នាវនតើម 20
20
កោរាញឞ្រាសលាសកាដាច់អាបីមាលិចតានាវមឞើយ
1ជេសរីអាឞ្រាហាម់ លោសឞើសនតុកពាង់គុនៃ ហាន់មពែសមាឞ្រីនេកិប។ ពាង់គុតាប៝នកេរារ ជេងវាសវាងប៝នកាដែសមាឞ្រីឆូរ។#១២:១០-២០; ២៦:៧-១១ 2តានៃអាឞ្រាហាម់ ងើយងក៝ចឆារាអីអូរពាង់រីមាឞូ ពាង់លាសឆារានៃជេងអីអ៝សពាង់។ តាប៝នកេរារនៃគែសទូហ្វេរាញាអាបីមាលិច ពាង់ជេងកាដាច់ឞ្រីនៃ ត៝ត់ពាង់គឹតមានាវអាឞ្រាហាម់ងក៝ចអីនៃ ពាង់ដាៈឞូហាន់ឆ៝ៈឆារាលែវអាពាង់មាជានអូរ#នន ១២:១៣; ២៦:៧ 3យើនមាតាមាង់នៃកោរាញឞ្រាសហាន់ម៝ប់មានាវមឞើយ លាសមាពាង់៖ “មៃតៃខឹតរ៝យ៝រមាឞូអូរអីមៃឆ៝ៈនៃ យ៝រលាសពាង់នើសជេងអូរឞូ”។ 4យើនមាកាដាច់អាបីមាលិចអេហ៝ៈអោសឞិចដាសឆារា នទ្រីពាង់អោប៖ “អើកោរាញឞ្រាស មៃលើសលើយដ៝ង់ឞើស លាសគ៝ប់នទ្រែលមាប៝នលានគ៝ប់មោម៝ប់ជានតីស? 5អើមមោទីលាសពាង់លែៈមឞើសមាគ៝ប់លាស៖ «ឞូអូរអ្យាជេងអ៝សគ៝ប់»? ជេសរីឞូអូរនៃក៝ៈមឞើសមាគ៝ប់លាស៖ «ឞូក្លោអ្យាជេងនោគ៝ប់»ដ៝ង់។ កើតនទ្រីនាវគ៝ប់ជានអ្យាជេងទីមាគ៝ប់ គ៝ប់ក៝ៈមោជានតីសដ៝ង់”។ 6កោរាញឞ្រាសលាសមាពាង់តឹមនាវមឞើយនៃ៖ “គ៝ប់គឹតនាវមៃជាននៃជេងទីមាមៃ កើតនទ្រីទឹងគ៝ប់ឞ្វៃមៃ មោអ៝ន់មៃជានតីសមាគ៝ប់។ គ៝ប់មោប៝ង់គ៝រអ៝ន់មៃឞិចដាសឞូអូរនៃដ៝ង់។ 7លាសនទ្រីអ៝ន់មៃមព្លឹឞូអូរនៃអាឆាយពាង់អាបៃរី តៃពាង់មឞើសឆើមអ៝ន់មាមៃ គៃមាមៃហោមគុរេសជឹត យ៝រលាសពាង់ជេងឞូនុយ្សនតើយ្សនាវគ៝ប់ងើយ។ លាសមៃមោអោសមព្លឹឞូអូរនៃអាពាង់ មៃតៃ នទ្រែលមាប៝នលានមៃខឹតរ៝”។
8កាដាច់អាបីមាលិចរីទ៝ក់អើមអោយ ពាង់ក្វាល់រាគូមផូងកើលជានការពាង់ ជេសរីមឞើសងក៝ចទឹងលែៈនាវមឞើយអីនៃអ៝ន់មាខាន់ពាង់តាង់។ ជេសតាង់នាវអីនៃ លែៈរាងោចខាន់ពាង់ក្លាចញឆ៝រ់ទាទេ។ 9ជេសរីកាដាច់អាបីមាលិចដាៈឞូហាន់ក្វាល់អាឞ្រាហាម់ កាដាច់លាសពាង់៖ “ម៝សមៃជានមាហេនកើតនអាមេស? ម៝សបាៈគ៝ប់ជានតីសមាមៃ ទឹងមៃជានអ៝ន់មាគ៝ប់ នទ្រែលមាឞ្រីទាកគ៝ប់គែសនាវតីសទុតក្វ៝ង់កើតនអា? យ៝រលាសនាវអីមៃជានមាគ៝ប់អ្យា ឞូមោគែសអោសទីមាជាន!” 10កាដាច់អាបីមាលិចលាសតៃមាអាឞ្រាហាម់ ៖ “មើមនាវមៃមឹន ទឹងមៃអុចជានកើតនអា?” 11អាឞ្រាហាម់ លាសមាកាដាច់នៃ៖ “យ៝រលាសគ៝ប់មឹន ឞូនុយ្សតាឞ្រីអ្យាមោគែសអោសទូហ្វេក្លាចមាកោរាញឞ្រាស ល៝ង់គ៝ប់តៃឞូទែងខឹតយ៝រមាអុចឆ៝ៈអូរគ៝ប់នៃ។ 12នទ្រែលមាពាង់នើសជេងអ៝សគ៝ប់ងាន់ ជេងក៝នឞឹគ៝ប់ដ៝ង់ តីសមាមេៈគ៝ប់ដាសមេៈពាង់ជេងមេៈអេងៗ ជេសរីគ៝ប់ឆ៝ៈពាង់នអាប់អូរឆាយ។ 13ទោលកោរាញឞ្រាសអ៝ន់គ៝ប់ទូងាយដាសមានទុលមពោលគ៝ប់នើម គ៝ប់លែៈលាសមាពាង់៖ «អ៝ន់អៃយោៈនអាចមាគ៝ប់បាៈយឹ អាសនតុកឞ៝ន់ហាន់ អ៝ន់អៃមឞើសងក៝ចមាឞូលាស ឞ៝ន់ជេងរោសក្លោហ៝ៈ»”។ 14ជេសរីកាដាច់អាបីមាលិចឆ៝ៈឞែឞ្យាប់ ឆ៝ៈនទ្រោកតាៈឞើសផូងមពោមពា(ឆ្យុម)ពាង់នើម នទ្រែលមាឆ៝ៈទឹកឞូអូរទឹកឞូក្លោពាង់នើមអ៝ន់មាអាឞ្រាហាម់ នអ៝ប់មាមព្លឹឆារាអីអូរពាង់នើមរីនើសដ៝ង់។ 15កាដាច់នៃលាសមាអាឞ្រាហាម់ ៖ “ល៝ង់ឞ្រីទាកគ៝ប់តាអ្យា អាសនតុកមៃអុចគុ ទាសមៃអុច”។ 16ពាង់លាសដ៝ង់មាឆារា៖ “អ្យាព្រាក់គ៝ប់ទូរាឞាន់កាក់ព្រាក់ គ៝ប់អ៝ន់មានោអៃ គៃមាមពោលអីគុនទ្រែលអៃនៃគឹតនហេលអៃមោអោសគែសជានតីសទូនតីល គៃមាឞូនុយ្សទឹងលែៈគឹតនហេលអៃមោអោសគែសជានតីស”។ 17-18នោកនៃយ៝រមាឆារាអីអូរអាឞ្រាហាម់ នៃគុតាជៃកាដាច់អាបីមាលិច ឞ្រាសយេហោវាអ៝ន់ទឹងលែៈឞូអូរអីគុតាជៃពាង់ឞាសឞាៈក៝ន។ អាឞ្រាហាម់ មឞើសឆើមអ៝ន់មាអាបីមាលិចទាន់មាកោរាញឞ្រាស ជេសរីកោរាញឞ្រាសជានអ៝ន់ឞាសជីពាង់ អ៝ន់ឞាសជីអូរពាង់ នទ្រែលមាលែៈទឹកឞូអូរពាង់ ជេសរីមពោលនៃគែសអ៝សគែសក៝នជឹត។
Dewis Presennol:
នាវនតើម 20: cmoK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© (Active) Wycliffe Bible Translators, Inc. All rights reserved.