Luk 19
19
Mfufuk kè Jakiọs ogwu otitip ido
1Jisọs onenikije itibi emen ama Jeriko. 2Îkaan̄ enerieen̄ ge òkup me ama ya ekigwen Jakiọs. Jakiọs yi ìre ogwu ibot ebi ìkibọkọ otitip ido, mè ire si ogwu òbọbọọn̄ ubọọn̄ enenen. 3Jakiọs oneniweek imumun̄ Jisọs isi mè isi. Ire, bak me lek ọmọ orebe ogwu mgbidim, ìkakọt ìmun̄ Jisọs, mije ogbogbo ene efan̄abe ichit Jisọs. 4Eya orọ, ililibi iraka otutuuk ogbogbo ene cha ifo isi, mè isi inene inyọn̄ uti sikamọ ge me oniin̄ ere Jisọs obonije iraka, inyi ọmọ ikọt imun̄ Jisọs.
5Mgbọ Jisọs ojebe ire ebon uti ya, ibebene chieen̄ ikpọ ebek uti ya, mè igwen ọmọ, “Jakiọs, gwat lek sibi ijọn̄ na, ke m̀bakup me uwu kwun̄ cherekeyi.” 6Mgbọ yaage, Jakiọs onanan̄a isibi ijọn̄, mè inibọkọ Jisọs itap me uwu kan̄ me ubelejit.
7Otutuuk ebi ìkup me ere ya imun̄ Jakiọs obọkọbe Jisọs itap ebebene ikinunuun̄ ibe, “Ìkpọ-nu ubọk ene yi osibe ichen me uwu ogwu ijo keyilọ.”
8Me emen uwu ya, Jakiọs onanan̄a ikeke, mè itumu inyi Okaan̄-ene ibe, “Okaan̄-ene, kpọ, mâche otutuuk inu nkaan̄be ìkike iba, mè isa agan̄ ge iche inyi ebi ugbọọn̄. Ire ikaan̄ ogwu mfeen̄be me inu geelek, mâyaka inu ya ikpe inyi ene ya mgbọ ini.”
9Jisọs otutumu inyi ọmọ ibe, “Unyan̄a eyi Awaji înu me uwu keyi chereyi, mije, ene yi si ìre gwun̄ kè Ebereyam. 10Emi Gwun̄ Ebilene ǹnu ineniweek, mè inyan̄a ebi ìchechep.”
Urọk ikpoko alata araran̄
(Mat 25:14-30)
11Ere ya ema erebe îgbet ere me Jeruselem. Ebi ìkukup ikigban̄ ikọ ya ekekikeek ibe ke Jisọs isirere Jeruselem, ke mkpulu eyi Awaji môbene mgbọ yaage. Eya orọ, ike ema ekigban̄ ikọ ya, Jisọs okpọkpọk ito ofifi urọk inyi ema ibe, 12“Ogwu enerieen̄ ge òsibi me uwu ubọọn̄ oninan̄a ije ujọn̄ọ ije isi ofifi ido, ibosi inyi erọ ọmọ ubọọn̄ me ere ya, mè ọmọ igwu ikom ika inu inikpulu ebi kan̄. 13Sabum îninan̄a ije ya, igwegwen akọp ebi ikwaan̄ kan̄ ititiin̄, mè inyi ema ikpoko alata araran̄ ge ge me ene, mè ibe ema esa ikpoko cha enyam ewe mege ire mgbọ ọmọ môkabe.#19:13 Ikpoko yi ge môso isasa ikpe ogwu ikwaan̄ ge onyan̄ ita.
14“Ire, ebi kan̄ cha ebi ìboka inikpulu kpema ọmọ. Eya orọ, mgbọ ogwu enerieen̄ yi onan̄abe isan̄a, me udun̄ kan̄, ife chi esasan̄a ikwaan̄ iria isi lek ebi ìberọ ogwu enerieen̄ yi ubọọn̄ ibe ke ema kpeweek ibe ene yi inire ogwu ubọọn̄ kiban̄.
15“Ire, mîrọ si ogwu enerieen̄ ya ubọọn̄, igwugwu ikom ika, ubọk geelek ebi kan̄ echabe ọmọ. Mgbọ îkabe, iraria ikwaan̄ igwen ebi ikwaan̄ kan̄ cha ebi înyibe ikpoko, ibe enerọ ifuk enyi ọmọ, inyi ọmọ iriọọn̄ oruru ekaan̄be me ibot ikpoko cha.
16“Ogwu adasi onunu, mè inibe, ‘Ogwu nte, eyi n̄a, nrie ofifi akọp ikpoko alata araran̄ me oruru itoon̄ me inyọn̄ ibot ikpoko eyi owu onyibe emi.’
17“Ogwu nte uwu kan̄ ofọfọọk ọmọ ibe, ‘Owu orọ ijaan̄ enenen, ata ogwu ikwaan̄! Owu ogbe utoon̄-ejit me lek sọntiik inu. Eya orọ, bọkọ akọp ama ile kikpulu.’
18“Ogwu òso iba onunu, mè ibe, ‘Ogwu nte, eyi n̄a nrie ikpoko alata araran̄ go itoon̄ me inyọn̄ ibot ikpoko eyi owu onyibe emi.’
19“Ogwu nte uwu kan̄ otutumu inyi ọmọ ibe, ‘Owu bọkọ ama ile go kikpulu.’
20“Ofifi ogwu ikwaan̄ onunu, mè ibe, ‘Ogwu nte, kpọ ikpoko kwun̄ yi. Ǹsasa okpọkọ ekwut ikat ikpoko ya, mè iben isi ilet, inyi ikachep. 21Ukpook kwun̄ îtet emi, mije, owu ìre uyọt uyọt ene. Owu òkimọnọ inu me ere okasun̄ge, mè ikirọkọ inu me ere owu okawopge.’
22“Ogwu nte uwu kan̄ ofọfọọk ọmọ ibe, ‘Owu ijo ogwu ikwaan̄ keyi! Ikọ otu kwun̄ gaalek ke mbasa ifieek oyerebet inyi owu. Owu oriọọn̄ ibe ke emi ìre uyọt uyọt ene; ke ǹkimọnọ inu ikarege eyi n̄a, mè ikirọkọ inu eyi nkawopge! 23Ìre keke orọ owu òkasa ikpoko ya ìsi ìnyi ebi ìkinyam ikpoko, inyi iman oruru inyi emi, mè ǹnengbaan̄ isi ikpoko melek oruru m̀bọkọ mgbọ keyi nkabe?’
24“Itutumu ikeya inyi ogwu ikwaan̄ yi isan̄a, inenitumu inyi ebi melek kiban̄ ekupbe me ere ya ibe, ‘Ìbọkọ ene yi ikpoko ya ìsan̄a me ubọk, mè ìsa ìnyi ogwu òrerie akọp ikpoko alata araran̄ me oruru.’
25“Ife cha efọfọọk ogwu ubọọn̄ ya ibe, ‘Ogwu nte, ogwu owu obe eji ebọkọ ikpoko ya esa enyi îwuuk lek ikakaan̄ akọp ikpoko!’
26“Ogwu ubọọn̄ ya ofọfọọk ibe, ‘Me atikọ, ogwu òkakaan̄ inu ke ebenyi isọkọ me lek, inyi ikaan̄ inu iwa igak. Ire, ogwu ikakaan̄ge inu, ìrere sọntiik eyi îkaan̄be, mêtet ibọkọ isan̄a me ubọk, inyi ikayaka ìkakaan̄ geege.’ 27Ogwu ubọọn̄ ya oneninyi ida ibe esi etet otutuuk ebi ochicha kan̄ cha, ebi ekaweekge ibe ọmọ ikpulu ema, esa enu enekpan̄ me isi kan̄.”
Jisọs înin̄ Jeruselem kubọk ogwu ubọọn̄
(Mat 21:1-11; Mak 11:1-11; Jọn 12:12-19)
28Jisọs itoto urọk ya isan̄a, inanan̄a ikeke, mè ibene ije kan̄ ikije isi Jeruselem. Ọmọ okije me isi, sà ebi udun̄ kan̄ ekije igọọk ọmọ me udun̄. 29Mgbọ îjebe igbet Betifegi mè Betani, ama iba òkup me inyọn̄ ogoon̄ Olifu ya, inenidasi iria ene iba ebi udun̄ kan̄ ibe, 30“Ìje ìsi ama yilọ òkup me isi kinyi. Mgbọ yaage enyi enin̄be, enyi mêmun̄ gwun̄ inyinya akpan ge, etobobe itele, eyi ene geege ikanenege inyọn̄. Ìtọn̄ọ ìsa ìjet emi. 31Ire ikaan̄ ogwu ido enyi ibe mè ìre keke orọ enyi ekitọn̄ọ anam ya, ìfọọk ibe ke îre Okaan̄-ene okiweek.”
