Yowana 3
3
Yesu n ti Nikodimus
1Wuka nii we di̱n ki̱nu n Nikodimu. N ki̱n we tikaketi a kwa̱l ni̱bu Farisamu. N ki̱n wuduwe we Yafuda. 2Nii wa be bwa di̱Yesuwe, ki̱ni ki̱tati̱lang kuma̱ng, a yi ki̱n ko, “Tete, ni̱n yim, m mun naba yungke, wu n Kwama a tume, di̱ne a ne nii ka ma chi ka̱ta̱ki ti̱te we, ka n ke wu, n Kwama we ware ti ki̱ne.”
3Yinu n Yesu, a ke ki̱mi̱n ko, “Bi̱yili̱m mi̱n fwami̱nu, nii a ne we ki̱ni dukan di̱du ka le ya Kwamanu, ka n ke ka ya bi̱be wu robe.”
4N Nikodimu a bi̱u ko, “Ka bi̱u nii wa ka̱ra̱ne yire?”
5N Yesu a ke ki̱mi̱n ko, “Bi̱yili̱m mi̱n fwa chimi̱nu, ka a bi̱bu nii, a mwe ti Fi̱ki̱me, a ne ya dukanu ka le ya Kwamanu. 6Aya nii ki̱bi̱u nii, Fi̱ki̱m ki̱bi̱u Fi̱ki̱m.”
7Ka̱ta̱duwe mwi widu n yi mi, a mwintuwe ta ya bi̱be wu robe. 8Ki̱fi̱be ki̱sudu, ki̱ya bwanu n ki̱n a ku diye, mun nwe diru, mun kudu yinang ka ki̱yingle chitangu, aya niyang yimbu bwa ki̱chir mi̱nede n ti bwa ki̱yaande. A ti we nii wa bi̱u a Fi̱ki̱me.
9Nikodimu a bi̱u Yesu ko, “Ti̱tu ka fwedi yire?”
10Yinu n Yesu a yi ko, “Mun naba yungke wuduwe we a ti̱m Yisrelamu, a mayire mwang swaanbu ki̱chitu wuwe?” 11Bi̱yili̱m mi̱n fwa mi̱nu, ni̱n fwa chitu nang yimi, ni̱n mwa chitu nang kui, aya a mwintuwe ta yibu di̱mwar ni̱nu. 12Mi̱n fwa chimi̱n ya̱mu, we chi a ti̱ti̱niye, ta kebu bi̱yili̱mu, ta ke bi̱yili̱mi yire, ka n fwa chimi̱n chi a bwadite?
13A ne ni a fili̱n bwadiye we, ka n ke Bwe Niye. N ki̱n n ki̱kun wa be we bwako. 14Tiyangu m Musa a kukku so ki̱ni ki̱tiyang we di̱chilanchangi̱n, a mwintuwe ni̱bu ka kuku Bwe Nii. #3:14 Kik 21:9. 15Ke ka nang wuwule niye, wu ki̱ke bi̱yili̱mu a di̱ki̱ne, a ya ti̱kuri ki̱diya kwaditu.
16N Kwama a mwan, a mi̱la ti̱ti̱nitu, a ni Bwe Ni̱re ko, ko ke nii a ke bi̱yili̱m a di̱ki̱ne, aya ti̱kuri ki̱diya kwaditu, a twiyaduwe. 17N Kwama a tumebu Bweko ko ke a mwata ti̱ti̱nitu mi̱n ya̱m, aya ko ke ti̱ti̱nitu, a ya yuku a di̱ki̱ne. 18A ne mwataku we bi̱bu a tu a ke ki̱ni̱mu, aya bi̱bu a ko ki̱ni̱mu, ka ya mwataku, di̱ne n chi a kebu bi̱yili̱mu, we Bwe Kwama n ki̱kune. 19Ya̱ma mwatana fi. Yiiki̱ku a be ti̱ti̱nitu, ni̱bu a ki̱la mi̱la ki̱liye, a la chi, di̱ne nangi̱n chitu ti̱bwilai.
