Ibeb 7
7
Mun̄ ile
1Okumugwem onenitumu inyi Nuwa ibe, “Owu melek otutuuk ebi ototun̄ ukan̄ kwun̄, ìna ìninin̄ emen uji ya, mije, îre owu gaalek ke emi mweek imun̄ ibe ke îre ogwu ata irọrọ me etete otutuuk ebi ìluk me linyọn̄ me ukot keyi. 2Me etete anam geelek òtatana me isi Awaji, titen̄e orie jaaba mè uman jaaba. Me etete anam geelek ikatanage me isi Awaji, titen̄e orie ge mè uman ge. 3Titen̄e si chieen̄ unọn geelek, orie jaaba mè uman jaaba tap me emen uji ya, inyi chieen̄ unọn chi geelek ikup ikimumana me otutuuk linyọn̄, mè ikakwaan̄ ìta. 4Usen jaaba isiraka, emi me lek n̄a mâda ibot igwook me linyọn̄, mè irep ejit yaage akọp egwe ini mè akọp eririeen̄ ini. Sa me ikeyi, mâchep otutuuk inu geelek nrombe echi òkifuuk efuuk ugwem isan̄a dìp dìp me otutuuk linyọn̄.”
5Nuwa orọrọ otutuuk inu cha geelek ike Okumugwem onyibe ida ibe ọmọ irọ.
6Nuwa ìre efit acha gweregwen mgbọ mun̄ ile ya onube me linyọn̄. 7Nuwa mè ebi bọn mè ogwu nwa mè nwa ebi bọn enunu ininin̄ emen uji ọfọ ya, inyi mun̄ ile ya ikarie ema. 8Otutuuk chieen̄ anam geelek, echi òtatana me isi Awaji mè echi ikatanage, mè otutuuk chieen̄ unọn geelek, mè otutuuk inu geelek òkinyinyọnọ me ijọn̄, 9ejeje iba iba, orie mè uman, igọọk Nuwa inu ininin̄ emen uji ọfọ ya, ike Okumugwem onyibe Nuwa ida ibe irọ. 10Mgbọ usen jaaba orakabe, mun̄ ile ya onunu me linyọn̄.
11Me òso akọp mè usen jaaba, me emen onyan̄ iba me acha Nuwa osobe efit acha gweregwen, otutuuk ikpele ogbuuruk geelek òkup me irak ijọn̄ ogwugwuku ibook, mè ibene ikisook mun̄ isibi. Otutuuk otu nruruk òkup me akpa isinyọn̄ ochichili ibook, ibot obebene ikida igwook me linyọn̄. 12Ibot ya îrep me linyọn̄ abayaage akọp egwe ini mè akọp eririeen̄ ini, ìkafieek.
13Îre me achubọk usen ya ke Nuwa mè ebi bọn, Sem mè Am mè Jefet, mè nwa kè Nuwa, mè nwa ebi bọn ita cha esaba inin̄ emen uji ọfọ ya, 14ema melek otutuuk chieen̄ anam oron mè anam uwu geelek, mè otutuuk inu geelek òkinyinyọnọ me ijọn̄, mè otutuuk chieen̄ unọn geelek, mè otutuuk inu geelek òkaan̄ uwop. 15Otutuuk chieen̄ inu geelek òkifuuk efuuk ugwem mîje iba iba, orie mè uman, igọọk Nuwa inu ininin̄ emen uji ya. 16Nuwa mè otutuuk inu cha geelek, orie mè uman, eninin̄ emen uji ya ike Awaji onyibe ida ibe ema erọ. Mgbọ ema enin̄be isan̄a kpai, Okumugwem me lek kan̄ ogwugwuk isotu ikwek ema me emen.
17Mun̄ ile ya okukup me linyọn̄ akọp usen ini, mè ibaak iwuku ijibi uji ọfọ ya iwook ibene ijọn̄ọ ere inan̄a me ijọn̄. 18Mun̄ ya okpọkpọ ikimin, mè ibaak iwuku enenen me linyọn̄. Uji ya okekite ikana me inyọn̄ isi mun̄. 19Ikeya si, mun̄ okpọkpọ ikibaak, mè ibaak imeen̄ otutuuk ubene ubene ogoon̄ geelek òkup me otutuuk linyọn̄, 20mè isa ejit ita mè okpọkọ ibene isaba iraka ibot ogoon̄ echi òbebene igak otutuuk. 21Otutuuk inu geelek òluk me linyọn̄ okwakwaan̄ isan̄a kpai, bene me lek ebi kè unọn, re lek ebi kè anam uwu mè anam oron, mè inu geelek òkinyinyọnọ me ijọn̄, mè otutuuk ebilene. 22Otutuuk inu geelek òluk me inyọn̄ ijọn̄, mè ikifuuk efuuk ugwem, okwakwaan̄ isan̄a kpai. 23Okumugwem ochechep otutuuk inu geelek òluk me linyọn̄ isan̄a dìp dìp, bene me lek ebilene re lek anam mè inu geelek òkinyinyọnọ me ijọn̄, mè unọn òwulu me inyọn̄. Îtata Nuwa mè ebi melek kan̄ ekupbe me emen uji ọfọ ya gaalek esik me ugwem.
24Mun̄ ile ya ìmemeen̄ linyọn̄ ibia ikeya efit usen mè akọp go.
Dewis Presennol:
Ibeb 7: Obolo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.