Matiyu 11
11
Zang ɓɔɔ Yɔhana ɓɔɔ palɛ zang batizima shong ɓɛɛ
(Luk 7:18-35)
1Yeesɔ hangsɛ zang kopi tu ziti ɓɔɔ ri mantɛ vuu ka bii ɓiɓɛ yee rannang tɔ, a seepaa nɛɛ nɔng kaɓa, a daa ka rɛɛ gari ɓɔɔ ka tipi Galili. Tusu zang vuu a ti rang zang yee Laa.
2Yɔhana ɓɔɔ zang mã wu ka sãa, tãa nyaa vuu ɓɔɔ Kirisi palɛ, a shong zang ɓɔɔ ri mantɛ vuu ka bii ɓiɓɛ, ka bii Yeesɔ, 3nɛɛ ri daa hɛ̃ɛ Yeesɔ nɛɛ, “Ɓu mɔkɔ yɔɔ ɓɔɔ zang tɔɔ naa a ɓɛɛ ya, kɔ ruu gãng jĩng ka zang ɓɔɔgn?”
4A Yeesɔ kasɛ ri nyaa tɔɔ, “Nɔɔ gbãayu ta, nɔ́ɔ daa kɔɔ Yɔhana vuu kɔ nɔɔ tãa ɓee, nɛɛ ɓɔɔ nɔɔ ti zi ɓɛɛ. 5Zang jĩng ringtang ri zi nɔng kana, zang ɓɔɔ kàa katɔ ri ti ra kana, a kɔnang zang vuu bii ti yaa ri nɔng kana. Zang ɓɔɔ shoo gbooto ri ti tãa nɔng kana, n ti wisi zang ɓɔɔ ri vɔlɔ ɓɛɛ paa kana. Zang ti rǎng zang ɓɔɔ vuu ka naa kpang Ruu Tɔ̃ɔ Laa kana. 6Tĩnang tãanang, ɓi ɓɔ̀ɔ́ zang ɓɔɔ yaa danggn naa, ka ruu mɛɛ kpang ɓɛɛ.”
7Zang ɓɔɔ ri mantɛ vuu ka bii Yɔhana naa seepaa daanang tɔ, a Yeesɔ naa kɔɔ zang dɔɔli ɓɔɔ ri kpalɛ zɔɔ ka bii ɓiɓɛ ruu Yɔhana kati. Yeesɔ tɔɔ, “Nɔɔ dàa ɓu vi zinang ka jĩngti viya? Lagaa ɓɔɔ jasung zĩiti ɓɛɛ ya? 8Nɛɛ nɔngkɔ kpang, nɔɔ daa vi zinang viya? Nɔɔ daa zang ɓɔɔ hãa fɔ̃ɔrɔ tɔ̃ɔ tɔ̃ɔ zinang ya? Zang ɓɔɔ ri hãlɛ fɔ̃ɔrɔ tɔ̃ɔ tɔ̃ɔ, ri nwalɛ ɓarɛ ka gãa rɛɛ kpanti. 9A nɔɔ daa ɓu vi zinang viya? Nɔɔ daa ka ruu zang nyaa shonang Kpanti Laa zinang ya? Nɔ́ngkɔ̀, n kɔɔ nɔɔ, zang nyaa shonang Laa kɔ, ti ɓa zang nyaa shonang Laa ɓi katɔ. 10Wee yɔɔ ɓɔɔ zang bee ruu ɓiɓɛ ka labeenang Laa kɔ. Laa kɔɔyi tɔɔ, ‘N shong zang shonang mɛɛ ditɔ ka tĩng ɓaaɓɛ, wu palɛ mɔɔ gbalang.’
11“N kɔɔ nɔɔ ruu ɓɔɔ niizang kɔ nwani, ka teteng shɔnzang ɓɔɔ zang yiki ka koo keɓe, zang ɓɔɔ ɓa Yɔhana ɓɔɔ palɛ zang batizima kagn kpang. A zang tɔkɔlɔng piti, ka teteng zang ɓɔɔ ri ka nɔng ɓɔɔ Laa roo Kpanti ɓa wu bannang katɔ.” 12Zang yeti shi kpang gaa tɔɔsung Kpanti roonang Laa lasɛnang nɛɛ diki ɓɔɔ Yɔhana ɓɔɔ palɛ zang batizima rang yee Laa ɓɛɛ. Ri ti kãa gbalang ɓɔɔ ri ta ɓɛɛ doo kana kɔ sasak. 13Zang nyaa shonang Laa piti, nɛɛ Labeenang Laa ɓɔɔ Musa beeyi, ri kɔɔ ruu Kpanti roonang Laa sasak, a à nɔng ka bii Yɔhana ɓɔɔ palɛ zang batizima ɓɛɛ. 14Nɔɔ nɛɛ kasɛ ruu keɓe tanang katɔ, Yɔhana kɔ Iliya ɓɔɔ zang kɔɔyi nɛɛ naa a ɓɛɛ. 15Zang ɓɔɔ shoo ɓiɓɛ nɛɛ kagn wu tãayi.
16“N gãsɛ zang koo jaa knti keɓe, ɓu nɛɛ viya? Ri nwang naa wujɛ ɓɔɔ tãa shoo kpang, ɓɔɔ ri nwalɛ ka lumang, ri ɓaa nyaa ka rɛɛ ɓeesang pĩirinang ɓɛɛ nɛɛ, 17‘Rùu jee nɔɔ leere, a nɔɔ sɔ̀ dang kpang. Ruu ti ɓàa nyaavaa nɔɔ ti kaa nyavɔ kpang.’ 18Yɔhana arɛ seng nyaalaa, ɓoo sàa kpang, a zang tɔɔ, ‘Suru shi kpang kagn bii ɓiɓɛ.’ 19Jaa Shɔnzang àrɛ, shaa katɔ, ti ɓoo katɔ. Zang ti kɔɔyi tɔɔ, ‘Nɔɔ zi zang nyɔkɔ keɓe, zang ɓɔɔ ɓoo saa dɔɔli. Wusang zang saka tipi tanang nɛɛ zang ɓɔɔ ri dũng nyaa ɓɔɔ Laa dang kpang kɔ doori ɓɛɛ.’ Zũnang Laa tusu bii ka vuu tɔ̃ɔ ɓɔɔ shɔnzang palɛ ɓɛɛ.”
Naa ɓɔɔ Yeesɔ mangkɛ zang gari ɓɔɔ ri kɔ̃sɔ yeti kpang ɓɛɛ
(Luk 10:13-15)
20A Yeesɔ gaa tɔɔsung zang gari ɓɔɔ wu palɛ shonang ɓɔɔ zang mã naa ka danggn dɔɔli mangkɛnang kati, ka ruu ɓɔɔ, ri kɔ̃sɔ yeti, ri yaa vuu shi kpang ɓarɛ kpang ɓɛɛ. 21“Vuu gn kɔnang kagn yuu manɛ zang gari Korazing nɛɛ Bɛsɛda. Naa vuu bang ɓɔɔ zang zirɛ zang mã naa ka danggn kɔ zang palɛ ka teteng manɛ ɓee, zang nɛɛ palɛ nɔngkɔ ka Taya nɛɛ Sidong, zang ɓarɛ nɛɛ kɔ̃sɔ yeti tɔ, ri nɛɛ yaa vuu shi kpang ɓarɛ tɔ tɛ̃ɛ tɛ̃ɛ. Ri nɛɛ ti hãa sɛ̃ɛ fɔ̃ɔrɔ yeti lasɛnang tɔ. Ri nɛɛ ti tɛ̃ɛ pũngku tɔ ka yuu ɓarɛ, nɛɛ tɔ̀ɔ, zang zi kati nɛɛ ri yaa vuu shi kpang ɓarɛ tɔ ɓɛɛ. 22N kɔ̀ɔ́ nɔɔ, ka diki ɓɔɔ Kpanti Laa naa jɛ̃ɛ zang ruu, gn zang Taya nɛɛ Sidong naa kɔng wu ɓa ɓɔɔ manɛ katɔ. 23A ɓɔɔ manɛ, zang Kafanahu, zang naa tuu nɔɔ ditɔ ka lapa ya? Kpang. Zang naa tasɛ nɔɔ ka yeti waa bang kɔ jong. Zang nɛ̀ɛ́ palɛ vuu bang kɔ zang mã naa ka danggn ɓee, ka Sɔɔdom, zang Sɔɔdom ri nɛɛ doogn diki keɓe. 24N kɔɔ nɔɔ ka diki ɓɔɔ Kpanti Laa naa jɛ̃ɛ zang ruu, gn zang Sɔɔdom naa kɔng wu ɓa ɓɔɔ manɛ katɔ.”
Nɔɔ a ka bii mɛɛ nɔɔ ɔ̃sɔ
(Luk 10:21-22)
25Ka laa kaɓa, Yeesɔ naa risi nyaa gàa Laa tɔɔ, “N zãa mɔɔ tɔ Dada, Kpanti Laa ɓɔɔ mãa lapa nɛɛ tipi ɓɛɛ. Ka ruu ɓɔɔ, mɔɔ wàasɛ̀ zang ɓɔɔ zũng katɔ nɛɛ zang ɓɔɔ ri zi labeenang dɔɔli vuu keɓe, a mɔɔ naa tusu zang ɓɔɔ ri zi vuu kpang kɔ jong ɓɛɛ. 26Nɔngkɔ Dada, mɔɔ pálɛ̀ vuu keɓe, ka ruu ɓɔɔ, mɔɔ kasɛ nɔngkɔ ɓɛɛ.”
27A Yeesɔ naa risi nyaa, kɔɔ ri tɔkn tɔɔ, “Daa mɛɛ, a m vuu piti tɔ ka naa. Zang ɓɔɔ zi m Jaa Laa, kagn gbete kpang, ɓi Daa mɛɛ kɔ gbete. Zang ɓɔɔ ti zi Daa mɛɛ kagn gbete kpang, ɓi nkɔ Jaa ɓiɓɛ n zirɛ, nɛɛ zang ɓɔɔ n kasɛ nɛɛ n tusu ri Daa mɛɛ ɓɛɛ.
28“Nɔɔ a ka bii mɛɛ, zang piti ɓɔɔ dang jĩng, a ti rɛ̃rɛ dɔɔli ɓɛɛ, n á nɔɔ ɔ̃sɔnang katɔ. 29Nɔɔ yaa m ta n tusu nɔɔ vuu ɓɔɔ nɔɔ palɛ ɓɛɛ, nɔɔ mantɛ vuu ka bii mɛɛ, ka ruu ɓɔɔ n tuu yuu kpang N ti lakɛ jĩng kpang ɓɛɛ. Nɔɔ wàlɛ́ ɔ̃sɔnang katɔ. 30Ka ruu vuu ɓɔɔ n tɔɔ nɔ́ɔ palɛ m, kpãa ɓi kpang ɓɛɛ. Vuu ɓɔɔ n tɔɔ nɔ́ɔ ti tuuyi, ti kpiti ɓi kpang ɓɛɛ.”
Dewis Presennol:
Matiyu 11: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust