Tio 14
14
Uvaʼs iyatzʼax el Xhun, u aqʼol kuʼ xaol xeʼ aʼ
Kuxh 6.14-29; Luk 9.7-9
1Antichetzxh tuulbʼal inqʼa qʼij inqʼae, tul tabʼi vet Eroodes Antiipas, ipaxin itziulal Jesuus tiʼ ibʼanax inqʼa mam bʼaʼnil, Eroodes vaʼl u mam iqʼesal te kajvaʼl inqʼa mam iqʼesal.{*}#14.1 Aʼ nik tal u versiikulo uvaʼa Eroodes Antiipas. Tan nimalen kuxh Eroodese atiche tuulbʼal uvaʼs atich quBʼaal Jesuus vatz txʼavaʼ. Tan Eroodes uvaʼ nik tal tzitza, tan ikʼaolich Eroodes uvaʼ nik tal tu Tio 2.1. Tul aʼetz Eroodese uvaʼ nik tal tzitza bʼekʼon iyatzʼax el Xhun, u aqʼol kuʼ xaol xeʼ aʼ. Antetzxh Eroodese uvaʼa, nik tal tzitza, aqʼon kuʼ yol tinuqul tiʼ quBʼaal Jesuus, uvaʼs itxhaqax bʼen quBʼaal Jesuus xeʼ Eroodes taʼn Pilaato, eche uvaʼ nik tal tu Luk 23.6-12.
2Tul ech tal Eroodes te inqʼa taqʼonvil s-eche: —¡Qatetzebʼ itzʼeʼvy naq u Xhun inpaqte, uvaʼ kamnaʼq veteʼ; naq uvaʼ nikich aqʼon kuʼ inqʼa xaol xeʼ aʼ, xaʼte at tiqleʼm naq tiʼ ibʼanax inqʼa mam bʼaʼnil! —xeʼt Eroodes.{*}#14.2 Aʼ nik tal tu kastiiya ‹de los muertos,› chiche. Pet aʼ nik elkaʼp t-quyolbʼal, ‹kʼuxh maʼt ikameʼ,› chiche.
3Tan iqʼaqʼalich kuxh ixoq, u Erodiias, u tixqel Piʼl, u titzʼinich Eroodes, tul ibʼekʼ vet Eroodes itxeyp Xhun. Tul qitzix vet Xhun s-kadeena, atz palsal vet jaʼ Xhun t-tzeʼ.
4Tan ech nikich tal Xhun te Eroodes s-eche: —Quqʼesal Eroodes, yeʼbʼaʼn uvaʼ nik abʼaneʼ, tan antxh tixqel naq u eetzʼin Piʼl iqʼomal aaʼn, —chichich Xhun.#Leviitiko 18.16; 20.21
5Echetz s-tiʼile nikich isaʼ Eroodes iyatzʼax el Xhun. Poro nikich ixoʼv Eroodes te inqʼa xaol, tan qʼexsanich tetz iyol quBʼaal Tiuxh Xhun vatz inqʼa xaol.
6Ibʼanetz vet Eroodes val u nimla qʼij tiʼ inimal itzʼeq iyaʼbʼ, tul paloʼk ixvaak, u tal Erodiias bʼixoq vatz Eroodes, atz vatz inqʼa imol Eroodes. Tul yekichxh chiibʼ Eroodes tiʼ vibʼix u ixvaak. 7Tul ech tal vet Eroodes te u ixvaak s-eche: —Poro ech ivatz inqʼa inmol inqʼaa, tul toq val see uvaʼ, tetxhal kuxh laʼ vaqʼ kam uvaʼ laʼ ajaq s-ve, —xeʼt Eroodes.
8Yaʼne ech tal u ixvaak s-eche: —Aqʼ viviʼ Xhun s-ve s-txheel tuul invaʼq puraato, —xeʼte, tan maʼtich itxhaqtziil taʼn vitxutx.
9Tul yekichxh txumun vet Eroodes. Pet tetxhal kuxh vet inima Eroodes viyol, tiʼ uvaʼ tan, maʼtich talt vatz inqʼa imol uvaʼ atich viʼ u meexha s-kʼatza. Tul itzaqʼbʼe vet Eroodes taqʼax viviʼ Xhun te u ixvaak.
10Yaʼne ibʼekʼ vet Eroodes itzokʼox el iviʼ Xhun tu tzeʼ. 11Tul iqʼol vet tzaan viviʼ Xhun tuul val u puraato. Tul ul aqʼaxoq vet te u ixvaak. Atz ex taqʼ vet u ixvaak te vitxutx.
