Lukéstar 15
15
1Akaná avén paš‐pašé les o gümrükdžídes, te šunén les.
2Mŭrmŭrínen o rašajá thai o sikljardé, phenén: Adavká hem e bezexéngere manušén posreštínel, hem léntsa‐da maŗó xal.
3Vakerél lénge adiká paramísi, phenél:
4Siné jek dženó, isí‐da les šel bakré. Jekhés našavél, ačhón léske doksán thai énja, len‐da kamukhjél ándo pústo than, kadžál, ródel kai ródel, e našavdé bakrés dži kai arakhjél.
5Arakhjél. Togái uprál pe phiké thovél, lošánel.
6Kheré avél, pe amalén vikínel, avén o komšídes, lénge‐da phenél: Lošánen‐ta mánge, sostár e našavdé bakrés arakhljóm.
7Phenáv tuménge: Čoká k’oovél ándo nébos‐da. Kití lošanibé k’oovél, doksán‐u‐énja lačé manúš kána andré avén, ol‐da bi‐bezexéngere kai isí, du‐var pó‐baró k’oovél o lošanibé, kána andré avél jek bilačó manúš, ov‐da pišmáni kai isí.
8Siné‐da jek džuvlí, isí‐da la deš gurúši, jek‐da našavél, togái jek momelí tharél, sa šulavél ándo kher, ródel kai ródel, dži kai arakhjél.
9Ói kána arakhjél, vikínel, avén o amalá thai o komšídes, adiká‐da phenél: Lošánen‐ta mánge, sostár jek gurúši našavdjóm, amí les arakhljóm.
10Čoká phenáv tuménge: Kamlošánen o ángelja e Devléskere, jek bilačó manúš kána pišmáni ovél.
11Vakerél: Siné kai siné jek čórbadžis, isí‐da les dúi čhavé.
12O ternedér čhavó pe dadéske phenél: Ábe‐Bába, mangáv tut, dé‐man so ovél mánge katár to mangín. O dad‐da ulavél (razdelínel) po mangín maškár lénde.
13Jek diés, dúi diés, trin diés, kídel pe šéxja o ternedér phral, džal na‐avrí, džál‐peske ándo durutnó them, othé piibnása, lubnjéntsa o lové sa xal.
14Xaljás, sa. Uló jek barí bok ándo them, ov‐da čoŗó kai isí, bokhálilo, trušálilo.
15Geló kai geló tsanínel pes dekáte katár o them. Ov‐da, o čosámudžas, andé jekhé livadjá bičhalél les, ta te čaravél e balén.
16Ov‐da oví mangélas, bokhaló kai si, prŭštinjéntsa‐da te čáljol. Amá níko nána dinjás léske.
17Togái kórkoŗo péske vakerél: Kití xizmetkjárja andé me dadéskere kheréste isí, lénge‐da resél o maŗó, amí athé muljóm bokhátar!
18Kamuxtjáv, paš me dadés kamdžáv, te vakeráv léske: Bába‐be, mamúi e Devléste, thai mamúi túte bezexá kerdjóm.
19Nána sinjóm dostá lačó, ta te vikínen man to čhavó; ker ta t’ováv jek katár te xizmetkjárja.
20Uxtjél, džál paš pe dadés. — Hénos but isí durál, dikhél les o dad, lačó vogí čalavdó isí, prástal, perél léske turjál i men, del ángali, čumídel.
21Phenél léske o čhavó: Bába‐be, mamúi e Devléste, thai mamúi túte bezexá kerdjóm. Nána sinjóm dósta lačó, ta te vikínen man to čhavó.
22Amí phenél o dad pe slugánge: Pó‐sigo anén‐ta o nái‐šukár urjaibé, urjavén‐ta les, thovénta léske jek angrustí ándo vast, thai tservúlja (kondúrja) ándo piŗé.
23Thai anén‐ta athé e bakrés, e thuljardés, thai čhinén‐ta les, ta te xas, te piás, te lošánas.
24Sóske adavká aló mánge, mo čhavoŗó kai muló, kai našavdjóm les, pále arakhljóm les. Lilé te kerén, te lošánen.
25Akaná o phuredér phral ándi livádja butjarélas. Irínel‐pes, hem avél hem šunél, paš e kheréste sa bašaibé, thai khelibé.
26Vikínel jekhé slugás, phučél, saví si adiká butí.
27Phenél o xizmetkjári: Amí ne‐li džanés, aló to phral, to dad‐da e thulé bakrés čhindjás, sóske po čhavó sastó‐vestó aló.
28Ov‐da, o phuredér phral, rušél thai xoljánel, na mangél te del andré. Togái íkljol o dad, sa molínel‐pes léske.
29Amí phenél adavká pe dadéske: Áke edekí but berš služínav tut, hič to aláv dúi na kerdjóm, amí mánge oví jekhé buznoŗés hič nána dinján, axéngi (práznikos) ta te keráv me amaléntsa berabér.
30Amí adavká, to čhavó, kai po mangín lubnjéntsa sa xaljás, avél‐li pále kheré, tu čhinés léske andékhora e thuljardé bakrés.
31Phenél o dad léskoro: Mo čho, sa sinján paš mánde, so si so nanái mánge sa toŗó isí.
32Amí lačés sas, ta te lošánas, thai te xas, te piás, sostár to phraloŗó, muló kai sas, ašló dživdó, našavdó kai sas, aráklilo.
Dewis Presennol:
Lukéstar 15: ARL1912
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© British and Foreign Bible Society