Luka 12
12
Túsa e ra vɔ̂k nenu-neba
(Mat 10:26-27)
1E jeng yane, sede bemat gu kpɛɛ bá sè tús ɛn e dem hining, yɛn á bɔrɔs bemɛn, ko Yɛsu á tānga yâng bemât masâ fwom mɛ, “Tē in naka na géy-sing BeFarisi de wa sé negwɔn vɔ̂k nenu-neba. 2Vit a pyɛ de ba ga kana bang de ba rɔda ba wunta yɛ wɛt, ko vit a pyɛ de ya sé ye neyaang de ba rɔda ba tɔk yɛ wɛt. 3Yaga ano, kayɛ pyɛ de yin a ga ha e lwīl, ba rɔda wok yɛ e kwɔ̂n negbey ko kayɛ pyɛ de yin a ga ha a bemin show-show e ji duk, ba rɔda ba mok yɛ e rahwol.”
Mwat de bê wok bengyip mɛ
(Mat 10:28-31)
4“À besa hom, sǎ me ha a yin, yin wok bengyip bemat de be mɔrɔ rebêk mwat, ko e bama mo, yɛn e to tɔk ra pyɛ cak de ya dal yane wɛt. 5Ko ma rɔda dura a yin mwat de a jam na yin a wok bengyip mɛ: Wok in bengyip Dagwi, yɛ de a vɔk retô mɔrɔ, de a to vɔk retô bomo e kwɔ̂n kya arɔng. Ey, ma sé ha a yin, e yɛ wɛ de yin ê wok bengyip mɛ!
6“Be rɛsɛl nenon tyǐ netungun e nû bekobo beba wɛt arɛt? Ko mwa ano, Dagwi a ye bam a kehak e ji nɛ wɛt. 7Àa! Dagwi a ga basa nepyak setot e ratô kawɛ e ji min. Yin wok bengyip wɛt; yin a dal nenon tyǐ pyak na nerey!”
Dura tɔ̂k Kristi e nuyêl bemat
(Mat 10:32-33; 12:32; 10:19-20)
8“Ma to sé ha a yin, kawɛ mwat de e dura wɛshɛrɛk e nuyêl bemat, a tɔk me, ko Me de ma tɛ́ me mwat ma rɔda ba dura wɛshɛrɛk e nuyêl betom-lagwî Dagwi, ma tɔk ɛ arɔng. 9Ko kawɛ mwat de e tono e nuyêl bemat a tɔk me wɛt, ba rɔda ba tono hɛ e nuyêl betom-lagwî Dagwi arɔng.
10“Dagwi ê tɔk hàla a kawɛ mwat de a ha há ves e ra Me de ma tɛ́ me mwat, ko a rɔda hàla a mwat de a ha há ves e ra Gabik Jɛrɛ wɛt.
11“Jeng de yɛn a rɔda vos in na be vɔk na yin e beduk re fongol, kɛ e nuyêl begwɔmna kɛ bedagwɔm, na be ra a yin shɔt, yin sap gwong de yin ê dul mɛ̀ bato min wɛt, kɛ pyɛ de yin a rɔda ha arɔng wɛt. 12Yaga e jeng o, Gabik Jɛrɛ ha rɔda basa a yin pyɛ de yin a rɔda ha.”
Darwey de a sé tɔn
13Mwat hwak yi e ji regyɛng bemat o a hwo yâng Yɛsu, “À Mwat Basa, hā a gwa hom a gas pyɛ̂ nedanelɔ tanga me.”
14Yɛsu a hanat, a yang ɛ, “À sa! Wà a tɛ̀ me mwât shɔt kɛ mwât gas a yin pyɛ́ arɛt?” 15Ko a re nuyel na ha a yɛn mwa wɔgɔ, “Tē in naka, na yin a gyeng bato min yi e kayɛ yerê gananâng pyɛ́. Yaga mwa ano de mwat a vɔk pyɛ́ pyak, nepyak pyɛ́ mo ne nɔng ɛ neken wɛt.”
