Mutendeko 10
10
Miwiro ya ŵa ŵana ŵa Nowa
(1 Mid 1.5-23)
1Iyi ndiyo miwiro ya ŵana ŵa Nowa: Shemu, Hamu, na Yafeti. Aŵa ŵatatu nawo ŵakababa ŵana pamanyuma pa chigumura chira.
2Ŵana ŵa Yafeti ŵakaŵa aŵa: Gomere, Magogi, Madayi, Yavani, Tubala, Mesheki na Tirasi. 3Ŵana ŵa Gomere ŵakaŵa aŵa: Ashikenazi, Rifati na Togarima. 4Ŵana ŵa Yavani ŵakaŵa aŵa: Elisha, Tarishishi, Kitimu na Dodanimu. 5Mwa ŵeneaŵa ndimo mukafuma ŵanthu awo ŵakatandazgika mu mphepete mwa nyanja. Ŵeneaŵa ndi ŵana ŵa Yafeti kwakuyana na vyaru vyawo, na chiyowoyero chakhe, na mbumba zawo na mafuko ghawo.
6Ŵana ŵa Hamu ŵakaŵa aŵa: Etiyopiya, Eguputo, Puti na Kanani. 7Ŵana ŵa Etiyopiya ŵakaŵa aŵa: Seba, Havila, Sabuta, Raama na Sabuteka. Ŵana ŵa Raama ŵakaŵa aŵa: Sheba na Dedani. 8Etiyopiya wakababa Nimurodi mweneuyo wakaŵa chinkhara chakudanga pa charu cha pasi. 9Iyo wakaŵa chiŵinda wa nkhongono panthazi pa Fumu. Chifukwa cha ichi kukayowoyeka kuti, “Nga ndi Nimurodi, chiŵinda wa nkhongono panthazi pa Fumu.” 10Pakudanga iyo wakawusa ku misumba iyi: Babuloni, Ereki, Akadi na Kaline. Misumba yose iyi yikaŵa mu charu cha Babuloni. 11Iyo wakafumamo mu charu chira na kuruta ku Asiriya ndipo kwenekura wakazenga msumba wa Nineve, wa Rehoboti Iri, wa Kala, 12na Reseni uwo ukaŵa msumba ukuru pakati pa Nineve na Kala. 13Eguputo wakababa Ludimu, Anamimu, Lehabimu, Nafituhimu, 14Patirusimu, Kasiluhimu (mwa mweneuyo mukafuma ŵaFilisiti) na Kafitorimu.
15Kanani wakababa Sidoni, mwana wakhe wa uŵere, na Heti. 16Kanani wakaŵaso wiskewokuru wa ŵaYebusi, ŵaAmori, ŵaGirigashi, 17ŵaHivi, ŵaAriki, ŵaSini, 18ŵaArivadi, ŵaZemari na ŵaHamati. Pamanyuma mbumba za ŵaKanani zikatandazgira ku malo ghanyakhe. 19Charu cha Kanani chikamba ku msumba wa Sidoni, kurazgira ku dera la msumba wa Gerara, na kuya kafika ku msumba wa Gaza, mpaka ku misumba ya Sodomu, Gomora, Adima na Zeboyimu, ndipo chikaya kafika ku Lasha. 20Ŵeneaŵa ndiwo ŵana ŵa Hamu, kwakuyana na mbumba zawo, viyowoyero vyawo, vyaru vyawo ndiposo na mafuko ghawo.
21Ŵana ŵakababikaso kwa Shemu uyo wakaŵa mukuru wa Yafeti. Shemu ndiyo wiskewokuru wa ŵana wose ŵa Ebere.
22Ŵana ŵa Shemu ŵakaŵa aŵa: Elamu, Ashuru, Aripakishadi, Ludi na Aramu. 23Ŵana ŵa Aramu ŵakaŵa aŵa: Uzi, Hulu, Getere na Mashi. 24Aripakishadi wakababa Shela, ndipo Shela wakababa Ebere. 25Ebere wakababa ŵana ŵanarume ŵaŵiri. Yumoza wakaŵa Pelegi, (pakuti mu mazuŵa ghakhe ŵanthu mu charu ŵakagaŵikana), ndipo munung'una wakhe wakaŵa Yokutani. 26Yokutani wakababa Alimodadi, Shelefu, Hazaramaveti, Yera, 27Hadoramu, Uzala, Dikila, 28Obala, Abimayele, Sheba, 29Ofiri, Havila na Yobabu. Wose aŵa ŵakaŵa ŵana ŵa Yokutani. 30Charu icho ŵakakharangamo chikayambira ku Mesha kurutilira ku Sefara, ku mapiri gha ku mafumiro gha dazi. 31Ŵenaŵa ndiwo ŵana ŵa Shemu kwakuyana na mbumba zawo, viyowoyero vyawo, vyaru vyawo ndiposo na mafuko ghawo.
32Izi ndizo mbumba za ŵana ŵa Nowa, kwakuyana na miwiro yawo, mu mafuko ghawo. Kufuma mwa ŵeneaŵa, mafuko gha ŵanthu ghakatandazgika pa charu, chigumura chikati chamara.
Dewis Presennol:
Mutendeko 10: Tumbuka
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Bible Society of Malawi