Zang Shonang Yeesɔ 5
5
Hananiya nɛɛ ɓeeso Safaratu
1Yɔɔ ɓɔɔ kagn zang ɓaa wu nɛɛ Hananiya nɛɛ ɓeeso Safaratu, ri mãlɛ́ tipi ɓarɛ ɓɔɔ kagn. 2Vaa nyaa saka a waasɛ, ɓeeso kasɛ nyaa kagn. A atɛ ɓɔɔ yaa knti, naa a rɛɛ zang shonang Yeesɔ. 3Bituru hɛ̃ɛ wu nɛɛ, “Hananiya, ka ruu vi sheetang ta rɛ̃rɛnang ɓaaɓɛ, mɔɔ sùú Suru Laa sèé, a mɔɔ vaa saka tipi ɓɔɔ mɔɔ mãlɛ́ mɔɔ yiti viya? 4Ɓɔɔ bɛ̀ɛ́ mɔɔ mãlɛ́ gn kpang, wu ɓɔɔ ɓaaɓɛ kpang ya? Ka ɓɔɔ mɔɔ ti mãlɛ́ tɔ, saka piti wu ɓɔɔ ɓaaɓɛ kɔ kpang ya? Ka ruu vi mɔɔ naa mang ka yeti ɓaaɓɛ nɛɛ mɔɔ palɛ vuu keɓe viya? Mɔɔ suu wu shɔnzang sèé kpang, mɔɔ suu ɓaa Laa sèé.” 5Ɓɔɔ Hananiya tãa ruu keɓe naa weɓe, tantɛ watɛnang ka tipi a vɔrɛ. Zang ɓɔɔ ri tãa ruu keɓe piti, ri kaa vɔrɔ dɔɔli. 6Wujɛ jasang ɓɔɔ ri ka nɔng, ri seepaa, ri leng vɔrɔ ɓiɓɛ nɛɛ fɔ̃ɔrɔ, ri nwangsɛ wu ka biling. Ri daa gbãa wu.
7Knti bée tɔ tɔkɔlɔng, ɓeeso arɛ, zi vuu ɓɔɔ palɛ ɓi kpang. 8A Bituru hɛ̃ɛ wu tɔɔ, “Kɔɔ ruu jong, tipi ɓɔɔ nɔɔ mãlɛ́, wee saka bìí kɔ nandon ya?”
Kasɛ wu nyaa tɔɔ, “Nn, saka bìí kɔ nandon.”
9Bituru hɛ̃ɛ wu tɔɔ, “Ka ruu vi nɔɔ mã zɔɔ naa nɛɛ ɓaavɛ nɛɛ nɔɔ gãsɛ Suru Laa viya? Ɓaa shoo mɔɔ tãa doo zang ɓɔɔ ri dàa gbãa ɓaavɛ kɔ, ri a kana nyaa gãa ɓee. Ri tuu mɔɔ ditɔ jong, ri nwangsɛ mɔɔ ka biling.” 10A tantɛ watɛnang ka tĩng Bituru ka nɔngkɔ a vɔrɛ. Wujɛ jasang kaɓa, ri a ka yeti gãa, ri zi wu vɔ tɔ. A ri tuu wu, ri nwangsɛ wu ka biling, ri daa gbãa wu ka kagn ɓeevɛ. 11Zang ɓɔɔ ri dũng Laa nɛɛ zang piti ɓɔɔ ri tãa ruu keɓe ri kaa vɔrɔ dɔɔli.
Rɛɛ zang shonang Yeesɔ ri masɛ zang dɔɔli
12Rɛɛ zang shonang Yeesɔ, ri palɛ vuu ɓɔɔ zang zirɛ zang mã naa ka danggn dɔɔli ka teteng zang. A zang ɓɔɔ ri shíng danggn tɔ ri kpálɛ́ zɔɔ diki diki ka nɔng gbete, ka nɔng ɓɔɔ zang ɓaa nɛɛ Putali Sulemanu ɓɔɔ ka Gãa Laa ɓɛɛ. 13Zang rang yee tɔ̃ɔ ka yuu ɓarɛ, a zang biling ɓɔɔ shɛ̃ɛ teteng ɓarɛ kaa tɔ̀ɔ́ kagn gbete kpang. 14Zang ɓɔɔ ri shing danggn ka bii Laa, ri shangnɛ diki diki. Ri shang dɔɔli zang varɛ nɛɛ zang soro nandon. 15Ka ruu vuu ɓɔɔ rɛɛ zang shonang Yeesɔ ri pálɛ̀, zang dɔɔli ri ãatɛ zang kɔnang ɓarɛ ka nyaa gbalang, ri wɔɔ ri ka yuu latãng nɛɛ siri, ka ruu ɓɔɔ, Bituru nɛɛ tɛɛnang, jasuru ɓiɓɛ kɔ̀ wu ti a ka yuu ɓarɛ shɛ̃ɛning wu másɛ́ ri kati. 16Zang ri alɛ dɔɔli nɛɛ rɛɛ gari ɓɔɔ kiiri Urushalima nyaa ka teteng ɓɛɛ. Ri atɛ zang kɔnang nɛɛ zang ɓɔɔ suru shi kpang ka bii ɓarɛ ɓɛɛ, zang másɛ́ ri nandon.
