Mateyu 2
2
Pilipe Konginjeli Peli Ye Pokore Yesusi Ongo Kanoringi Temanemo
2:1-12
1Erote kolea Judia disiriki yembomanga ye nomi kingi molopili Mariane kolea Judia, Betellieme taonona Yesusi merimu. Kanu walemanga ena wendo oli koleana pilipe konginjeli peli ye pokore alieli ‘Ulu mare wendo okomonje piliemili.’ ningu kombukandipime mimi siku kanoko moloringime kolea awili Jerusalleme ongolie ningendo: 2“Juda yembomanga ye nomi kingi molomba kango meringimu#2:2 Kanu walemonga kangomo yu ponie talo mele molorumunje, inie maniekondo 2:16 kanani. tena molemoye? Olio ena wendo olemo koleana molopolie ye te ye nomi kingi molomba meringimu lipe ora sili kombukandipi te pulu pulu wendo omba angilierimu kanopolie nirimulumuni, yu popo topo imbi lipu ola mundundumolondo okomolo.” niringi.
3Ye nomi kingi Erote iungumu pilipelie ‘Ye te yu kolo wangopa kingi molomba lepamo.’ nimbe pilipelie yu mini-wale mundupe, Jerusalleme yemboma pali mini-walela mundoringi.
4Kanu kinie yuni Juda yembomanga Pulu Yemo popo tondoringi ye awilime pali kinie Pulu Yemonga ungu manemanga pulume pilku mane siringi yema pali kinie#2:4 bokumunge alsena anjokondo “34. pris”, “41. saveman”. “Sukundu waa.” nimbelie eno walsipe pilipelie nimbendo: “Pulu Yemone “Eno nokopa kondomba ye te lipu mundumbo.” nimbe mako torumu ye nomi Kirasimu#2:4 bokumunge alsena anjokondo “23. Krais”. tena mengemondo niringiye?” nirimu.
5Enone yundu ningendo: “Kolea Judia sukundu Betellieme taonona yu menge. Pulu Yemone ungu umbu tondorumume pilipe yemboma nimbe sirimu ye ˻Maikane˼#2:5 bokumunge alsena anjokondo “35. profet”. pe aku sipe wendo ombamondo ou nimbe boku torumu akune molemo kanumu. Yuni nimbendo:
6“Betellieme, kolea Juda#2:6 Kolea Juda kinie Judia kinie kolea telu sipe mele, nalo ou kolea Kenane sukundu pulu pulu pukulie Juda yemboma siringi koleamo “Juda” niringi akumundu nirimu.
lemo kolea te,
yu kolea Juda sukundu kolea awilimenga yu kolea manie te molo.
Yunge sukundu ye nomi awili te wendo ombá, akumuni nanga Isirele yembomanga
sipisipi tapu yemo molopa eno nokomba.”.#2:6 Maika 5:2.
nirimu kanumu.” niringi.
7Kanu kinie yembo lupema naa kanoko naa pilku molangi Erotene pilipe konginjeli peli yema “Waa.” nimbe kombukandipimu pulu pulu wendo omba angilierimu walemo walsipe pilipelie nirimumuni, yundu ningu siringi kinie 8pilipelie enondo nimbendo: “Eno Betellieme puku kangomo wamoko koro-payo! Kanoko lendekolie na ongo ningu sieyo. Na kepe yu ombo popo topo imbi lipu ola mundundembo.” nirimu. 9Kingimuni aku sipe nirimu pilkulie eno kelko puku kano-poringi.
Kanu kinie ena wendo oli koleana molkolie kombukandipi kanoringimu eno puringine kumbi lepa pumbe pupelie kangomo molorumu ulke imune pupe ola angilierimu. 10Enone kombukandipimu kanokolie konopu paa awili teko siringi. 11Ulkena sukundu pukulie kangomo kinie anumu Maria kinie moloringili puku kanoko lenderingi. Kanokolie kangomonga kumbikerena koporongo langoko ma kanokolie yu popo toko imbi liku ola mundundoringi. Mundundukulie eno wale peanga mengo oringime apisiku mele peangama wendo liku yu siringi. Kou gollo kinie, paura kalemele kinie mune paa toli paura te kinie, kopongo wele mune paa toli te kinie, aku melema yu siringi.
12Kanu kinie Pulu Yemone eno uru kumbu sipelie enondo nimbendo: “Eno Erote molemona kelko pu naa pangi, molo.” nirimu kinie pilkulie eno aulke tenga lupe ongolie lkondo puringi.