16Ko a ha a yɛn gwɔrɔ-há hemo, a yang ɛn, “Darwey hwak a vɔk cāp de ya nɔng ɛ pyɛ́ tyɔng wɛt. 17Ko a hwo bare e yey mɛ, ‘Mê ra sɛ́ ɛ? Yaga ma vɔk kwɔn de mê tik ɛ̀ pyɛ́ yemo mwa wɛt.’ 18Ko a ye, ‘Pyɛ ma yemo de ma rɔda ra: Ma rɔda gangas begban hom vemo na me lɔk berey o, ko e ji vɛ mê tik ɛ̀ pyɛ̂ hwiri hom mwa na bwang pyɛ́ hom cak arɔng. 19Ano, ma rɔda yâng tó hom, “À sa-pen, hwà ga sɛ̀ pyɛ́ shɛrɛk de yê wul a hwo neshey pyak. Sangal bes, na hwo re, na hwo sɔ, na hwo wok neta mó!” ’ 20Ko Dagwi a yang ɛ, ‘À hwo tɔn! Yunung nabwalak ma rɔda jut neken mō; ko pyɛ́ de hwà ga kana tula mwa yê tɛ́ ɛ yê wǎ kwong ɛ?’ ”
21Yɛsu a yɛnɛ há mo, a ye, “E ba sè tyɛng ano na womo de e tulsa a tó mɛ yas, ko e nuyêl Dagwi yɛ a vɔk yas wɛt.”
Tɛ̀ in gap e ra Dagwi sana sap
(Mat 6:25-34)
22E bama mo, Yɛsu a yâng bemât masâ fwom mɛ, “Yaga ano, ma sé ha a yin: Yin kwon sap e ra pyɛ de yin ê re na yin a sangal mɛ̀ beken, kɛ e ra berugu de yin a rɔda tɛ̀. 23Yaga neken na dal pyɛ̂ re, ko rebek arɔng ra dal berugu. 24Bɛrɛng hin behwǎk: Be tus pyɛ cak wɛt, be yɛt bwal arɔng wɛt, be vɔkɔs befang kɛ begban wɛt; ko mwa ano, Dagwi e nɔngɔ̂s vɛ pyɛ̂ re! Nekên benon na se sɛ́, ka sede ba tyɛngrɛ nɛ na nemin arɛt? 25E wɛ̌ mwat e ji min de e tɔk gwɛ̌ pɔlɔ mɛ e jey, yaga e sap neken mɛ arɛt? 26Yàa! Ka sede yin e tɔk ra kepyɛ yere kane wɛt, ko yaga sɛ́ de yin e sap e ra bwang pyɛ́ mo arɛt? 27Bɛrɛng hin gwong de bejamuk hey be ras: Be ra fwom, kɛ be lɔk berugu yaga bato mɛn wɛt. Ko ma sé ha a yin, mwa ano de yɔ̀m Gbɔng Gwɔ̀m Sɔlɔmɔn yà sè ryat sizɔng, ko nerât yɛ na ka vey ne gwining — e ji bejamuk vane wɛt. 28Ka sede Dagwi e tɛ̀sɛ sɔng gwo sè rwat ano, gwomo de gwa sé kwen yunung ko nahwol vit a gwɛ, ba ga kyé mɛ̀ pyɛ́ na gwɛ, tàga yin arɛt? À yin de yin e tɛ̀ gap min mwa e ra me wɛt!
29“Yin dopse bare e ra pyɛ́ de yin ê re kɛ yēmo de yin ê sɔ wɛt. Yin sap pyɛ cak e yey min wɛt. 30Yaga a sé e mwa bemat de ba tɔk Dagwi wɛt de ba sê bûm ɛn e de jāmâ pyɛ́ yemo, ko Da min a tɔk, yin e simo pyɛ́ mo. 31Nduga yin tānga jāma pyɛ́ de ya sé yê Segwɔm Dagwi, ko Dagwi a rɔda gwɛ̌ a yin ɛ̀ pyɛ́ yane mo mwa arɔng.”
Báng in yas min e lagwi
(Mat 6:19-21)
32“Yin vɔk bengyip wɛt, yin de yin a sé sede kwara swɛl, yaga Da min a vɔk yey pyɛng na yin a re negwɔm tanga yɛ e ji Segwɔm mɛ. 33Rɛsɛl hin mwa pyɛ́ de yin a vɔk, na yin a nɔ̂ng bepɛng dyām o. Jāma hin a bato min berabâk dyām de be kwop wɛt, na yin a bang yas min de yê tala hɛ wɛt e lagwi. E hwomo, vit a gbik de e tɔk wɔ̀ shigi yɛ; bekǔt arɔng be tɔk re yɛ wɛt. 34Yaga yey min ya rɔda sè e kwɔn de yin a bang ɛ̀ yas min.”
Besam de be bɛrɛng nekanang
(Mat 24:43-51)
35“Yóng in, na yin a rɔgɔs bègbɔng berugu min gak na begyindi yaga fwom, na yin a tɛ̀ nekyǎ bekywa-kya min ne lolo. 36Sè in sede besam de ba sé gyeng dalɔ mɛn na a vɛ̄ hɛ yi e dem nzem weneng. Jeng de a vey, a kwɔktɔ rwi lɔ mo, ko remo-remo, yɛn a rɔda wunta a yɛ. 37Vê yey pyɛng a besam vemo de dalɔ mɛn ê pom, a sɛ̀ ɛn ba sé bɛɛ nekanang. Tsak o mwin me ha a yin: Dalɔ mo a rɔda rɔgɔs gbɔng rugu mɛ, ko ê tɛ̀ ɛn, yɛn a sangal na a nɔng ɛn pyɛ̂ re. 38Vê yey pyɛng a besam vemo de dalɔ mɛn a rɔda sɛ̀ ɛn ywey, ka a ka vɛ̄ hɛ nakabadem kɛ e rwa hwol gasi ayi. 39Ko bàre hin, ka sede dalɔ a yâng tɔk jeng de gbik ê wɔ̀ yel e lɔ mɛ, ka ê bɛɛ jey na a ro ɛ nà yel ɛ̀. 40Ko yin arɔng, sangal hin e yong in, yaga Me de ma tɛ́ me mwat ma rɔda ba vey e jeng de yin ê sè gyeng vey hom wɛt.”
Sam rwat na sam vwes
(Mat 24:45-51)
41Bitrus a hwo yâng Yɛsu, “À Darwey, hwà sé ha gwɔrɔ-há hemo yaga wot kɛ yaga kawɛ mwat arɛt?”
42Darwey a hanat, a yang ɛ, “E wǎ kwong de a sé gbɔng sam wo netsitsɛng de be tó yey na yɛ wɛt arɛt? A sé e womo de dalɔ ê tik a yɛ bɛrɛ̂ng lɔ mɛ, na a nɔngɔ̂s bwang besam lɔ mo pyɛ́ mɛn yê kahɛ tuk tyɛng e ra jeng. 43Wo yey pyɛng a gbɔng sam de dalɔ mɛ mo ê sɛ̀ ɛ a sè ra ano jeng de a vɛ̄ hɛ! 44Mwin me ha a yin: Dalɔ mo a rɔda nɔng ɛ bɛrɛng pyɛ̂ nedanelɔ mɛ mwa. 45Ko ka sede sam o a ye e yey mɛ, ‘Kée! Dalɔ hom ê ros na vɛ̄ hɛ’, ko yɛ ê hwo dak bwang besam beras o na beha mo, ko ê hwo re, e sɔ sɛ̌ a hwo feng. 46Dalɔ̂ sam o a rɔda ba to ɛ pút, ko sam o a rɔda ba tɔk jeng o wɛt. Ko dalɔ mɛ mo ê gas ɛ zang ba na a wey na yɛ, ko ê wuna hɛ na bemat de ba sey tsak o na Dagwi wɛt.
