Ikwaan̄ 8
8
1Sọọlu okukup me ere ya, mè igọọk ichieek ibe ekpan̄ Sitibin.
Sọọlu îsisaak ebi ntitiin̄ Awaji
Usen yaage, atalek ikpele ufialek oninin̄ ikeme ebi ntitiin̄ Awaji cha ìkup me Jeruselem. Otutuuk ebi ntitiin̄ cha eyiyiyala, mè ikpọk ichon ikana iso otutuuk agan̄ Judia mè Sameria. Ebi otuchieen̄ cha gaalek eyaka inisik me Jeruselem. 2Usini ebi Ju ebi ìkaan̄ ukpook Awaji me emen esisi iben nkwukwu kè Sitibin isi ifuun̄, mè ifieek ejit inyi ọmọ enenen. 3Sọọlu obebene ikijijaka ntitiin̄ Awaji. Ìkije ikana me uwu me uwu ikitaba ebirieen̄ mè ebibaan̄ ebi ìchechieek me lek kè Jisọs isibi isa isi itap me uwu mkpọn.
Filip îtumu ikọ Awaji me Sameria
4Ebi ìchechieek cha ìyayaak Jeruselem, ekekitumu ikọ Awaji me ere geelek ema esibe. 5Filip osisi ama ge òkup me Sameria, mè ikilook ebi ama ya ata etip ofolek ogwu Awaji otọkọbe aran̄ me ibot. 6Ebi ene efafan̄a ijot inikigban̄. Mgbọ ebi urum ene cha enọbe ikọ Filip okitumu, mè imun̄ inu ukechieen̄ îkirọ, ema egbagbala utọn̄ ikigban̄ ikọ kan̄. 7Owuwa ijo erumun̄ òkup me emen ebi ene okekitaan̄ ukpo unye unye, mè ikinan̄a me emen owuwa ene isibi. Filip okekigwa si owuwa ebi ngọm, mè ebi akọọk. 8Mije keya, ebi ama ya enwọnwọọn̄ unwọọn̄ enenen.
Mfufuk kè Saimọn ogwu òdo inu
9Me emen ama ya, îkaan̄ ogwu enerieen̄ ge ekigwen Saimọn. Ọmọ ìre ogwu òdo inu. Ido-inu kan̄ îke ebi ene chieen̄ enenen me Sameria. Ọmọ okekigugo lek ibe ke ọmọ ìre òsibi isi ene. 10Mije keya, otutuuk ebi Sameria, ebi ugane mè nsabọn, ubọọn̄ mè ugbọọn̄, ekekigban̄ utọn̄ inyi ọmọ, mè ikitumu si ibe ke ọmọ me atikọ ore unye Awaji ya eyi ebi ene ekigwen “Ikpele Unye.” 11Otutuuk ene ekekisiki ibot inyi ọmọ, mije îkisa unye eyi ido-inu kan̄ ya irọ ema inu ukechieen̄ ijọn̄ọ acha. 12Ire, mgbọ Filip onube inilook ata etip ofolek mkpulu eyi Awaji mè erieen̄ kè Jisọs Karais, ebi ama ya echechieek me lek kè Jisọs. Filip ogwogwook ema mun̄, ebirieen̄ mè ebibaan̄. 13Saimọn ya me lek kan̄ si ochechieek me lek ata etip ya. Egwogwook ọmọ mun̄. Ibebene ikigọọk Filip ikijijen̄e ikana. Ikpele ikwaan̄ ukechieen̄, mè uyeke inu cha Filip okirọ okekike ọmọ chieen̄ enenen.
14Ebi otuchieen̄ ìkup me Jeruselem eneninọ ibe ke ebi Sameria mîbọkọ ikọ Awaji itap, mè iria Pita mè Jọn isi lek kiban̄. 15Mgbọ Pita mè Jọn erebe ama ya, eneniriaak uriaak me lek ebi ìchechieek cha, inyi ema ebọkọ Ekwukwu Mbuban. 16Mije, karake ema echieekbe me lek kè Jisọs, Ekwukwu Mbuban ìkanin̄-nu emen ene geege me etete kiban̄. Egwook ema mun̄ gaalek me erieen̄ Okaan̄-ene Jisọs. 17Pita mè Jọn enenitoon̄ ema ubọk me ibot, ema ebọbọkọ Ekwukwu Mbuban.
18Saimọn imumun̄ ibe ke ebi ene mîbọkọ Ekwukwu Mbuban mgbọ ebi otuchieen̄ cha etoon̄be ema ubọk me ibot, ichechieek Pita mè Jọn ikpoko, 19mè itumu inyi ema ibe, “Soso, ìnyi emi ojelek unye yi si, inyi ene geelek mâtọkọbe aran̄ me ibot ibọkọ Ekwukwu Mbuban ya.”
20Ire, Pita ofọfọọk ọmọ ibe, “Ikpoko kwun̄ ichep melek kwun̄, mije, òkikeek ibe ke owu môkọt isa ikpoko ilep uche eyi Awaji. 21Owu òkakaan̄ irek me emen ikwaan̄ keyi, òkakaan̄ si uche me lek, mije, ejit kwun̄ ìkatat me isi Awaji. 22Eya orọ, gwu kom me emen ijo inu yi, mè riaak uriaak nyi Okaan̄-ene ibe itele inyi owu. Usini mgbọ, Okaan̄-ene môtele inyi owu me lek ojelek ijo ekiket keyi okaan̄be me ejit kwun̄. 23Mije, mmun̄ ibe ke owu okaan̄ ijo ejit enenen, mè isa me ikeya inin̄ usun̄ inyi ijo inu.”
24Saimọn otutumu inyi Pita ibe, “Soso riaak Okaan̄-ene nyi emi, inyi inu geege me lek inu cha otumube ikarọ emi me lek.”
25Mgbọ Pita mè Jọn enyibe ata-ikọ kiban̄ isan̄a, mè ilook ata etip eyi Okaan̄-ene isan̄a, ema egwugwu ikom ifo Jeruselem. Me oniin̄ ifofo kiban̄, ema ekekilook si ata etip ya me owuwa asabọn ama ebi Sameria.
Filip îtumu ikọ Awaji inyi ogwu ibot uwu ikpoko ebi Etiopia
26Ogwu osat Okumugwem ge onenitumu inyi Filip ibe, “Nan̄a keke, mè je fo agan̄ osiki, me oniin̄ ònan̄a me Jeruselem itibi me emen èwê, isi Gaja.” (Oniin̄ ya mikinọọn̄.) 27Filip onanan̄a ikeke mgbọ yaage ije, mè isi ichichini ogwu enerieen̄ ge esan̄abe òsok, òkisi ikwaan̄ inyi ogwu Kandes, òrere ogwu ubọọn̄ enenwaan̄ òkikpulu Etiopia. Ogwu enerieen̄ ya ìre ikpele ogwu ibot ikwaan̄ òkikpọ chieen̄ me lek otutuuk uwu isun̄-ikpoko me Etiopia. Ogwu enerieen̄ yi ìsi Jeruselem isi igọọk itọbọ ebum inyi Awaji. 28Me oniin̄ ikaka kan̄, ikwekweek me emen uji akọn̄ kan̄, eyi anam okitaba ije, ikifuk ikpa Asaya ogwu nriran ogebe. 29Ekwukwu Mbuban otutumu inyi Filip ibe, “Gele gbet lek uji akọn̄ ya, mè kachieek ibe ilibi iraka owu.”
30Filip olilibi iriaak me lek uji ya, mè inọ ogwu enerieen̄ ya okifuk ikpa Asaya ogwu nriran ogebe, mè inido ọmọ ibe, “Ìre otet inu ya okifuk?”
31Ogwu enerieen̄ ya ofọfọọk Filip ibe, “Ìre m̀bajeje ikọt itet, ire kpunu ogwu òjejeen̄ emi?” Inenigwen Filip ibe isaba inin̄ emen uji ya inigọọk ọmọ ikweek irek.
32Ibot Ikpa Mbuban ere îkifuk ìre ere egebe ibe:
“Etet ọmọ isa ije kubọk arọọn̄ ebesa isi ikpan̄.
Ìkasan̄a amọn, ìkpọkpọ iriaan̄ otu, kubọk arọọn̄ okirọ
mgbọ ekisọp inwọọn̄ isan̄a me lek.
33Mîrọ ọmọ inu esip,
mè ijit ifefieek unen oyerebet inyi ọmọ.
Kpunu ogwu òbokọt ikpa inu ofolek bọn owot iman kan̄,
mije, mîfieek ugwem kan̄ isan̄a me linyọn̄.”#8:33 Asaya 53:7,8
34Ogwu ibot ikwaan̄ ya onenido Filip ibe, “Tumu nyi emi, ìre ekene ke Asaya ogwu nriran okitumu ikọ yi ibak? Ìre ìkitumu ibak lek kan̄, sà ìre ofifi ene?” 35Filip onenibene me ibot ikpa ere îkifuk ya, mè ikpa ata etip ofolek kè Jisọs inyi ogwu enerieen̄ ya.
36Me oniin̄ ije kiban̄, ema enenire ere ge mun̄ okupbe. Ogwu ibot ikwaan̄ ya obebe Filip, “Kpọ, ke mun̄ ire eyi! Ìre keke obogban ibe owu okagwook emi mun̄ mgbọ keyi?”
[ 37Filip ofọfọọk ọmọ ibe, “Ire owu osa otutuuk ejit kwun̄ ichieek me lek ata etip yi, mâkọt igwook owu mun̄.”
Ogwu enerieen̄ ya ofọfọọk ibe, “Nchieek ibe ke Jisọs Karais ore Gwun̄ eyi Awaji.”]
38Ogwu ibot ikwaan̄ ya oneninyi ida ibe mè uji ya ikeke. Uji ya okekeke. Filip melek kan̄ esisibi ijọn̄, mè ije isi emen mun̄ ya. Filip ogwogwook ọmọ mun̄ me ere ya. 39Mgbọ yaage ema enan̄abe me emen mun̄ ya iwook inene, Ekwukwu Okaan̄-ene omọmọnọ Filip isan̄a. Ogwu ibot ikwaan̄ ya ìkayaka ìmun̄ ọmọ ìgak ikeya. Ire, ikekinwọọn̄ unwọọn̄, mè ikpọk ibene ije kan̄ ikije ifo ido kiban̄. 40Filip onenisi isibi me ama ekigwen Ajọtọs, mè ikijijen̄e ikana ama ile geelek ikilook ata etip mege isi ire ama Sisaria.
Dewis Presennol:
Ikwaan̄ 8: Obolo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.