Luka 16
16
Gbɔng mwât fwom wo netsitsɛng neves
1Yɛsu a to yâng bemât masâ fwom mɛ, “Darwey hwak á sɛ̀ de á vɔk gbɔng mwât fwom; ko bá vey ha a dalɔ mo wɔgɔ, mwât fwom o e wey a yɛ na yas. 2Dalɔ mo a yila hɛ, a yang ɛ, ‘Me wokos sɛ́ e ra hwo ɛ? Dura a me begwong de hwà ra fwom na yas hom, yaga e ngamo nuyel, hwà rɔda to tɔk sè gbɔng mwât fwom hom wɛt.’ 3Mwat o a hwo ye e yey mɛ, ‘Háay! Dalɔ hom a sé kyè wɔ̀ pat me e fwom, ko sɛ̌ me tala ɛ? Ma vɔk gâp hôw cap wɛt, ko me wok rekyen na me ra won arɔng. 4Yàa! Ma tɔk pyɛ de mê ra, yaga na jeng de ba ro me e fwom o, ma rɔda vɔk besa de bê sey me e nelɔ mɛn.’
5“Ko a yila mwa bemat de ba vɔk badu dalɔ mɛ. A hwo yâng mwât mɛsɛng o, ‘Dalɔ hom e rangal hwo redu sɛ́ ɛ?’ 6Mwat o a yang ɛ, ‘Bègbɔng bètus něy naga.’ Mwât fwom o a yang ɛ, ‘Bwok-jɛk mō a gwane; sangal ziri, na hwo jɛk bègbɔng bètus kuru batungun.’ 7A to yâng mwat o hwak, ‘Ko hwo ɛ? E rangal hwo redu sɛ́ ɛ?’ Mwat wo neba mo a yang ɛ, ‘Gbɔng shīt naga betungun yê alkama.’ Ko mwat fwom o a to yang ɛ, ‘Bwok-jɛk mō a gwane, na hwo jɛk gbɔng shīt naga benaas.’
8“Ko dalɔ mo a somo mwât fwom mɛ de a dura tsak o wɛt yaga netsitsɛng de a ra. Yaga bemât jey yemo ba dal vemo de ba sé vê negbey na netsitsɛ̂ng kyé na bemɛn.”
9Ko Yɛsu a to yang ɛn, “Ma sé ha a yin, rá in fwom na yas jey yemo, na yin a vo mɛ̀ besa, yaga na jeng de yê tala hɛ, be ba sey in e kwɔ̂n sangal hê neshey gbak-gbak. 10Mwat de be tó yey na yɛ e rà pyɛ hyet wɛt, ba rɔda tó yey na yɛ e ra pyɛ́ pyak arɔng wɛt. Mwat de e dura tsak o e ra pyɛ hyet wɛt, a rɔda dura tsak o e ra pyɛ́ pyak arɔng wɛt. 11Ka sede yin kwong yin e dura tsak o e vɔ̂k yas jey yemo wɛt, ko e wà de a rɔda nɔng in yas ye tsak o e vwɔ min arɛt? 12Ko ka sede yin e dura tsak o e ra pyɛ̂ mwat hwak wɛt, ko e wà de a rɔda nɔng in pyɛ́ de yê sè myin arɛt?
13“Vit a mwât fwom de ê tɔk ra a beda beba fwom. Kɛ ê bɛrɛng womo ves na a simo woro, kɛ ê tɛ̀ nehywɛ mɛ e ra hâ womo na a byɛs woro. Yin ê tɔk ra a Dagwi tanga yas fwom e jeng jining wɛt.”
Begwong Dagwi na vê bemât jey
(Mat 11:12-13; 5:31-32; Mar 10:11-12)
14Sede BeFarisi ba wok há hane mwa, ba hwo shɛgɛsh Yɛsu, yaga yɛn a kat simo dyām. 15Ko Yɛsu a yang ɛn, “Yin vɛ, yin e dura e nuyêl bemat, yin a sé cik, ko Dagwi a tɔk neyey min. Yaga pyɛ́ de bemat be dal na simo mo sizɔng ya sé byɛm-byɛm e nuyêl Dagwi.
16“Gyam na Yohana wo batisma a vey, bà ra fwom na Badu Mose tanga bebok-basa de bezarap Dagwi bà kana jɛk. Yimo yi e jeng o, ba sé shara Yɛgɛt Yat wɔgɔ, Dagwi a rɔda re negwɔm e ra jey, ko kawɛ mwat a yel ɛ̀ na yol. 17Ko a dal na nebegelek na lagwi tanga jey be tala hɛn, de bê vuru keyis kesɛl o e jɛ̂k Badu mo.
18“Kawɛ mwat de a ro hwā mɛ, na a to vo hwak a sé ra nejwang. Ko mwat de a vo hwā de ba ga kana ro ɛ a sé ra nejwang arɔng.”
Darwey hwak tanga Lazarus
19“Darwey hwak á sɛ̀ de á tɔrɔ hɛ na berugu berat de ba vɔk dyām sizɔng, ko á sè e ji sangâl neta kahɛ tuk. 20Mwat hwak arɔng á sɛ̀ de á sè pɛ́ng-pɛng. Bá tang ɛ, à Lazarus, ko rebek mɛ rá sila na benot. Á dyɛngɛs e rwi duk lɔ darwey o, 21na a simo a hǎl neshǐ pyɛ̂ darwey o. Ko pyɛ de yá gwɛ̌ dal na neves mwa, yɛ à bevu de bá vɛ̀sɛ lɛlɛ baram mɛ mo.
22“A vane ano, Lazarus a ku, ko betom-lagwi ba jut ɛ na a wɔ̀ sangal tanga Abraham. Darwey o arɔng a ku, ko ba lɛrɛ hɛ e sak. 23E hwomo e kwɔ̂n bevuvwel, a sé e ji rezot sedesi. A ye garang, ko yi e jey a di Abraham tanga Lazarus bagat e vwara mɛ. 24A hwo yila, ‘À Da Abraham! Tosho reyɔm hom, na hwo tomo Lazarus, na a tɛ̀ tîn kwɛn vwɔ mɛ e ji nshi, na a tɛ̀ a me e lem hom, na a bin sè a me tyaang, yaga ma sé sɔ reyɔm ding-ding e ji kya hemo!’
25“Ko Abraham a yang ɛ, ‘À hwey hom, bàre na jeng de yin á sè e jey na neken, hwá sɛ̀ pyɛ́ ryat pyak, ko Lazarus á sɛ̀ pyɛ́ vyes, ko a remo, yɛ a sé wok neta e ngamo, ko hwo hwà sé sɔ reyɔm ding-ding. 26Ko hane zɔng wɛt, ba ga ta gwogbɔng gwohwes gwolwis o e tē mot na yin, yaga na vit a mwat de e simo ye dɔ yi e gura mot vey na yin e tɔk ra ano, ko vit a mwat de e tɔk ye dɔ arɔng yi e gura min vey na wot.’ 27Darwey o a ye, ‘Ka sede ano, à Da, ko ma sé ra won na hwo, tomo Lazarus vɔk e lɔ da hom, 28yaga ma vɔk begwa hom betungun. Tik na yɛ a wɔ̀ tusa hɛn, na yɛn a to ba yel e kwɔ̂n rezot hemo wɛt.’
29“Ko Abraham a ye, ‘Yɛn a vɔk bebok-basâ Mose tanga ve bezarap Dagwi; tik na yɛn a wet betong na pyɛ́ de ba jɛk e ji vɛ.’ 30Darwey o a toyo a yɛ, a ye, ‘À Da Abraham, vàne ba vey wɛt! Ko ka sede hwak e ji vemo de ba ga kushu a sogo na a wɔ́ na yɛn, yɛn a rɔda doyo yi e banɛn mɛn.’ 31Ko Abraham a yang ɛ, ‘Ka sede yɛn a wet betong na pyɛ́ de Mose tanga bezarap Dagwi bà jɛk wɛt, ko ka mwat hwak a ka sogo yi e reku, yɛn a rɔda sege bare mɛn wɛt.’ ”
Dewis Presennol:
Luka 16: bomBI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust