Luka 20
20
Puku ki Yesu
(Matai 21.23-27; Maruku 11.27-33)
1Yakai saka minakavalane, ku Yesu la ikai ki daane ki Twaumase si bulrubulru ki laumawmase, pelaelaela ku hukuingi. La ikai ku marudrange ki labarakalai, si latarabulrubulru ki Sisiu, si lamarudrange ki cekele wakela kikawriva iniane, 2si kivaga iniane iya kai, “Kusu pangwakaisu ku puku ki manemane si pia kilakikai? Aneane ku wabaai muswane kikai puku? Ala pelaela naiane!”
3Ku Yesu la tubalre liniane, “Ala nau paswalana kivaga numiane ku niakuvaalane, la pelaelaili, 4ku sapabanavane ki Yuhani ku puku twalai ki Twaumase twalai ki umawmase?”
5Kwini lalasu la pathagilinga makitu madrikidrikisi ku vaga, si iya kai, “Lri tumanaiyata tubalre? Alaiyasi iyata kai, ‘Twalai ki Twaumase’ iya, ka lasu lri iya kai, ‘Ala kikai, lanu kai kipawtenga ki Yuhani?’ 6Alaiyasi iyata kai, ‘Twalai ki umawmase’ iya, kai mapapangale lri malra ku lrenege si cabiri mitane, asi lwiyane kai lalasu makitwa kasalru ki Yuhani ala ka yuginsia.” 7Ala kamani Kwini lalasu tubalre iya kai, “Kai nai wathingale luka twalai inu kela.”
8Ku Yesu la iya kai liniane, “Lukamiyaiya kai, lri kainaku pelaela numiane, luka satalwaku ki puku ki manemane pia kilakikai.”
Pathalrilriku patharukai ki mangangace ka kiasalru ku umawma
(Matai 21.33-46; Maruku 12.1-12)
9La pacungulu, ku Yesu pelaela liniane ku vaeva ku pathalrilriku, “Yakai ku tangea ku umawmase twaumawma ku taluvale tubabudwane, la malra pakisalru ki tarakawaungu, si katwase mubabadhane mwa adaili, ku taibabadhanane ikai kwidra ki minakapialane ka vai. 10Sadarurunga ki kalakibudwane, la sikawlu ki tangea ka sasiakawlu pamwa kwini ki kiasalru ki umawma malra ku naika amalrane ku drulruini ku paisu. Ai kwini lalasu la pwa lrumai kwini ki sasiakawlu, si pasiwlri papaliwnawnai inane. 11Kwini piumawmane la sikawlunga ku tangea ka sasiakawlu pamwa; kwini lalasu la tuthadalrane lrumai iniane, si tusinalrelreme iniane, si pasiwlri papaliwnawnai iniane. 12Sa saka kingitulrulu kwini tawki ki babudwane la sikaaulunga ku tangea ku sasiakawlu pamwa; kwini kiasalrwalru ku umawma la lrumainga pakadula iniane, si lrudrulu iniane pulatadre ki babudwane. 13Kwini tawki ki babudwane la iya kai, ‘Lai lri pangitumanai naku? Ala nau sikawlu kai ki kathalraili ka lalakeli pamwa, kwini lalasu alau lri usaakene iniane.’ 14Ai ku latarakawaungu sadrele kwini ki lalake ki tawki ki umawma, la mapeaelaela iya kai, ‘Kikai umawmase amani ku lri mucungulu kai ki tawki ki umawma; tapapacai iniane, kikai lrika aucungulaneini lani ka mitane!’ 15Ngwalai kikai, kwini lalasu la lrudrulu ki lasu pulatadre ki babudwane, si papacai iniane.
“Luka miyaiyakai, kwini tawki ki babudwane la lri pangitumane kwini ki latarakawaungu? 16Kwini lasu lri tara keela papacai liniane, si malra kwini babudwane pakisalru ki palrapalra.”
Kwini laumawmase sakilalranga kikai lavaga, amia kai makanaelre, “Madha paka ikaikai ku ngimiyaiya kikai!”
17Ku Yesu la drele liniane, si kivaga iya kai, “Kai Sisiu amia kai:
Kudra cilri ki taratudadaane ka lrenege,
amaanilringa kudra makuciaciingalrenga ka karwalai.
Manemane ku pacugane kikai vaga? 18Sana ka aneanenga ku mwacilri makakai kwini ki lrenege, lri tara kababurau ku kinawmasane ki aneanenga; kwi lrenege ku tamucilriane makakai ki aneanenga, lri mialri kipakababurau ku aneanenga.”
Patharwakai ki abaadhane ku kazilu ki tinuhika ki swa Ruma
(Matai 22.15-22; Maruku 12.13-17)
19Kudra latarabulrubulru ki Sisiu si lamarudrange ki barakalai wathingale ku pathalrilriku ki Yesu aka amiamia liniane kawriva, la kisanu yasasaane pwalra ki Yesu ikai kwini; ai mwakuludru ki mapapangale, 20la iceelrebeana mukalavalava ku lrika ataesadhane iniane. Kai lalasu wabaai ku paisu ki tapia ka umawmase, la ngikathaithaitharirane kivavaga ki Yesu, kisanu taesaesai ku tapasalrivane ku vaga ki Yesu. Pakai ku apwalrane si pukunkwane pakipathavungu. 21Kikai la seasepai amia kai ki Yesu, “Sinsi, wathingale nai kikai pelaelaelasu bulrubulru mamamwa ki kakudhane, la thingale nai ka kaisu wadrele ku taka umawmasane, tara pangiamiasu ku vaga ki Twaumase si bulru ki umawmase. 22Ala pelaela naiane, lu kazilwane baai ki tinuhika ki swa Ruma kaika wabaebalreaini ki hulriceta?”
