱ Zhinkirang zu̱nki nga, nga tu̱k nga zu̱n Zhinkirang. Nga ka vu̱r nyifi ɓang ku̱me ndu̱ɓangkwang. 16Ɓeeni ndu̱ɓangkwang nje nu̱ke a mbu̱ shapir nang ɓa. Wa ku̱s a ɓa nga ndu̱ wora. Ka tu̱k su̱qura ku, ka kha ma shapir da, ndu̱ nu̱ khutlori da tu̱k. 17Nang ke ɗyi nu̱ saki tu̱ Zhinkir ɓang ki ndola nga, nga ka vu̱r nyifi ɓang ma da nga tu̱k. 18Nduk a nje nu̱ke ka ɗu̱maki lawa nyifi ɓang ɓar ɓa, ku̱me nga ke nu̱ vu̱rtan ɓar ndu̱ vara. Zalale vu̱rtan ɓara a nje khara, yang zalale gaɓti si a nje khara tu̱k. Nang ke ɗyi nu̱ Zhinkir ɓang zu̱ki ya za shi nga.”
19Tu̱ Yakhudeku vi ma keele chele ɓaanda ku̱me ɓalar nu̱ Yesu shiki nang. 20Tu̱ nduki khang chele ɓaanda zu̱ za, “A su̱yen ndu̱ khu̱kheeti nang ke ɗyi nu̱ saki tu̱ ki me yirti nang. Nu̱m saki tun ngga dlu̱mndonu yenda?”
21Yang tu̱ ɓeenan zu̱ za, “O'o, ɓalar nang ɗya ɓalar ɓu̱ nu̱ khu̱kheet ɓa. Woɗye khu̱kheet ka ɗu̱ma qu̱n yiti pugum mu?”
Yakhudeku wa Zhang Yesu
22Ɗya sarchi mbiti, yang a Tabar kwari qu̱ndi Rafti ɓu̱ Magham mbu̱ ghai Urshalima. 23Yang Yesu a bara maa nu̱ka qaki za, kalap ɓu̱ Solomon mbu̱ Rafti ɓu̱ Maghamang. 24Tu̱ Yakhudekwang kara nda nu̱ tala tu̱ zu̱ ku za, “Nu̱m saki tom ngga ɗyinerem gha ɓa? Mbu̱ to ke Masiya to zu̱ yerem ye dalangi.”
25Tu̱ Yesu tlogha ye wor za, “Ai nga woɗa zu̱ran ye nu, yang nun maita ɓa. Ɗye lazhamku nu̱ke nga shiran mbu̱ dlu̱m Zhinkir ɓang kya saida nga ye nu. 26Yang nun maita ɓa, ku̱me tun ndu̱ɓangku ɓang ɓa. 27Ndu̱ɓangku ɓang wa ka mbu zu̱r ɓanga, nga zu̱n wora, wa ka mburi nga ku tu̱k. 28Nga vu̱r nyifi ye wor nu̱ke ɓu̱ shi woɗa ɓa, ɓu̱ dar mu̱t ku ɓa, yang nduk a nje nu̱ke ka lawaki wor ɓar mbu̱ khara ɓa. 29Zhinkir ɓang nu̱ vu̱rki ndu̱ɓangkwang ya wa duk aaki ndu̱ gwaari, yang nduk a nje nu̱ke ka ɗu̱maki lawa wor ɓar mbu̱ kharan ɓa. 30Nga ndu̱ Zhinkirang chem da.”
31Tu̱ Yakhudekwang gaɓ tu̱ ghar ndogdiku ma mbukti nda. 32Tu̱ Yesu tlogha ye wor za, “Nga shi ɗyi mbarkandi ye nu khang she Zhinkirang, yang tun a ma mbukti nga ku̱me nyi chele na?”
33Tu̱ Yakhudekwang tlogha yenda za, “Ai, chem a ma mbuktoro ku̱me tlu̱nar mbarkandi no shiki ɓa, yang chem a ma mbuktoro ku̱me ɓalar ndu̱mndi no shiki ye Magham. To nu̱ke to nduku yang ta buu ɗyinor ndu̱ Magham.”
34Tu̱ Yesu tlogha ye wor za, “A nje bu̱laran mbu̱ wopar ɓaanu za Magham wa zu̱ za, ‘Nga za tun maghamndiku.’ 35‘Yang chem wa zu̱n Bu̱lar ɓalar ɓu̱ Magham nu̱ka zu̱ wollo ɓa, mbu̱ Magham wa qa nduki nu̱ tu̱kki ɓalar ɓaran maghamndiku,’ 36yang nga nu̱ Magham wakaki, tu̱ ɗa ru̱kti nga nu̱ larji. Ka kha ma ɓalar ndu̱m ku̱me nga zu̱ za, ‘Nga Yi ɓu̱ Magham’ mu? 37Mbu̱ nga shikya tlu̱nar nu̱ke Zhinkir ɓanga shiran ɓa, maita nu nga ɓa. 38Yang mbu̱ nga shikya tlu̱nar nu̱ kya shiran, aa nun maita nga ɓa, maita ma tlu̱narkwang, ku̱me zu̱n nu, tun da mban tu̱k za, Zhinkirang a nje mbya, yang nga mbe nda tu̱k.” 39Tu̱ shi ku tu̱k ma ku̱s nda, yang nu̱ gwa tu̱ ku̱s nda ku ɓa.
40Kom tu̱ Yesu gaɓ nu̱ dlar Gaawu Urdun, ye maa nu̱ke Yokhana shiki baptisme nu̱ gumapaalyang, ta kha gha fara. 41Tu̱ nduki khang a ɓa she nda. Tu̱ yang ki zu̱ran ku za, “Aa nu̱ke Yokhana nu̱ shi ɗye lazham sarda ɓa, yang kap ɗyi nu̱ zu̱ki ɗyine khuski nang ɗya zhire.” 42Ba ye maa nang tu̱ nduki khang maita Yesu.
Dewis Presennol:
Yokhana 10: ttrNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016