នាវនតើម 19

1ត៝ត់កេងមាង់រី ឞារហៃតោងពារ់នៃហាន់ត៝ត់តាប៝នឆោដុម។ លុត គុតាឞោកមពោងប៝ននៃ ត៝ត់មាឆៃតោងពារ់ឞារហៃនៃ ពាង់រានច្វាៈនហ៝មាពាន់ក្រាបអានែសឆូរ៝។ 2ពាង់លាសមាឞារហៃតោងពារ់នៃ៖ “អើកោរាញ គ៝ប់ជេងឞូនុយ្សតាន៝ម់ខាន់មៃ ហាន់លាប់អាជៃគ៝ប់ប៝ត់ គៃមារាវជ៝ង់ខាន់មៃ ជេសរីឞិចតាអ្យាទូមាង់ ក៝ប់អោយតៃទឹងទ៝ក់អើមអោយហាន់ជឹត”។ យើនមាតោងពារ់នៃអើសមាពាង់៖ “មោអោស មាង់អ្យាហេនឞិចតាជ៝ង់គូងប៝ន”។ 3យ៝រមាលុត ទាន់ហោងាន់ នទ្រីទឹងមពោលតោងពារ់នៃហាន់ឞិចអាជៃពាង់ ពាង់នទ្រាប់នទើឆោងឆាអ្វែស ដាៈឞូគុចនុមពាង់មោគែសនទ្រូយអ៝ន់មាមពោលតោងពារ់នៃ ជេសរីមពោលតោងពារ់នៃឆា។ 4ទោលខាន់ពាង់អេហ៝ៈឞិចអោស ទឹងលែៈឞូនុយ្សតាប៝ននៃ លែៈរាងោចឞូក្លោតាប៝នឆោដុមរី នតើមឞើសឞូនទាម់ត៝ត់មាឞូរាញ លែវឞាល់ហាន់ញជ្វែងជៃលុត រីទាទេ។ 5#ផក ១៩:២២-២៤ផូងអីនៃនតែរអោបលុត ៖ “អាសគុឞូនុយ្សអីលាប់តាជៃមៃមាង់អ្យានើសមេស? ហាន់មៃងលោសខាន់ពាង់មាហេន ហេនទែមាតឹមហាវដាសខាន់ពាង់”។ 6ជេសរីលុត លោសអាទីសទ៝ក់ឞើសទីសមពោងរី ពាង់នតឹលមពោងឞើសកើយពាង់នើម។ 7ពាង់លាស៖ “អើអ៝សនោ គ៝ប់ទាន់ទោយ្សមាខាន់មៃខឹតអោមលោមលាៈងាន់ លើយជានអ្យើសកើតនៃ! 8គ៝ប់គែសក៝នឞូអូរទ្រោសឞារហៃ អេហ៝ៈដាសឞូអោស គ៝ប់អ៝ន់ខាន់ពាង់មាខាន់មៃ ទាសខាន់មៃអុចជាន អ្យាត់មាខាន់មៃលើយលើសមាឞារហៃខាន់ពាង់អ្យា យ៝រលាសខាន់ពាង់លែៈវែសឞិចតាជៃគ៝ប់”។ 9ឞូលាសមាពាង់៖ “ទុមៃអ្យាៈ!” ជេសរីឞូលាសតៃពាង់ជឹត៖ “មៃអីនៃមោអោសទីផូងហេន មើមអាបៃរីអុចជានកោរាញហេន? លាសនទ្រីលើសអ្យើសមៃអ៝ន់ហោរាលាវមាឞារហៃនៃជឹត”។ ជេសរីឞូនត្រោលលុត ទុតហោ លាប់អុចមាមព្លុងមពោងរ៝។#២ពេ ២:៦-៨ 10យើនមាតោងពារ់ទែឆូកតីមផ៝ក់លុត លាប់អាត្រោមជៃ ជេសរីនតឹលមពោង។ 11ជេសឞើសនៃតោងពារ់ទែជានចែសត្រោមមាត់ផូងអីគុតាឞោកមពោងរីអ៝ន់ចែសទាទេ នតើមឞើសឞូជេៈត៝ត់មាឞូក្វ៝ង់ នទ្រីទឹងផូងអីនៃជ៝យងាន់ជ៝យងាន់មពោងមោហោមឆៃជឹតអោស។#២កក ៦:១៨

12ជេសរីតោងពារ់នៃអោបលុត ៖ “មៃគែសនទុលមពោលអាបាៈគុតាប៝នអ្យាដ៝ង់? មោលាសគែសក៝នគែសក្លៃ? អ៝ន់មៃលែវលែៈឞូនុយ្សមៃទូលោសឞើសនតុកអ្យាហ៝ម់។ 13ប៝នអ្យាហេនលើសលើយ យ៝រលាសនាវអ្យើសតាប៝នអ្យាលើហោងាន់លឺអាឞ្រាសយេហោវារី កើតនទ្រីទឹងពាង់ដាៈហេនហាន់លើសហេងលើយប៝នអ្យា”។ 14ជេសរីលុត ទ៝ក់មឞើសក្លៃៗអីនអាប់មាក៝នពាង់រី៖ “ទ៝ក់ទូឞើសនតុកអ្យាហ៝ម់ យ៝រលាសឞ្រាសយេហោវាឞើយមាលើសហេងលើយប៝នអ្យា”។ តីសមាអីក្លៃៗរីមោអោសអ្យាត់ ខាន់ពាង់នអោនលាសងើយព៝ល់ទើម។

15ត៝ត់ឞ្រីលែៈប្ហីតអាង តោងពារ់ទែញច៝ប់លុត ៖ “ទ៝ក់ហ៝ម់ លែវអូរមៃ នទ្រែលមាក៝នមៃទូឞើសនតុកអ្យា ក្លាចលាសគែសខឹតនទ្រែលផូងតីសតាប៝នអ្យា”។ 16តីសមាលុត ហោមអែគុមឞ្រែៈមឞ្រើយ។ ជេសរីតោងពារ់ទែតេកតីលុត តេកតីអីអូរពាង់ នទ្រែលមាតេកតីអីក៝នពាង់រី លែវខាន់ពាង់អ៝ន់គុអាឞើសទីសប៝នរី យ៝រលាសឞ្រាសយេហោវាយោៈខាន់ពាង់។#២ពេ ២:៧ 17ត៝ត់ឞើសទីសប៝នរី ទូហ្វេតោងពារ់លាសមាខាន់ពាង់៖ “ខាន់មៃញច្វាត់ហ៝ម់គៃមាក្លាយ្ស លើយអោសងគឹលជឹតកើយ នទ្រែលមាលើយញឆ្រុងតានតុកឞ្រីរាដុងដ៝ង់ អ៝ន់ខាន់មៃញច្វាត់ជឹតយោករី គៃមាក្លាយ្សឞើសនាវខឹតហេង”។ 18លុត ងើយមាតោងពារ់៖ “អើកោរាញ លើយអោសញច៝ប់គ៝ប់នទ្រី។ 19មៃលែៈយោៈមាគ៝ប់ហោងាន់ រាក្លាយ្សនាវរេសគ៝ប់។ យើនមាលាសមៃដាៈគ៝ប់ញច្វាត់ជឹតយោករីមោនាន់អោស ក្លាចលាសនាវអ្យើសនៃឞានគ៝ប់ច្រាវ ជេសរីគ៝ប់ខឹតរ៝។ 20អើកោរាញ តាអ្យាគែសទូប៝នទាច់អ៝យគ៝ប់ទើយមាញច្វាត់ ប៝នអីនៃជេៈទើម លាសនទ្រីមៃអ៝ន់គ៝ប់ញច្វាត់តាប៝នជេៈនៃ គៃមារេស!” 21តោងពារ់លាសមាពាង់៖ “លាសនទ្រីគ៝ប់តឹងនាវមៃ គ៝ប់មោអោសលើសហេងប៝នជេៈអីមៃលាសនៃ។ 22មៃញច្វាត់អ៝ន់គើញហ៝ម់តាប៝ននៃ យ៝រលាសគ៝ប់មោអោសឞ្លាវជានលាសមៃអេហ៝ៈត៝ត់តានៃ”។ នទ្រីទឹងឞូតេៈរាញាប៝នអីនៃ«ឆោអារ» គែសនាវខ្លៃ«ជេៈ»។ 23ត៝ត់លុត លែៈលាប់តាប៝នឆោអាររី នារលែៈលោសជេស។ 24នោកនៃឞ្រាសយេហោវាអ៝ន់គែសញឆីវហីតអុញតាៈឞើសត្រោកតីតឹមឞានមាមីសងាន់ងខុតតាប៝នឆោដុម នទ្រែលមាប៝នកោមោរា។#នវ ២៩:២១-២៥; នម ១១:៦; អេឆា ១:៩-១០; អាម ៤:១១; មថ ១០:១៥; ១១:២៣-២៤; លក ១០:១២; ១៧:២៩; ១៧:២៨-២៩; ២ពេ ២:៦; យដ ១:៧ 25ឞ្រាសយេហោវាលើសហេងលើយទឹងលែៈប៝ននៃ នទ្រែលមាលែៈរាងោចនតុកឞ្រីរាដុង ឞូនុយ្សទឹងលែៈតាប៝ន នអ៝ប់មាលែៈនទើហ៝នតានែស ខឹតរ៝សហេងលែៈផ្យៅ។

26ល៝ង់អីអូរលុត រី ពាង់ងគឹលជឹតកើយ នហ៝មាជេងឞ៝សរូបអីឆាក់ពាង់រី។#លក ១៧:៣២

27 អាឞ្រាហាម់ ទ៝ក់អើមអោយ ពាង់ហាន់តានតុកពាង់គុនទ្រែលឞ្រាសយេហោវារីនើស 28ជេសរីពាង់អ្វាញ់ឞើសលើយោកជឹតប៝នឆោដុម ជឹតប៝នកោមោរា នទ្រែលមាលែៈរាងោចនតុកឞ្រីរាដុងរី ពាង់ឆៃញហូកអុញតឹមឞានមាញហូកអុញមពុយ្សងាន់។

29កើតនទ្រីនោកឞ្រាសយេហោវាលើសហេងលើយទឹងលែៈប៝នរ៝ៈនតុកឞ្រីរាដុងនៃ ពាង់កាសគឹតមាអាឞ្រាហាម់ ជេសរីពាង់រាក្លាយ្សលុត អ៝ន់រេស នោកពាង់លើសហេងលើយប៝នលុត គុនៃនើស។

30 លុត នទ្រែលមាឞារហៃក៝នទ្រោសពាង់លោសឞើសប៝នឆោអារហាន់គុអាយោករី យ៝រលាសពាង់មោអោសឞាញ់គុតាប៝នឆោអារ នទ្រីទឹងពាង់ហាន់គុអាទូមល៝ម់ត្រោមយោក នទ្រែលមាឞារហៃក៝នទ្រោសពាង់នៃ។ 31ទោលនៃអីយោសរីលាសមាអីអ៝ស៖ “ឞឹឞ៝ន់លែៈរាញ តាឞ្រីអ្យាមោអោសគែសឞូក្លោឆ៝ៈឞ៝ន់មាជានអូរ កើតឞូអាបាៈអេងតានែសនតូអ្យា។ 32លាសនទ្រីឞ៝ន់ជាៈពាង់ញេតនទ្រាញ់អ៝ន់ត៝ត់ញុល ជេសរីឞិចនទ្រែលពាង់ គៃមាហោមគែសរាន៝យទែសតាៈឞើសឞឹឞ៝ន់”។ 33មាង់នៃឞារហៃខាន់ពាង់រីជាៈឞឹខាន់ពាង់ញេតនទ្រាញ់អ៝ន់ញុលរ៝ ជេសរីអីយោសរីលាប់ឞិចនទ្រែលអីឞឹរី យើនមាលុត មោគឹតអោសក៝នពាង់ឞិចដាសពាង់ យ៝រមាលែៈញុលហោអីរ។ 34កាសអោយតៃអីយោសរីលាសមាអីអ៝ស៖ “អាមាង់នើសគ៝ប់លែៈជេសឞិចដាសឞឹ មាង់អ្យាឞ៝ន់ជាៈពាង់ញេតនទ្រាញ់អ៝ន់ត៝ត់ញុលជឹត ជេសរីអៃឞិចដាសពាង់ គៃមាហោមគែសរាន៝យទែសតាៈឞើសពាង់”។ 35ត៝ត់មាង់នៃ ខាន់ពាង់ជាៈតៃអីឞឹញេតនទ្រាញ់អ៝ន់ត៝ត់ញុល ជេសរីអីអ៝សរីលាប់ឞិចដាសអីឞឹរី យើនមាលុត មោគឹតអោសក៝នពាង់ឞិចដាសពាង់ យ៝រមាលែៈញុលហោអីរ។ 36ជេសរីលែៈឞារហៃក៝នទ្រោសលុត រី នត្រែវដាសពាង់នើមទាទេ។ 37អីយោសរីគុអ៝សទូហ្វេក៝នឞូក្លោ ពាង់តេៈរាញាមោអាប់ ពាង់អីនៃជេងចែមាផូងមោអាប់នហ៝មាត៝ត់អាបៃអ្យា។ 38អីអ៝សរីគុអ៝សទូហ្វេក៝នឞូក្លោដ៝ង់ ពាង់តេៈរាញាបេន-អាមី ពាង់អីនៃជេងចែមាផូងអាមោននហ៝មាត៝ត់អាបៃអ្យា។

Adnodau Beiblaidd Poblogaidd o
នាវនតើម 19

Beibl:

Bunong

Fersiwn: Bunong - cmoK