Tabekacane 11
11
Cakare Babilunia
1Sakapathagilane kai kawmasane taingeangeane ku vaga, kai laumawmase arakaikai ku taingeangeane ku vaga. 2Kai lalasu sa ikai tali talrawane acaicaicali wakela kwini dratane Babilunia, ikai kwini sutelrai cekecekele. 3Kwini lalasu madrekadrekase, “Bwala! Tatulringiga, malra lama tukawlukulu kwini lringiga.” Kwini lalasu la kirimu pathagili arakai kwini lringiga raedre, la arakai ku kurutange raedre ki lringiga. 4Kwini lalasu la iya kai, “Bwala, tapia ku vaeva ka cekele, ikai ki cekele lri ikai ku abeelenge ku cakare, ku abelengane lri daruru ki ememe subelebelenge, la tapakithingale kai lanaganeta, amani lu kipasivagavagaita sarau mwa kiinunga kai kawmasane.”
5Sapia kwini, ala kela ku Tamatama mulebe, lri drele kikai ki laumawmase ku piyaiya lini ku cekele si abebelenge ka cakare. 6La iya kai, “Kai lalasu maelrelre kavaevanga ka minzuku, la iya ku taingeangeane ku vaga; kikai yai pathagithagiliana, lu bibilrilinga kai lalasu lri singikaainga ku nau pia iya lini. 7Bwala! Ta mulebe pakalrithavulu ki vaga lini, lani kai maka mathingathingale lu makawrivariva kai lalasu.” 8Ku Tamatama la malra liniane pasivagavagai pasarau mwa kiinunga kai kawmasane; kai lalasu la isaadranga ku kauawngu lini tucekele. 9Lakamani kikai cekele ku kipasi cakare Babilunia; asi lwiyane ku Tamatama yakai kwini pakalrithavulu ku vaga ki laumawmase, si pasivagavagai pasarau liniane mwa kiinunga kai kawmasane.
Mwabaibalrithi ki Seme
(1 Lacaili 1.24-27)
10Kikai lebe amani ku mwabaibalrithi ki Seme. Sa taradrusanga ka caili ku tangilribatane ki telebe, sa taraidai ku caili ki Seme twalalake ki Arepakesade. 11La panianiakeana tara 500 ka caili, si tulalalaalakeana.
12Ku Arepakesade satara 35 ku cailini twalalake ki Sela, 13la panianiakeana tara 403 ka caili, si tulalalaalakeana.
14Ku Sela sa taramatulrulu ku cailini twalalake ki Ibere, 15la panianiakeana tara 403 ka caili, si tulalalaalakeana.
16Ku Ibere satara 34 ku cailini twalalake ki Pelege, 17la panianiakeana tara 430 ka caili, si tulalalaalakeana.
18Ku Pelege sa taramatulrulu ku cailini twalalake ki Reu; 19la panianiakeana tara 209 ka caili, si tulalalaalakeana.
20Ku Reu satara 32 ku cailini twalalake ki Seruge, 21la panianiakeana tara 207 ka caili, si tulalalaalakeana.
22Ku Seruge sa taramatulrulu ku cailini twalalake ki Nahure, 23la panianiakeana tara 200 ka caili, si tulalalaalakeana.
24Ku Nahure satara 29 ku cailini twalalake ki Tera, 25la panianiakeana tara 119 ka caili, si tulalalaalakeana.
26Ku Tera sa icengecenge taramapitulu ku cailini, twalalakeenga ki Aberame, Nahure si Harange.
Mwabaibalrithi ki Tera
27Kikai lebe amani ku mwabaibalrithi ki Tera. Ku Tera twalalake ki Aberame, Nahure si Harange. Ku Harange twalalake ki Lute. 28Ku Harange sa pacai ikai ki cekeleini ka Babilunia ka Ure, ku tamaini ka Tera yakaaiyana panianianiake. 29Ku Aberame la karudrange mwa ki Sarai; ku Nahure la karudrange mwa ki Mileka ka lalake ki Nahure; ku Harange mialri ka tama ki Iseka. 30Ku Sarai kai maka twalalake, la kakadrwa ku lalake.
31Ku Tera wailuku ki lalakeini ka Aberame, kwi aganeini ka lalake ki Harange ka Lute si kiathareve ka taelrelre ki Aberame ka Sarai matwase kwini ki cekele Babilunia ka cekele Ure, papia talikai Kanange. Kwini lalasu sa kelanga ka Harange, la ikainga kwini sutelrai cekecekele. 32Ku Tera satara 205 ka caili la pacai ikai Harange.
Dewis Presennol:
Tabekacane 11: NDV
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© The Bible Society in Taiwan, 2017
All rights reserved
© 臺灣聖經公會版權所有，2017