Yohana 4
4
Yesu kodi Dhasamaria moro
1Munyo Yesu oniaŋ nike Jofarisayo jotieko winjo ni go onyo ywayo ji bonge aka miyo ji batisimo loyo Yohana, 2(iy'adieri, Yesu k'obatisa nyatoro, to jofonjirok pere am'oyido jotimo ameno.) 3Go oeye Yuda to gik yu Galili; 4Aka go onwaŋo ripo luwo gi Samaria.
5Go obino i tindi ma Samaria m'ilwoŋo ni Sika, m'oyido cegin gi ndelo ma Yakobo cango omiyo Yozefu, wode. 6Waŋ pi pa Yakobo oyido nikenyo, aka Yesu munyo ool gi woth, obedo piny dho waŋ pi no oyido obedo odieceŋ kapa sawa aucel.
7Dhasamaria moro obino kulo, to Yesu waco rigo ni, “Miyan ye pi amadhi.” 8(Jofonjirok pere onwaŋo fodi jokidho i tindi nyewo cemo.) 9#Ezira 4:1-5; Nehe 4:1-2Dhasamaria no odwoko ni, “Kole in i Jayuda aka an a Jasamaria; inyalo nedi kwayan pi amadha?” (Ato Joyuda oyido jokitiyere gi Josamaria kosa jokiori atewe pa Josamaria kendo jokimadhi pi g'agwatin ma Josamaria jomadh'iye pi.) 10Yesu odwoko ni, “Bedi iŋey mic pa Were kodi ŋata kwayin pi amadha, d'ikwayo go aka d'omiyin pi ma kwo.” 11Dhako no owaco ni, “Jadwoŋ kole ingoye kodi gitwomo pi aka waŋ pi luth. Inonwaŋ kune pi ma kwo m'iwaco no? 12Iparo ni idwoŋ loyo kwari wan Yakobo m'omiyo wan waŋ pi me; aka go kodi wote, kodi mwendi pere jomadho pi me?” 13Ana Yesu ni, “Moro je ma madho pi me bino winjo riyo kendo; 14to ŋat'omadhi pi m'abino miyo go odoko kilawinjo riyo kendo. Aka pi m'anomiy go bino lokere i go waŋ pi ma mol to miyo go kwo makirum.” 15Ana dheno ni, “Jadwoŋ, miyan pi no aka ŋey akiri doko awinji riyo kosa adwoki ka kendo kulo.” 16Yesu owaco rigo ni, “Kidhi ilwoŋ cworin idwoki gine ka” 17Dheno odwoko ni, “Angoye gi cworan.” Ana Yesu ni, “Itire waco ni ingoye gi cworin, 18rupiri itieko nywomirok gi cwo abic, aka ŋata pama ibedo gine no bende k'obedo cworin. Iwaco gir'adieri.” 19Dhako no owaco ni, “Jadwoŋ, onyo aniaŋ ni kere i jatuci wac Were. 20Kole kwarere mawan yado jolamo Were wi got me, to win wi Joyuda wiwaco ni Yerusalem a kama waripo lam'iye Were.” 21Yesu odwoko go ni, “Dhako me, yey gim'awaco rin; hongo bino tundo ma ji jok'olam Baba wi got me kosa kada i Yerusalem. 22Win Josamaria wilamo gima wikuya; to wan Joyuda waŋeyo gima walamo, kwoŋbedo both wok bongi Joyuda. 23To hongo bino, aka ee otieko kiri tundo, ma joma lamo Baba i yo m'otire, jobino lamo go i Cuny kodi iy'adieri, rupiri Baba yenyo joma lamo go ameno. 24Were obedo Cuny aka joma lama go joripo lamo go i cuny kodi iy'adieri.” 25Dhako no owaco rigo ni, “Aŋeyo ni Mesiya (m'ilwoŋo ni Kristo), labino, aka k'obino lawaco riwan kisi gimoro.” 26Yesu odwoko go ni, “An won ago, an m'aluwo kodin me.” 27I hongo no won to jofonjirok pa Yesu jodwoko, to jodhier swa munyo jonwaŋo go luwo kodi dhako. To ongoye kwoŋ jo ŋat'openjo go kada ni, “Imito aŋo?” Odoko ni, “Raŋo m'iluwo gi dheno?”
