Luka 11
11
Bása Yɛsu e ra râ won
(Mat 6:9-13; 7:7-11)
1Tuhak, Yɛsu á sè ra won e dem hak. Jeng de a tala, gwining e ji bemât masâ fwom mɛ a yang ɛ, “À Darwey, bàsa a wot râ won, tyɛng sede remo de Yohana á kana basa a bemât masâ fwom mɛ.”
2Ko Yɛsu a yang ɛn, “Jeng de yin a sé ra won, yē in:
“ ‘À Da,
tik na be nɔ̂ng reza mō rê jɛrɛ nerey;
tik na jeng de hwô re negwɔm ye vey.
3Nɔng ot kahɛ tuk pyɛ̂ re de wot e simo.
4Hàla a wot banɛn mot, yaga wot pyɛ mot wot e hàla a kawɛ mwat de e ra a wot banɛn.
Hwo tik na wot a wɔ́ e kwɔ̂n setɔgɔs wɛt.’ ”
5Ko a to yang ɛn, “Sede wot a ye ngan: Mwat hwak e ji min a vɔk sa mɛ, ko a hwo wɔ na yɛ nakabadem, a yang ɛ, ‘À sa hom, hwɔp a me bāgat kpam-tuk batat. 6Yaga sa hom hwak a pom a me a remo yi e kwɛngɛl, ko ma vɔk pyɛ de mê nɔng ɛ wɛt.’ 7Ko sa mɛ mo a hanat yi e hwomo e ji mo wɔgɔ, ‘Hwo shɔk a me yey wɛt! Ma ga kana man rwi duk, ko me na nèy hom wot a sé e dyɛngɛ. Mê tɔk sogo na me nɔng o pyɛ cak wɛt.’ 8Ko ma sé ha a yin: Mwa ano de mwat o ê sogo na a nɔ̂ng sa mɛ pyɛ cak yaga nesa mɛ wɛt, ko a rɔda sogo na a nɔng ɛ kayɛ pyɛ de a simo, yaga sa mɛ mo a shonong e ra yɛ.
9“Yaga ano, ma sé ha a yin: Rá in wôn pyɛ de yin e simo na Dagwi, ko a rɔda nɔng in. Jāma hin, ko yin a rɔda sɛ̀ pyɛ mo. Kwɔgɔt hin, ko ba rɔda wunta a yin rwi duk o. 10Yaga kawɛ mwat de e ra wôn pyɛ cak, ba rɔda nɔng ɛ yɛ; ko yɛ de e jāma pyɛ cak, a rɔda sɛ̀, ko yɛ de e kwɔgɔt kwong, ba rɔda wunta a yɛ rwi duk o. 11E wà e ji min de a sé da de a rɔda nɔ̂ng hwey mɛ gwofwa jeng de ha ra wôn kpam-tuk arɛt? Ko e wà de a rɔda nɔ̂ng hɛ gwɔ̄m jeng de ha ra wôn tɔk arɛt? 12Kɛ e wà de a rɔda nɔ̂ng hɛ lyang jeng de ha ra wôn regyi arɛt? 13Ka sede yin kwong de yin a sé beves yin e tɔk nɔ̂ng nèy min pyɛ́ ryat, tàga Da min e ji lagwi a rɔda nɔ̂ng vemo de ba ra won na yɛ Gabik Jɛrɛ!”
Yɛsu na Baal-Zɛbul
(Mat 12:22-30; Mar 3:20-27)
14Tuhak, Yɛsu á sè pat ceng cak de ya tɛ̀ mwat hwak a tɛ́ ɛ kpey. Jeng de ceng o ya nusu, mwat o a hwo ha, ko bemat ba langat hɛn. 15Ko bemat o behak ba ye, “A sé e Baal-Zɛbul, gwɔ̀m cēng, de e nɔngɔs hɛ reto na a paa mɛ̀ cēng!”
16Ko behak kwong ba simo be mara hɛ; yaga ano, yɛn a rangâl Yɛsu na a dura a yɛn pyɛ bes cak yemo de yê dura, reto mɛ ra yi na Dagwi. 17Ko Yɛsu a tɔk bare mɛn, a yang ɛn, “Kasɛ̌ sevwel de sa gas ɛ na se tó como na tô sɛ sa rɔda lashe hɛ. Ko kahɛ lɔ de ha gas ɛ na tô hɛ ha rɔda gaba arɔng. 18Ko ka sede Shetan a yâng sé tó como na tó mɛ, yi e rɛ̌ de segwɔm mɛ sê tumal arɛt? Ma ye ano, yaga yin a ye, me paa cēng na reto de Baal-Zɛbul a nɔng me. 19Ko ka sede me paa cēng na retô Baal-Zɛbul, ko bemât raa min ɛ̄, be paa yɛ̄ na retô wà arɛt? Di, pyɛ de bemât raa min o be ra ye dura tsɛng-tsɛng, yin a ga buru. 20Ko sede remo de me paa cēng yi na retô Dagwi, ko hane he dura, Dagwi a ga hwo re negwɔm e ra yin.
21“Ka sede mwât gap a ga yong ɛ na pyɛ̂ yol mɛ, na a gyeng mɛ̀ lɔ mɛ, ko pyɛ cak yê ra pyɛ́ mɛ wɛt. 22Ko ka sede mwat de a dal ɛ na gap a wɔ̀ hwo ɛ, na a di wɛng e ra yɛ, ko mwat o a rɔda hashe pyɛ̂ yol mwât mɛsɛng wane de á sè dak mɛ̀ ragey na yɛ̄, na a to gas a bemɛn pyɛ́ de a hashe yi na yɛ̀.
23“Kawɛ mwat de a sé nwang me wɛt a kyɛ́ ɛ me; ko yɛ womo de e sɛlɛ me e de tulâ pyɛ́ wɛt e shara yɛ̄.”
Ceng de ya toyo
(Mat 12:43-45)
24“Jeng de ceng ya ga nusu yi e ji mwat, ya sé kyě kyè e nedem nehwogot na ye jāma kwɔn de yê pɔng ɛ̀. Ka sede ya sɛ̀ wɛt, ko ye yâng tô yɛ, ‘Mê to me vɔk e lɔ hom de ma ga kana yi ɛ̀.’ 25Ko jeng de ye wɔ, ye wɔ̀ sɛ̀ lɔ mo ba ga yishing hɛ haalal, ko ba ga to yong hɛ mwa gyat. 26Ye to kyè, ko ye wɔ̀ vey na cēng o cak tyaama de ya dal yɛ̀ na neves, ko ye yel na ye sangal e hwomo. E yɛnɛ mo, negwɔn sangâl mwat o ne dal ne mɛsɛng o na neves.”
Yey pyɛng yê mwin
27Jeng de Yɛsu a ha ano, hwā hwak a hwo ye ngyat yi e ji regyɛng bemat, a yang ɛ, “Hwā de a tɔ o, na a ngas o arɔng a sé wo yey pyɛng!”
28Ko Yɛsu a toyo a yɛ, a yang ɛ, “A sé e vemo de be wok hâ Dagwi e negya, na be gyenges hɛ, de ba sé vê yey pyɛng.”
Bemat ba simo be dura a yɛn pyɛ bes
(Mat 12:38-42)
29Jeng de bemat bá sè gwɛsɛ hɛn na Yɛsu, a re nuyel na ha, a yang ɛn, “Bemât jeng yemo ba sé beves! Yɛn e simo be dura a yɛn pyɛ bes cak, ko ba rɔda dura a yɛn yɛ wɛt sɛ̌ yè Yona. 30Sede remo de Yona, zarap Dagwi, à sè pyɛ cak ye bɛrɛng na bemât Nineve, ano arɔng Me de ma tɛ́ me mwat ma rɔda sè a bemât jeng yemo pyɛ bɛrɛng. 31Tuk de Dagwi a rɔda ba ra shɔt, hwā de à sè gbɔng gwɔ̀m e rwa batin a rɔda ba sogo tanga bemât jeng yemo, ko a rɔda ba tɛ̀ kun mɛn, yaga à kyě gwɔsɔ yi e yɛnɛ̂ jey, na a wokos neha tɔ́k ne Sɔlɔmɔn. Ko di in, mwat hwak a sé e ngamo de a dal Sɔlɔmɔn o na nerey! 32Tuk shɔt o arɔng, bemât Nineve yɛn a rɔda ba sogo tanga bemât jeng yemo, ko yɛn a rɔda ba tɛ̀ kun mɛn, yaga bemât Nineve mo bà kana doyo yi e banɛn mɛn jeng de yɛn à wok Yona à shara hâ Dagwi. Ko di in, mwat hwak a sé e ngamo de a dal Yona mo na nerey!”
Negbêy rebek
(Mat 5:15; 6:22-23)
33“Vit a mwat de e tɛ̀ kya e kywa-kya, na a lɛrɛ wɛ, kɛ na a ye gup a wɛ na kwɛt. Ko ê tik wɛ e ra kwɔn de ha sé garang, na bemat de bê yel bê di negbey o. 34Bayis ba sé sede kywa-kya wo rebek. Ka sede bayis mō ba sé barat, ko mwa rebek mō rê vɔk negbey; ko ka sede bayis mō ba lashe hɛn, ko mwa rebek mō rê sè e ji lwīl. 35Yaga ano, tē naka, yaga na negbey de na sé e ji mō ne tɛ́ ɛn lwīl wɛt. 36Ka sede rebek mō mwa kwong ra vɔk negbey, ko vit a dem hak de ha sé e ji lwīl, ko mwa rɛ ra rɔda sè wɛshɛrɛk, sede remo de kywa-kya de wa sé wɛshɛrɛk naka wo nɔng o negbey.”
Gawêy BeFarisi na bemât basâ Badu
(Mat 23:1-36; Mar 12:38-40)
37Jeng de Yɛsu a ga yɛnɛ ha, WoFarisi hwak a rini hɛ pyɛ́ e lɔ mɛ, ko a yel, a sangal na a re yɛ̄. 38Jeng de WoFarisi mo a di Yɛsu a hwo re pyɛ́ sana kus vɔ, a langat hɛ. 39Ko Darwey a yang ɛ, “Di, yin BeFarisi, yin e kus bebamâ begance na bebamâ neshǐ, ko ji mo min ha sila na retek na neves. 40À yin betɔn! A sé e Dagwi de a yong bama mo tanga ji mo arɔng wɛt arɛt? 41Ko nɔng în bepɛng pyɛ́ de ya sé e ji begance tanga neshǐ min; e bama mo, kayɛ pyɛ ya rɔda sè jɛrɛ yaga yin.
42“Yaa kukuuk! Gawey e ra yin BeFarisi! Yin e nɔngɔ̂s Dagwi jining e ji kuru wo mazɛng, na leng sit, na kahɛ hwonong, ko yin e tik nà gas badu e tē, yin a tɛ̀ yey na Dagwi arɔng wɛt. A jam na yin a ra pyɛ́ yemo sana tik râ yane mo.
43“Gawey e ra yin BeFarisi! Yin e simo nekwɔn de be tikis a bemat beting e beduk re fongol, ko yin e to simo bemat be tē a yin kwot na be tang in show e dúra. 44Gawey e ra yin! Yin a sé sede besak de ba gwɔrɔ vɛ na beta wɛt, vemo de bemat be kyě kyè e ra vɛ vit a tɔk.”
45Gwining e ji bemât basâ Badu a hanat, a yang ɛ, “À Mwat Basa, sede hwó ha ano, hwà ha há ves e ra wot arɔng!”
46Ko Yɛsu a toyo a yɛ, a yang ɛ, “Gawey e ra yin arɔng, yin bemât basâ Badu! Yin e tɛ̀ a bemat pyɛ́ dirik de ya dal gap mɛn na be tos, ko yin pyɛ min yin e ka tɛ̀ kekɛn vwɔ na yin a sɛlɛ hɛn mɛ̀ wɛt. 47Gawey e ra yin! Yin e lɔkɔs beta báre e ra besak bezarap Dagwi, ko à sè e bedabeda min de bà mɔbɔs hɛn. 48Ano kwong, yin pyɛ min yin e nɔng nuha, yin e simo pyɛ de bedabeda min bà ra. E yɛn vɛ de yɛn a mɔbɔs bezarap Dagwi o, ko e yin vɛ de yin e lɔkɔs beta báre na yɛn e rà besak o. 49Yaga ano, Dagwi yi na netsitsɛng mɛ a ye, ‘Ma rɔda tomo a yɛn na bezarap Dagwi tanga betom, ko yɛn a rɔda mɔbɔs behak e ji mɛn, ko bê tak a behak reyɔm arɔng.’ 50Yaga ano, ba rɔda ba rangâl bemât jeng yemo nemî mwâ bezarap Dagwi nemo de bà shushu yimo yi e susû jey, 51yimo yi e jeng de bà mɔrɔ Hɛvɛl vey e jeng de bà mɔrɔ Zɛkarya, yɛ Zɛkarya mo à wey e tê gàgbang rangâs yas vɔk na Dagwi na kwɔ̂n jɛrɛ hê Gbɔng Duk Re Fongol. Ey, me ha a yin, ba rɔda ba rangâl bemât jeng yemo nemî bemat o mwa!
52“Gawey e ra yin bemât basâ Badu! Yin a ga jut makwili de be wunta mɛ̀ gwông tɔ́k. Yin pyɛ min yin a raa gwɛ wɛt, ko yin e ro vemo de be simo be raa gwɛ arɔng!”
53Sede Yɛsu a sé nusu yi e hwomo, bemât basâ Badu tanga BeFarisi ba tɛ̀ shom sizɔng, ko yɛn a hwo jɔgɔt hɛ na nerangsal e ra pyɛ́ pyak. 54Yɛn a jāma na be tɛ̀sɛ a yɛ segun na be vo ɛ, ka sede a gyili nu e há mɛ hak.
Dewis Presennol:
Luka 11: bomBI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust