ᒉᓂᓯᔅ 30
30
1ᐊᐲ ᑕᔥ ᐅᕒᐁᒐᓬ Rachel ᐁᐙᐸᑕᕽ ᐁᑮ ᐊᔮᐙᓯᒃ ᒉᑲᐴᓐ Jacob ᐅᓃᒑᓂᓯᓂ, ᐅᑮ ᐅᑌᓂᒫᓐ ᐃᓂ ᑎᐱᓇᐌ ᐐᒋᑴᐗᓐ᙮ ᒦᑕᔥ ᑳᑮᐃᓈᒡ ᒉᑲᐴᓐ, ᑕᑲ ᒦᔑᔑᓐ ᐊᐱᓅᒌᔕᒃ, ᑯᒫ ᒣᔥᑾᒡ ᓂᑲ ᓂᑉ, ᐅᑮᐃᓈᓐ᙮
2ᐅᑮ ᓂᔥᑭᐋᓐ ᑕᔥ ᒉᑲᐴᓐ ᐁᑮᐃᑯᒡ, ᑳᐐᓐ ᓃᓐ ᓂᑭᔐᒪᓂᑑᐎᓰ, ᐐᓐ ᐄᑐᒃ ᑳᐃᔑᐃᒃ ᒋᐊᔮᐎᒫᓯᐗᒡ ᐊᐱᓅᒌᔕᒃ, ᐅᑮᐃᑰᓐ᙮
3ᒦᔥ ᐅᐅ ᑳᐃᓈᒡ, ᐃᓇ ᐗᐊ ᐱᓬᐊ Bilhah ᑳᐸᒦᑕᐎᒡ ᐃᑴ᙮ ᓈᓯᑲᐤ ᒋᐐᐯᒪᒡ ᒋᐊᔮᑕᒪᐎᒡ ᐊᐱᓅᒌᔕᐞ᙮ ᒦ ᓴ ᐃᒫ ᑫᓃᓐ ᑫᐅᒋ ᐊᔮᐗᒀ ᐊᐱᓅᒌᔕᒃ, ᐅᑮᐃᓈᓐ᙮ 4ᒦᑕᔥ ᑳᐃᔑ ᒦᓈᒡ ᐅᓈᐯᒪᓐ ᐃᓂ ᐅᐸᒦᑖᑲᓂᑴᒪᓐ ᐱᓬᐊᐗᓐ᙮ ᒦᑕᔥ ᒉᑲᐴᓐ ᑳᐃᔑ ᐐᐯᒫᓂᒡ᙮ 5ᐱᓬᐊᐗᓐ ᑕᔥ ᑮᑭᑭᔥᑲᐙᐗᓱᐗᓐ ᐁᑮ ᐅᑯᓯᓯᓂᒡ᙮ 6ᐅᕒᐁᒐᓬ ᑕᔥ ᑮᐃᑭᑐ, ᑳᑎᐯᒋᑫᒡ ᓴ ᓂᑮ ᓈᑕᒫᒃ, ᑌᐺ ᓴ ᓂᑮ ᓅᑖᒃ, ᐁᑮ ᒦᔑᒡ ᑫᐅᑯᓯᓯᐗᒃ᙮ ᑌᓐ Dan ᑕᔥ ᐅᑮ ᐃᔑᓂᑳᓈᓐ ᐃᓂ ᑸᐎᓭᓴᓐ᙮ 7ᐅᕒᐁᒐᓬ ᑕᔥ ᐅᐸᒦᑖᑲᓂᑴᒪᓐ ᐱᓬᐊᐗᓐ ᒦᓇᐙ ᑮᑭᑭᔥᑲᐙᐗᓱᐗᓐ, ᒦ ᐃ ᓃᔑᓐ 2 ᑫᐅᑯᓯᓯᓂᒡ ᐁᑮ ᐅᑎᓈᓂᒡ ᒉᑲᐴᕽ᙮ 8ᐅᕒᐁᒐᓬ ᑕᔥ ᑮᐃᑭᑐ, ᒦᑕᔥ ᐅᐅ ᐁᔑ ᑲᑴ ᔖᑰᒋᐃᑎᔮᕽ ᑎᐱᓇᐌ ᓃᒋᑴ, ᓃᓐ ᑕᔥ ᓂᐸᑭᓈᑫ, ᑮᐃᑭᑐ᙮ ᓈᐱᑕᓬᐋᐃ#30.8 