12Yaʼne ex eloq vet vitxhiʼoʼl Xhun taʼn inqʼa nikich itxhus tibʼ s-kʼatza. Tul exaq imuq veteʼ. Atz exaq tal vet te Jesuus.
Uvaʼs inaʼsat quBʼaal Jesuus oʼvaʼl paan tuchʼ kaʼvat txay tiʼ itzuqbʼel oʼvaʼl mil (5,000) vinaq
Kuxh 6.30-44; Luk 9.10-17; Xhun 6.1-14
13Taʼnetzxh tabʼi Jesuus u yol uvaʼ ex altxhoq s-te, tul bʼen vet Jesuus tuul val u vaarko. Tul yekich vet Jesuus t-val u txʼavaʼ uvaʼ yeʼl invaʼq xaol jeqlich s-tuul. Tabʼietz vet inqʼa xaol itziulal vibʼen Jesuus, tul sibʼxh xaol motx tzajaq vet t-toq tuulbʼal inqʼa tenam tiʼ tilix Jesuus. 14Aʼetz vet teluʼl Jesuus tuul u vaarko, tul til Jesuus uvaʼ mam tenam txʼebʼoʼmyich vet s-tiʼ. Tul itxum vet Jesuus ivatz inqʼa xaol s-kaqaayil. Atz ibʼan vet Jesuus bʼaʼn inqʼa yaabʼ, inqʼa atich xoʼl inqʼa xaol.
15Bʼiitichetz kuxh vet iqʼeqxeʼ, tul molmotxh tok vet inqʼa kʼatz Jesuus, inqʼa nikich itxhus tibʼ s-kʼatza. Tul ech motx tal te Jesuus s-eche: —Kuʼy vet qʼij. Tul yeʼl invaʼq xaol jeqlel tzitza tu txʼavaʼ uvaʼa. Pet txhaq vet bʼen inqʼa xaol, tul bʼen iloqʼ itxʼix tal uvaʼ jeqlel xaol, —xeʼtaq te Jesuus.
16Yaʼne ech tal Jesuus s-eche: —Yeʼ laʼ utxhi laʼ qutxhaq bʼen inqʼa xaol. Pet antxh ex toq aqʼon itxʼix, —xeʼt Jesuus.
17Yaʼne echaq motx tal s-eche: —Poro yeʼl mamala txʼix ati. Pet oʼvaʼl kuxh vatz paan tuchʼ kaʼvaʼt vatz votzʼim txay ati, —xeʼtaqe.
18Tul ech tal Jesuus s-eche: —Aqʼvaq tzaan, —xeʼt Jesuus.
19Yaʼne ibʼekʼ Jesuus ikuʼ inqʼa xaol vatz txhaqʼaala. Tul ikʼul Jesuus oʼvaʼl u paan tuchʼ kaʼvaʼt txay te inqʼa nikich itxhus tibʼ s-kʼatza. Tul saqin jaʼ Jesuus t-amlikaʼ. Tul taqʼ Jesuus taʼntiuxh te quBʼaal Tiuxh tiʼ inqʼa paan, atz tiʼ inqʼa txay. Tul ijatx Jesuus inqʼa paan. Tul taqʼ Jesuus te inqʼa nikich itxhus tibʼ s-kʼatza. Aʼetz vet inqʼa nikich itxhus tibʼ kʼatz Jesuus jatxon el xoʼl inqʼa xaol s-kaqaayil. 20Tul jankʼalxh inqʼa xaol motx txʼaʼoni. Atz tetxhal motx inoj inqʼa xaol s-kaqaayil. Tul aʼl tel imolt inqʼa nikich itxhus tibʼ kʼatz Jesuus kabʼlavat xuʼk viyal u etxhbʼubʼal. Tul nojnaʼqichxh inqʼa xuʼk. 21Poro oʼvaʼl mil (5,000) vinaq txʼaʼoni. Tul motx txʼaʼon inqʼa ixoq tuchʼ inqʼa nitxaʼ inpaqte, poro yeʼ motx ok s-atxh.
Uvaʼs ixaon quBʼaal Jesuus viʼ u mam aʼ
Kuxh 6.45-52; Xhun 6.15-21
22Tul yekichxh ibʼekʼ vet Jesuus ipaloʼk inqʼa nikich itxhus tibʼ s-kʼatza tuul u vaarko. Tan aʼich isaʼ Jesuus ibʼaxabʼaq bʼen s-vatz jala el u mam aʼ, ayaʼl s-tuul nikich tal vet Jesuus ibʼen inqʼa xaol s-kaqaayil. 23Itxhaqetz kuxh vet bʼen Jesuus inqʼa xaol, tul bʼen vet jaʼ Jesuus viʼ val u vitz tiʼ inatxhax Tiuxh. Tul ijunalich kuxh Jesuus atich viʼ u vitz uvaʼs iqʼeqx veteʼ.
