John 3
3
NAKATA 3
Jesusim Nicodemus ukagvigiyaa
1Pharisekut ilangat, ataniuyuk Jewmiuni, atikaktuk Nicodemusmik. 2Tapfuma Jesus pulaaktaa unuktillugu ukautivlugulu, “Rabbi ilihauyyiugavin Godmin ilihimayugut, iliktun inuk alla pilimaiman hapengnaktunik Godim naiyugngitpagu.” 3Jesusim kiuyaa “Ilumun ukautigipkin inuk anikigngitkumi Godim atanguvianik tautugunaituk.” 4Nicodemusim ukallautiyaa, “Inuk kanuk anikigniakka inukuaktillugu? angnami timaanun itekigniakka anikikuvlugu?” 5Jesus kiuyuk “Ilumuktumik ukautigipkin, inuk anikigngitkumi imekun, Anengnikullu Naguyukun Godim atanguvianun tikittunaituk. 6Tamna anihimayuk timikaktumin timauyuk, tamnalunin anihimayuk Anengnimin anengniuyugaluak. 7Kugluktailutin ukautigapkin 'Anikiktukhauyuhi nutaamik'. 8Anugi kuyagingnakhuni pivaktuk anukhivakkanlu nipaa tuhaayan, nakinlunin pimangan naamunlikiak ainiagmangan ilihimangngitpiaktutin. Taimalingnaktuk kinalika anihimagumi Anengnikun Naguyukun.” 9Nicodemusim kiuyaa, “Kanuk piniakka tamna?” 10Jesusim kiuyaa, “Ilvin Israelmiunun ilihauyyiuvin hapkuninga kangekhilimaitkaluaktillutin? 11Ilumun ukautigipkin ilihimayaptingnik ukaktugut, takuyaptingniglu uniuyyiyugut, ukaktavulli ukpengngitagaluahi. 12Ukpegngitkuvin ukautigigapkin nunaum pikutain ilingnun, kanuk ukpegniakkin ukautigigupkin kilaum pikutain? 13Inuit kilangmun maiyukhimaitpiaktun, atauhingnak kihimi, tatpanga atkakhimayuk tamnauyuk, Inum engniga.
14“Mosesim nimegianguak kangataktimagu inuilgulmi, taimatuntauk Inum engniga kangataktitauniaktuk, 15tapfumunga ukpegluaktun inuit inuhengmik nungulaitumik pikakuvlugit tapfumuna. 16Godim nunaum inungit nagugigamigit engniminik tuniyain tapfumunga inuit tamangmik ukpekluaktun inuhengmik nungulaitumik pikakuvlugit tamakhimaitumik. 17Godim engnini tilihimaitaa nunamun uktukuvlugit inuit, inuilli annauyyaukuvlugit kihimi tapfumuna.
18“Inum ukpegigumiuk Jesus ihuigiyaungituk, ukpektaitugli ihuigiyauhimayugaluak ukpegnginami Godim engniktuata atianun. 19Uktuktauyyutikhak imaatun-ituk, kaumanek inungnun tikihimayuk, inuilli taagnek aliagikiyagiyagaluangat kaumangnengmin havaangit ihuitpiangmata. 20Huinekiyun ilaa kaumangnek nagugiyuitpiaktaat kaumaktitauyumangngitkivlutik havaangit tautugnakunagit. 21Inuillunin ilumuktumik havagumik kaumangnengmun piyumayun havaangit tautugnakuvlugit piyaumata Godmin.”
John Baptaiekti uniuyyimiyuk Jesuskun
22Kinguaguntauk Jesus maligutaillu Judeam nunaanungaktun takanani naiyukhutik aahin baptaihivaktuglu. 23Johntauk Aenonmi, Salim hanianiituk baptaiekhiyuk talvani imekangman, inuilli kaivlutik baptaiektauyun, 24John itektauvigmungaktinagu. 25Aahin Johnim maligutaita ilangit, Jewmiutaglu kangutiyun halumautikhanik. 26Tapkualu upakhugu John ukallautiyaat, “Rabbi tamna ilingniitpaktuk Jordam avataani, ukautigihimayan, baptaihilekpangman tamna inuit tamangmik upalektaat.” 27John kiuyuk, “Inuk piyunaituk kilangmin Godim aitugngitpani. 28Ilipfi ilipfingnik tuhaavaktuhi uvamnin ukakhimagama, 'Uvanga Christiungitunga tiliyauhimagaluaktunga tapfuma hivuagun.' 29Uikhak kihimi nuliakhakaktuk, uikham ilanangali hanianiituk tuhaavluni aliatakpiakhuni uikhak ukangman. Taimatuntauk kuviahukpiakaakhunga. 30Tamna ilaa ataniukiyauyukhauyuk uvanga ataniukiyaungitkaluaktillunga.
Kilangmin tikihimayuk
31Tatpanga kilangmin tikihimayuk ataniuyuk tamainun, inuklunin nunamin piyauyuk nunaum pikutaitigun ukainaktuk. Tamnali kilangmin tikihimayuk tamainun ataniuyugaluak. 32Tamna takuyaminik, tuhaayaminiglu uniuyyiyuk, inuilli ukakhimayain tuhaayumangngitpiaktagaluangit. 33Inumli ukauhiit tuhaagumigit naunaektuk God ilumungman. 34Tiliyauyum Godmin Godim ukauhiit ukautigiyain, Godim aitutigimagu Anengnek Naguyuk tapfumunga. 35Godim engnilgum engnini nagugiya tunivlugu tamainik. 36Inuglu engningaanun ukpegumi inuhengmik nungulaitumik pikaktuk, inumli engniga tuhaangitkumiuk inuhengmik nungulaitumik kauyimangngituk Godim ningautigilengmagu.”
Dewis Presennol:
John 3: Sperry
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
©1972 Canadian Bible Society