जकरयाह 9
9
इसरायल के बईरीमन ला दंड
1एक अगमबानी:
हद्राक देस के बिरूध यहोवा के ये बचन अय
अऊ येकर परभाव दमिस्क सहर ऊपर पड़ही—
काबरकि जम्मो मनखे अऊ इसरायल के जम्मो गोत्र के नजर
यहोवा ऊपर हवय—
2अऊ येकर सीमना ले लगे देस हमात ऊपर लगे हवय,
अऊ सूर अऊ सीदोन ऊपर घलो लगे हवय, हालाकि ओमन बहुंत जानकार अंय।
3सूर ह अपन बर एक मजबूत गढ़ बनाय हवय;
ओह चांदी ला धुर्रा सहीं,
अऊ सोन ला गली के चीखला सहीं कुढ़ोय हवय।
4पर परभू ह ओकर जम्मो चीजमन ला ले लीही
अऊ ओकर सक्ति ला समुंदर म नास कर दीही,
अऊ सहर ह आगी म जलके नास हो जाही।
5अस्कलोन सहर ह येला देखके डरही;
गाजा सहर ह बहुंत तकलीफ म पड़के छटपटाही,
अऊ एहीच हालत एकरोन सहर के घलो होही, काबरकि ओकर आसा ह खतम हो जाही।
गाजा ह अपन राजा ला गंवा दीही
अऊ अस्कलोन ला तियाग दिये जाही।
6एक दोगला जाति के मनखेमन असदोद सहर ऊपर अधिकार कर लीहीं,
अऊ मेंह पलिस्तीमन के घमंड ला टोर दूहूं।
7मेंह ओमन के मुहूं ले खून,
अऊ ओमन के दांतमन के बीच म छोंड़े गय जेवन ला ले लूहूं।
तब ओमन, जऊन मन बच जाहीं, ओमन हमर परमेसर के हो जाहीं
अऊ यहूदा म एक गोत्र बन जाहीं,
अऊ एकरोन ह यबूसीमन सहीं हो जाही।
8पर मेंह अपन मंदिर ला लुटेरामन ले बचाय बर
ओकर पहरेदारी म डेरा डालहूं।
कोनो घलो अतियाचारी फेर कभू मोर मनखेमन ऊपर अधिकार नइं कर सकहीं,
काबरकि अब मेंह पहरेदारी करत हंव।
सियोन के राजा के अवई
9हे बेटी सियोन, बहुंत आनंद मना!
हे बेटी यरूसलेम, जय-जयकार कर!
देखव, तुम्हर राजा ह तुम्हर करा आवत हे,
ओह धरमी अऊ बिजयी होके,
बिनम्र अऊ एक गदहा ऊपर,
एक बछेड़ा ऊपर, गदही के एक बछेड़ा ऊपर सवारी करे हवय।
10मेंह एपरैम ले रथमन ला
अऊ यरूसलेम ले लड़ई के घोड़ामन ला ले लूहूं,
अऊ लड़ई के धनुसमन ला टोर दिये जाही।
तब ओह जाति-जाति के मनखेमन के बीच म सांति के घोसना करही।
ओकर राज ह एक समुंदर ले लेके दूसर समुंदर तक
अऊ नदी#9:10 या फरात नदी ले लेके धरती के छोर तक बगरही।
11जहां तक तुम्हर बात अय, तुम्हर संग मोर करार के लहू के कारन,
मेंह तुम्हर कैदीमन ला ओ सूखा खंचवा ले बाहिर निकाल दूहूं।
12हे आसा लगाय कैदीमन, अपन गढ़ म लहुंट आवव;
अभी घलो मेंह घोसना करत हंव कि मेंह तुमन ला दू गुना लहुंटा दूहूं।
13मेंह यहूदा ला अपन धनुस सहीं मोड़हूं
अऊ एपरैम ले येला भर दूहूं।
हे सियोन, मेंह तोर बेटामन ला
यूनान के बेटामन के बिरूध भड़काहूं,
अऊ तोला योद्धा के तलवार सहीं कर दूहूं।
यहोवा परगट होही
14तब यहोवा ह ओमन ऊपर परगट होही;
अऊ ओकर तीर ह बिजली सहीं चमकही।
परमपरधान यहोवा ह तुरही फूंकही;
ओह दक्खिन के आंधी म होके चलही,
15अऊ सर्वसक्तिमान यहोवा ओमन के रकछा करही।
ओमन नास कर दीहीं
अऊ गोफन के पथरामन के दुवारा जयवंत होहीं।
ओमन पीहीं अऊ अइसने हल्ला करहीं जइसने मनखे मंद पीके करथें;
ओमन ओ कटोरा सहीं भर जाहीं
जेकर उपयोग बेदी के कोनटामन म छिंचे बर करे जाथे।
16जइसन एक चरवाहा ह अपन झुंड ला बचाथे
वइसन ही यहोवा ओमन के परमेसर ह ओ दिन अपन मनखेमन ला बचाही।
ओमन ओकर देस म अइसने चमकहीं
जइसने मुकुट म लगे रत्नमन चमकथें।
17कतेक जादा मन ला भानेवाला अऊ सुघर होहीं ओमन!
जवान छोकरामन अनाज खाके,
अऊ मुटियारी छोकरीमन नवां अंगूर के मंद पीके मजबूत हो जाहीं।
Dewis Presennol:
जकरयाह 9: एस सी ए
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
पबितर बाईबल, समकालीन छत्तीसगढ़ी अनुवाद™ एस सी ए™
कापीराईट © 2012, 2016, 2021, 2024 Biblica, Inc.
Biblica, Inc. के अनुमति के दुवारा उपयोग। पूरा संसार म जम्मो अधिकार सुरछित।
Holy Bible, Chhattisgarhi Contemporary Version™ SCA™
Copyright © 2012, 2016, 2021, 2024 by Biblica, Inc.
Used by permission of Biblica, Inc. All rights reserved worldwide.