20N chi a ko yiiki̱ku, ko ke chi chakakku ki̱ni ki̱leti we ki̱liye. Di̱ne taye, n chi a kwati̱bu we yiiki̱ku, ko ke chi kwaladuwe. 21Aya nii wu ki̱tum bi̱yili̱me, a wulbu chi, ki̱ya fi a yiike ko ke ni̱bu a ku nangi̱n ti̱yili kitu n ki̱n ki̱maditu, a yim ko n ki̱n ki̱bunti̱ chi Kwama ki̱badde.
N Yesu ti Yowana wu ki̱ma Batisma
22A kute ki̱ku n Yesu ti miyari̱m ki̱mu, a du Wurchalima a yika bale Yafudiya. A da diti we bwako, ki̱ma batisma. 23We ki̱swi wuko, n Yowana ki̱ma batisma a Yinon wa kwati̱na Sali̱me. Mwe we nabwen, ni̱bu ki̱ti̱kedi kutukutu, we a di̱ki̱ne yaki̱ ma batisma. 24Ki̱chitu a fwe, yo n Yowana a tibu le di̱bi̱nti̱le. #3:24 Mat 14:3; Mar 6:17. 25Wuka naba ni̱bu Yafudiya#3:25 Wuka naba ni̱bu Yafudam: Yikayu tatti̱ki̱dai a mwal ko bi̱kam ni̱bu Yafudam. a le ki̱ tuka ya̱mu, a da ruki̱mu n ti miyari̱m Yowanamu. 26Miyari̱m Yowanamu, a be, a yi ki̱n ko, “Tete, nii wu, a no ti̱n ware, a ki̱ti̱ku la wurdune, wu mwang ma di̱mwar a dur ki̱ne, ki̱ma batisma we bwa, ni̱bu kwang ki̱ki̱la bwa a di̱ki̱ne.”
27N Yowana a yi chi ko, “N kawure ki̱ma kana chi n Kwama a tum ki̱ne ko a be maatu. 28A mang tu, mang fwa chimi̱n mi, m mi̱n n ke Masiya aya n Kwama a ke ma tiye kakku.” #3:28 Yow 1:20. 29We ti̱kali ki̱naitu, fwa̱nu n di̱u bwele ki̱yiu naye. Fate bwele ki̱yiu naye a mabu kana chi bwele ki̱yiu naye kiyi ki̱nitu. N fate ki̱n ki̱nwe ta̱ma̱ng, ka ya̱m bwelemu ki̱chirede, fur ki̱ni mwe di̱ne yiko. 30A mwintuwe, n ki̱n ka ya ri̱keku, yinu m mi̱n ma ya ki̱taku.
N ki̱n wu a be a diye
31N ki̱n a be a dii, n ki̱n a la ka nang wuwule niye. Bi̱bu a chire a ti̱ti̱nimu m bi̱u ti̱ti̱ni, ya̱mi chiyu yiya ti̱ti̱ni. Wu a be, a bwadiye a la ka nang wuwule niye. 32Ki̱kumang, ki̱fwa chi n ki̱n a kuwe n ti chi n ki̱n a nwe. A mwintuwe, a ne ni a ke di̱mwar ki̱ne we. 33Aya ka nang wuwule niye, wa yiu di̱mwal ki̱ne, a tau kwari̱lle ko, n Kwama naba bi̱yili̱me. 34Nangki̱n wu n Kwama a tume, ki̱fwa ya̱m Kwama mu, di̱ne n Kwama a ri ki̱n ki̱ni Fi̱ki̱m. 35N Kwama a mi̱la Bwe ko, a du chiti kwang a fa̱la̱ng kang.#3:35 Mat 11:27; Luk 10:22. 36Kanang wuwule niye wu ki̱ke bi̱yili̱m we Bwe we ki̱ya ti̱kuri ki̱diya kwadi ti̱tu a ne ridii, aya wa ko Bwe we, a ne ya ti̱kuri ti̱tu, ka wuran bwi ki̱ni kana ki̱fwini Kwama, a dur ki̱n.
Dewis Presennol:
Yowana 3: Tula
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015, The Nigeria Bible Translation Trust and Wycliffe Bible Translators, Inc. All rights reserved.