Zang Shonang Yeesɔ 6
6
Zang manziti ɓɔɔ zang shɛ̃ɛrɛ ri ɓɛɛ
1Ka diki kaɓa, zang ɓɔɔ ri shing danggn ka bii Laa ri shang kana dɔɔli, rɛɛ zang Yahudi ɓɔɔ ri ráng nyaa Heleni ri gɔ̃ɔrɔ yee ka yuu rɛɛ zang Yahudi ka ruu ɓɔɔ, zang nɛ́ɛ bàsɛ́ vuu shaanang diki diki, zang yee laa ka rɛɛ suvɔ ɓarɛ kpang ɓɛɛ. 2A rɛɛ zang shonang Yeesɔ kopi tu ziti keɓe, ri ɓaa nyaa ka rɛɛ zang ɓɔɔ ri mantɛ vuu ka bii ɓarɛ nandon, a ri kɔɔyi tɔɔ, “Daa naa ɓɔɔ ruu yaa Ruu Laa rangkɛnang nɛɛ ruu basɛ vuu shaanang kpàng. 3Ka ruu nɔngkɔ, rɛɛ manzung, nɔɔ shɛ̃ɛrɛ zang manziti ka teteng manɛ ɓɔɔ nɔɔ zi tɔ Suru Laa kagn bii ɓarɛ, a ri ti zũng dɔɔli ɓɛɛ. Rúu shing rikɔ ri gãng jĩng ka vuu shaanang basɛnang. 4Rùu ráa jĩng ɓuru kaa Laa gaanang, nɛɛ Ruu Laa kɔɔrɔnang.”
5Ruu rɛɛ zang kopi tu ziti keɓe, daa zang piti ka yeti. A zang shɛ̃ɛrɛ rɛɛ Istifanu, yɔɔ ɓɔɔ shing danggn ka bii Laa dɔɔli, a Suru Laa ti kagn bii ɓiɓɛ ɓɛɛ, a ɓɔɔ Filibu, nɛɛ Porokoru, nɛɛ Nikana, nɛɛ Timon, nɛɛ Barimina, nɛɛ Nikola yɔɔ tipi Antakiya ɓɔɔ bɛ̀ɛ́ dũng gbalang zang Yahudi ɓɛɛ. Kãntang keɓe dũng kaa Yeesɔ Kirisi. 6Zang atɛ ri ka bii rɛɛ zang shonang Yeesɔ. Rɛɛ zang shonang Yeesɔ ri shĩili ri naa ka yuu, a ri ti gaa ri Laa.
7Ruu Laa ti bàá nɔng ɓi kana. Zang ɓɔɔ ri mantɛ vuu, ri ti shang kana diki diki ka Urushalima. Zang ɓɔɔ ri dɔɔ vuu ka Gãa Laa ɓɔɔ ri shing danggn ka bìí Laa ri shang kana jong diki diki.
Istifanu ka tĩng zang ɓɔɔ ri jɛ̃ɛ zang ruu ɓɛɛ
8Laa pàlɛ̀ Istifanu tɔ̃ɔ dɔɔli, a ti a wu naa vuu palɛnang, ka ruu nɔngkɔ, pálɛ́ vuu bang bang dɔɔli ɓɔɔ zang zirɛ zang mã naa ka danggn ɓɛɛ ka teteng zang. 9A zang ɓɔɔ ri ka gãa zɔɔ kpalɛnang ɓɔɔ zang ɓaa nɛɛ gãa zɔɔ kpalɛnang “Zang ɓɔɔ zang yaa ri naa tɔ”, ɓɔɔ ri ɓarɛ zang Yahudi nɛɛ gari Kiranɛ nɛɛ gari Alezandiriya, a ɓɔɔ nɛɛ tipi Silisiya nɛɛ tipi Asiya ri kasɛ ruu ɓiɓɛ kaa takpang. Zang keɓe ri gaayu nyaa laanang kaa nɛɛ wu. 10Suru Laa á Istifanu zũnang dɔɔli naa ɓɔɔ nɛ́ɛ ràng yee, zang keɓe ri zunung ɓɔɔ ri kasɛ wu nyaa kpang ɓɛɛ. 11Ka ruu nɔngkɔ, ri dɔ̃̀lɔ̀ zang ɓɔɔ nyaa nɛɛ nwĩiri nɛɛ ri kɔɔyi nɛɛ, “Ruu tãayi kɔɔrɔ ruu shi kpang ka yuu Laa, a ti dãlɛ Musa.” 12Ɓɔɔ ri tãa ruu keɓe naa weɓe, yeti zang nɛɛ ɓɔɔ zang bang bang zang Yahudi, nɛɛ zang ɓɔɔ ri tusu zang labeenang Laa ɓɛɛ, lasɛ dɔɔli. Ri arɛ, ri naa yi Istifanu ri daa nɛɛ wu ka bii zang ɓɔɔ ri jɛ̃ɛ zang ruu ɓɛɛ. 13Ri atɛ zang ɓɔɔ nɛɛ ri naa suu sèé ka yuu ɓiɓɛ. Ri kɔ̀ɔyi tɔɔ, “Yɔɔ keɓe kɔɔrɔ ruu shi kpang diki diki ka yuu Gãa Laa, a ɓɔɔ ka yuu nyaa ɓɔɔ Musa dang ɓɛɛ. 14Ruu ti tãayi kɔ̀ɔ́yi nɛɛ Yeesɔ yɔɔ gari Nazara keɓe, jili Gãa Laa keɓe ka tipi, wu ti kɔ̃sɔ vuu daa ɓɔɔ daa ɓuru ri tusu, ɓɔɔ Musa a ri ɓɛɛ.” 15Zang ɓɔɔ ri nwalɛ ri jɛ̃ɛ zang ruu ɓɛɛ, ri shu jĩng ka waa nyaating Istifanu, ri zirɛ waa nyaating ɓiɓɛ nwáng naa waa nyaating zang nyaa shonang Laa ɓɔɔ ka lapa ɓɛɛ.
Dewis Presennol:
Zang Shonang Yeesɔ 6: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust