Ikwaan̄ 7
7
Sitibin îtumu ikọ Awaji me emen Oru ebi Ju
1Ogwu òban Awaji onenido Sitibin ibe, “Ìre ikọ chi etumube itoon̄ owu ìre atikọ?”
2Sitibin ofọfọọk ibe, “Ebi ngwan̄ n̄a ebirieen̄, mè ebi nte n̄a, ìgban̄ utọn̄. Awaji ogwu òkaan̄ ujamgbugbo îsibi me isi kè Ebereyam nte nte kiji mgbọ îkupbe me ido Mesopotemia, sabum îninan̄a isi iluk me ama Aran, 3mè itumu inyi Ebereyam ibe, ‘Nan̄a sibi tele ido kwun̄ mè ebi uwu kinyi, mè je si inyọn̄ ijọn̄ ere emi mâsabe owu ijeen̄.’#7:3 Ibeb 12:1
4“Sa me ikeya, Ebereyam onanan̄a itele ido Kalidia, mè isi iluk me Aran. Mgbọ ogwu ute okwube iraka, Awaji oneniria ọmọ inu me inyọn̄ ijọn̄ yi ere enyi ebi Ijeren elukbe mgbọ keyi. 5Mgbọ înube iniluk me inyọn̄ ijọn̄ yi, Awaji ìkacheche ijọn̄ yi ìnyi ọmọ, ìkatọtọ kubọk ukot ge, ibe ikana ire eyi kan̄. Ire, Awaji onenichieek use ibe ke îre Ebereyam mè bọn owot iman kan̄ ebekaan̄ ijọn̄ yi, ubọk geelek Ebereyam ikakaan̄ge gwun̄ geege nu me mgbọ ya. 6Awaji ìtumu inyi ọmọ ibe, ‘Bọn owot iman kwun̄ mêsi iluk kubọk ebi ichen me ama ikarege eyi kiban̄. Ebi ama ya mêsa ema irọ usun̄, mè itutuku ema efit acha ini. 7Ire, emi mâsut ido ya ema enin̄be usun̄ inyi osusut. Osusut ya isiraka, ema mênan̄a me ido ya isibi, mè initọbọ ebum inyi emi me ere keyi.’#7:7 Ibeb 15:13,14 8Awaji oneninyi Ebereyam orọmijọn̄ eyi ifieek-afi isasa ijeen̄ inu ijejeen̄ ofolek inyan̄a-ibot ọmọ onyan̄abe melek Ebereyam. Ebereyam onenibon Ajiki. Mgbọ emanbe Ajiki isan̄a, òso usen jeeta, Ebereyam ofefieek ọmọ afi. Ajiki onenibon Jekọp, Jekọp onenibon ebi nte nte kiji, akọp mè ene iba.
9“Ebi nte nte kiji cha enenikaan̄ njijọ ejit me lek kè Josefu ngwan̄ kiban̄, mè itet ọmọ inyam kubọk usun̄ inyi ebi Ijipiti. Ire, Awaji okekeke melek kè Josefu, 10mè inyan̄a ọmọ isibi me otutuuk uyọrọlek kan̄. Awaji oneninyi ọmọ iriọọn̄-inu, mè irọ inyi ogwu Fero, òrere ogwu ubọọn̄ ido Ijipiti, ima ọmọ. Ogwu Fero onenisa ọmọ irọ ogwu ibot mkpulu me otutuuk ido Ijipiti, mè isa ọmọ si irọ ogwu ibot mkpulu me emen uwu kan̄ òrere uwu ogwu ubọọn̄. 11Akan̄ oneninin̄ ikana otutuuk ido Ijipiti mè ido Kenan, ebi ene etataka lek me otu mije una inorie. Ebi nte nte kiji kpeyaka ikaan̄ inorie eberie. 12Mgbọ Jekọp onọbe ibe ke inorie òwa me Ijipiti, iraria bọn ebirieen̄ kan̄ òrere ebi nte nte kiji cha, ibe esi elep inorie. Adasi mgbọ ema esibe ama ya ire eya. 13Òso mgbọ iba ema esibe Ijipiti, Josefu osasa lek kan̄ ijeen̄ ebi ngwan̄ inyi ema eriọọn̄ ogwu ọmọ orebe. Ogwu Fero si osasa me ikeya iniriọọn̄ inu ofolek ebi uwu ebi kè Josefu. 14Josefu oneniria etip ibe Jekọp ogwu ute mè otutuuk ototun̄ ukan̄ kan̄, eka egọọk ọmọ me Ijipiti. Otu ifuk ebi ototun̄ ukan̄ kè Jekọp ebi ìnan̄a me Kenan isi Ijipiti ìre akọp ene jaaba mè go. 15Ikeya ke Jekọp osa ije isi iluk me Ijipiti. Ọmọ mè ebi nte nte kiji cha ekukup me ere ya ikwaan̄ isan̄a. 16Esasa nkwukwu kiban̄ ika inu me Sekem inifuun̄ me udọn̄-ufuun̄ Ebereyam ofukbe ikpoko kan̄ isa ilep me ubọk kè Amọ me Sekem.
17“Mgbọ îgbetbe mgbọ Awaji oborọ use îchieekbe Ebereyam iso, ebi Ijeren ìkup me Ijipiti emumumana enenen, mè iwa me otu ifuk. 18Ofifi ogwu ubọọn̄ ikariọọn̄ge Josefu onenibene ikikpulu ido Ijipiti. 19Aya ogwu Fero ya onenikaan̄ ijo ejit me lek ebi kiji, mè ikirọ ema inu me lek ofiaan̄ ofiaan̄, mè itet ema me unye ibe eben asa nsabọn kiban̄ emanbe ayaya etọp efiin̄, inyi ekwaan̄.
20“Me emen mgbọ yi ke eman Mosis. Mosis ìre gwun̄ òsisibi esese mgbọ emanbe. Onyan̄ ita gaalek ke ekpukpo Mosis me uwu ogwu ute. 21Mgbọ kpeyaka ikọt ilet ọmọ, esasan̄a ọmọ isibi me uwu. Gwun̄ enenwaan̄ ogwu Fero osisi imun̄ ọmọ, mè iben ọmọ isa isi ikpukpo, mè imọnọ ọmọ isa irọ gwun̄ kan̄. 22Mosis obọbọkọ ikween̄-inu ofolek otutuuk iriọọn̄-inu ebi Ijipiti, mè inye lek, mè inye si otu itumu ikọ.
23“Mgbọ Mosis osobe akọp acha ini, ineniben me ejit ibe ke ọmọ môsi ikpọ ebi kiban̄, ebi Ijeren. 24Mgbọ îkije, imumun̄ ogwu Ijipiti ge okirọ nnaan̄ me lek ogwu Ijeren ge, mè isi ibọkọ etim ya itim inyi ogwu Ijeren kiban̄, mè isulu ogwu Ijipiti ya ikpan̄. 25Mosis ìkeek ibe ke ebi kiban̄ mêriọọn̄ ibe ke Awaji ìbonisa ọmọ inyan̄a ema isibi. Ire, ebi kiban̄ kperiọọn̄. 26Ofit iwele kan̄, Mosis onenimun̄ ebirieen̄ iba ebi Ijeren ekitim etim. Isisi iteek etim ya, mè itumu inyi ema ibe, ‘Ebi une n̄a, ikayaka ìrọ ma, ke enyi ìre ngwan̄ ngwan̄. Ìre keke orọ enyi ebesak lek kinyi unan?’
27“Ire, ogwu ubọk kan̄ onyebe igak, obebieen̄ Mosis ida ibọkọ, mè ido ọmọ ibe, ‘Ìre ekene orọ owu ogwu mkpulu mè ogwu ibot oyerebet me etete kiji? 28Ìre òbonikpan̄ emi ike okpan̄be ogwu Ijipiti me iyakwut?’#7:28 Isis 2:14 29Mgbọ yaage Mosis onọbe ikọ ya, ililibi iyaak Ijipiti, mè isi iluk me ido Midia kubọk ogwu ichen, mè ikup me ere ya ibon ibot bọn ebirieen̄ iba.
30“Mgbọ Mosis olukbe me ere ya iso akọp acha ini, mè iraka, inenimun̄ ogwu osat ge me emen alọm ukan̄ òkilomo me lek gwun̄ uti ge òkup me emen èwê me agba lek ogoon̄ Saina. 31Inu ya îmun̄be okeke ọmọ chieen̄ enenen, ijeje iriaak, inyi ọmọ iriọọn̄ ubọk ikpọ inu ya iso chieen̄ iba. Mgbọ îjebe igbet, inọnọ ida Okumugwem okitumu inyi ọmọ ibe, 32‘Emi ìre Awaji ebi nte nte kwun̄. Emi ìre Awaji kè Ebereyam, mè Awaji kè Ajiki, mè Awaji kè Jekọp.’#7:32 Isis 3:6 Mosis oririki, ukpook otetet, ìkayaka ìkọt ìkpọ gwun̄ uti ya.
33“Okumugwem otutumu inyi Mosis ibe, ‘Wọọk ikpukot san̄a me ukot kwun̄, mije, ere yi okekebe ìre ijọn̄ mbuban. 34Me atikọ, emi mmun̄ tukutuku eyi ekitutuku ebi n̄a me Ijipiti, mè inọ si mfi ito kiban̄. Mgbọ keyi nnan̄a isibi inu ineninyan̄a ema isibi. Eya orọ, na me ǹria owu ǹgwu ǹkom ǹsi Ijipiti.’#7:34 Isis 3:5,7,8,10
35“Mosis yi ke ebi Ijeren ejit, mè ido otu ibe, ‘Ìre ekene orọ owu ogwu mkpulu mè ogwu ibot oyerebet me etete kiji?’ Ọmọ ke Awaji me lek kan̄ oria ibe iyaka inire ogwu mkpulu kiban̄, mè inyan̄a ema isibi sa me unye eyi ogwu osat Awaji ogwu òtutumu ikọ inyi ọmọ me emen alọm ukan̄ ya. 36Mosis osasa me unye ubọk isan̄a ema isibi, mè irọ owuwa uyeke uyeke inu mè ikwaan̄ ukechieen̄ me Ijipiti, mè irọ si me okwaan̄ Anyiaan̄, mè irọ si ikeya me emen èwê otutuuk akọp acha ini. 37Mosis yi si otumu inyi ebi Ijeren ibe ke Awaji môsan̄a ogwu nriran ge òkup kubọk kan̄ isibi me etete kinyi inyi enyi.#7:37 Ikan 18:15 38Mosis yi si melek ebi nte nte kiji ekup me emen èwê. Ọmọ si ore ogwu òbọbọkọ ikọ òkinyi ene ugwem me otu ogwu osat Awaji me inyọn̄ ogoon̄ Saina isa initumu inyi ebi nte nte kiji, ebi nte nte kiji ekakana iyaka initap eji me ubọk.
39“Ire, ebi nte nte kiji ejijit igbagban̄ utọn̄ inyi ọmọ, mè ifiin̄ ọmọ itele, mè iyaka ikiweek igwugwu ikom ifo Ijipiti me emen ejit kiban̄, 40mè itumu inyi Erọn ibe ibot awaji ebobot inyi ema, inyi inisa ema ije me oniin̄, mije ke ema kpeyaka iriọọn̄ inu òrọrọ Mosis ogwu òsasa ema isibi me Ijipiti.#7:40 Isis 32:1 41Mgbọ ya ke ema enibot inu ge kubọk gwun̄ eriembuuk, mè ito ijọk inyi, mè ikisa ngwugwa inigwa inyi inu yi ema esabe ubọk kiban̄ gaalek irọ. 42Ire, Awaji odada lek ibọkọ me lek kiban̄, mè ijit ema itele, inyi ema eketọbọ ebum enyi ebi kè ntoronyan̄ òkup me isinyọn̄. Eyi onenirọ inu Awaji otumube me emen ikpa ebi nriran iso ibe,
“ ‘Enyi ebi Ijeren,
ìre îkaan̄ ngwugwa ge enyi egwabe inyi emi,
mè ìre eyi anam, mè ìre eyi ofifi inu,
me otutuuk akọp acha ini enyi ekupbe me emen èwê?
43In̄-in̄, kpan̄asi ikeya, ke enyi
eyaka ikiben isi yọk ekigwen Molek ikaan̄,
mè ikiben si ntoronyan̄ enyi
ebotbe inyi yọk kinyi ekigwen Refan ikaan̄.
Inu chi otutuuk ìre mkpọmfaka enyi
erombe me ubọk kinyi gaalek,
mè ikitọbọ ebum inyi.
Eya orọ, me atikọ, mâkpulu enyi itọọn̄ isibi me ido kinyi
ifo ere òjọjọn̄ọ ere#7:43 Emọs 5:25 iraka ido Babilọn.’