Zang dàng rɛɛ zang shonang Yeesɔ jĩng
17Kpanti zang ɓɔɔ ri dɔɔ vuu ka Gãa Laa, nɛɛ rɛɛ zang ɓɔɔ ri nɛɛ wu ɓɛɛ nandon, ɓɔɔ ri ɓarɛ zang Saduki ɓɛɛ, ri kaa sũnyaa, a gnvɔ shaa ri dɔɔli. 18Ri yiki rɛɛ zang shonang Yeesɔ, ri loo ri ka sãa. 19Nɛɛ zĩi zang nyaa shonang Laa ɓɔɔ ka lapa arɛ naa puu nyaa sãa, a nwangsɛ ri ka biling. A kɔɔ ri tɔɔ, 20“Nɔɔ daa ka yeti Gãa Laa, nɔɔ daa shii ka nɔngkɔ, nɔɔ kɔɔ zang ruu ɓɔɔ a zang Suru bii ɓɛɛ nandon.” 21Ɓɔɔ ri tãa naa weɓe, ri daa yeti Gãa Laa bɛ̀ɛ́ nɔng gãntɛ tɔ, a ri gáa tɔɔsung ɓɔɔ ri tusu zang vuu ɓɛɛ.
Kpanti zang ɓɔɔ ri dɔɔ vuu ka Gãa Laa, nɛɛ zang ɓɔɔ ri nɛɛ wu, ri ɓaa nyaa ka rɛɛ zang bang bang zang Isirela, nɛɛ zang ɓɔɔ ri jɛ̃ɛ zang ruu ɓɛɛ. Ri shong nyaa nɛɛ zang daa atɛ rɛɛ zang shonang Yeesɔ kaɓa ta nɛɛ sãa. 22Rɛɛ zang ɓɔɔ ri gã Gãa Laa, ri daa ka sãa, ri daa ĩi rɛɛ zang shonang Yeesɔ tɔ̀ɔ́ ka sãa kpang. Ri gbãayu ri daa kɔɔ rɛɛ zang ɓɔɔ jɛ̃ɛ zang ruu ɓɛɛ. 23Ri kɔɔyi tɔɔ, “Ɓɔɔ ruu daa ka sãa, ruu ĩi nyaa gãa kulu katɔ gbatagbata. Zang ɓɔɔ ri gã sãa bii ri shiiri ka nyaa gãa. A ɓɔɔ ruu puu nyaa gãa, ruu ĩi zang ɓɔɔ kaa tɔ̀ɔ́ yeti sãa kpang.” 24Ɓɔɔ kpanti zang ɓɔɔ ri gã Gãa Laa, nɛɛ rɛɛ zang bang bang zang ɓɔɔ ri dɔɔ vuu ka Gãa Laa, ri tãa naa weɓe, ri mã naa ka danggn, ka ruu ɓɔɔ, ri zi naa ɓɔɔ ruu keɓe naa dii nyaa kpang ɓɛɛ. 25A zang ɓɔɔ arɛ naa kɔɔ ri tɔɔ, “Rɛɛ zang ɓɔɔ nɔɔ loo ri ka sãa, ri shiiri ka Gãa Laa, ri tusu zang vuu.” 26A rɛɛ kpanti zang ɓɔɔ ri gã Gãa Laa nɛɛ zang ɓiɓɛ, ri daayi nɛɛ ri daa atɛ ri. Ri atɛ ri wu nɛɛ bàng kpang, ka ruu ɓɔɔ, ri kaa vɔrɔ, zang nɛɛ luku ri nɛɛ tari ɓɛɛ.
27Zang atɛ zang shonang Yeesɔ ka tĩng rɛɛ zang ɓɔɔ ri jɛ̃ɛ zang ruu ɓɛɛ, ri shi ka tĩng ɓarɛ ka nɔngkɔ. A kpanti zang ɓɔɔ ri dɔɔ vuu ka Gãa Laa rang ri yee tɔɔ, 28“Ruu dàng nɔɔ nyaa gbãng gbãng nɛɛ nɔɔ tusu zang vuu tɔ̀ɔ́ nɛɛ nung yɔɔ keɓe kpang. Nɔɔ zi vuu ɓɔɔ nɔɔ palɛ ɓɛɛ ta, nɔɔ baa gari Urushalima tɔ nɛɛ vuu ɓɔɔ nɔɔ tusu ɓɛɛ. Nɔɔ kasɛ nɛɛ zang zirɛ nɛɛ rukɔ nyɔ wu vɔrɔ.”
