Luka 15
15
Baltaku a kwami wu a laiye
(Mat 18:12-14)
1Wuka ki̱di ni̱bu ki̱yiu sangkali̱m n ti ni̱bu ki̱leti̱m a muran beka nwe ya̱m ki̱mu. #15:1-2 Luk 5:29-30. 2Yinu ni̱bu Farisamu n ti ni̱bu yungku yili̱ng Musati̱mu a mwe kungakunga ki̱yidu ko, “Di̱ne wule tani̱n chau chitu n ti ni̱bu ki̱yiu sangkali̱mu n ti ni̱bu ki̱letime?”
3Yinu n Yesu a fwa chimi̱n ki̱ku baltaku ko, 4“Kanodu ka wuka chi̱n ki̱ni kwantiyu kuule, yini wiin a laiye, n ki̱n a ne du yiyu wan-turkubu chiri turkubiyu we nachangu, ka ki̱ladu kani̱n babba wu a laiya? 5Ka a yawenge, ka ngada a ki̱tale, ka ki̱la lo ki̱ni ti̱mi̱lan, 6Ka yika lo. Yinu ka yale fati̱bu ki̱mu n ti bi̱bu chi a kwakan waremu, ka yi chidu ko, ‘Ti̱makai mi̱laku di̱ne n yawe kwami wu a laimiye.’ 7Mi̱n fwa chimi̱nu, ti̱mi̱lantu nabwen we dii, we nii wiin wu a be wo ki̱ti̱me, ka lati̱ bi̱bu a yim Kwamamu wan turkubu chiri turkubi̱mu, bi̱bu a ne bau woki̱ ki̱ti̱mangu.”
Baltaku a ka̱mbi̱r da laiyin
8A yi ko, “Naye ki̱ni ka̱mbi̱r suri kubu, wiin a lai, n ki̱n ka mwa chi yikitu ka fi̱reti̱ lo, kani̱n babbadu yinu ka yadu. 9Ka n ki̱n a yange yinu ka mure fati̱bu, n ti bi̱bu a fi̱lang chiyangi̱mu, ka yi chidu ko, ‘Ti̱makai mi̱laki̱ di̱ne n ya ka̱mbi̱r di̱du a laiyenu.’ 10Mi̱n fwa chimi̱nu, a fi wiine ka kau chi mi̱lake we ni̱bu ti̱tumbi̱ri Kwamamu ka naba ki̱letiye wiin a wo ki̱ti̱m me.”
Baltaku a bwe laiye
11Yinu Yesu a chakakku, “Wuka nii we wu ki̱ni bwesi̱m kwartabu burabu. 12Wu ti̱re a yi te ki̱n ko, ‘Tete, nimi̱n chitu no mwang niyitu we kuteng ki̱ku mang bwadangu.’ Yinu tete a keran chimi̱n kuli kitu.
13“A kuteng ki̱ku, ditiyu bayim mangu, bwe a mur kuli̱n ki̱ni kwang, a du lo, a yika di̱kan bi̱n di̱du kutan we bwako a ya kai ka̱mbi̱ru, a nangi̱n ti̱kusi. 14We kutengu n ki̱n a ri chaku kwa̱li̱n chiin di̱du n ki̱ni ki̱ni̱nu, yinu chun di̱duun a le bi̱nu, n ki̱n a kwalan ka ti̱ti̱le chiye. 15Yinu a ya bau nangang a wuka nii we bi̱n di̱ki̱nu, nabani a tun ki̱n a ba̱la̱ng ka sulti̱ ki̱mi loi, ko a yana todu. 16A bau ka chau chabtu sulti̱ki̱mitu. Aya a ne ni wu a ni ki̱n da ka chadewe.
17“A kuteng ki̱ku ni wu a kuran we ni̱r ki̱nu ko, wule? Ni̱bu nangari Temiyemu ki̱chau chabti̱tu chi ti̱kusi, nang wu ki̱la ka kadu yama bwadu ki̱ni chuna! 18Mang ki̱la bwadi temiye, mang yidu mi, tete, m ma Kwama wu a diye mi̱n ki̱le, m ma mumi̱n ti̱n. 19Mang lwebu mwang yaliyu mwi bwemo. Yo n kau yinang ka̱be mo. 20Yinu a kun a tau ware ki̱ki̱la bwa di̱teki̱ne nangu bwe a fwewengu, te a swir ki̱n, yinu a nwe ki̱bune ko, a kuni ka banang, a ya kwar bwe ko.
21“Bwe a yi ko, tete, m ma Kwama mi̱n ki̱le, m ma mumi̱n ti̱n. Mang lwebu mwang yaliyu mwi bwemo.
22“Aya te a yale ka̱bi kiyu, a yi ko, ti̱ya datu! Ti̱bemiye ki̱ni luke wuyile wu a la chiye ti̱do ki̱mi̱n ti̱do ki̱mi̱nti̱n kene n ti ki̱wamiyu. 23Ti bete ki̱ni tanka wu a kwam yinange ni bidu, ni wudu, ni mi̱la ti̱nu. 24Di̱ne bwemi no a bwa, a ya a kabatuwe, a no a lai, a ya ki̱ka̱ngu ni yatuwe. Yinu n chi a ma ti̱mi̱lantu yinang.
25“We ki̱dang kangu bwe ko wu sele n ti bi̱kam seli̱bu ki̱ki̱ladu a kir. Yo a lame ki̱dwan n ti lo, a nwe ni̱bu ki̱ngau kwa̱ri̱n, ki̱yiu were. 26N ki̱n a yale wuka ka̱be we lo, a bi̱u ko wule ki̱fwedu. 27Ka̱be a yi ko, n bwe chi̱n a ki̱lawe, nang wu n temun a yo ni̱bu a bi tanka wu a kwam yinange, di̱ne ke mo a ki̱lawe lo li̱mang ki̱ri̱m.
28“Bwele wu sele a nwe ki̱fwini yinang, a ko ka le lo, yinu n te ki̱n a chire a be ni bwanu, a wana ki̱n ko a lewe lo. 29Aya n ki̱n a ki̱l teki̱n mi̱n ko, ‘Da̱ng! We swa̱tu ti̱tu, mi̱n mami̱n nangangu nang ka̱be mang kobu chitu mwang ya̱iyu mwi n mami̱nitu mwang lami̱nbu be si mwang nibu ke n yale fati̱bi̱ mi̱mu n ma bwi ware. 30Aya da̱ng bwemo wu a ki̱lawe, a ya chau kuli̱n munu n ti ti̱bani nang wu ki̱la mwang bi ki̱mi̱n tanka wu a ri bwiye.’
31“Te a yi ko, ‘Bwemi, ditiyu ki̱dang mi̱n we ware n ti mun chitu mi̱ni ki̱nitu n ti̱u mun. 32A dakan ni ma ti̱mi̱lan n ti̱ furi mwemwen, di̱ne ke mo a no bwa, ki̱kangu a ki̱lawe lo, a no lai, aya ki̱kangu ni yawe ki̱n.’ ”
Dewis Presennol:
Luka 15: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.