32Ebi îriabe ikwaan̄ ya ejeje, mè isi imun̄ otutuuk inu cha ubọk yaage Okaan̄-ene otumube inyi ema. 33Mgbọ ema ekitọn̄ọ gwun̄ inyinya akpan ya, ebikaan̄ enenido ema ibe, “Ìre keke orọ enyi ekitọn̄ọ anam ya?”
34Ema efọfọọk ibe ke îre Okaan̄-ene okiweek. Ebikaan̄ anam ya etetele ibe ema esa anam ya eje.
35Ema enenisa anam ya ijet Jisọs, mè iwọọk ofọnti inyọn̄ kiban̄ itoon̄ me inyọn̄ anam ya, mè itap ubọk ibene Jisọs, inyi ikọt inene ikweek me inyọn̄ anam ya.
36Mgbọ anam ya okisa Jisọs ije, ebi ene ekekiwọọk ofọnti inyọn̄ kiban̄ iwele me ejit oniin̄.
37Mgbọ Jisọs orebe ere oniin̄ okwalabe isiki inan̄a me inyọn̄ ogoon̄ Olifu ya, ogbogbo ebi ìkigọọk ọmọ me udun̄ ebebene ikitaan̄ ukpo unwọọn̄, mè ikitọn̄ Awaji, mije otutuuk inu ukechieen̄ geelek ema emun̄be Jisọs orọbe, 38mè ikitumu ibe,
“Ugbana ikup inyi ogwu ubọọn̄
ogwu ònunu me erieen̄ Okumugwem.#19:38 Itọn̄ 118:26
Esuuk ikup me emen inyọn̄,
mè itọn̄ ikup inyi Awaji me
emen inyọn̄ ere òbebene ichit!”
39Usini ebi Farisi ìkup me etete ogbogbo ene cha etutumu inyi Jisọs ibe, “Ogwu Ijejeen̄, tumu nyi ebi udun̄ kwun̄ ibe ekayaka ìkput ere!”
40Jisọs ofọfọọk ema ibe, “Me atikọ, ǹkitumu inyi enyi ibe, ire ebi ife chi iriaan̄ otu, ewuuk chi òkup me ere yi môsan̄a amọn itaan̄ ukpo itọn̄ yi si.”
41Mgbọ Jisọs ojebe igbet, mè ibene chieen̄ itoon̄ me lek ama Jeruselem, mun̄ ito osisibi ọmọ me chieen̄. 42Itoto ito me ibot ama ya, mè ibe, “Jei ebi Jeruselem, ire gaalek mofet ibe enyi eriọọn̄, mè chereyi, inu òbosa esuuk ijet enyi, kè ònwọn! Ire, îlet enyi me chieen̄ mgbọ keyi. 43Ìkpọ, mgbọ òkinu mgbọ ebi ochicha kinyi mêsabe akọn̄ inikana enyi me ijọn̄ okokop, mè ifieek mgban ikwek enyi me agan̄ geelek, inyi ene geege ikakọt ìnan̄a me emen ama kinyi ìsibi, mè ikitim akọn̄ me lek kinyi. 44Ebi ochicha kinyi mêgbugbọ otutuuk mgban ama kinyi igwook me ijọn̄, mè ikpan̄ otutuuk ebi ama kinyi isan̄a kpai! Ife cha kpebetele inyi ewuuk mgban ama kinyi ge ikeke me inyọn̄ ge, mije, enyi kpeweek irọriọọn̄ mgbọ Awaji onube iboninyan̄a enyi.”
45Jisọs oneninin̄ ama Jeruselem, mè ije inin̄ emen Uwu Mbuban, mè ibene ikilap ebi ìkinyam ewe isibi me ere ya, 46mè ikitumu inyi ema ibe, “Awaji ìtumu me Ikpa Mbuban ibe, ‘Uwu n̄a môre uwu uriaak.’#19:46 Asaya 56:7 Ire, enyi eyaka inikisa uwu ya irọ ere ebi inọ ekinu inilet lek.#19:46 Jeri 7:11”
47Bene me usen ya, Jisọs okekijeen̄ inu me Uwu Mbuban ya usen geelek. Ebi ibot ngwugwa, mè ebi ìjeen̄ Ikan, mè ebi ibot ebi Ju ekekiweek ikpakpan̄ ọmọ. 48Ire, ema kpekọt ikaan̄ irek itet ọmọ, mije, ebi ene ekpọkpọ ikinin̄ ijot ere ya inikigban̄ ikọ kan̄.
Dewis Presennol:
Luk 19: Obolo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.