John 13
13
Asenh-aton iaȣenre teioteriȣasonterakȣen Oriȣatokenti tsini hoiaton Roiatatokenti San.
1ONEN thoa saȣentanoronne ne Shotonnhestston, roterientare ne Iesos tsi onen ieiohe nahonsahatenti tsi ionȣentsiate, Ronineha niiahonsare, tsini sakohnoronkȣakȣe ne raonkȣeta onȣentsiakeronon, ok ki eh niieheiot tsiniiore ieiotokte.
2Nok nonen sahatikȣentane nʼokarassa, onen sihonikonraten nʼotkon ne Sitas-Iskariot Simon roienha, nahotenninon.
3Nok tsi roterientare ne Iesos tsi akȣekon niiehoiatakȣeniioston ne Roniha, nok tsi Niiohne thoientakon, tsi oni Niiohne niionsahaȣenonhatie.
4Tahanistskȣarako natekȣaratserakta, ȣahatiataȣitasi; ohniataraha ȣahateniionton nok tahatiatannhake,
5Nok akeratne ȣahnnekaren, nok tasakositohare ne raotiokȣa, nok neh tontasakositokeȣatonhatie ne roteniionte.
6Kahre onen iaharaȣe tsi tenstskȣahere ne Simon Tier; tahenron neneh ne Tier: Saianer! enskasitohare kenh nekenhen?
7Tontahoȣennaȣeron ne Iesos, nok ȣahenron; iah nonȣa tesaterientare tsini ȣakierenhatie, onakenke ki ensatokense.
8Tontahenron ne Tier; iah ki nah nonȣenton tiiaskasitohare. Tontahenron ne Iesos: nene iah tenkonhiasitoharehe, iah ki taetenikȣekhene.
9Simon Tier tontahenron; Senha ioianere akȣekon ne kesnonsake oni kenontsine asenohare.
10Tontahenron ne Iesos: nonen rotiatohare, neok tetsiotonȣentsiohon naonsaonȣasitohare, nok akȣekon enȣatenohare; onen kati Seȣatiatohare iah ki tanon akȣekon tehken.
11Aseken roterientare onka rotenninonre; nese ȣaonni ȣahenron: iah ki akȣekon tehken.
12Nok nonen sasakositoharesi, sahatseronni nok sahanistskȣaren atekkȣaratserakta nok ȣasakaȣenhase; seȣaterientare kenh nahoten ȣatenientenstakon tsi nakȣaierase?
13Roianer nok Raȣenniio takȣanatonkȣa, akȣa neneh tiseȣariȣaierists: aseken tokenske Ii.
14Ne kati kehiken ts Ii ine Roianer, oni ne Raȣenniio tanon Ii ȣakȣasitohare; etho kati oni nise nenseȣaiere enhietsiiasitohare nakoren.
15Aseken ȣakȣanatonhase, neh naonseseȣaiere, tsi nakȣaierase.
16Oriȣiio akȣa oriȣiio tsi kȣarori, tsi iah senha kannhatsera tehaiatanoron tsiniiot ne raiatakȣeniio, oni ne rariȣenhaȣi tsiniiot ne thotorion.
17Toka seȣaterientare neh nikarihotens, enseȣaiatateri neh nenseȣaiere.
18Iah ki tanon tiiekȣakȣekta, aseken kheienteri ki nonka kheiatarakȣen; Nok ki tanon iatekakonte tsi enkahnane tsinikaiaton, tsi ȣaton; nehne teiakiatonsts ȣahakatkarhateni.
19Tahonenne ok tkȣaroris ohenton eh naiaȣenne; nʼaiaȣens nʼonen ienkaeȣe eh oni nenhiaȣenne aonteseȣetakȣe tsi Ii takatorion ne Rakeniha.
20Oriȣiio akȣa oriȣiio tsi kȣarori: nonkakiok ienhiiatenniete nok enthonȣakonnienste, enhakkonnienete ki oni nii; nok nenhakkonnienste enhokonnienste ki ne thakatorion.
21Nonen saharihokten ne Iesos, akȣa anio tsiniiot nahonikonranonȣake, nok ok tiiahatrorikoȣa, nok ȣahenron: Oriȣiio, oriȣiio tsi kȣarori, saiatat tsinitsion enhakatenninon.
22Ȣathontatkathoseron ne raotiokȣa ok tihotinikonrotht thiken onka onte sakohton.
23Saiatat tsinihati, nehne ronoronkȣakȣe ne Iesos, akȣa kati rakȣistsake iehakonhen rohtas.
24Simon Tier iahotkatho tsiniiot nahorori nahariȣanonton, kah nihaiatare ne rohton.
25Eh kati iahattate tsi rotte ne Iesos, nok ȣahenron: Saianer! onka nekenhen?
26Tontahenron ne Iesos, neh nenthiion kanataranaȣenton. Nok ȣahanataranaȣente niȣaha Sitas Iskariot tahaon, Simon roienha.
27Nok nonen siiarennekȣane, onen ȣahotienhase nʼotkonseraksen: Nok ne Iesos ȣahaȣenhase: tesasterihen eh natsier tsinahoten sariȣaien.
28Iah tanon onka teiohnikonraientaon tsinihati tehonatekkȣaratserannhenne tsi nahoten ȣahenton tsi nahoten ȣahenron.
29Aseken otiake ȣaonnere, ne kenh tsi Sitas ranatatserenhaȣe, tsi kati niiot nahororike ne Iesos ne Sitas nahaninon tsinahoten teiotonȣentsiohon tsi ȣentanoronsere; ok ne ens nasakotenrate ne iakotent.
30Akȣa neok siiarennekȣane ne Sitas ne kanatarok oksaok ȣahatenti; onen asonthenne sihken.
31Nok nonen siiehoiakenhon, ȣahenron ne Iesos: Onȣa onen enhasennanoronne nʼOnkȣe Roienha, nok raonhake enhasennanoronne ne Niio.
32Ne kati tsi raonhake enhasennanoronne ne Niio, raonhake kati oni ne Niio enshosennanoronste; akȣa ok oni iosnore tsi enhosennanoronste.
33Kȣaienhokonha, niskariȣesha onen tsi tsiteȣakȣekon. Enskȣaiatisake, nok tsiniȣakieren tsi kherori ne Sitaeronon, tsi iah thiiahonneȣe tsinonȣe ȣake, onen kati oni nise ȣakȣarori.
34Tsioriȣat noriȣase ȣakȣatenienthase; nehne, taeseȣatatenoronkȣake tsi ki nʼii nikȣanoronkȣa eh nataeseȣatatenoronkȣake.
35Neh enkaieronniststakȣen tsi ise nakitiokȣa ne tenseȣatatenoronkȣake.
36Simon Tier tahatati, ȣahenron: Saianer! kah ȣase? tontahenron ne Iesos: Tsinonȣe ȣake, iah taskȣehni nonȣa nasksere; nok tanon niare ohnakenke eh niienhense.
37Tontahenron ne Tier: Saianer! oh niiotieren tsi iah kenh nonȣa takkȣeni nakonsere? enkateȣentete tsi konnhe nise sariȣake.
38Tontahenron ne Iesos: ensateȣentete tsi sonnhe nʼii akeriȣake! Oriȣiio akȣa oriȣiio tsi konrori tsi iah taontontati ne kitkit nʼiah asen taskatonnihiiasere.
Dewis Presennol:
John 13: MHK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.