Lukahtar 24
24
E Isusohko uštipe katar e mule. O Isuso sikadol pe amalengje save džan ando Emauso thaj palal sikadol e apostolongje. O iklipe e Hristohko ando del.
1O djive pala o kurko avile oteharinate pe limojra thaj ande peha e sungale draba save seha lačharde, a lenca avile vi varesave aver manušnja.
2Thaj dikhle kaj si o bar̄ huljardo katar o limori, miškome.
3A von dije andre thaj niči arakhle e mule Bare, e Isuso.
4Kana von ačhadile jekhvaratar angla pehte dikhle do manušen ando parno ujravipe.
5E džeja daralje maj but thaj erade pire šoren e phujvate, a gola duj manuša phende lengje: Sohtar roden tumen e džuvinde maškar e mule, maškar e limoraša.
6Vov naj kathe, vov uštilah. Den tumen godji so vov phendah tumee kana sah ande goja phuv Galileja.
7Thaj kana dijah tumengje vorba kaj e manušehho čhavo trubuj te tradel pe ande va e džungalengje te inzaren le po trušul thaj o trito djive te uštel pale.
8Gadija von dije pe godji pe lehće alava.
9Akana von irisalje katar o limori thaj phende sa gova e dešujekhe amalengje thaj e savor̄e averengje.
10Gova seha e Magdalina Marija, e Jovana thaj e Jakovohći Marija thaj e aver manušnja save mothode gova e apostolongje.
11A gola alava ćerdinalje lengje sar h̄oh̄amne thaj von niči paćaje len.
12A o Petre uštilah the prastijah ko limori thaj dijah andre. Kana vov dikhlah o hujravipe thaj e gada kaj pašljon pe phuv gjelo tar kothar thaj čudisaljah sar šaj gova ćerdilah pe.
13Gova djive duj džene gjele tar lendar ando gav Emauso savo sah dur katar Jerusalimo šovardeš drom po šel thaj eftavardeš metejra.
14A von dije vorba maškar pehte katar sa gova so nakhlo.
15Thaj kana von džando gadija dije vorba thaj phučle jekh e avre, pašilah lende o Isuso the lijah te džal lenca.
16A lengje jakha seha sar phangle tha našti pindžarde le.
17Thaj vo mothodah lengje: Saji si goja vorba kaj ićaren tumen maškar tumende džando e dromeha thaj sohtar sen phare odjehće thaj sohće dićhon bibah̄tale, dukhade.
18A jekh dženo maškar lende savehko anav sah Kleopa phendah lehće: Da li san tu jekh golendar e manušendar andar Jerusalimo a niči ašundan so sah gale djivesengo.
19A vov phučlah len: So saha gova? A von phende lehće pala o Isuso Nazaretohko savo sah proroko, zuralo vi ande bući vi ande alava, angla o Del thaj angla e manuša.
20Amare phuredera, e šorutne e lilvarnengjerengje thaj e anglune tradije le ande va e dušmanongje the bičhalde le ando meripe te inzaren le po trušul.
21Amen paćajam thaj inćardam ande godji kaj vov si gova kaj anela e bah̄ e Izrailjehće phujvaće, a dikhta, adjive si o trito djive sar gova ćerdilah pe gadija.
22Thaj darade amen nesave amare džeja save seha teharin ko limori.
23Kana niči arakhle e mule Isuso, irisalje thaj mothode kaj sikadile lengje e angjelujra, dindo vorba kaj o Isuso si džuvdo.
24Thaj jekh džene gjele amendar po limori thaj sa gadija arakhle sar e manušnja mothode, ali leh niči dikhle.
25A vov phendah lengje: O, tumen dile manušale, tumaro ilo si poloko thaj našti gadija sigo te paćal so von phende tumengje.
26Zar niči trubujah te ićharel pe o Hristo ande gasave dukha, pa te šaj ašarel le, hvali le o manušipe.
