Luká 21
21
Janózáméay shogránah
(Markás 12:41–44)
1Issáyá sar borz kort o disti ke lahtén sér o hazgár wati shogránahán mazanén parasteshgáhay pétiá#21:1 Péti, bezán sanduk. mán kanagá ent. 2Áiá nézgárén janózámé ham dist ke pétiay tahá do paysahi#21:2 Asligén Yunáni nebeshtánka gwashit: “do lepton”, bezán á zamánagay gwandhterén zarr. dawr dát. 3Gorhá Issáyá gwasht: “Shomárá rásténa gwashán, é béwasén janózámá cha sajjahénán géshter dát. 4Chéá ke á degarán cha wati bázén málá shogránah dát, bale é janózámá, gón wati garibiá, harché ke áiá pa wati gozaráná hastat, dáti.”
Áyókén zamánagay bárawá Issáay péshgói
(Mattá 24:1–14; Markás 13:1–13)
5Lahtén mardom mazanén parasteshgáhay bárawá gwashagá at ke é gón chónén dhawldárén seng o hayrát kortagén chizzán singárag butag. Issáyá gwasht: 6“É chizzán ke shomá maróchi gendagá ét, róché kayt ke sajjahén próshag o dawr dayaga bant. Yakk sengé ham domi sengay sará namánit.” 7Jostesh gept: “Oo ostád! Bárén, é chizz kadéna bant o esháni nazzikk bayagay nesháni ché ent?” 8Issáyá gwasht: “Hozzhár bét, kasé shomárá gomráh makant. Chéá ke bázéné mani námá kayt o gwashit: ‘Man hamá án#21:8 Hodá watá gón Mussáyá hamé námá pajjárénit. Bechár Dargwaz 3:14.’ o ‘Wahd átkag o nazzikk ent,’ bale shomá áyáni randá makapét. 9Wahdé shomá jang o áshópay hálána eshkonét, delá tors mayárét. Chéá ke awalá báyad ent é chizz bebant, bale halásiay wahd hamá damáná nayayt o narasit.”
10Padá gón áyán gwashti: “Yakk kawmé dega kawméay helápá o yakk molké dega molkéay helápá páda kayt. 11Mazanén zeminchandha#21:11 Zeminchandh, bezán zeminjomb, zelzelah. bant o báz jágah dhokkál o wabá kapit. Cha ásmáná torsnákén nedárag o ajabbatén nesháni záhera bant.
12Bale cha é sajjahénán o pésar, shomárá gerant o ázára dayant, kanisah o zendánána barant o bandiga kanant. Mani námay sawabá shomárá bádsháh o hákemáni démá barant o pésha kanant. 13Gorhá shomárá pa gwáhi dayagá sharrén móhé rasit. 14Wati delá erádah kanét ke pa wati démpániá cha wahdá pésar paréshán mabét. 15Chéá ke man shomárá anchén zobán o zánté dayán ke hecch dozhmené shomay habaráni démá óshtáta nakant o natwánt áyán rad sabet bekant. 16Shomay mát o pet o brát o syád o dóst ham shomárá geráénant o lahténá kóshárénant. 17Sajjahén mardom mani námay sawabá cha shomá naprata kanant, 18bale shomárá heccha nabit. 19Agan shomá bardáshta kanét, wati sáhá rakkénét.
Urshalimay harábi o wayrániay péshgói
(Mattá 24:15–21; Markás 13:14–19)
20Wahdé shomá gendét ke lashkarán Urshalim angerr kortag, gorhá bezánét ke eshiay wayrániay wahd nazzikk ent. 21Á wahdá hamá ke Yahudiahá ant, kóhán betachant. Á ke Urshalimá ant, dhanná dar bekapant o á ke cha shahrá dhann ant shahrá marawant. 22Chéá ke á wahd sezáay wahda bit o sajjahén nebeshtánkáni habar purah o sarjama bant. 23Á róchán, lápporrén janén o hamá ke chokka méchénant sakk bazzaga bant, chéá ke molkay sará mazanén mosibaté kayt o é kawmay sará kahr o gazaba kapit. 24Mardom zahmay dapára bant o bázéné bandig bit o sajjahén donyáyá darándhéh#21:24 Darándhéh, bezán jaláwatan. kanaga bit. Darkawm Urshalimá tán á wahdá lagatmála kanant ke darkawmáni dawr o bárig halása bant.
Issáay per tarrag
(Mattá 24:29–31; Markás 13:24–27)
25Cha róch o máh o estárán nesháni záhera bant o donyáay sajjahén kawm cha daryáay chawl o mawjáni trondén tawárá hayrán o paréshána bant. 26Mardom donyáay sará áyókén mosibatáni torsá béhósha bant, chéá ke ásmánay zór o wák larzénaga bant. 27Á wahdá Ensánay Chokká gendant, ke gón mazanén wák o twán o shán o shawkaté jambaréay tahá ent o kayt. 28Wahdé é jáwara#21:28 Jáwar, bezán hálat. káyant o rasant, gorhá tachká tachk bóshtét o wati sará borz kanét ke shomay nejátay wahd nazzikk ent.”
Enjiray drachk
(Mattá 24:32–35; Markás 12:28–31)
29Issáyá áyáná é mesál ham dát: “Enjir o é dega drachkán bechárét, 30anchosh ke tákesh jat, shomá wata zánét ke nun garmág nazzikk ent. 31Hamé paymá, wahdé é chizzána gendét, shomá wata zánét ke Hodáay bádsháhi nazzikk ent. 32Shomárá rásténa gwashán, tán é sajjahén jáwar mayáyant, é nasl o padréch halása nabit. 33Ásmán o zemin gára bant, bale mani habar hechbar gára nabant.
34Hozzhár bét, chó mabit ke shomay del cha neshah o malár o zenday pegr o paréshánián chér betarrit o á róch anágat shomay gotthá lóp bebit. 35Chéá ke á róch donyáay sajjahén mardománi sará kayt. 36Paméshká harwahd hozzhár bét o dwá bekanét, tánke cha sajjahén áyókén mosibatán berakkét o Ensánay Chokkay bárgáhá óshtát bekanét.”
37Issáyá har róch, mazanén parasteshgáhá sabakk o tálima dát. Har shap shahrá dhann Zaytun námén kóhéay sará shot o wati shapia gwázént. 38Har sabáhá máhallah sajjahén mardom pa áiay habaráni gósh dáragá mazanén parasteshgáhá átkant.
Dewis Presennol:
Luká 21: HPKB
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2015-2022, Wycliffe Bible Translators, Inc. and the Balochi Bible Translation Team. All rights reserved.