28Gikenyo dhako no oweyo dak pi pere, ogik i tindi, to waco ri ji ma kenyo ni, 29“Biye neni win dhano m'owaco ran gimoro je m'atieko timo, kosa go a Kristo?” 30Gikenyo ji joay i tindi to jokidho bongi Yesu.
31I hongo no jofonjirok oyido jokwayo Yesu nike, “Jafonji, cemi ye!” 32To odwoko jo ni, “Anitie gi cemo acama ma wikuya.” 33Gikenyo jofonjirok pere wegi jocako penjirok kendi gin ni, “Yagi, kosa moro nende okelo rigo cemo?” 34Yesu owaco rijo ni, “Cemo paran obedo timo gima ŋat'ooran yenyo gi cowo tic pere.”
35“Wingoye gi ageca ma wimaro luwo ni, ‘Odoŋ dwe aŋwen to keco tundo?’ Awaco riwin, kaŋasa win ndelin maber: Gim'ocwoy pama otieko cek aka otundo akeca. 36Ŋata keco limo kemba, aka ameno go coko gim'onyak ri kwo makirum, ŋey jacwoyo kodi jakeco je jowosangala kanyacel. 37Kole ageca me ripo ni, ‘Ŋat'acel cwoyo aka ŋatiman keco.’ 38Adhiro win keco gima wikicwoyo; joman ama jonekere gi tic mere, aka onyo widonjo limo bero ma wok i kwok pajo.”
39Josamaria mathoth ma tindi no joyeyo Yesu rupiri dhako no owaco rijo ni, “Go owaco ran gimoro je m'atieko timo.” 40Gikenyo Josamaria jobino bonge to jokwayo go nike wobedi gi jo, to Yesu bedo kenyo ndelo ario.
41Ji mathoth man joyeyo go ro fonji pere, 42aka jowaco ri dhako no ni, “Pama onyo wayeyo go, ki kwoŋbedo gim'iwaco, to rupiri wawegi watieko winjo go, aka onyo waŋeyo adieri ni go a Jaboth pa piny.”
Yesu botho wod pa jadwoŋ moro
43Munyo ndelo ario no orumo, Yesu oeye kenyo to kidho Galili, 44#Mat 13:57; Mar 6:4; Luk 4:24kada nende go won onwaŋo otieko waco ni, “Jatuci wac Were kimiy go dwoŋ i piny pere won.” 45To munyo go otundo Galili, ji jojolo go, rupiri jo wegi ndir ca jokidho Yerusalem i ndelo madwoŋ ma kalima ma Kadho to joneno gimoro je ma go otimo i kalima no.
46Gikenyo Yesu ogik i Kana ma Galili, kama go ndir ca olok'iye pi vini. Kenyo onwaŋo nitie jadwoŋ moro ma wode oyido two yu Kapernaum. 47Munyo jalo owinjo ni Yesu obino Galili wok Yuda, okidho bonge to kwayo go nike wokidhi Kapernaum wobothi rigo wode m'onwaŋo cegin tho. 48Yesu owaco rigo ni, “Ato ka wikineno ranyuth madongo wik'oyey!” 49Jadwoŋ ma Jaroma no odwoko ni, “Jadwoŋ, bowe wakadhi kafodi nyathi paran k'otho.” 50Yesu owaco rigo ni, “Kadhi, wodin bino kwo!” Jalo oyeyo gima Yesu owaco rigo to kadho. 51Munyo fodi ni royo kadho, jotic pere joromo gine to jowaco rigo ni wode kwo. 52Go openjo jo ni two oweyo go keraŋo, to jowaco ni, “Nyoro odieceŋ kapa sawa abirio ama two no owey'iye go.” 53Gikenyo bamere opoyo ni i hongo no won ama Yesu owac'iye rigo ni, “Wodin bino kwo.” Riameno go kodi peco pere gipi joyeyo.
54Me obedo gir'aura mar'ario ma Yesu otimo munyo otieko wok Yuda okidho Galili.
Dewis Presennol:
Yohana 4: DHOPE
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Dhopadhola DC Bible © Bible Society of Uganda, 2018.