44“Mgbọ ebi nte nte kiji ekije me emen èwê, ema mîkaan̄ Atanga Chinichini, eyi òkijeen̄ ibe ke Awaji òwa melek kiban̄. Enama uwu ya igọọk ubọk Awaji odọmọbe isan̄a, mè isa ijeen̄ Mosis. 45Owuwa acha iraraka, Josuwa osasa ebi Ijeren initim akọn̄ me lek ebi ofifi ido ebi ìdadasi iluk me inyọn̄ ijọn̄ yi, mè ilap ebi ife cha isibi. Ebi nte nte kiji esasa Atanga Chinichini ya igbaalek iniluk me ere yi. Emen Atanga Chinichini ya ke ebi nte nte kiji ekitọbọ ebum inyi Awaji mege inire me ukot kè Debit ogwu ubọọn̄. 46Awaji onenima Debit enenen. Debit onenibeek Awaji kè Jekọp ibe itele inyi ọmọ inama uwu inyi ogwugwu. 47Ire, Solomọn gwun̄ kè Debit oyaka ininama uwu ya inyi Awaji.
48“Ire, Awaji Ogwu Òbebene Ichit ìkakiluk me uwu ebilene enamabe, kubọk Okumugwem otumube me otu ogwu nriran ibe,
49“ ‘Emen inyọn̄ ìre ogboon̄ ubọọn̄ n̄a,
sà linyọn̄ ore inu ibene-ukot n̄a.
Ìre kpasi uwu kè enyi ebekọt inama inyi emi?
Sà ìre ere owa obota emi mè ǹkup ǹkensiki efuuk?
50Ìre ìkare emi nsa ubọk n̄a irom otutuuk inu chi?’#7:50 Asaya 66:2
51“Enyi ebi unye-ibot kechi! Ejit kinyi ìkariọọn̄ Awaji! Utọn̄ kinyi si ìkakinọ ikọ Awaji! Enyi ekup kubọk ebi nte nte kinyi. Enyi ekpọkpọ ikirọ ikeme Ekwukwu Mbuban mgbọ geelek kubọk ebi nte nte kinyi erọbe. 52Ìre îkaan̄ ogwu nriran Awaji geege ebi nte nte kinyi ekatapge ufialek me lek uyọt uyọt? Ìrere ebi ìtutumu inu ofolek inunu Ogwu Ata Irọrọ, ebi nte nte kinyi mîtet si ikpan̄. Mgbọ keyi Ogwu Ata Irọrọ ya onube, enyi me lek kinyi eleleke ọmọ si, mè itet ikpan̄. 53Enyi kechi ìbọbọkọ Ikan inan̄a me ubọk ebi osat Awaji, mè ijit irọrọ inu Ikan ya otumube.”
Mîsa ewuuk itọbọ Sitibin ikpan̄
54Mgbọ ebi Oru cha enọbe ikọ ya Sitibin otumube, ema enanaan̄ ejit enenen, mè iban̄a otu inyi ọmọ. 55Ire, me mgbọ ya, Ekwukwu Mbuban oninin̄ ijot emen kè Sitibin. Sitibin obebene chieen̄ ikpọ emen inyọn̄, mè imun̄ ujamgbugbo eyi Awaji, mè imun̄ si Jisọs okekebe me agan̄ ubọk ulom Awaji. 56Sitibin okekitumu ibe, “Ìkpọ! Mmun̄ emen inyọn̄ ochilibe ibook, mè imun̄ si Gwun̄ Ebilene okekebe me agan̄ ubọk ulom Awaji.”
57Mgbọ ema enọbe ikọ ya Sitibin otumube, ema otutuuk ene esasa ubọk ichit utọn̄, mè ikitaan̄ ukpo ibene ida enenen, mè igbaan̄ ilibi mgbọ ge inin̄ lek kè Sitibin, 58mè itaba ọmọ isibi ifo udun̄ ama, mè iteen̄ ewuuk ikisa itọbọ ọmọ. Otutuuk ebi ìnitoon̄ Sitibin uraamọn cha ewọọk ofọnti kiban̄ igwook inyi gwun̄ enerieen̄ ge ekigwen Sọọlu ibe ikpọ chieen̄ me lek.
59Mgbọ ema ekisa ewuuk itọbọ Sitibin, Sitibin orariaak uriaak ibe, “Okaan̄-ene Jisọs bọkọ ibot ejit n̄a.” 60Itutumu ikọ ya isan̄a, igwogwook ekpe kan̄ me ijọn̄, mè itaan̄ ukpo itumu ibe, “Okaan̄-ene, kafuk ijo keyi itoon̄ ema me ibot.” Ikọ keyi itata ọmọ me otu, itọtọbọ.
Dewis Presennol:
Ikwaan̄ 7: Obolo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2012, The Nigeria Bible Translation Trust and Wycliffe Bible Translators, Inc. All rights reserved.
New Testament originally published by International Bible Society 1991.