Lukahtar 16
16
Paramiči katar e bičačimahko pristavo. O barvalo thaj o čor̄o Lazari.
1A pire amalengje phendah: Sah varesavo barvalo manuš, a sah le jekh bućarno. Gale bućarne phukade kaj čhorel lehko barvalipe.
2O barvalo akhardah le thaj mothodah lehće: So gava me ašunav pala tute? Sikav mae gova sar ićardan o ćher. Akana našti maj but ićare le.
3A o bućarno, dijah vorba an pehte: So te ćerav? O barvalo niči del mae te avav lehće ćherehko angluno, a me našti hanavav, a pale ladžavipe mae te džav te mangav po drom.
4Akana avilem dži mande, džanav so kam ćerav, te e manuša len ma ande pe ćhera, kana mandar den mrtik o arakhipe e ćherehko.
5Vov ćidijah gole savor̄en save seha udžilitne lehće gazdahće thaj phendah e anglune udžilesutnehće: Gaći san udžile mrne barvalehće.
6A vov phendah: Šel okave zejtino. Pale vov vaćardah: Le ćo lil, sigo beš thaj ramosar pinda okave.
7Pala golehte phendah e averehće: A tugaći san udžilesno? A vov phendah le: Šel okave, šel crdija gjiv. A vov pale mothodah lehće: Le ćo lil thaj čhuv oh̄tovardeš crdija.
8A o barvalo ašardah, hvalisardah e bimohće bućarne, sar ćerdah godjaver gova, kaj e akanutne čhave si maj bižaj, maj godjaver katar e čhave gole avere svetohće.
9A me tume mothovav: Ćeren tume amalen katar o bipaćamno barvalipe, a kana čor̄ajvona von kam tumen muken ande bimerimahće ćhera.
10Gova savo si paćivako ando cikno, gova avela paćavdo vi ando baro vareso. A gova savo si bipaćamno ando cikno, avela bipaćivalo vi ando baro.
11Thaj te naj sena paćamne ande bičačimahko barvalipe, ko šaj tume paćal ando čačuno barvalipe.
12Thaj te naj sena paćamne ando mangjin e averehko, ko kam tume paćal pala gova so si tumaro.
13Nisavo bućarno khatinde našti thovel kan duje barvalen. Jekhehće kam avel lačho, mišto, a e averehće kam avel bipaćivalo, ili kam pala jekhehte ćerel bući, a e avre niči kam kandel. Našti thovel kan lidon, vi e Devle vi o barvalipe.
14A sa gava ašunde e rašaja save volin e love, e saja, thaj von lije akana te prasan pe leha.
15A vov lengje phendah: Tumen sen gola save ćeren tumen paćivale angla e manuša, a o Del pale pindžarel tumare odja. So si paša e manuša barikane vazdino, kova si nahasili angla o Del.
16O zakoni thaj e prorokujra si dži ko Jovano. A katar akana e Devlehko thagaripe kam sikadinajvol andar o Sumnalo Lil, thaj sa o manušvalipe kamel te del ande lehte, an le.
17Maj loćhe kam nakhel o del thaj e phuv nego so kam jekh jekhor̄i rigor̄i andar o zakoni h̄asajvol.
18Savo god tradel pe r̄omnja thaj lel e avrija, gova ćerel khalkhanipe, a savo lela e r̄omnja muklinja e r̄omehtar, pale ćerel khalkhanipe.
19Varesavo barvalo manuš ujravela pe ande rupune ujravimate thaj ande phanrone, ćežalune gada, thaj gjive po djive ićardinajvola barikane ando vestipe.
20A sah jekh čor̄o, po anav Lazari, thaj vov pašljola angla lehće udara ande phubale, h̄andživale phuknja.
21Gova čor̄o kamlah te parvardol thaj te čaljol e prušukenca save perena katar o h̄ape e barvalehko. A e džućhela avena thaj čarena lehće phumbale blundor̄a.
22Thaj kana mulah gov čor̄o, igjarde le e angjelujra ande podji e Avramohći, a mulo tar vi o barvalo thaj prah̄osarde le.
23A kana o barvalo sah ande jag e bengjalengji thaj kana pećola, vov vazdijah pe jakha thaj dikhlah dural e Avramo tha ande lehći angali e Lazare.
24Thaj dijah vorba vov andar sa o krlo: Avrame, av kovle ilehko pe ma, bičhal mangje e Lazare nek bolel ando paj piro naj thaj te šudrarel, šiljarel mrni čhib, kaj phabivav, phagjinajvav ande jag.
25A o Avramo phendah: Ej čhaveja, de tu godji, ripardiv, kaj tut sah lačhipe ande ćo nakhlo džipe, a o Lazari dikhlah sa džungalipe. Vov si akana bah̄talimahko, a tu san bibah̄talo.
26Maškar amende thaj tumende si jekh bari h̄îv, handuk h̄ar, savi amen ulavel, pa kala prdalune našti nakhen tumende, a ni kola našti okotar karingate, amende.
27Akana phendah o barvalo: Av lačho, muk ći milja pe mande, dadeja, thaj bičhal le ke me dadehko ćher.
28Kaj si ma pandž phral, pa te sikavel len godjate, te niči aven ni von ande gasavi jag e grehondar.
29A o Avramo phendah lehće: Len si e Mojsije thaj e prorokujra. Nek len thoven kan.
30A vov phendah: Na, dadeja, Avrame, šaj avela lende khonik katar e mule thaj von kam pokajisajvon.
31A o Avramo phendah lehće: Te von niči kanden e Mojsije thaj e prorokon, niči kam paćan ni kole savo uštela katar e mule.
Dewis Presennol:
Lukahtar 16: GURB1938
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Englezongo thaj avere Themengo Biblijako Amalipe 1938.