ᓈᐱᑕᓬᐋᐃ: ᐃᐃᐌ ᐃᔑᓂᑳᓱᐎᓐ ᓈᐱᑕᓬᐋᐃ ᑳᐃᒋᑳᑌᒃ, ᒦᑳᓱᐎᓐ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Naphtali ᑕᔥ ᐅᑮ ᐃᔑᓂᑳᓈᓐ᙮
9ᐊᐲ ᑕᔥ ᓬᐄᔭ Leah ᐁᑭᑫᑕᕽ ᐁᐴᓅᔐᒡ, ᐅᑮ ᐅᑖᐱᓈᓐ ᐅᐸᒦᑖᑲᓂᑴᒪᓐ ᓯᓬᐸ Zilpah ᐁᔑᓂᑳᓱᓂᒡ, ᐅᑮ ᒦᓈᓐ ᑕᔥ ᒉᑲᐴᓐ ᒋᐋᓂᑫ ᐐᐎᓂᒡ᙮ 10ᓬᐄᔭ ᑕᔥ ᐅᐸᒦᑖᑲᓂᑴᒪᓐ ᓯᓬᐸᐗᓐ ᐅᑮ ᐊᔮᑕᒪᐙᓂ ᒉᑲᐴᓐ ᐁᐅᑯᓯᓯᓂᒡ᙮ 11ᓬᐄᔭ ᑕᔥ ᑮᐃᑭᑐ, ᐁᑕᑕᐌ ᒥᓄᓭᐎᓐ ᓂᑑᑎᓯᑯᓐ, ᑮᐃᑭᑐ᙮ ᑳᑦ#30.11 ᑳᑦ: ᐃᐃᐌ ᐃᔑᓂᑳᓱᐎᓐ ᑳᑦ ᑳᐃᒋᑳᑌᒃ, ᒥᓄᓭᐎᓐ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Gad ᑕᔥ ᐅᑮ ᐃᔑᓂᑳᓈᓐ᙮ 12ᒦᓇᐙ ᑕᔥ ᐅᐸᒦᑖᑲᓂᑴᒪᓐ ᓯᓬᐸᐗᓐ ᑮᑭᑭᔥᑲᐙᐗᓱᐗᓐ᙮ ᒦ ᐃ ᓃᔑᓐ 2 ᐁᑮ ᐊᔮᐙᓂᒡ ᑫᐅᑯᓯᓯᓂᒡ ᒉᑲᐴᕽ ᐅᒋ᙮ 13ᓬᐄᔭ ᑕᔥ ᑮᐃᑭᑐ, ᐁᑕᑕᐌ ᓂᒥᓉᑕᒻ! ᐃᑴᐗᒃ ᓴ ᓂᑲ ᐃᔑᓂᑳᓂᑰᒃ, ᑳᒥᓉᑕᕽ, ᑮᐃᑭᑐ᙮ ᐋᔕᕒ Asher ᑕᔥ ᐅᑮ ᐃᔑᓂᑳᓈᓐ᙮
14ᒣᒀ ᐁᔑᓭᓂᒃ ᐊᐲ ᑮᒪᓂᔑᑫᕽ, ᐅᕒᐆᐱᓐ Reuben ᑮᐃᔖ ᒥᔕᐗᑲᒥᒃ, ᐅᑮ ᒥᑳᓇᓐ ᑕᔥ ᑭᑎᑳᓇᓐ ᑳᐅᒋ ᐅᔑᒋᑳᑌᒃ ᒥᓉᑖᑯᓰ ᒪᔥᑭᑭ#30.14 ᒥᓉᑖᑯᓰ ᒪᔥᑭᑭ: ᒦ ᓴ ᐃ ᑭᑎᑳᓐ ᒥᓉᑖᑯᓰ ᒪᔥᑭᑭ ᑮᐃᔑᓂᑳᑌ ᑳᑮ ᐃᔑ ᑌᐺᑕᒧᓈᓂᐗᕽ ᑫᐅᒋ ᐅᑕᐱᓅᒌᔑᒥᕽ᙮ ᒦᔥ ᑳᐃᓍᑌᒃ ᒥᓉᑖᑯᓰ ᒪᔥᑭᑮᕽ᙮ ᑖᐱᔥᑰ ᑲᔦ ᔒᐎᒦᒋᒻ ᑳᑮ ᓂᑖᐎᑭᕽ ᐱᑾᒐᔭᐄ᙮ ᒦᑕᔥ ᑳᑮ ᐃᓀᑕᒧᐙᒡ ᐃᑴ ᒦᒋᒡ ᒋᑲᔥᑭᑑᒡ ᒋᐊᔮᐙᒡ ᐊᐱᓅᒌᔕᓐ᙮ mandrake ᑳᐃᔑᓂᑳᑌᒃ᙮ ᐅᑮ ᑮᐌᐎᑑᓇᓐ ᑕᔥ ᐁᑮ ᐲᑕᒪᐙᒡ ᐅᒫᒫᓐ ᓬᐄᔭᐗᓐ᙮ ᓬᐄᔭ ᐅᑮᐃᑰᓐ ᐅᕒᐁᒐᓬᐗᓐ, ᑕᑲ ᒦᔑᔑᓐ ᐃᓂ ᐋᓂᑕ ᑭᑯᓯᔅ ᒥᓉᑖᑯᓰ ᒪᔥᑭᑭ ᑳᐊᔮᒡ, ᐅᑮᐃᑰᓐ᙮
15ᐅᐅ ᑕᔥ ᐅᑮᐃᓈᓐ, ᑳᐐᓐ ᐃᓇ ᐸᑮ ᑭᑎᓀᑕᓰ ᐁᑮ ᒪᑲᒥᔭᓐ ᓂᓈᐯᒻ? ᑭᐐ ᒪᑲᒫᓇ ᑲᔦ ᓂᑯᓯᔅ ᐅᒥᓉᑖᑯᓰ ᒪᔥᑭᑭ? ᐅᑮᐃᓈᓐ᙮
ᐅᕒᐁᒐᓬᐗᓐ ᑕᔥ ᐅᑮᐃᑰᓐ, ᒉᑲᑉ ᓴ ᒣᔥᑾᒡ ᑭᑲ ᐐᐯᒥᒃ ᐅᓈᑯᔑᓂᓂᒃ ᑮᔥᐱᓐ ᒦᔑᔭᓐ ᐃᓂ ᑭᑯᓯᔅ ᑳᐊᔮᒡ ᒥᓉᑖᑯᓰ ᒪᔥᑭᑭ, ᐅᑮᐃᑰᓐ᙮
16ᐊᐲ ᑕᔥ ᒉᑲᐴᓐ ᒥᔕᐗᑲᒥᒃ ᐁᑮ ᐱᐅᒋ ᑕᑯᔑᓂᓂᒡ ᐁᐅᓈᑯᔑᓂᓂᒃ, ᓬᐄᔭ ᐅᑮ ᐊᑕ ᓇᑭᔥᑲᐙᓐ ᐁᑮᐃᓈᒡ, ᒦ ᓴ ᐃ ᐁᔑᓈᑾᒃ ᒋᐐᐯᒥᔭᓐ, ᐋᓃᔥ ᑭᑮ ᑌᑎᐸᐅᓐ ᐁᑮ ᐋᐸᒋᑑᔮᓐ ᓂᑯᓯᔅ ᑳᐊᔮᒡ ᒥᓉᑖᑯᓰ ᒪᔥᑭᑭ, ᐅᑮᐃᓈᓐ᙮ ᒦᑕᔥ ᑳᐃᔑ ᐐᐯᒥᑯᒡ ᐃᐃ ᐁᑎᐱᑲᓂᓂᒃ᙮
17ᑭᔐᒪᓂᑑᓐ ᑕᔥ ᓬᐄᔭ ᐅᑮ ᓅᑖᑰᓐ, ᒦᔥ ᑳᑮ ᑭᑭᔥᑲᐙᐗᓱᒡ᙮ ᒦᑕᔥ ᐃᐃ ᓈᓇᓐ ᐁᑮ ᐊᔮᐙᒡ ᑫᐅᑯᓯᓯᒡ ᒉᑲᐴᕽ ᐅᒋ᙮ 18ᓬᐄᔭ ᑕᔥ ᑮᐃᑭᑐ, ᑭᔐᒪᓂᑑ ᓴ ᓂᑎᐸᐊᒫᒃ, ᐋᓃᔥ ᓂᑮ ᒦᓈ ᓂᓈᐯᒻ ᓂᐸᒦᑖᑲᓂᑴᒪᓐ, ᑮᐃᑭᑐ᙮ ᐃᓴᑳᕒ#30.18 ᐃᓴᑳᕒ: ᐃᐃᐌ ᐃᔑᓂᑳᓱᐎᓐ ᐃᓴᑳᕒ ᑳᐃᒋᑳᑌᒃ, ᐃᓂᓂ ᑳᐊᓄᑮᐋᑲᓂᐎᒡ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Issachar ᑕᔥ ᐅᑮ ᐃᔑᓂᑳᓈᓐ᙮ 19ᒦᓇᐙ ᑕᔥ ᓬᐄᔭ ᑮᑭᑭᔥᑲᐙᐗᓱ᙮ ᒦ ᐃ ᓂᑯᑣᓱ ᐁᑮ ᐊᔮᐙᒡ ᑫᐅᑯᓯᓯᒡ ᒉᑲᐴᕽ ᐅᒋ᙮ 20ᒦᑕᔥ ᑳᐃᑭᑐᒡ, ᑭᔐᒪᓂᑑ ᓴ ᐁᑕᑕᐌ ᐅᓂᔑᔑᓂᓂ ᑳᒦᔑᒡ; ᓅᑯᒻ ᒫᐐᓐ ᓂᓈᐯᒻ ᓂᑲ ᑭᒋ ᐃᓀᓂᒥᒃ, ᐋᓃᔥ ᒦ ᐃ ᐋᔕ ᓂᑯᑣᓱ ᐁᔮᑕᒪᐗᒃ ᐅᑯᓯᓴᐞ, ᑮᐃᑭᑐ᙮ ᓭᐱᔪᓬᐊᓐ#30.20 ᓭᐱᔪᓬᐊᓐ: ᐃᐃᐌ ᐃᔑᓂᑳᓱᐎᓐ ᓭᐱᔪᓬᐊᓐ ᑳᐃᒋᑳᑌᒃ, ᒦᓂᑰᐎᓐ, ᒦ ᐃᐌ ᐁᓂᑖᑾᓂᓂᒃ ᑳᐃᔑᑮᔗᐙᒡ ᐄᐸᕒᐆᐗᒃ᙮ Zebulun ᑕᔥ ᐅᑮ ᐃᔑᓂᑳᓈᓐ᙮ 21ᓈᓈᑫ ᑕᔥ ᐁᐊᓂ ᐃᔑᓭᓂᒃ ᑮᐅᑖᓂᓯ, ᑖᐃᓇ Dinah ᐁᑮ ᐃᔑᓂᑳᓈᒡ᙮
22ᑭᔐᒪᓂᑑ ᑕᔥ ᐅᑮ ᑑᑕᐙᓐ ᐅᕒᐁᒐᓬᐗᓐ Rachel ᑳᑮ ᐃᔑ ᐊᓇᒥᐁᑖᑯᒡ, ᒦᑕᔥ ᑳᑮ ᐃᔑᐋᒡ ᒋᑲᔥᑭᑑᓂᒡ ᒋᐅᑕᐱᓅᒌᔑᒥᓂᒡ᙮ 23ᐅᕒᐁᒐᓬ ᑕᔥ ᑮᑭᑭᔥᑲᐙᐗᓱ ᐁᑮ ᐅᑯᓯᓯᒡ, ᒦᔥ ᑳᐃᑭᑐᒡ, ᑭᔐᒪᓂᑑ ᓴ ᓂᑮ ᑑᑖᒃ ᒋᐅᑕᐱᓅᒌᔑᒥᐗᒃ, ᒦᔥ ᑳᐅᒋ ᐴᓂ ᒦᑭᓱᒥᑰᐗᒃ, ᑮᐃᑭᑐ᙮ 24ᒎᓴᑉ Joseph ᑕᔥ ᐅᑮ ᐃᔑᓂᑳᓈᓐ ᐅᐅ ᐁᑮ ᐃᑭᑐᒡ, ᑕᑲ ᑳᑎᐯᒋᑫᒡ ᓂᑲ ᒦᓂᒃ ᑯᑕᒃ ᑫᐅᑯᓯᓯᐗᒃ, ᑮᐃᑭᑐ᙮ 25ᐊᐲ ᑕᔥ ᒎᓴᐴᓐ ᑳᐃᔥᒀ ᓂᑖᐎᑭᓂᒡ, ᒉᑲᑉ ᐅᑮᐃᓈᓐ ᓬᐁᐸᓅᓐ Laban, ᑕᑲ ᐸᑭᑎᓂᔑᓐ ᓂᑕᑮᒥᕽ ᒋᔑ ᑮᐌᔮᓐ᙮ 26ᒦᔑᔑᓐ ᓂᐐᐗᒃ, ᓂᓃᒑᓂᓴᒃ ᑲᔦ ᑳᑲᔥᑭᑕᒫᓱᔮᓐ ᑳᐱ ᐊᓄᑮᑕᐎᓈᓐ, ᒦᔥ ᒋᐸᑭᑎᓂᔭᓐ ᒋᓂ ᒫᒑᔮᓐ᙮ ᑭᑭᑫᑖᓐ ᐄᑐᒃ ᐌᐌᓂ ᐁᐱ ᐊᓄᑮᑕᐎᓈᓐ᙮
27ᒦᔥ ᐅᐅ ᓬᐁᐸᓅᓐ ᑳᐃᑯᒡ, ᑮᔥᐱᓐ ᐃᓴ ᒣᓍᐸᒥᐗᓀᓐ, ᑫᑯ ᒫᒑᑫᓐ᙮ ᓇᓈᑕ ᑭᑫᒋᑫᐎᓂᕽ ᐅᔕ ᓂᑑᒋ ᑭᑫᑖᓐ ᑳᑎᐯᒋᑫᒡ ᐁᔕᐌᓂᒥᒡ ᑮᓐ ᐅᒋ᙮ 28ᒦᔥ ᑲᔦ ᑳᐃᑯᒡ, ᐐᑕᓐ ᑫᔑ ᑎᐸᐊᒪᐎᓈᓐ, ᒦᔥ ᐃᐃ ᑫᔑ ᑎᐸᐊᒪᐎᓈᓐ᙮
29ᐅᐅ ᑕᔥ ᒉᑲᑉ ᑮᐃᑭᑐ, ᑭᑭᑫᑖᓐ ᐄᑐᒃ ᐋᓃᓐ ᐯᒥᔑ ᐊᓄᑮᑕᐎᓈᓐ, ᐁᐊᓂ ᐹᑏᓄᐙᒡ ᑲᔦ ᑭᑕᐗᑳᓂᒪᒃ ᑫᓇᐌᓂᒪᒀ᙮ 30ᒋᑆ ᑕᑯᔑᓈᓐ ᓴ ᐸᑮ ᐁᑕ ᑫᑰᓐ ᑭᑮ ᐊᔮᓐ, ᓅᑯᒻ ᐃᑕᔥ ᐁᑕᑕᐌ ᑭᐌᓅᑎᔅ᙮ ᑳᑎᐯᒋᑫᒡ ᓴ ᐐᑫ ᑭᔕᐌᓂᒥᒃ ᐋᑎ ᐱᑯ ᐯᒥ ᐊᔮᐗᒃ᙮ ᒦᑕᔥ ᐁᐅᒋᒋᓭᒃ ᓃᓐ ᐃᑯ ᒋᑲᔥᑭᑕᒪᐗᒀ ᐁᔮᐙᒡ ᓂᑖᐎᓂᕽ᙮
31ᒦᔥ ᐅᐅ ᑳᐃᑯᒡ ᓬᐁᐸᓅᓐ, ᐌᑯᓀᓐ ᐃᑕᔥ ᑫᒦᓂᓈᓐ?