Josepone Anumu Maloselo Kolea Isipi Memba Kowa Purumu Temanemo
2:13-15
13Kanu kinie pilipe konginjeli peli yema kelko puringi kinie Awilimunge angello tene Josepo uru kumbu sipelie nimbendo: “Ye nomi kingi Erotene nondopa yunge ami yemando “Kangomo koroko toko kondo-paa!” nimbé kene nu ola molkolie kangomo kinie anumu kinie liku mengo kolea Isipindu kowa puku molo-payo. Ne anjo molkolie ningemone, pe nane “Kelko yando waa.” nimbo kinie wangi. Ou molo.” nirimu. 14Aku nirimu kinie pilipelie Josepo ola molopalie ipulueli anunguluselo lipe meli Isipindu purumu. 15‘Erote kolomba kinie kelepo ulkendo pumolo.’ ningu ou Isipi anjo moloringi.#2:13-15 Pulu Yemone Yesusi nokorumumundu Konana 22:9 molemo kanani. Aku teringimunge Pulu Yemone ungu umbu tondorumume pilipe yemboma nimbe sirimu ye tene ulu te pe wendo ombá ou nirimu mele kamu wendo orumu. Akumu isipe:
“Pulu Yemone nimbendo:
“Nanga kangomondo
“Kolea Isipi munduku siye kolko wendo ou.” nirindu.” nirimu.”.#2:15 Osia 11:1.
nimbe kanu ye ˻Osiane˼ nirimu kanumu.
Ye Nomi Kingi Erotene Betellieme Kango Pamema Topa Kondorumu Temanemo
2:16-18
16Kanu kinie anumu lapaselo Yesusi pea Isipi puku molangi, pilipe konginjeli peli yemane Erote yu liku lou lenderingi Erote yuni pilipelie mumindili paa awili tepa kolorumu. Mumindili kolopalie ami ye marendo nimbendo: “Betellieme taono kinie Betellieme nondopa lemo koleamakinie kanumenga puku kango ponie talo omba puli kangoma kinie ponie talo naa pora nili kangoma kinie koroko toko kondo-paa!” nirimu. Kombukandipi kanoko pilipe konginjeli peli yemane kombukandipimu pulu polopa wendo omba angilierimu walemo yundu ningu siringi mele pilipelie ponie aku sipe nirimu.
17Aku sipe terimumunge koronga-ou Pulu Yemone ungu umbu tondorumume pilipe yemboma nimbe sirimu ye Jeremayane ulu te pe wendo ombá ou nirimu mele wendo orumu. 18Yuni nimbendo:
“Eno kolea Rama#2:18 “Rama” nirimu Betelliemendo nirimu. suku ungu te pilieringi; kola teringi pilku,
yembo kolemele kinie kola telemele mele kola aku siku teringi pilieringi.
Ambo Reselene yunge ambolangomanga kola terimu.
Yu ‘Konopu pe nipili.’ ningulie teringi nalo yunge ambolangoma naa moloringi kulu yu kondo kolopa mindi molorumu.”.#2:18 Jeremaya 31:15.
nimbe Jeremayane ou aku nirimu kanumu.
Josepone Anumu Maloselo Kelepa Isilerendo Yando Memba Orumu Temanemo
2:19-23
19Pe Erote kolorumu kinie Awilimunge angello tene Josepo Isipi molopili uru kumbu sipelie nimbendo: 20“ “Kangomo toko kondangi koro-paa.” nirimu yemo kolorumu kene ola molko anumu maloselo liku mengo kolea Isirelendo kelko pu.” nirimu kinie 21pilipelie yu ola molopa anumu maloselo lipe memba Isirelendo purumu.
22Nalo Akellesi yunge lapa Erote kolo wangopa ye nomi kingimu molopa kolea Judia disiriki nokorumu pilipelie Josepo yu kanune altopa pumbendo pipili kolorumu. Kanu kinie Pulu Yemone uru kumbu sipelie nimbendo: “Marena tongenje kene akune naa pu.” nimbe yundu liepi liepi torumu kinie yu kelepa kolea Gallilli disiriki pupe 23akune lierimu Nasarete taonona pupe molorumu kulu Pulu Yemone ungu umbu tondorumume pilku yemboma ningu siringi yemane ˻Yesusi kinie˼ ulu te pe wendo ombá ou niringi mele kamu wendo orumu. Enone ningendo:
“Yembomane “Yu Nasarete taono ye te.” ninge.”
niringi kanumu.
Dewis Presennol:
Mateyu 2: ubuK
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 1995, Wycliffe Bible Translators, Inc. All rights reserved.