24Aʼetz taqʼbʼ vet u vaarko tinikʼa u mam aʼ, tul oqxhich teyut vet tibʼ u aʼ jaqʼ u vaarko taʼn val u mam kaqiqʼ. Tul yeʼ nikich tutxh vet ixaon bʼen u vaarko taʼn u mam kaqiqʼ. 25Bʼiitichetz kuxh vet isaqbʼeʼ, tul sebʼtich ixaon opoon Jesuus viʼ u mam aʼ kʼatz inqʼa nikich itxhus tibʼ s-kʼatza.
26Tiletz vet inqʼa nikich itxhus tibʼ kʼatz Jesuus val uvaʼ nikich ixaon tzaan viʼ u mam aʼ, tul yekich motx xoʼvaq veteʼ. Tul ech motx tal vet s-eche: —¡Txa! ¡Il val u txhitxh tuleʼ! —xeʼtaq isichʼin t-xoʼval.
27Yaʼne ech tal tzaan Jesuus s-eche: —¡Yeʼ kuxh xoʼv ex! ¡Tij ex ebʼana! Tan ine, —xeʼt Jesuus.
28Yaʼne tzaqʼbʼ Luʼ. Tul ech tal Luʼ s-eche: —InBʼaal, oq nuqxhtuʼ uvaʼ axhe, tul bʼana uvaʼ laʼ xaon bʼen in sakʼatza viʼ u aʼ, —xeʼt Luʼ te Jesuus.
29Tul ech tal Jesuus s-eche: —Ape. Avuleʼ, —xeʼt Jesuus te Luʼ.
Yaʼne kuʼl Luʼ tu vaarko. Tul xaon vet bʼen Luʼ viʼ u aʼ kʼatz Jesuus. 30Tiletz vet Luʼ uvaʼ oqxhich iyakʼil u kaqiqʼ viʼ u mam aʼ, tul yekich xoʼv vet Luʼ. Tul tabʼi vet Luʼ uvaʼ aalemal nikich ipal vet kuʼ Luʼ jaqʼ u aʼ. Tul sichʼin vet Luʼ. Tul ech tal Luʼ s-eche: —¡Kol in, inBʼaal! —xeʼt vet Luʼ.
31Tul nal kuxh itxey jaʼul Jesuus iqʼabʼ Luʼ. Tul ech tal Jesuus s-eche: —Luʼ, ¡tira bʼak yeʼ txʼakel ok kʼuqlebʼal akʼuul s-viʼ! Tan ¡keʼch nik axoʼveʼ! —xeʼt Jesuus.
32Iletz kuxh Jesuus nikich ipal jaʼ tu vaarko tuchʼ Luʼ, tul yekich yaʼ vet u mam kaqiqʼ viʼ u mam aʼ. 33Tul ijetxhaq vet ok tibʼ inqʼa nikich itxhus tibʼ kʼatz Jesuus. Tul natxhkʼuulal vet Jesuus taʼn. Tul ech motx tal s-eche: —¡Nuq bʼakxhtuʼ uvaʼ axhxh iKʼaol quBʼaal Tiuxh! —xeʼtaqe.
Uvaʼs ibʼant inqʼa xaol bʼaʼn t-inqʼa yaabʼil tu txʼavaʼ Jenesareet
Kuxh 6.53-56
34Aqʼbʼetz vet Jesuus tuchʼ inqʼa nikich itxhus tibʼ s-kʼatza tu txʼavaʼ Jenesareet, antxh tziʼ u mam aʼ. 35Tiletz vet inqʼa xaol, inqʼa jeqlich tzitzi u taqʼbʼ Jesuus s-xoʼl, tul motx ipaxsaaq vet el yol xoʼl inqʼa tenam, inqʼa naqlich kuxh s-kʼatza, tiʼ u taqʼbʼ Jesuus. Tul iqʼol vet tzaan jankʼalxh inqʼa yaabʼ vatz Jesuus taʼn inqʼa xaol. 36Tul nikich ijaq inqʼa yaabʼ bʼaʼnil te Jesuus, tiʼ uvaʼ laʼich ikan vixojbʼal viqinkin oksaʼm Jesuus uvaʼ txhasich ok s-tiʼ. Echetz taʼn kuxhte nikich ikan inqʼa yaabʼ viqinkin oksaʼm Jesuus uvaʼ txhasich ok s-tiʼ, tul yek nikich motx ibʼan bʼaʼn t-inqʼa yaabʼil.
Dewis Presennol:
Tio 14: ixlC
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2016, Wycliffe Bible Translators, Inc. All rights reserved.