ᐅᐅ ᑕᔥ ᐅᑮᐃᓈᓐ, ᑳᐐᓐ ᑫᑰᓐ ᓂᓇᑕᐌᑕᓰᓐ ᒋᒦᔑᔭᓐ᙮ ᒦ ᓴ ᑯ ᐃ ᑫᔑ ᓈᓈᑲᒋᐊᒀ ᑭᑕᐗᑳᓇᒃ ᑮᔥᐱᓐ ᐃᓀᑕᒪᓐ ᐅᐅ ᑳᐐ ᐃᑭᑐᔮᓐ᙮ 32ᐸᑭᑎᓂᔑᓐ ᓅᑯᒻ ᑳᑮᔑᑲᒃ ᒥᓯᐌ ᒋᐸᐹ ᐃᔖᔮᓐ ᐁᔑᐊᔮᐙᒡ ᑭᑕᐗᑳᓇᒃ ᒋᑲᑮᑭᓇᒀ ᑲᑭᓇ ᒣᑲᑌᐎᓯᐙᒡ ᒫᓇᒑᓂᔐᓴᒃ, ᐃᑭ ᑲᔦ ᑳᒪᒫᑎᑐᐙᒡ ᑳᐹᐹᑌᐎᓯᐙᒡ᙮ ᐃᑭ ᑕᔥ ᑲᔦ ᑳᐹᐹᑌᐎᓯᐙᒡ ᒫᓇᑎᑾᒃ᙮ ᒦ ᓴ ᐃᐌ ᐁᔑ ᐊᑕᐌᑕᒫᓐ ᒋᔑ ᑎᐸᐊᒪᐎᔭᓐ᙮ 33ᒦᔥ ᐃᐃ ᓇᑫ ᑫᓂᔑ ᑭᑫᑕᒪᓐ ᑮᔥᐱᓐ ᑌᐺᔦᑖᑯᓯᐙᓀᓐ ᐊᐲ ᐱᐊᑕ ᑭᑫᑕᒪᓐ ᐁᔑ ᑎᐸᐊᒪᐎᔭᓐ᙮ ᑮᔥᐱᓐ ᐊᔮᐗᒀ ᑳᐹᐹᑌᐎᓯᓯᒀ, ᐃᑭ ᑲᔦ ᑳᒪᓯᓂᓯᓯᒀ ᒫᓇᒑᓂᔕᒃ, ᐃᑭ ᐃᑕᔥ ᑲᔦ ᑳᐹᐹᑌᐎᓯᓯᒀ, ᑳᒪᓯᓂᓯᓯᒀ ᒫᓇᑎᑾᒃ, ᒦ ᐃ ᐄᓴᓐ ᒋᑭᑫᑕᒪᓐ ᐁᑮ ᑮᒨᑎᔮᓐ᙮
34ᐅᐅᔥ ᓬᐁᐸᓅᓐ ᐅᑮᐃᑰᓐ, ᒦ ᓴ ᐃ ᑫᐃᔑᒋᑫᔭᕽ ᐃᐃ ᐁᑭᑐᔭᓐ᙮ 35ᐃᐃ ᑕᔥ ᐁᑮᔑᑲᓂᓂᒃ ᓬᐁᐸᓐ ᐅᑮ ᐅᑖᐱᓈᐞ ᑲᑭᓇ ᐊᔮᐯ ᒫᓇᑎᑾᐞ ᑳᐯᐯᔑᓯᓂᒡ, ᑳᐹᐹᑌᐎᓯᓂᒡ, ᐃᐃ ᑲᔦ ᓅᔐ ᒫᓇᑎᑾᐞ ᑳᒪᓯᓂᓯᓂᒡ, ᐯᐸᑮ ᑳᐙᐱᓈᑯᓯᓂᒡ ᑲᔦ᙮ ᑲᑭᓇ ᑲᔦ ᒣᑲᑌᐎ ᓈᑯᓯᓂᒡ ᒫᓇᒑᓂᔐᓴᐞ ᐅᑮ ᐅᑖᐱᓈᐞ᙮ ᐅᑯᓯᓴᐞ ᐃᑕᔥ ᐅᑮ ᑲᓇᐌᑕᐋᐞ᙮ 36ᓂᓱᑮᔑᒃ ᐃᑕᔥ ᒥᓂᒃ ᑮᐃᔑ ᒫᒑ ᐁᔑᐊᔮᓂᒡ ᒉᑲᐴᓐ ᐯᐸᑳᓐ ