Lukahtar 8
8
E manušnja save džana pala o Isuso. Paramiči e sijačehtar, e gavehće bućarnehtar. Ko si e Hristohko rodo. Ačhavipe e bahvaljako po baro paj. O sastaripe e manušehko e bengjalimahtar. O džungavipe e Jairohće čhejako thaj o čudo e nasvale džejaha.
1Maj palal vov phirela pe thema, pe forujra thaj pe gava, pe sa e thana, dindo vorba e Devlehće thagarimahtar, a leha džana e dešuduj amala.
2Thaj varesave džeja saven vov sastardah katar e džungale duhujra, katar e čoh̄ane, thaj katar o nasvalipe: e Marija, sajvako anav sah Magdalina, andar savi ikliste efta bengjale.
3Thaj e Jovana, e r̄omni e Huzaći, e Irodohće šorutnehći, thaj e Susana, thaj e aver but manušnja save lehće ćerena bući thaj kandena le pehtar thaj pire barvalimaha.
4A kana ćidinalje but manuša, save lehte avile andar sa e thema, vov lengje phendah gaja paramiči:
5Varesavo gavehko manuš iklisto tar jekhvar pe pi umal te čhudel ande phuv kuća, sumbujra, te siji len te bajrol o gjiv. Čhudindo gadija jekh kućin pelah uzo drom thaj uštadinalji, a e Devlehće čiriklja h̄ale la.
6A jekh aver kućin pelah po bar̄, pa kana bajrilah, šućilo tar, kaj naj sah la ćingjipe.
7Pale jekh kućin pelah ande karne, pa kana o karno bajrilah, tasili e kućin.
8A jekh kućin pelaha pe lačhi phuv thaj kana bajrilah, bijandah šel droma maj but nego anglal so sah la.
9A lehće amala phučle le: Pe so sikavel amen gadav paramiči?
10A vov phendah: O Del muklah tumen te haćaren so garudol ande Devlehko thagaripe, ande lehko rajipe, a e averengje del vorba e paramičenca, pa, putarindo e jakha te na dikhen, a ašunindo te na haćaren.
11A gaja paramiči sikavel ame agava: E kućin si e Devlehko alav.
12Gola kućina save si paša o drom, gova si gola manuša save ašunen, a pala golehte, maj palal avel o beng thaj lel o alav e Devlehko andar lengo odji, kaj vov kamel te na von paćan te na aven spasime e Devlehtar.
13Gola kućina po bar̄, gova si gola save len e alava dragostijaha, šukarimaha, ali naj len kočaja, pa akana cîr̄a paćan, athoska kana avel o beng te zumavel len, von muken e Devle.
14A godja kućin savi pelah ande karne, gova si gola kaj ašunen thaj džan tar, a maj palal h̄asardon, tasadon katar e buća, katar o lačhipe thaj barvalipe, pa niči resen khanči, niči bijandol niso.
15A goja kućin savi pelah pe lačhi phuv, gova si gola manuša kaj ašunen o alav thaj ićaren le ande po lačho thaj paćamno odji thaj cîr̄a po cîr̄a plodujra bijanen. Kana vaćardah gova, dijah vorba: Kahte si kan, nek ašunel gova.
16Kana vareko phabarel e memeli, vov niči učharel la khajekhe vasoha thaj niči kam thovel la tala o buhljardo. Vov kam čhuvel la inćate pe memeljako than te dikhen o ždrako, o strafin, gola save den andre.
17Kaj naj niso garudino savo niči sikadola jekhvar, savo niči haćardola, savo niči iklela po dićhipe e djivesehko.
18Dikhen akana sar kam ašunen: Gova manuš savo si le vareso, golehće kam del pe, a gova savo naj le, lehtar lela pe vi gova so vov ićarel kaj si le.
19Avile lehte lehći dej thaj e phrala lehće pa našti nisar dije vorba leha kaj seha kothe but džene.
20Thaj e manuša phende lehće: Ći dej thaj će phrala ačhen avri, kamen te dićhen tu.
21A vov dindo vorba phendah lengje: Mrni dej thaj mrne phrala si gola save ašunen o alav e Devlehko thaj ićaren le.
22Jekhe djivesehko dijah vov pe amalenca ande jekh pajali, ande ladja, thaj phendah lengje: Haj te nakhah pe okoja rig preko paj. Thaj lije te nakhadon.
23Kana von gjele, vov suto tar, a varekatar vazdinaljah jekh bari balval po paj, pa pherdinaljah e pajali e pajeha, a baro darape astardah e dženen.
24Thaj pašile lehte thaj džungade le, dindo vorba: Sikavneja, sikavneja, kam merah. Vov uštilah, vaćardah vareso e balvaljaće thaj e pajehće, thaj von ačhile jekhvaratar te na miškosajvon.
25A lengje phendah: Kaj si tumaro paćape? A von daralje thaj začudisalje, dije vorba jekh e avrehće: Savo si gava kaj del vorba e balvaljenca thaj e pajeha, a von thoven le kan?
26Thaj von avile ando them e Gadarinengo, savo si paše ke Galileja.
27Kana vov iklistah pe phuv, dijah pe lehte jekh manuš ande savehte seha e bengjale but brša. Naj seha le gada pe lehte thaj niči bešela ando ćher, nego ačhela ande limojra.
28Kana vov dikhlah e Isuso, vov dijah muj thaj pelah angla lehte pe čanga thaj phendah: So si tuće dži mande? Čhaveja e Devlehćireja, e Maj Barederehćireja! Me moli tu, na nasvaljar ma, na ićhar ma!
29Kaj o Isuso phendah e odjehće e bengjalehćerehće te iklel andar gova manuš. Odomut astarela le budroma, pa phandena le ande sastra te arakhen le, a vov akušindo len phagardah e sastra thaj o beng tradijah le ande korkor̄utno them.
30A o Isuso phučlah le dindo vorba: Sar si ćo anav? A vov phendah: Vojska, askejra, kaj ande lehte dije but benga.
31Thaj molisarde le te na bičhalel len te džan tele ande h̄îv h̄arate.
32Inćate upre ande plajin, ando voš čajrona but bale. Von mangle lehtar te mukel len te den andre ande bale. Thaj vov muklah len.
33Akana ikliste e benga andar o manuš thaj dije ande bale. A e bale katar go učo plajinako than lije te prasten thaj sigarindo dije ando paj thaj tasile tar.
34A kana gova dikhle gola kaj čajrarena e balen, dije našipe thaj morhode ando foro thaj ande gava sa gova so dikhle.
35Thaj ikliste e manuša te dikhen so sah, thaj avile ko Isuso thaj arakhle gole manuše, andar savo e benga ikliste. Vov bešela hujrado, ande pi godji, paša e prne e Isusohće, thaj von daralje golehtar.
36A gola save dikhle, mothode lehće sar sastilah o bengjalo dženo.
37Thaj sa e manuša andar e Gadarinengo them mangle te džal tar vov lendar, kaj von savor̄e daralje lehtar. A vov dijah ande pajali, ande ladja, thaj irisaljah palpale.
38A o manuš andar savehte ikliste e bengjale, manglah lehtar te mukel le te avel uzo lehte. Ali o Isuso bičhaldah le pehtar dindo vorba:
39Irisajvo ke ćo ćher thaj sikav savor̄engje so ćerdah tuće o Del. Gov manuš gjelo tar thaj dijah vorba ando sa o foro save bare buća ćerdah lehće o Isuso.
40A kana irisaljah o Isuso, dijah pe sa e manuša save le ažućarena.
41Thaj, ake dikh, avilah varesavo manuš, po anav Jairo, savo sah šorutno ande khangjiri, pa pelo tar angla e Isusohće prne thaj akhardah le, te del ande lehko ćher.
42Lehte sah jekh jekhor̄i čhejor̄i dešudo bršengji, pa nasvaljaha po meripe. A e manuša gadija džando ćićidije pe thaj ispidije pe trujal o Isuso.
43Okoring sah vi jekh nasvalimahći džuvli, sajvatar radela dešuduj brš, thavdelah o rat. Voj dela sa piro barvalipe ke doktojra, a ni jekh našti sastardah la.
44A e džeji ačhilah pala o Isuso thaj palal astardah e rig katar lehko hujravipe, a o rat ačhilah jekhvaratar te na pićal.
45Thaj o Isuso phendah: Ko si gova savo astardilah pala mande? A savor̄e phende kaj niči astardinalje. Akana phendah o Petre thaj gola save seha leha: Sikam neja, e’ manuša ačhen oko tute utral thaj ispidinja von, a tu, ake, pheneh: Ko astardol gova pala mande?
46A o Isuso phendah: Vareko čače mora te astardilah pala mande, kaj me haćardem kana iklistah andar mande o zuralipe.
47A kana dikhlah e manušni kaj našti nisar garudilah, lijah voj te izdral tha pelah lehće dži ke čanga, vaćarindo angla sa e manuša, pala sohte astardilah pala lehte thaj sar pe jekhvar sastilah golehtar.
48A vov phendah laće: Ma dara, čhejene, ćiro pać pe ćerdah tuće pa sastilan, dža tar šukarimaha!
49Kana vov gadija dijah vorba, avilah varesavo dženo katar o ćher e khangjiraće šorun hko thaj phendah: Etali, muli tar ći čhej, na ačhav maj but e sikamne!
50Thaj kana gova ašundah o Isuso, phendah lehće vaćarindo: Ma dara, trubuj te paćah, pa kam voj sastol, kam džuvindol pale.
51A kana avilah ando ćher, niči muklah nikah te del and e, samo e Petre, e Jakovo thaj e Jovano thaj e da e čhejaćira.
52Thaj savor̄e ruje pala late, a vov dijah vorba: Na rovljardon, voj niči mulah, voj sovel.
53Thaj asaje lehće, ćerena phejras lehtar, kaj džanglekaj e rakhli sah muli.
54A palal vov tradijah len savor̄en avri thaj astardah e čheja pala o va, dindo vorba: Čhejo, ušti!
55Akana lako odji, lako džipe, pale irisaljah ande late thaj voj uštilah sigo, a o Isuso vaćardah te den la h̄ape.
56A lako dad thaj laći dej začudisalje, a vov phendah lengje te na nikahće mothoven gova so sah.
Dewis Presennol:
Lukahtar 8: GURB1938
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Englezongo thaj avere Themengo Biblijako Amalipe 1938.