47“Sam de a tɔk pyɛ de dalɔ mɛ e simo yɛ a ra, ko a yong ɛ wɛt, ko a to kyɛ́ ɛ nà ra yɛ, a rɔda ba sɔ barâm dak sizɔng. 48Ko sam de a tɔk pyɛ de dalɔ mɛ e simo na yɛ a ra wɛt, ko a ra pyɛ de ya jam dak, a rɔda sɔ baram hyet. Kawɛ mwat de ba nɔng ɛ pyɛ́ pyak, ba rɔda ba simo pyɛ́ pyak yi na yɛ; ko mwat de ba tik pyɛ́ pyak e vɔ mɛ, ba rɔda ba jāma pyɛ́ de ya dal yane mo na nepyak yi na yɛ arɔng.”
Yɛsu a vey na a gas bemat
(Mat 10:34-36)
49“Ma vey na me ba tɛ̀ kya e jey; ko a sé a me ka ba ga kana pɛl hɛ! 50Ko batisma wa sɛ́ de ba rɔda tɛ̀ a me wɛ, ko yey hom ye lashe hɛ, sɛ̌ ba ga yɛnɛ tɛ́ a me wɛ e ngyen. 51A sé a yin sede ma vey na me tɛ̀ bemât jey be sangal tyang na bemɛn arɛt? Wey, ma sé ha a yin, ma vey na me tɛ̀ ɛn be gas ɛn e negya. 52E ngamo nuyel, lɔ de ha vɔk bemat betungun ha rɔda gas ɛ, betat ba rɔda ra repugu na beba, ko beba ba rɔda ra repugu na betat. 53Ano kwong, yɛn a rɔda gas ɛn, da a rɔda ra repugu na hwey mɛ, ko hwey ha rɔda ra repugu na da mɛ arɔng. Neng a rɔda ra repugu na hwóng mɛ, ko hwóng mɛ a rɔda ra repugu na neng mɛ arɔng. Dekwop a rɔda ra repugu na gwel mɛ, ko gwel a rɔda ra repugu na dekwop mɛ arɔng.”
Misâng cap-hâ jeng yemo
(Mat 16:2-3)
54Yɛsu a to yâng regyɛng bemat o, “Jeng de yin e di rele ra yi e tā, remo-remo yin e ye, ‘Rwak wo kyè wɔ̀ rop’, ko wô rop. 55Ko jeng de yin e wok gûl batin gwo pɛsɛl, yin e ye, ‘Jey ye kyè wɔ̀ fes’, ko yê fes. 56À yin bemât nenu-neba! Yin e tɔk bɛrɛng jey tanga lagwi, ko yin e misang cap-hâ pyɛ́ de ya sé e ji mo, ko yaga sɛ́ de yin e tɔk misang cap-hâ pyɛ̂ jeng yemo wɛt arɛt?”
Yóng in na mwât tɛ̂ sekun min
(Mat 5:25-26)
57“Yaga sɛ́ de yin e masa pyɛ́ de ya sé ryat pyɛ min wɛt arɛt? 58Ka sede shɔt ya wuna hwo na mwat hwak de e simo a wɔ̂ kun mō e duk shɔt, ko ye ngyɛ́k na hwo yong há mō na yɛ e gwong e ngyen. Ka ano wɛt, ko a rɔda hwɔlɔ hwo e nuyêl mwât shɔt, mwât shɔt o a rɔda nára hwo e vɔ mwât fwôm gwɔ̀m, ko yɛ mo a rɔda tɛ̀ o e ngyang. 59Ma sé ha a hwo, mwin, hwà rɔda nusu yi e hwomo wɛt, sɛ̌ hwà tala kakɛ kedyam de e rangal hwo.”
Dewis Presennol:
Luka 12: bomBI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust