Lukas 1
1
Lukas manjalasakan manganai Nabi Isa.
1:1-4
1Gasan Nang Tahurmat, Tuan Teopilus,#1:1 Teofilus: Ngaran Teopilus baarti ‘urang nang mangasihi Allah’ atawa ‘sahabat Allah’. Bisa jua, Lukas manulis kitab ini sabagai laporan lawan saikung urang nang badahi nang bangaran Teopilus. Tapi lantaran arti ngaran nang itu, maka ada jua banyak panafsir nang bapikir bahwa laporan Lukas nang ini ditujuakan ka samuaan urang nang mangasihi Allah.
Sudah banyak urang nang manulis kajadian-kajadian di banua kami manganai Nabi Isa. 2Kajadian-kajadian nang itu disampaiakan lawan kami ulih urang-urang nang suah manyaksiakannya, tamasuk jua pangikut-pangikut Nabi Isa. 3Lantaran ulun sudah manyalidiki kajadian-kajadian nang itu, ulun tulis kisah ini gasan pian 4sakira pian tahu kajadian-kajadian nang itu dasar bujur tajadi.
Habar manganai diranakakannya Nabi Yahya
1:5-20
5Wayah jaman pamarintahan Herodes, raja Yudea, ada saikung imam nang bangaran Zakariya. Sidin tu tamasuk aliran imam Abia. #1:5 aliran imam Abia: Wayah itu, iman-imam tabagi dalam dua puluh ampat aliran, gasan mangatur waktunya bubuhannya batugas di Bait Allah saban tahun. Lihat 1Taw. 24. Bini sidin juriat imam Harun. Ngaran bini sidin tu Elisabet. 6Dua laki bini tu urang nang saleh wan takwa di hadapan Allah. Inya badua tu bujur-bujur maasi samunyaan parintah wan hukum Tuhan. 7Zakariya wan bini sidin sudah tuha banar, kada sing anakan sualnya Elisabat tamanang.#1:7 Kata ‘tamanang’ baarti ‘mandul’ dalam bahasa Indonesia. 8Wayah aliran imam Abia kana giliran, Zakariya parahatan malakuakan tugas baimaman di Bait Allah. 9Biasanya gasan manantuakan imam nang mana nang mambanam kamanyan di dalam Ruang Suci di Bait Allah, dilakuakan undian. Pas wayah itu, sakalinya Zakariya nang kana gasan mambanam kamanyan. 10Parahatan acara mambanam kamanyan, samunyaan jamaah bakumpulan di luar wan malakuakan sambahyang.#1:10 bakumpulan di luar wan basambahyangan: Ruang Kudus di Bait Allah itu dianggap suci banar sampai urang biasa kada bulih masuk. Hanya saikung imam haja nang bulih masuk. Jamaah nang lain musti bakumpulan di luar. Lihat Imanat 9 dan 16. 11Lalu malaikat Tuhan batampai lawan Zakariya di higa kanan mija parapen wadah mambanam kamanyan. 12Pas malihat malaikat tu, sidin kabuliangan lawan katakutanan.
13“Zakaria! ikam kada usah takutan Zakaria ai! Aku ni handak mahabarakan habar baik lawan ikam. Doa ikam sudah dikabulakan Zakaria ai! Bini ikam, Elisabet tu, cagar batianan wan maranakakan saikung anak lalakian. Ikam kaina musti mangaraninya Yahya. 14Ikam musti kahimungan. Malah urang nang lain gin banyak nang kahimungan wayah anak ikam diranakakan kaina. 15Sualnya anak ikam tu cagar manjadi urang nang dimuliaakan Tuhan. Cirinya, inya kada bulih nginum banyu anggur atawa minuman lain nang ditangati.#1:15 Sabagai ciri … minuman karas nang lainnya: Parintah nang kaya ini dibariakan [ka/lawan] kuitan Simson (Hak. 13:5, 7), jadi kuitan Yayha pasti/musti bapikir bahwa anak bubuhannya cagar manjadi saurang nabi. Lawan pulang, inya cagar dirasuki Ruh Kudus#1:15 Ruh Kudus: Ruh Kudus di sini adalah Ruh Allah. Lihati catatan di Matius 1:19. dalam parut umanya. 16Banyak juriat Nabi Ibrahim cagar diulahnya babulik manyambah Allah. 17Yahya tu cagar manjadi utusan Allah nang kuat wan bakuasa nang kaya Nabi Ilyas. Inya cagar mandahului Al Masih gasan maulah hati abah-abah babulik pulang ka anak-anaknya. Lawan pulang, inya cagaran maulah hati urang-urang durhaka wan urang-urang nang kada taat babulik ka jalan nang lurus. Kaina inya malakuakan nang kaya itu tu gasan manyiapakan umat Allah sakira siap manarima kadatangan Al Masih” ujar malaikat lawan Zakariya.
18“Nang kaya apa ulun tahu hal nang itu cagar tajadi? Ulun ni sudah tuha. Bini ulun gin tuha jua” ujar Zakariya manakuni malaikat tadi.
19“Aku ni malaikat Jibril nang malayani Allah. Aku ni diutus ulih Allah mahabarakan habar baik tadi gasan ikam. 20Ingatakanlah! Samunyaan nang kupadahakan wan ikam cagar tajadi. Tagal lantaran ikam kada parcaya lawan pandiranku tadi, maka ikam manjadi bisu sampai kajadian itu tajadi” ujar malaikat Jibril mahimati.
21Wayah itu, urang nang banyak di luar tu mahadangi Zakaria kaluar matan Ruang Kudus di Bait Allah. Bubuhannya hiran kanapa maka lawas banar inya kada sing kaluaran.
22Pas Zakaria kaluar, inya bisu, kada kawa bapandir lagi lawan bubuhannya. Inya kawanya cuma mamakai bahasa isyarat lawan tangannya. Kaputingannya, bubuhannya sadar ada nang luar biasa nang dilihatnya di dalam Ruang Kudus tadi.
23Imbah tuntung giliran batugas, Zakaria langsung bulik. 24Kada lawas, batiananay Elisabet, bininya. Salawas lima bulan, Elisabet bahinip haja di rumah, kada sing kaluaran. 25Himung banar Elisabet tu. Lalu, inya bapandir dalam hati, “Paampihannya Tuhan mangabulakan doaku wan mahapusakan kasupananku.”
Habar diranakakannya Nabi Isa
1:26-38
26Wayah itu, Elisabet sudah parak anam bulan batianan. Malaikat Jibril diutus mandatangi 27saikung babinian nang bujangan di kuta Nasaret di banua Galilea. Ngarannya Siti Maryam. Siti Maryam tu sudah batunangan lawan Yusup juriat Raja Daud.
28“Assalamu alaikum! Ikam ni bauntung banar manarima barakah matan Allah" ujar malaikat ka siti Maryam tadi.
29Siti Maryam takajut mandangar ucapan malaikat tadi.
“Apa lah artinya ucapan nang ini?” ujar siti Maryam bapandir dalam hati.
30“Kada usah takutan Maryam ay! Ikam dipilih gasan manarima barakah Allah.
31Ikam cagaran manianakan saikung anak lalakian. Kaina amun baranak, ngarani anak tu Isa.#1:31 Isa: Arti ngaran ‘Isa’ adalah ‘urang nang manyalamatakan manusia’ (Lihati Matius 1:21). 32Anak ikam tu cagar bakuasa nang kaya padatuan-Nya Raja Daud.#1:31 Raja Daud: Raja Daud adalah Nabi Daud. Inya cagar disambat Anak Nang Di Atas. 33Imbah itu, Inya cagar bakuasa salawasan atas juriat Nabi Yakub. Karajaannya kada bakasudahan” ujar Malaikat tadi manambahi.
34“Mana kawa? Ulun nih bujangan” ujar Siti Maryam manyahut.
35“Ruh Kudus #1:35 Ruh Kudus: Ruh Kudus di sini adalah Ruh Allah. Lihati catatan di Matius 1:19. cagar datang ka ikam wan kuasa Allah cagar manaungi ikam. Lantaran itu pang, anak ikam cagaran suci wan cagaran disambat Anak Nang Di Atas” ujar Malaikat tadi mahimati.