29Bituru nɛɛ rɛɛ zang shonang Yeesɔ ɓɔɔ nɛɛ wu ri kasɛ wu nyaa tɔɔ, “Ruu ɓáa shoo ɓuru ka nyaa Laa, ɓa ɓɔɔ ruu ɓaa shoo ka nyaa shɔnzang katɔ. 30Làá rɛɛ dáa ɓuru wisi Yeesɔ paa nɛɛ sàa. Yeesɔ ɓɔɔ nɔɔ nyɔ wu vɔrɔ, ka ɓɔɔ nɔɔ ɓaa wu naa ka laa ɓɛɛ. 31Laa a wu bannang, a shing wu ka nakn ɓiɓɛ, nɛɛ wu nwang zang bang, á wu ti nwáng zang ɓɔɔ ta yuu zang ɓɛɛ. Tɔ̀ɔ, Isirela ri walɛ gbalang ɓɔɔ ri kɔ̃sɔ yeti ɓarɛ, zang wu yaa ri gbalang vuu shi kpang ɓarɛ kati. 32Ruu zi vuu keɓe tɔ, nɛɛ jĩng ɓuru, ruu ti kɔɔrɔ zang. Rùu nɛɛ Suru Laa ɓɔɔ Laa a zang ɓɔɔ ri ɓaa shoo ka nyaa ɓiɓɛ ɓɛɛ.”
33Ɓɔɔ rɛɛ zang ɓɔɔ ri jɛ̃ɛ zang ruu, ri tãa ruu keɓe gnvɔ shaa ri dɔɔli, ri kasɛ nɛɛ ri nyɔ rɛɛ zang shonang Yeesɔ keɓe kaa vɔrɔ. 34A zang gbete ka teteng ɓarɛ, yɔɔ Farisi ɓɔɔ zang ɓaa wu nɛɛ Gamaliyel. Yɔɔ keɓe tusu zang nyaa dannang Laa, a zang ti á wu bannang dɔɔli. A shii paa ka teteng ɓarɛ, a kɔɔyi nɛɛ zang nwangsɛ rɛɛ zang shonang Yeesɔ ka biling ka gbongkarɛ. 35A rang rɛɛ zang ɓɔɔ ri jɛ̃ɛ zang ruu ɓɔɔ nimbang yee tɔɔ, “Ɓɔɔ nɔɔ zang Isirela ɓɛɛ, nɔɔ palɛ waasɛ̃, nɛɛ vuu kɔ nɔɔ mangnɛ, nɛɛ nɔɔ palɛ rɛɛ zang keɓe ɓee. 36Diki ɓɔ̀ɔ́gn yɔɔ ɓɔɔ zang ɓaa wu nɛɛ Tuuda nwang nyaa, kɔɔrɔ zang nɛɛ wu ɓi zang bang. Zang ɓɔɔ ri dũng wu, ri daa nung laa maani dakn dɛ̃ɛti katɔ. Zang naa nyɔ wu vɔrɔ a zang tantɛ zang ɓɔɔ ri dũng wu ɓɛɛ, a ri shaarɛ. 37Ka knti ɓiɓɛ, Yahuda yɔɔ tipi Galili nwang nyaa ka diki ɓɔɔ bɛ̀ɛ́ zang gã zang ɓɛɛ, zang dɔɔli ri dũng wu, a ri haa nyaa. Zang ti nyɔ wu vɔrɔ, a zang ɓɔɔ ri dũng wu ri shaarɛ jong. 38N kɔ̀ɔ́ nɔɔ doo nɔngkɔ ka ruu keɓe, nɔ́ɔ palɛ rɛɛ zang keɓe vuu ɓɔɔ kpang. Nɔɔ yáa ri ka nɔngkɔ, vuu kɔ ri palɛ nɛɛ vuu ɓɔɔ ri mang ka yeti ɓarɛ ɓee, nɛɛ ɓɔ̀ɔ́ shɔnzang, shaarɛ ditɔ. 39Nɛɛ à nɛɛ bii Laa, nɔɔ zunung ɓɔɔ nɔɔ zãa ri palɛnang kpang. Naa nɔɔ zãa ri naa nwang ɓi kaa naa nɔɔ gaa nyaa manɛ nɛɛ Laa.” 40Zang ɓɔɔ ri jɛ̃ɛ zang ruu, ri ɓaa shoo ka nyaa Gamaliyel. Ri ɓaa rɛɛ zang shonang Yeesɔ nyaa tɔkn ka yeti gãa. Ri kɔɔ zang nɛɛ zang nyɔ zang shonang Yeesɔ keɓe nɛɛ gbãa. A zang dang ri nyaa, nɛɛ ri rang zang yee tɔ̀ɔ́ nɛɛ nung Yeesɔ kpang. A zang yaa ri, ri daayi. 41Rɛɛ zang shonang Yeesɔ ri yaa nɔng ruu jɛ̃ɛnang ri tãa ɓarɛ tĩnang, nɛɛ Laa zirɛ ri daa naa ɓɔɔ ri dang jĩng ka ruu nung Yeesɔ tɔ. 42Diki, diki ri tusu zang vuu, a ri ti kɔɔrɔ zang Ruu Tɔ̃ɔ Laa ka yeti Gãa Laa nɛɛ yeti gãa zang, nɛɛ Yeesɔ wukɔ Kirisi.
Dewis Presennol:
Zang Shonang Yeesɔ 5: mzmNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Revised edition © 2018 Wycliffe Bible Translators, Inc.and The Nigeria Bible Translation Trust First edition published by © 1994 International Bible Society and The Nigeria Bible Translation Trust