ᒉᓂᓯᔅ 34
34
ᑖᔨᓇ ᑮᐱᔑᒀᒋᐃᓐᒡ
1ᐋᐱᑎᕽ ᐁᑮᔑᑲᓂᓂᒃ ᑖᔨᓇ Dinah ᐌᑌᑌᒡ ᒉᑲᐴᓐ Jacob, ᐌᒫᒫᒡ ᓬᐄᔭᐗᓐ Leah ᑮᐃᔖ ᑫᓇᓐ Canaan ᐊᑮᕽ ᐁᒪᐗᑎᓵᒡ ᐌᑎ ᐃᑴᐗᐞ᙮ 2ᐊᐲ ᓴ ᔒᑲᒻ Shechem ᐁᐙᐸᒫᒡ ᐃᓂ ᐃᑴᐗᓐ ᐅᑮ ᐅᑎᑎᓈᓐ ᐁᑮ ᐱᔑᒀᒋᐋᒡ᙮ ᔒᑲᒻ ᑮᐅᑌᑌ ᐁᒪᕒ Hamor ᐁᔑᓂᑳᓱᓂᒡ ᑭᐲ Hivite ᐁᑮ ᑎᓄᐎᓂᒡ ᐁᑮ ᐅᑭᒫᑲᑕᒥᓂᒡ ᐃᐃ ᐊᔮᐎᓐ᙮ 3ᐐᑫ ᓴ ᐅᑮ ᒥᓴᐌᓂᒫᓐ ᐃᓂ ᐃᑴᐗᓐ ᐌᑌᑌᓂᒡ ᒉᑲᐴᓐ᙮ ᐐᑫ ᑲᔦ ᐅᑮ ᓵᑭᐋᓐ ᐁᑮ ᑲᑴ ᒥᓄ ᑲᑲᓅᓈᒡ᙮ 4ᒦᔥ ᔒᑲᒻ ᑳᑮᐃᓈᒡ ᐅᑌᑌᓐ ᐁᒪᕒᐊᓐ, ᑕᑲ ᐅᑎᓇᒪᐎᔑᓐ ᐗᐊ ᐃᑴ ᒋᐐᐎᔮᓐ᙮
5ᒉᑲᑉ ᐃᑕᔥ ᑮᓅᑕᒻ ᐁᑮ ᐱᔑᒀᒋᐃᒥᓐᒡ ᐅᑖᓂᓴᓐ᙮ ᐅᑯᓯᓴᐞ ᐃᓴ ᑮᐊᔮᐗᐞ ᒥᔕᐗᑲᒥᒃ ᐁᔑᐊᔮᓂᒡ ᐅᑕᐗᑳᓂᒪᐞ᙮ ᑳᐐᓐ ᐃᑕᔥ ᑫᑰᓐ ᒋᑮ ᐃᑭᑐᒡ ᐹᓂᒫ ᑳᐱ ᑕᑯᔑᓂᓂᒡ ᐅᑯᓯᓴᐞ᙮ 6ᐃᓂ ᓴ ᐁᒪᕒᐊᓐ ᐌᑯᓯᓯᓂᒡ ᔒᑲᒨᓐ ᐅᑮ ᐱ ᑲᑲᓅᓂᑰᓐ ᐊᐊ ᒉᑲᑉ᙮ 7ᒦᔥ ᐃᐃ ᐊᐲ ᒉᑲᑉ ᐅᑯᓯᓴᐞ ᑳᑮ ᐱᐅᒋ ᑕᑯᔑᓂᓂᒡ ᒥᔕᐗᑲᒥᒃ᙮ ᐊᐲ ᑕᔥ ᐁᓅᑕᒥᓂᒡ ᐋᓃᓐ ᑳᐃᓇᑲᒥᑲᓂᓂᒃ, ᐐᑫ ᓴ ᑮᒫᓀᑕᒨᐞ, ᐐᑫ ᑲᔦ ᑮᓂᔥᑳᑎᓯᐗᐞ ᐅᐅ ᐁᑮ ᐃᔑᒋᑫᓂᒡ ᔒᑲᒨᓐ᙮ ᑳᐐᓐ ᐄᑐᒃ ᑮᒥᓍᐸᒋᑳᑌᓯᓅᓐ ᐃᐃ ᑎᓄ ᐃᔑᒋᑫᐎᓐ ᐃᐃᒫ ᐃᔅᕒᐃᔭᓬ Israel ᑳᐃᔑᐊᔮᐙᒡ ᒋᐱᔑᒀᒋᐃᒥᑎᐸᓐ ᒉᑲᑉ ᐅᑖᓂᓴᓐ᙮ ᑳᐐᓐ ᐃᐃ ᒋᑮ ᐃᔑᒋᑫᓈᓂᐗᑭᐸᓐ᙮ 8ᒦᔥ ᐅᐅ ᑳᐃᑯᒡ ᐁᒪᕒᐊᓐ, ᐊᐊ ᓴ ᓂᑯᓯᔅ ᔒᑲᒻ ᐅᓵᑭᐋᓐ ᑭᑖᓂᓴᓐ᙮ ᑕᑲ ᐱᓵᓐ ᐃᓀᑕᓐ ᒋᒦᓇᒡ ᒋᐐᐎᒡ᙮ 9ᑕᑲ ᐃᓀᑕᑖ ᒋᐙᐐᑎᑫᑎᔭᕽ᙮ ᒦᔑᔑᓈᒻ ᑭᑖᓂᓯᐙᒃ, ᑫᓃᓇᐎᓐᑦ ᐃᑕᔥ ᑭᑲ ᒦᓂᑰᒻ ᓂᑖᓂᓯᓈᓂᒃ᙮ 10ᐱᓵᓐ ᐃᑕᔥ ᐃᑯ ᐅᐅᒫ ᑭᑲ ᐃᔑ ᑲᐯᔑᒻ, ᐁᑕᐎᓇᒫᑰᔦᒃ ᐅᐅᒫ ᓂᑕᑮᒥᓈᓂᕽ ᐱᓵᓐ ᒌᔑᑖᔦᒃ᙮ ᐱᓵᓐ ᑲᔦ ᒋᐊᓄᑳᑕᒣᒃ, ᑲᔦ ᑕᔥ ᒋᑎᐱᓇᐌᐎᓯᔦᒃ, ᐅᑮᐃᑰᓐ᙮
11ᒦᔥ ᔒᑲᒻ ᑳᑮ ᑲᓅᓈᒡ ᒉᑲᐴᓐ, ᐅᑯᓯᓯᓂ ᑲᔦ ᐁᑮ ᐃᑭᑐᒡ, ᑕᑲ ᒥᓄᑑᑕᐎᔑᒃ᙮ ᐌᑯᓀᓐ ᐃᓴ ᑯᒣᓴᐌᑕᒣᒃ ᑭᑲ ᒦᓂᓂᓂᒻ᙮ 12ᐐᑕᒪᐎᔑᒃ ᐌᑯᓀᓐ ᐁᑕᐌᑕᒣᒃ ᑫᒦᓂᓇᑰᒃ, ᐱᓵᓐ ᐃᑯ ᓃᐱᐗᐞ ᐃᓇᑭᒥᒃ ᐊᐊ ᑫᐐᑎᑫᒪᒃ, ᒦ ᓴ ᐱᑯ ᐃ ᒥᓂᒃ ᑫᑎᐸᐊᒪᐎᓇᑰᒃ᙮ ᒦ ᐁᑕ ᐁᔑ ᒥᓴᐌᑕᒫᓐ ᒋᒦᔑᔦᒃ ᐊᐊ ᐃᑴ ᒋᐐᐎᔮᓐ᙮ 13ᐃᐃ ᓴ ᑕᔥ ᒉᑲᑉ ᐅᑯᓯᓴᐞ ᑳᐐᓐ ᑾᔭᒃ ᑮᐃᓀᑕᓰᐗᐞ ᐁᓇᑴᑕᐙᓂᒡ ᐁᐐ ᐅᒋ ᐗᔦᔑᒫᓂᒡ ᐃᓂ ᔒᑲᒨᓐ ᐌᑌᑌᓂᒡ ᐁᒪᕒᐊᓐ, ᐋᓃᔥ ᔒᑲᒨᓐ ᐅᑮ ᐱᔑᒀᒋᐋᓂ ᐃᓂ ᑖᔨᓇᐗᓐ ᐅᑕᐌᒫᐙᓐ᙮ 14ᒦᔥ ᐅᐅ ᑳᐃᔑ ᓇᑴᑕᒥᓂᒡ, ᑳᐐᓐ ᐃᐃ ᓂᑖ ᐃᔑᒋᑫᓰᒥᓐ, ᒋᒦᑭᐌᔮᑭᐸᓐ ᓂᑕᐌᒫᓈᓐ ᒋᐐᑎᑫᒫᒡ ᐃᓂᓂᐗᓐ ᑳᑭᑭᓇᐙᑕᔕᑫᔣᓯᐎᒥᓐᒡ᙮ ᓂᑖ ᐅᒋ ᐋᓍᐸᒥᑰᒥᓐ᙮ 15ᒦ ᓴ ᐅᐌ ᐁᑰᔦᒃ, ᓂᑲ ᐃᓀᑖᒥᓐ ᒌᔑᒋᑫᔮᕽ ᐃᐃ ᐁᑭᑐᔦᒃ ᑮᔥᐱᓐ ᑯᑌᑕ ᑭᑭᓇᐙᑕᔕᑫᔓᑣ ᑲᑭᓇ ᑭᑎᓂᓃᒥᐙᒃ ᒌᔑᓈᑯᓯᐙᒡ ᑖᐱᔥᑰ ᐁᔑᓈᑯᓯᔮᕽ᙮ 16ᒦᑕᔥ ᐃᐃ ᐸᔦᔥ ᒋᒦᓂᑰᔦᒃ ᓂᑖᓂᓯᓈᓂᒃ, ᑲᔦ ᑕᔥ ᒋᐅᑖᐱᓇᑭᑣ ᑭᑖᓂᓯᐙᒃ᙮ ᒦᔥ ᑫᔑ ᑲᐯᔑᔮᕽ ᒣᑴᔭᐄ ᐁᔑᐊᔮᔦᒃ ᒋᐯᔑᑴᑖᑯᓯᔭᕽ᙮ 17ᑮᔥᐱᓐ ᐃᑕᔥ ᐐᓐ ᐃᓀᑕᓯᐌᒃ ᒋᑭᑭᓇᐙᑕᔕᑫᔓᑰᔦᒃ, ᒦᔥ ᑫᔑ ᒫᒑᔮᕽ ᒋᑕᑯ ᒫᒌᓇᑭᒡ ᓂᑕᐌᒫᓈᓐ, ᐅᑮᐃᓈᐙᐞ᙮
18ᐋᐱᒋ ᓴ ᐁᒪᕒ ᐊᐊ ᑲᔦ ᔒᑲᒻ ᑮᒥᓄᑕᒨᒃ ᑳᑮᐃᓂᑣ᙮ 19ᐊᐊ ᑕᔥ ᐅᔥᑭᓃᑭ ᔐᒫᒃ ᑮᐃᔑᒋᑫ ᑳᑮᐃᓂᑣ ᐋᓃᔥ ᐐᑫ ᐅᑮ ᐊᑕᐌᓂᒫᓐ ᐃᓂ ᐃᑴᐗᓐ ᐌᑌᑌᓂᒡ ᒉᑲᐴᓐ᙮ ᐐᓐ ᐄᑐᒃ ᑲᔦ ᒫᐗᒡ ᑮᑭᒋ ᐃᓀᑖᑯᓯ ᐃᐃᒫ ᐅᑌᑌᓐ ᐅᑖᐎᓂᓃᕽ᙮
20ᒦᔥ ᐊᐊ ᐁᒪᕒ ᐊᐊ ᑲᔦ ᔒᑲᒻ ᑮᐃᔖᐗᒃ ᐆᑌᓈᕽ ᐁᑕᔑ ᐅᓈᑯᓂᑫᕽ ᐁᑮ ᑎᐹᒋᒧᐙᒡ ᑳᑮᐃᓂᑣ᙮ ᒦᔥ ᑳᐃᑭᑐᐙᒡ, 21ᐁᑕᑕᐌ ᐅᔕ ᐄᓴᓐ ᑭᐐ ᓵᑭ ᐐᒌᐎᑯᓈᓂᒃ ᐃᑭ ᐃᓂᓂᐗᒃ; ᑕᑲ ᐱᓵᓐ ᑕᑲᐯᔑᐗᒃ ᑭᑕᑮᒥᓈᓂᕽ, ᐱᓵᓐ ᑲᔦ ᐅᑲ ᐊᓄᑮᓄᑖᓈᐙ᙮ ᒪᑭᑕᐙ ᐄᑐᒃ ᑭᑕᑮᒥᓈᓐ ᒋᑌᐱᑖᐙᒡ᙮ ᐱᓵᓐ ᐃᑕᔥ ᑭᑲ ᐐᐎᐙᒥᓐ ᐅᑖᓂᓯᐙᐞ, ᐱᓵᓐ ᐃᑕᔥ ᑫᐐᓇᐙ ᑕᐐᐎᐗᒃ ᑭᑖᓂᓯᓈᓂᐞ᙮ 22ᐃᑭ ᓴ ᐃᓂᓂᐗᒃ ᑕᐃᓀᑕᒧᒃ ᒋᐐᒋ ᐊᔮᒥᓇᒀ, ᒋᐐᑖᑎᓰᒪᒀ ᑮᔥᐱᓐ ᑯᑌᑕ ᑭᑭᓇᐙᑕᔕᑫᔓᑣ ᑲᑭᓇ ᑭᑎᓂᓃᒥᓈᓂᒃ ᑖᐱᔥᑰ ᑳᑑᑕᐎᑣ᙮ 23ᑲᑭᓇ ᐅᑕᐗᑳᓂᒥᐙᐞ ᑲᑭᓇ ᑲᔦ ᑌᐯᑕᒧᐙᒡ ᑮᓇᐎᓐᑦ ᑭᑲ ᑎᐱᓇᐌᐎᓯᒥᓐ᙮ ᑕᑲ ᓴ ᐱᓵᓐ ᐃᓀᑕᑖ ᒌᔑᒋᑫᐗᕽ ᐁᓂᓇᒀ, ᒋᐐᒋᑖᒥᓇᒀ, ᑮᐃᑭᑐᐗᒃ᙮ 24ᑲᑭᓇ ᓴ ᑕᔥ ᑳᑮ ᐃᔖᐙᒡ ᐁᔑ ᐅᓈᑯᓂᑎᐎᓐᒡ ᐃᐃᒫ ᐆᑌᓈᕽ ᑮᐱᓯᑕᒨᒃ ᑮᐃᓀᑕᒨᒃ ᐋᓃᓐ ᐁᑭᑐᓂᒡ ᐁᒪᕒᐊᓐ ᐃᓂ ᑲᔦ ᐅᑯᓯᓯᓂ ᔒᑲᒻ ᐁᔑᓂᑳᓱᓂᒡ᙮ ᑲᑭᓇ ᓴ ᐄᓴᓐ ᐃᓂᓂᐗᒃ ᑮᑭᑭᓇᐙᑕᔕᑫᔣᐗᒃ᙮
25ᓂᓱᑮᔑᒃ ᐃᑕᔥ ᐁᐊᓂ ᐃᔑᓭᓂᒃ ᒣᒀ ᐁᐐᓴᑫᑕᒥᓂᒡ ᐃᐃ ᐃᓂᓂᐗᐞ, ᐊᐊ ᓴ ᓬᐄᐹᐃ Levi, ᐊᐊ ᓯᒥᔭᓐ Simeon ᐌᑌᑌᐙᒡ ᒉᑲᐴᓐ, ᐌᑕᐌᒫᐙᒡ ᑖᔨᓇᐗᓐ ᑮᑮᒨᒋ ᐃᔖᐗᒃ ᐃᐃᒫ ᐆᑌᓈᕽ᙮ ᐸᔑᐸᐃᑫᐎᑯᒫᓇᓐ ᐁᑮ ᒫᒌᑐᐙᒡ, ᑲᑭᓇ ᓴ ᐃᓂᓂᐗᐞ ᐅᑮ ᓂᓵᐙᐞ᙮ 26ᐃᓂᔥ ᑲᔦ ᐁᒪᕒᐊᓐ ᐃᓂ ᑲᔦ ᐅᑯᓯᓯᒫᓐ ᔒᑲᒪᓐ ᐅᑮ ᑕᑯ ᓂᓵᐙᓐ᙮ ᒦᑕᔥ ᑳᐃᔑ ᐃᔖᐙᒡ ᔒᑲᒪᓐ ᐅᐙᑳᐃᑲᓂᓃᕽ ᐁᑮ ᑮᐌᐎᓈᐙᒡ ᐅᑕᐌᒫᐙᓐ ᑖᔨᓇᐗᓐ, ᒦᔥ ᑳᐃᔑ ᒫᒑᐙᒡ᙮ 27ᐃᐃ ᑕᔥ ᑯᑕᒃ ᒉᑲᑉ ᐅᑯᓯᓴᐞ ᑮᐲᔖᐗᐞ ᐃᐃᒫ ᐆᑌᓈᕽ ᑳᐃᔥᒀ ᓂᔑᐌᓈᓂᐗᓂᓂᒃ, ᐁᑮ ᐱ ᓈᓯᑲᒥᓂᒡ ᑲᑭᓇ ᑫᑰᓇᓐ ᐃᐃᒫ ᐆᑌᓈᕽ᙮ ᒦᔥ ᑳᑮ ᐅᒋ ᐃᔑᒋᑫᐙᒡ ᐅᓵᒻ ᐋᓃᔥ ᐅᑕᐌᒫᐙᓐ ᑮᐱᔑᒀᒋᐋᐗᓐ᙮ 28ᐅᑮᒫᒌᓈᐙᐞ ᑲᔦ ᒫᓇᒑᓂᔕᐞ, ᐱᔑᑭᐗᐞ, ᒫᔑᒥᑕᑎᒨᐞ ᑲᔦ, ᑲᑭᓇ ᓴ ᑫᑰᓐ ᐁᔮᓂᒃ ᒥᔕᐗᑲᒥᒃ, ᐃᐃᒫ ᑲᔦ ᐆᑌᓈᕽ᙮ 29ᑲᑭᓇ ᓴ ᑯ ᑫᑰᓐ ᑳᐊᑭᑌᓂᑭᓐ ᐅᑮ ᒫᒌᑑᓈᐙ᙮ ᐊᐙᒡ ᑲᔦ ᐊᐱᓅᒌᔕᐞ, ᐃᑴᐗᐞ ᑲᔦ, ᑲᑭᓇ ᑲᔦ ᑫᑰᓐ ᐁᔮᓂᒃ ᐅᑖᐎᓂᓃᕽ᙮
30ᒦᑕᔥ ᒉᑲᑉ ᑳᐃᓈᒡ ᐅᑯᓯᓴᐞ ᓬᐄᐹᐃᔭᓐ, ᐃᓂ ᑲᔦ ᓯᒥᔭᓇᓐ, ᒦ ᓴ ᐃ ᓴ ᐁᑲᔥᑭᑕᒪᐎᔦᒃ ᒫᔑᓭᐎᓐ ᐅᐅ ᑳᑮ ᐃᔑᒋᑫᔦᒃ᙮ ᒦᔥ ᒋᑲᒀᓂᓴᑫᓂᒥᐙᒡ ᐅᑯ ᑫᓇᓐ ᐊᑮᕽ ᐌᒌᐙᒡ, ᐃᑭ ᑲᔦ ᐯᕒᐃᓰ Perizzites ᑳᑎᓄᐎᐙᒡ ᐅᐅᒫ ᐁᔮᐙᒡ ᐊᑮᕽ᙮ ᐋᐱᒋ ᓴ ᐊᑳᓰᓄᐗᒃ ᓂᑎᓂᓃᒪᒃ᙮ ᑮᔥᐱᓐ ᐃᑕᔥ ᒫᒪᐐᓄᐙᒡ ᒦᑳᔑᐙᒡ ᒦ ᓴ ᐃ ᒋᓂᓯᑰᔮᓐ, ᑲᑭᓇ ᑲᔦ ᑳᐐᒋ ᐊᔮᒪᒀ, ᐅᑮᐃᓈᐞ᙮ 31ᒦᔥ ᐅᐅ ᑳᐃᑯᒡ, ᑳᐐᓐ ᐄᑐᒃ ᐃᑕᔥ ᐃᐃ ᐅᑖᑮ ᑑᑕᐙᓰᓐ ᓂᑕᐌᒫᓈᓂᓐ ᑖᐱᔥᑰ ᐱᔑᒀᒋᑴᕽ, ᐅᑮᐃᑰᐞ᙮
Dewis Presennol:
ᒉᓂᓯᔅ 34: OJBS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ojibwe Shorter Bible (Syllabic Script) © 2008 Canadian Bible Society