Ñwaè' Matïìyoè 9
9
1Jisòs à niŋ mbe keŋ, a ker tuu nèŋguu rò, a du a ba' fa yě là'. 2Bèe mo' a vʉ nè ŋwɛ̀ mò' ce yì ŋgʉ̀' nyor mò' à m kwe, e noŋ mbe kèŋ. Jisòs à ka' yɛ lap rbyemì, a laa nè ŋwɛ̀ ce yì ŋgʉ̀' nyor mò' à m kwe nà enɛ̂, “Kur ntee muu wà, mɛ̀ fòosi wɛ̀ efa yò buu bbebep.” 3E ka' làa wa'a, bèe mo' efa mʉ̀ ŋgǎa ryɛ'ni mncir a laa fa wǎp mʉ enɛ̂, “Ŋwɛ̀ ca ce bepsi rlii Nyʉ̀.” 4Jisòs à riŋ yuu ce wowèe a m ce kwà'shi, a laa nè wowèe enɛ̂, “Wèe ce kwà'shi njɛ̀ɛ buu bbebep ca wa' njokɛ? 5Yuu ce yi yu àtɛ̀r yu ba yǐ fɛ? Yu ba à rlàa enɛ, ‘Mɛ̀ fòosi wɛ̀ efa yò buu bbebep’, kɛ̀ à rlàa enɛ, ‘Lò mbekì, jɛ̂r’? 6Banɛ à rgèe tɛ wèe bo rìŋ enɛ Muu Ŋwɛ̀ tʉr ŋger njep ŋgòŋ à rfòosi bèe efa yàp buu bbebep.” E laa nè ŋwɛ̀ yaŋ ca enɛ̂, “Nàti mbekì, lor yo kèŋ, du à là'.” 7E natì mbekì, a du à là'. 8Bèe a ka' yɛ ca, a wɛp sê, a yoŋshi Nyʉ̀ à njɛ̀ɛ ŋger ce e fa nè bèe nà.
9Jisòs à ka' lò embo ce dù, a yɛ ŋwɛ̀ mò' ce a m ce too enɛ Matìyò àmbò e cu mbe dì' rfà' ce e m ce koo mbàa bàrà'. E laa nè ye enɛ̂, “Vʉ̀ fa mɛ̌ mbùu.” Matìyò à ku nati a du a yě mbùu.
10Jisòs à m dù a cu mbe ndàp mbe Matìyò, a ce yeŋger. Ku' ŋgǎa ŋkùu mbǎa bàrà', ba ŋgǎa ŋgèe buu bbebep a vʉ̂, a cute, a ce yeŋger a Jisòs ba ŋgǎa yɛ'ni yì buu wèe. 11Bèe Farìsi a ka' yɛ, a laa nè ŋgǎa yɛ'ni yì buu enɛ̂, “Yè ŋwɛ̀ ryɛ'nì ce ye buu a ŋgǎa ŋkùu mbǎa bàrà', ba ŋgǎa ŋgèe buu bbebep njokɛ?” 12Jisòs à ka' yu', a laa enɛ̂, “Bèe ce a ke ròo ŋwɛ̀ mcɛ̀p e ke ba ŋgǎa byaŋ, ke' ba běe btatap ka'. 13Dù nè du fyɛ', yɛ ka enɛ yuu ce Ŋwǎ' Nyʉ̀ yi ce làa enɛ̂, ‘Yuu ce m ce kòŋ yu ŋkoosimnse, ke' ba ba taŋshì ka'’ nà, yi yu ba enɛ kɛ lɛ? Mɛ̀ vʉ̀ à rkɛ' běe byɛɛnì ka'. Mɛ̀ vʉ̀ à rkɛ' ba ŋgǎa ŋgèe buu bbebep.”
14Ŋgǎa yɛ'ni buu vǐ Jǒn, a vʉ̂, a yɛ ye a bipshi enɛ̂, “Wèr bèe Farìsi wèe e ke jì mdip, geewa'a ŋgǎa yɛ'ni yò buu a ce jì yap ka' njokɛ?” 15Jisòs à beesì enɛ̂, “Àde' bèe ce a dù à ŋkǎ' bgùu, a ba à nduu-gùu wèe ker ce koosimnse à njɛ̌ɛ kɛ? Geewa'a, nfè' mò' be ba ce a be koo nduu-gùu ese wowèe, tɛ wowèe a ka' koosimnse à nfè' anà. 16Àde' ŋwɛ̀ saa cɛ̌' fi, tar mbendù yǐ rʉ̀ʉ ka'. E ka' gee wa'a, banɛ cɛ̌' fi ca yi be sàa yǐ rʉ̀ʉ tɛ toto raa càa yì entòmbì nà. 17Àde' ŋwɛ̀ lor mrǔ' mfi foŋ lɛ njep mŋgùp mrù' vǐ brʉ̀ʉ ka'. E ka' gee wa'a banɛ mrǔ' mfi anà mi be lò koo, to'shi mŋgùp mrù' anà, tɛ mrù' mi kʉte à nshè, tɛ mŋgùp mrù' anà vi bʉ à cicì. Yi ke ba enɛ a lɛ mrǔ' mfi ba njep mŋgùp mrù' vǐ bfi tɛ mi bo kʉ̀te ka', tɛ mŋgùp mrù' vi to'ŋger ka'.”
