Lukahtar 21
21
E phivljaći parava. E vorba e Isusohći e Jerusalimohće peravimahtar, thaj lehći vorba golehtar so kam avel leha.
1Kana vazdijah upre pe jakha, dikhlah e barvalen kaj čhuven piro dipe ande Devlehći kasa, e lovengji.
2A dikhlah vi jekha čor̄a phivlja savi thodah gothe duj parave.
3Thaj phendah vov: Ake, mothovav tume, gaj čor̄i phivli čhutah maj but gale savor̄endar.
4Kaj saijekh galendar thodah ande Devlehko lačhipe golehtar pirehtar, so sah le maj but, a voj katar po čor̄ipe dijah sa piro so saha la.
5Thaj kana khajekh vaćarela pala e khangjiri kaj si lačhardi e šukare bar̄enca thaj kaj si šukar ćerdini, phendah vov.
6Kam aven e djivesa gola ande save so god dikhen niči kam ačhel ni bar̄ po bar̄ te na rumisajvol, te na phagjol.
7Thaj dindo vorba pale phučle le: Sikamneja, a kana gova kam avel thaj savo znako si kana gova kam avel.
8A vov lengje dijah vorba: Arakhen tumen te na h̄oh̄aven tumen, te na ćheladon. But džene kam aven ande mrno alav thaj kam den vorba: Me sem gova, thaj gola djivesa pašile. Na džan pala lende.
9A kana ašunena kaj avilah o maripe thaj e čingar, tumen na daran, kaj gova sa trubuj maj anglal te avel, a gova naj vadžaj o paluvnipe, o agor.
10Thaj akana mothodah lengje: Ande gola djivesa kam ušten e manuša jekh pe avrehte, o thagaripe po thagaripe.
11A e phuv kam izdral thaj kam ćinoj pe, kam avel bokh thaj meripe thaj darape thaj bare znakujra upre po del.
12A m’anglal sa golehtar kam thoven pire va pe tumende thaj kam traden tumen thaj kam čhuven tumen ande khangjira thaj ando phandipe, kam igjaren tumen angla e thagara thaj angla e šorutne zbog mrne anavehtar.
13A gova kam avel pala o svedočanstvo tumee.
14Ićaren ande tumare ile, te na maj sig lačhardon, turvinjisajvon, sar kam den tumen vorba.
15Kaj me kam dav tume mrno muj thaj o džanglipe, pe savo našti nisavo tumaro dušmano kam khanči del vorba, niti kam fijeso šaj ćerel tumee.
16A kam phukaven pe tumende thaj kam traden tumen vi tumare dada, deja, phrala thaj e amala, a khajekh džene tumendar kam aven vi mudardine.
17Thaj sa e manuša našti kam dikhen tumen pala mrno anav.
18Thaj ni jekh balor̄o katar tumaro šoro niči kam h̄asardol.
19Ćeren lačhipe pala tumare odja tumare dukhaha.
20Athoska dikhena e Jerusalimo ćićidino trujal e vojskaha, e karnalenca. Pe golehte šaj džanen kaj pašile gola djivesa, kana ni jekh dženo niči kam ačhel an lehte.
21Pala golehte gola save avena ande Judeja, te našen, te vîr̄inpe ande plajina, a gola save arakhadona andre ando them, nek inklen, nek laden andar lehte avri, a godola save si avri te na den andre.
22Kaj gala djivesa si e djivesa e Devlehće h̄olinatar the sa gova kam ćerdol pe, so si ramome ande lila.
23Thaj kam avel baro pharipe e khamnjengje thaj golengje save den čuči e cikne čhavor̄engje. Kam a vel darano bibah̄talipe pe gaj phuv thaj bari h̄oli pe gala manuša.
24Kam peren e oštrone čhujrendar thaj kam ingjardon ando phandipe an aver them pe sa e riga. O Jerusalimo kam uštaven gola save niči džanen pala o Del, dži kaj niči ačhadona thaj nakhena lengje djivesa.
25Thaj kam aven znakujra po kham thaj po čhonut thaj ande čehraja, a maškar e manuša pe phuv kam avel pharipe katar e bibah̄ thaj katar o čalavipe e bare pajehće valondar, izdramatar.
26E manuša kam meren e daratar, ažućarindo gova so kam avel pe phuv, kaj sa e Devlehko zuralipe kam vazdinajvol e thanehtar, katar po than andejekh.
27Thaj pala golehte kam dikhen e čhave e manušehćire kaj džal po del e Devlehće kadar̄imaha thaj barimaha.
28A kana gava lela te avel, vazden tumare šore thaj dikhen kaj, eke, pašol tumaro ikalipe andar e džung.
29Thaj palal mothodah vov lengje gaja paramiči: Dikhen pe smokva thaj pe sa e kaš.
30Thaj kana dikhena kaj sikadon e patra, korkor̄e kam džanen kaj o milaj si paše.
31Gadija tumen kana dikhena kaj gova ćerdol pe, trubuj te haćaren kaj si paše o Devlikano thagaripe.
32Čačimaha me phenav tumee, kaj gala manuša save akana bajron niči kam nakhen dž kaj sa gova niči kam ćerdol.
33O del thaj e phuv kam nakhen, a mrne alava niči kam nakhen.
34Thaj arakhen tumen te na tumare ile phajron e bute h̄amahtar, h̄abenatendar, katar o matipe thaj katar e buća pe gaja phuv, te na avel tume gav djive, kana tumen lehće niči nadisajvon.
35Kaj gova kam avel sar e sastra, sar o laco, pe sa gola save hi džuvinde pe gaj phuv.
36Pala gova dikhen thaj molisajvon e Devlehće, djive po djive, sar kam našen sa golehtar, so god kam avel pe gaj phuv te šaj ačhen angla o čhavo e manušehko.
37Sor̄o djive sikavela vov ande khangjiri, a e jraćaha iklela te raćarel pe plajin sajvako anav si e Maslinaći.
38Thaj sa e manuša avena lehte teharinaha ande khangjiri te ašunen lehći vorba.
Dewis Presennol:
Lukahtar 21: GURB1938
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Englezongo thaj avere Themengo Biblijako Amalipe 1938.