Yuhani 2
2
Pangiakaneane ku marudrarudrange ikai Kana
1Saka samaka tulrulu ka vai, ikai Galrilri ka cekele Kana yakai ku pakarudrarudrange. La ikai kwini ku tina ki Yesu, 2la kidawlu ku Yesu si kudra lasituini kipaelre ki marudrarudrange ku angiakaneanane. 3Sa elemenga ungulu ku bava, ku tina ki Yesu la pelaela iniane, “Kadrwanga ku bava ki lalasu.”
4Ku Yesu la iya kai, “Ina, madha vuthavutha pia ku manemane iya nakwane, kaiyana wakela ku vaili.”
5Ai ku tina ki Yesu peaelaela ki sasiakawlu, “Kudra pia kwini iyaini numiane, singikaiya ku vagaini pia.”
6Ikai kwini yakai ku eneme ka dilrungu, ka sarakaikaiyane ki swa Yuda tulrisi ki angibabulane, ku vaeva ka dilrungu lrika aku idai ka kunsenge ku acilai. 7Ku Yesu la iya kai ki sasiakawlu, “Pasaela pwa ku acilai pasuete ki dilrungu”. Kwini lalasu la pasaela ku acilai pwa ki dilrungu, pakela ki ngaanga. 8Ku Yesu la iyana kai, “Kai lri katumane lu vawnga numi kikai, si baai ki marasiakaikai ki ngiakanekaneane.” Kwi lalasu la katwase satedre. 9Kwini marasiakaikai ki ngiakanekaneane la palalava kwini nipaabavane ka acilai, kai wathingale ku tatwaladhane kikai bava (ai, kudra sasiakawlu ka amani ku wavau wathingale), ngwalai kai, si dawlu ki marudrarudrange ka sawvalai, 10la iya kai iniane, “Kai palrapalra paswala paungulu ku mathariri ku bava, lu tukelretenga ungulu ku badhabadha la putaluvaivai ku langubabava, la baalrelringasu paabilrili kai mathariri ka bava!”
11Amani kai ku aswalalanga ku pia ki Yesu ku pinangu Twaumasane ka puku, ikai Galrilri ka cekele Kana. Kikai paathingalanenga ku lriguini, ku lasituini masalru iniane makanaelre.
12Sangilribatenga kikai, ku Yesu la karedele ki tinaini, agini si lasituini mwa ka Kaperenawme, si ikai kwini makapiyale.
Ku Yesu wabula ki daane ki Twaumase
(Matai 21.12-13; Maruku 11.15-17; Luka 19.45-46)
13Lri padaalrunga si kainganai ku Takilragavane ka lrisi ki swa Yuda, ku Yesu la katwase udradha mwa Yerusalrime. 14Sa ikai kalatadrane ki daane ki Twaumase, la drele ku la kialangalangai ku lwange, kiu, tavagu, la ikaiyana ku wanene balribalrithi ku lapaisu. 15La malra ku calrisi si tusalrumalrumadhane, la sisau ki lwange si kiu patwalai ki daane ki Twaumase, si kadrulu ku cukwi ki tarabalribalrithi ku lapaisu, ku lapaisu la ngisarade icakena. 16La iyana kai ki kialangalangai ku tavagu, “Salria kilakikai lamanemane katwase, madha tutakilangalangadhane kai daane ki Ama!” 17Ku lasituini la ngulringau ku vaga ikai ki Sisiu, “Twaumase, maculu kai kidremedremeli papia ki daanesu, mia ki apwi ka kwadaladalai!”
18Kudra lamabelenge ki swa Yuda la kivaga iniane, “Lri dulrusu padrele ku manemane ku pinangu Twaumasane ka puku naiane, si tusapelaelane ka yakai ku pukusu pia kilakikai?”
19La iya ku Yesu, “Waburuku numi kai daane ki Twaumase, kai ki minaka tutulrulane, lri tupelaku tudaane.”
20Kwini lalasu la iya kai, “Kikai daane ki Twaumase nitara 46 ka caili ala maka tudaane, lri dulrusu ikai ki minaka tutulrulane ka vai si tupela tudaane?”
21Ku patengatengane, daane ki Twaumase ku taiyane ki Yesu amani ki kinawmasaneini. 22Ku Yesu sa twalai ki wapacai si sielanga, ku lasituini ngwalringau ku nataiyaneini kikai vaga, la kasalru ku taiyane ki Sisiu si Yesu.
Ku Yesu wathingale ku kidremedreme ki umawmase
23Ku Yesu sa ikai Yerusalrime kipaelre ki Takilragavane ka lrisi, takaalra ku umawmase ku wadrele ku tapianeini ku pinangu Twaumasane ka puku, la kasalru iniane. 24Ai ku Yesu kai maka masalru liniane, asi lwiyane wathingale liniane turamuru. 25Kai mwarikai ki umawmase ku apelaelane iniane ku ngwakai ki takaumawmasane, asi lwiyane wathingale turamuru ki kidremedreme ki umawmase.
Dewis Presennol:
Yuhani 2: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017