18Jisòs à ka' ce làa buu ca nè wowèe, ŋwɛ̌ ŋgòr mò' embe ndàp rloo à vʉ̂, a gʉ'shi njep yě tìi, a laa enɛ̂, “Muu wà à ku kwe sè'ni sè'ni na. Ka' yi yu wa'a, vʉ̀ la' mo mmbo mbe yě ndùu tɛ e bo kʉti ntèe.” 19Jisòs à natì a du a yě mbùu a ŋgǎa yɛ'ni yì buu wèe. 20Njeŋwɛ̀ mò' ce e m cu mbe kùu à bfè' ncòp-baa-à-rrʉ̀ʉ, à vʉ njì embe yě njì, a joo mcʉ̀ŋcʉŋ cɛ̀' ese ye. 21E m làa nè yì nyor enɛ̂, “M ka' ku joo ba yi cùu cɛ̀', m ku ke'se.” 22Jisòs à karsì nyor, a yɛ ye, a laa nè ye enɛ̂, “Muu wà, kur ntee, lo rbyemì li gèe wɛ̀ ke'sè.” Njeŋwɛ̀ anà à ku ke'se à nfè' anà.
23Jisòs à dû, a ba' mbe ndàp ŋwɛ̌ ŋgòr ca a yɛ àmbò ŋgǎa mndoŋ a ce fyɛp mndoŋ, bèe a ce warse sê. 24E laa enɛ̂, “Dù nè, muunje ca à kwe kwe ka', e ce buumi buumi.” E ka' làa wa'a, wowèe a vʉshì ye. 25A ka' fʉr bèe anà embe ndàp, e niŋ mbo, a koo muunje anà à bò, e natì mbekì. 26Nsuŋ kuu yuu ce Jisòs à m gèe na à du à bdì' wɛɛwɛ à ŋgòŋ anà.
27Jisòs à ka' lò embo ce dù, mmbaŋrù mo' bèe a mbaa ce a m ba mnfèp, a natì, a du a yě mbùu a ce waa enɛ̂, “Muu Dɛvìd, koosimnse nè wèr.” 28E ka' niŋ mbe ndàp, mmbaŋrù ca a vʉ a yɛ ye. E laa nè wowèe enɛ̂, “Wèe à byemi enɛ àde' m gee wèe yɛ buu a?” Wowèe a beesì enɛ̂, “Ɛ̀no, Tatâ.” 29A ka' bèesi wa'a, e joo map mmir nè mmbo, a laa enɛ̂, “Tɛ yi ku ba nè wèe àmbò wèe à byemi enɛ yi be ba nà.” 30Wowèe a kɛ' a ce yɛ buu. E laa nè wowèe tatap se enɛ̂, “Wèe fa gèe tɛ ŋwɛ̀ mò' riŋ ka'.” 31Wowèe a nati a du a du a suŋ yap yu yuu ce Jisòs à m gèe nè wowèe nà à bdì' wɛɛwɛ à ŋgòŋ anà.
32Jisòs wèe a ka' nàti ce dù, bèe a vʉ nè ŋwɛ̀ mò' ce e m ba lʉr, yʉ' nyʉ̀rkà' yi ba njep ye. 33Jisòs à ka' fʉr yʉ' nyʉ̀rkà' anà, ŋwɛ̀ anà à kɛ' a ce làa. Bèe ce a m ba àfo a bɛɛŋgèr sê, a laa enɛ̂, “Njɛ̀ɛ yuu ca yi m be koni à ŋgòŋ Isrɛ̀l ka'.” 34Bèe Farìsi a laa yap enɛ̂, “E ce fʉr byʉ' mnyʉ̌mkà' enjep bèe ba à ŋger ŋkʉʉ mnyʉ̌mkà'.”
35Jisòs à m jɛ̀r à mla' mŋgòrŋgòr ba à mla' mŋkɛ'ŋkɛ' a ce yɛ'ni bèe à wap mndap mloo, a ce fè'shi Nsuŋ Mbòŋmboŋ àmbò kʉʉ Nyʉ̀, a ce gèe bèe ce a m ce yaŋ byaŋ njɛ̀ɛ jɛɛ jɛ̀ɛ jɛɛ, a ce kè'se. 36E ka' ce yɛ ku' bèe, nse yi koo ye nè wowèe, njobè' wowèe a m jep, a riŋ yuu ce a ce gèe ka', àmbò njèe ce yi buu ŋwɛ̀ ncìŋ njèe wa'a. 37E laa nè ŋgǎa yɛ'ni yì buu enɛ̂, “Buu à bi à mŋkʉ̀ gòr, ŋgǎa rkep a ba mʉcàr. 38Banɛ wèe loo nè Tàr ce e tʉr ŋkʉ̀ enɛ e tuusi ŋgǎa mfà' tɛ a du kep yì buu efa mŋkʉ̀.”
Dewis Presennol:
Ñwaè' Matïìyoè 9: LNT
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Limbum New Testament © Bible Society of Cameroon, 2003.