23Ku Yesu wathingale kwini salrilrigilane lini, la iya kai liniane, 24“Malra ku vaeva ku gingi ka paisu padrele nakwane! Kikai belenge kai lringau si nagane aneanane?”
La tubalre kwini lalasu, “Tinuhika ki swa Ruma” iya.
25Ku Yesu la iya kai liniane, “Luka miyaiya kikai, ku tinuhika ki swa Rumane baadha ki tinuhika ki swa Ruma, ku Twaumasane baadha ki Twaumase.”
26Kwini lalasu la kai maka icucubungu ki mapapangale kidringai ku atakaiyane lini ku takawrivane ki Yesu; kwini lalasu la kasamaali turamuru ku tatubalreane ki Yesu, la makitu nguvagane makanaelre.
Patharukai ki siaelane
(Matai 22.23-33; Maruku 12.18-27)
27Yakai kudra la kai kiapawtenga aka yakai ku siaela panianiake twalai ki wapacai ka la swa Sadukise, wakela kikawriva ki Yesu, si kivaga iniane, 28“Sinsi, ku Musi pasiakai mitane tukakudhane, ‘Alaiyasi ikai ku tangea ku wapacai, la suru ki labaibaini, la kai tulalake, kwini agini lri tara malra sitaelrelre kwini ki walibakane ka sakadaneini, si pasikai ki takaini tulalake ku lri ucungulu.’ 29Kunadruma yakai ku tapitu ku lamatakataka ka sawvalai: Ku takataakanga la karudrange, la kai tulalake si pacai. 30Kudra mwasaka drusa la sitaelrelre kwini ki walibakane ka sakadane, 31sakabilrilanenga ku mwasaka tulru la mialri sitaelrelre iniane, pakela ki mwasaka pitu wamwa sitaelrelre iniane makanaelre, la kakadrua ku lalake makanaelre, la pacai. 32Sakabilrilanenga, kwini ababai la pacai. 33Nai kivaga, ikai ki tasielane ka vai, kwini alisu lrika labaibai ki saneaneane? Asi lwiyane kwini tapitu ka lamatakataka marudrangenga mwa iniane makanaelre.”
34Ku Yesu la tubalre liniane iya kai, “Kai kawmasane kai sawvalai si ababai marudrarudrange; 35ai kudra kiapasudalepe twalai ki wapacai si siela panianiake, si panianiake ikai ki mwabalrithi ka kawmasane ku umawmase, kai lri karudrangenga kai lri kitharevenga. 36Kwini lalasu lri mararaamau ki sasiakawlu belenge ka kai lri pacainga. Kwi lalasu amani ku lalalakenga ki Twaumase, asi lwiyane kwini lalasu twalainga ki wapacai si siela panianiake. 37Ku Musi patwathingalenga ala ka yakai ku wapacai si la siela panianiake, yakai ku tamatikaiyaneini ikai ki kwadaladalai ka cecenekane ka angatu ka abubulru: Ku Tamatama amani ku ‘Twaumase ki Aberahame, Twaumase ki Isake, Twaumase ki Yakubu.’ 38Ku pacugane amia kai, ku Twaumase yai Twaumase ki panianiake ka umawmase, kaika Twaumase ki wapacai ka umawmase. Asi lwiyane ikai ki tadrelane ki Twaumase, kai umawmase panianianiiake makanaelre.”
39Yakai kudra la tarabulrubulru ki Sisiu ku amia kai, “Sinsi, mathariri turamuru kai taiyanesu!” 40Twalainga kai, kwini lalasu kai maka wathurunga kivavaga ki Yesu ku mundai.
Patharwakai ki Kirisitu
(Matai 22.41-46; Maruku 12.35-37)
41Ai ku Yesu la iya kai liniane, “Kai umawmase ani dulru ku Kirisitu mwabaibalrithi ki Davidi iya? 42Kai Davidi ikai ki Lasenai amia kai:
Ku Tamatama amia kai ki Tamatamali:
Kusu nenea ikai ki tali vanaleli,
43pakeela kudra ki lrika apamalebeaneli ki badhasu pitailebe ki drapalesu.
44Ku Davidi kudra ‘Tamatama’ amianga iniane, ku Kirisitu ani kirimwaini ka mwabaibalrithi ki Davidi?”
Ku Yesu maelaelathe ki tarabulrubulru ki Sisiu
(Matai 23.1-36; Maruku 12.38-40)
45Kudra laumawmase sa kilalalalra, ku Yesu la iya kai ki lasituini, 46“Kipapawlringava telenge kudra ki tarabulrubulru ki Sisiu. Kwi lalasu madalame silaimai ku walrapeapele ku laimai si pasiavavava ikai kadalranane cekele, la murikai ku akisukubane ki umawmase ikai rarubwane ki swa Yuda, la murikai ku nipawkalrivilane ka taneneane ikai ki rarubwane ki swa Yuda si nikiwsaesakenanenga ku taneneane ki tangiakanekaneanane. 47Kwi lalasu la ravase ku tacekecekelane ki walibakane ka ababai, la pasiavava tuelrelrelrenge inulri. Kwi lalasu lri tara tarumaara ku matiangeange ku sapathavungane!”
Dewis Presennol:
Luka 20: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017