Tabekacane 14
14
Ku Aberame palribulu ki Lute
1Ku talialalai ki swa Babilunia ka Amerapele, talialalai ki swa Ilrasare ka Ariuke, talialalai ki swa Ilame ka Kedulaumere si talialalai ki swa Guime ka Tidale kikai tasupate ka talialalai wamwa maelrelre, 2si makaruruburu kikai ki talrima ka talialalai ki swa Sudume ka Bira, talialalai ki swa Gumura ka Biresa, talialalai ki swa Adema ka Sinabe, talialalai ki swa Semebere ka Zebuime si talialalai ka swa Bila (lasi Zuare ka talialalai) 3Kikai talrima ka talialalai ku kwapingi lini yakai kwini vaalru Sidime madredresenge; kwini Sidime kaiasasanenga amani kikai sia Titimwane ka laveke. 4Kai lalasu nakiarathudu ki talialalai ka Kedulaumere tara 12 ka caili, ai saka tara 13 ka caili, kwi lalasu wabaebalre iniane. 5Saka tara 14 ka caili, ku talialalai ka Kedulaumere si kwini maelrelre lini ka druma ka talialalai la mailuku ki kwapingi, ikai Aseteruthe Karenaime pamalebe ki swa Ripaime, ikai Hame pamalebe ki swa Zuzime, ikai dratane Kiriathaime pamalebe ki swa Imime, 6ikai tali lregelrege Idume pamalebe ki swa Huri, saladha liniane padaruru ka babiabila calragulragu ka Ile Parane. 7La pacungulu, kwini lalasu la siwlri madredresenge mwa ka Kadise (sakamaniana kwini sia Inemisepate), la malranga drikisi palraelre kwini ki kadaengane ki swa Amaleke, pamalebe ki yakai kwini Hazazunge Tamare ka swa Amuri.
8Ku kwapingi ki talialalai ki swa Sudume, talialalai ki swa Gumura, talialalai ki swa Adema, talialalai ki swa Zebuime, si talialalai ki swa Bila madredresenge ikai Sidime vaalru, 9lri makaruruburu ki talialalai ki swa Ilame, talialalai ki swa Guime, talialalai ki swa Babilunia, talialalai ki swa Ilrasare; kwini talrima ka talialalai si tasupate ka talialalai la makaruruburu. 10Kwini valrwalru Sidime yadrepele ka kurutange ka lalrubange. Sa mubere ku talialalai ki swa Sudume si swa Gumura la mulrubangane; kwini drumane ka tatulru ka talialalai la mubere papia tali lregelrege. 11Kwini tasupate ka talialalai la malra ribici ku lamanemane si lataleke paelre ki swa Sudume si swa Gumura. 12Sakamani kwidra ku lalake ki betakane ki Aberame ka Lute yakai Sudume; kwini lalasu la mialri malra ravase iniane, si ribici iluku ku tacekecekelaneini.
13Yakai kwidra tangea ku mwabere si kela ki swa Hiburu ka Aberame pelaela kikai patuelre. Sakamani kwidra ku Aberame yakai ki swa Amuri ka Mamere deethe ki tharialupu ka angatu. Kwini Mamere si betakaneini ka Isekule si Anere talragi ki Aberame makanaelre. 14Ku Aberame sa kilalra ka kiaravase ku Lute ka lalake ki betakaneini, la sarubu kwidra ki sawvalai si tamagarange ki wacekecekeleini ku ta 318, si katwase mwa saladha kwini ki tasupate ka talialalai, padaruru kavai Dange. 15Kwi lasu la ikai kwini patukwakudha kwini ki lakwapingi, si takamaungane mwa kikaruburu, la pamalebe ki badha kwi lasu. La pacungulu saladha ki badha, padaruru kavai tali dradha ki swa Damasekuse ka Huba, 16malra sawlri kwini nikiribicane patuelre, la palribulwana ki Lute ka lalake ki betakaneini si kudra lamanemaneini patuelre, lalabaibai si kudra kiaravase ku laumawmase.
Ku Milikizidike swabulrubulru ki Aberame
17Ku Aberame sa maka pamalebenga ki Kedulaumere si kudra langiaelre iniane ku latalialalai sa kainganainga siwlri mucekele, ku talialalai ki swa Sudume wakela ka vaalru Save (laka sia valrwalru ki talialalai) kidredresenge iniane. 18Kudra barakalai ki Abebeelengenga ka Twaumase ka talialalai ki swa Salrime ka Milikizidike la mailuku ku pange si bava kela kidredresenge ki Aberame, 19la subulrubulru iniane iya kai, “Ku Abebeelengenga ka Twaumase, kaamani ku wabekace belenge si kawmasane ani subulrubulru ki Aberame! 20Kudra amani ka paralubu si pamalebe ki badhasu ka Abebeelengenga ka Twaumase ani kidrengedrengere!” Ku Aberame la malra patwalai ki ravaseini ku lamanemane ngutaingeane ki taimangealane si baai ki Milikizidike.
21Ku talialalai ki swa Sudume la papia ki Aberame iya kai, “Kikai niravasane kai lamanemane lrika muswane patuelre! Ai kwini laumawmase sawlriaili patuelre!”
22Ku Aberame la tubalre, “Lri papiaku ki Tamatama ka Abebeelengenga ka Twaumase, ka amani ka wabekace belenge si kawmasane si kiketekete, 23kainaku lri malra ku lamanemanesu lutuumane, adravane ka vaeva ku valrai, ka vaeva ka sawculrungane ki kece kainaku lri malra, amani lukabibilrilinga lri iyasu kai, ‘Amaniaku ka pakaesai ki Aberame!’ 24Ku arakainga ki latwapapalra nakwane maru baaisu, kudra drumanenga kainaku lri malra. Ai kikai latalragili ka Anere, Isekule si Mamere ku naika amalrane lini, valaa liniane.”
Dewis Presennol:
Tabekacane 14: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017