36“Sabujurnya Elisabet, dangsanak ikam tu nah sudah anam bulan batianan biar inya sudah tuha wan disambat tamanang. 37Sualnya amun Allah bakahandak, kadada nang mustahil” ujar malaikat pulang.
38“Ulun ni hamba Allah, tasarah haja. Ulun manarima haja napa-napa kahandak Allah" ujar Siti Maryam manyahut.
Lalu malaikat tu bajauh maninggalakannya.
Siti Maryam maelangi Elisabet, dangsanaknya.
1:39-48
39Kada lawas, Maryam tu badadas tulak kasabuah kuta di banua Yudea didaerah pagunungan. 40Inya masuk ka rumah Zakariya wan mambari salam lawan Elisabet. 41Pas Elisabet mandangar salam matan Maryam, anak nang di dalam parutnya bagarak-garak. Lalu Elisabet dirasuki ulih Ruh Allah.
42“Maryam! Dingsanakku! Ikam bauntung banar lantaran ikam dibarakahi Allah diantara samunyaan bibinian nang lain wan dibarkahi jua anak nang ada di dalam parut ikam. 43Siapa garang aku ni sampai uma Junjunganku hakun maelangi? 44Pas aku mandangar salam ikam, anak nang ada di dalam parutku ni batandik kasukaan. 45Bahimunglah ikam, sualnya ikam parcaya amun samunyaan nang dipadahakan Tuhan cagaran tajadi" ujar Elisabeth nyaring manyahuti.
46Lalu Maryam baucap,
“Hati ulun baucap Allahu akbar.
47Jiwa ulun himung banar karna Allah, Juru salamat ulun.
48Inya ingat lawan ulun,
hamba-Nya nang hina.
Mulai wayahini sampai ka jaman kaina,
samunyaan urang pacangan manyambat ulun dibarkahi ulih Allah.
49Sualnya Allah nang Mahakuasa sudah malakuakan hal-hal nang luar biasa lawan ulun.
Pujilah Allah, lantaran Inya suci!
50Allah mangasihi samunyaan urang tatarusan
nang takutan wan mahurmati-Nya.
51Lawan di zaman bahari, Allah manampakakan kuasa-Nya malalui gawian-Nya.
Inya rahaiakan urang nang sumbung hatinya,
lalu Inya gagalakan samunyaan rancana bubuhannya.
52Di zaman bahari, Allah manurunakan raja-raja dari takhtanya
lawan Allah maninggiakan darajatnya urang nang randah hati.
53Di zaman bahari, Allah mambari makan nang nyaman-nyaman ka urang nang lapar sampai kanyang
sadangkan Allah manyuruh urang-urang nang sugih bajauh mambawa sapuluh jari haja.
54Jadi, sakali lagi nang kaya zaman bahari,
Allah lah nang manulungi juriat Nabi Ibrahim— yaitu umat pilihan-Nya,
sakira kita bujur-bujur kawa malayani-Nya.
Inya kada kalumpanan janji-Nya mangasihani kita—
55lantaran Inya maingatakan rahmat-Nya nang sudah dijanjiakan lawan padatuan kita,
mulai matan Nabi Ibrahim sampai ka kita, juriatnya
sampai salawas-lawasnya.”
56Maryam bagana di rumah Elisabet kira-kira tiga bulan lawasnya. Imbah itu, inya bulik ka kuta Nazaret.
Diranakakannya Nabi Yahya
1:57-66
57Kada lawas sampai-am wayahnya Elisabet baranak. Lalu diranakakannya ai saikung anak lalakian. 58Urang higa-mahiga rumah lawan dangsanak-dangsanaknya mandangar amun Tuhan mambari barakah lawan rahmat-Nya nang basar lawan Elisabet. Maka bubuhannya gin umpat himung jua lawan inya.
59Wayah anak halus tu baumur dapalan hari, datangan bubuhannya gasan acara manyunat anak halus tu. Anak halus tu handak dingarani bubuhannya Zakariya nang kaya ngaran abahnya.
60“Jangan! Jangan! Inya harus dingarani Yahya!” ujar umanya.
61“Saikung-ikung gin kadada nang bangaran Yahya di antara kula-kula ikam” ujar bubuhannya manyahut.
62Lalu bubuhannya mambari tanda isarat lawan abahnya gasan manakuni ngaran anaknya. 63Zakaria minta ambilakan batu tulis gasan manulis ngaran anaknya.
“Ngarannya Yahya!” ditulis sidin di batu tu lantaran sidin kada kawa bapandir.
Bubuhannya hiran sabarataan manganai pilihan ngaran tu. 64Wayah nitu jua Zakaria ampih bisu. Inya kawa pulang bapandir.
"Sukur, Alhamdulilah. Aku kawa bapandir pulang" ujar sidin sambil mamuji Allah.
65Samunyaan warga higa-mahiga rumah basukur. Kajadian-kajadian itu tadi dipandirakan urang di saluruh pagunungan Yudea.
66“Manjadi apa jualah kaina anak halus nang itu? Sualnya Ruh Kudus #1:66 Ruh Kudus: Ruh Kudus di sini adalah Ruh Allah. Lihati catatan di Matius 1:19. ada lawan inya" ujar bubuhannya bapandir dalam hati imbah mandangar hal itu.
Zakaria mamuji Allah wan banubuat.
1:67-80
67Zakaria— Abahnya Yahya, dirasuki ulih Roh Kudus lalu Sidin banubuat nang kaya ini,
68“Tapujilah Allah, Tuhan juriat Nabi Ibrahim,
nang sudah manulung kita
wan sudah mambibasakan matan musuh-musuh kita.
69Allah sudah mautus saikung Tukang Kasalamatan nang baasal matan juriat hamba-Nya nang bangaran Nabi Daud.
Inya bakuasa manyalamatakan kita.
70Nang kaya itu tu pas banar lawan janji Allah
nang disampaiakan matan nabi-nabi nang tadahulu.
71Sualnya nabi-nabi nang tadahulu tu manyampaiakan bahwa kaina Allah manyalamatakan kita
matan musuh-musuh kita nang mamuari.
72Gasan mambuktiakan kamurahan hati-Nya lawan padatuan kita,
Allah ingat janji-Nya.
Janji-Nya nang suci tu cagar ditapati-Nya.
73Maka Allah sudah basumpah lawan padatuan kita nang bangaran Nabi Ibrahim
74supaya kita dibibasakan dari kuasa musuh-musuh kita.
Maka kita kada usah gair malayani Allah.
75Nang kaya itu tu, kita bisa hidup suci wan bujur di hadapan-Nya saumuran.
76Lalu manganai ikam — anakku nang masih halus ni,
kaina ikam disambat saikung nabi Allah nang Mahatinggi lantaran ikam mandahului Tuhan.
Ikam cagar manyiapakan jalan gasan kadatangan-Nya.
77Artinya ikam kaina cagar mahabari umat-Nya nang kaya apa cara sakira bubuhannya kawa disalamatakan
malalui pangampunan dosa-dosa bubuhannya. 78Jadi, lantaran kabaikan hati Allah, Tuhan kita,
kaina Kasalamatan dari Allah, cagar manyinari kita.
79Nang kaya itu tu, Allah cagar manarangi urang nang hidup dalam kakadapan.
Imbah itu, Inya cagar manulungi urang nang katakutanan.
Cahaya Allah itu cagar mambimbing kita baampah ka Tuhan,
sakira kita hidup ruhui dalam parlindungan-Nya.”
80Anak Zakaria nang itu, nang bangaran Nabi Yahya, sasain baganal wan jiwanya gin batambah kuat jua. Wayah inya ganal, inya bagana di padang pasir sampai wayahnya gasan manyataakan dirinya kalawan juriat Nabi Ibrahim.
Dewis Presennol:
Lukas 1: BJN
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© Pioneer Bible Translators