27Thaj vov lijah te mothovel lengje sa gova so saha ramome, pišime pala lehte ande lila, katar o Mojsije thaj katar sa e prorokujra.
28Thaj pašile ko gav ande savo gjele, a vov ćerdinaljah sar te kamela te džal maj dur.
29A von ačhade le thaj či mukle le dindo vorba: Ači amenca, pašol e jrat, o kham huljistah tele pe rig. Thaj vov dijah andre te lenca raćarel.
30A kana bešlah lenca te h̄al, lijah o marno, blagoslovisardah le, phaglah le thaj dijah le lende.
31Akana putardile lengje jakha thaj pindžarde le, a vov jekhvarimahtar h̄asardilo tar lendar, h̄asaljah lengje angla e jakha.
32Thaj von dije vorba jekh e avrehće: Zar či phabilah amaro ilo ande amende kana vo dijah vorba amenca e dromeha thaj kana dijah svato amengje andar o lil.
33Palal sigo uštile, athoska irisalje palpale ando Jerusalimo thaj arakhle gole dešujekhe dženen thaj e averen save seha lenca.
34A gala mothode: Čačipe si gova kaj o Baro uštilah thaj sikadilah e Simonohće.
35Thaj von lengje phende so sah po drom thaj sar pindžarde le kana phaglah o marno.
36A kana von dije vorba avilah o Isuso thaj ačhilah maškar lende thaj mothodah: Nek avel lačhipe tumenca.
37A von daralje golehtar thaj paćaje kaj dikhen jekhe čoh̄ane.
38A vov phendah lengje: Sohtar gadija daraljen? Sohtar inćaren gasavi godji ande tumaro šoro.
39Dikhen me va prne, me sem gova. šoreha, korkor̄e, astaren ma thaj dikhen, a o čoh̄ano naj le ni kokala ni mas, sar, ake, dikhen kaj mande si.
40Kana gava mothodah sikadah lengje pire va thaj pire prne.
41Akana ačhile lengje jakha thaj našti gova paćaje e dragostimahtar. A vov phendah lengje: Da li si tumen vareso te h̄al pe.
42Thaj von thode angla lehte jekhe peće mačhe thaj avgjin te h̄al.
43A vov gova lijah thaj h̄alah angla lengje jakha.
44Dindo vorba lengje: Gava si gola alava kaj phendem tumengje kana sema tumenca, so trubuj te ćerdol pe, so si ramome pala mande ando zakoni e Mojsijehko, ande prorokujra thaj ande psalmujra.
45Akana vov putardah lengje e godji te šaj haćaren thaj džanen e lila.
46Thaj mothodah lengje: Gadija si ramome, pišime, kaj o Hristo kam haćarel o dukhavipe thaj kam ićhardol thaj kam uštel e tritone djivesehko katar e mule.
47Thaj kam del pe vorba te e manuša pokajisajvon ando anav e Hristohko the te šaj muken pe sa e doša thaj o bangjipe ande sa e thema katar o Jerusalimo thaj gadija sa maj dur.
48A tumen ašunden, dikhlen thaj haćarden gava.
49Thaj dikhenta, ake, me kam bičhalav tumengje o alav mrne Dadehko, a tumen te ačhen ando foro dži kaj niči huljel upral pe tumende e Devlehko zuralipe.
50Thaj vov igjardah len dži ke Vitanija, thaj vazdindo pe va, blagoslovisardah len.
51Thaj kana gova ćerdah gjelo tar lendar thaj iklistah upre ando del.
52A von bangjile angla lehte the irisalje palpale ando Jerusalimo bare dragostimaha.
53Thaj von seha andar djive ando djive ande khangjiri thaj ašarde thaj blagoslovisarde e Devle. Čačipe.
AGOR
Dewis Presennol:
Lukahtar 24: GURB1938
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Englezongo thaj avere Themengo Biblijako Amalipe 1938.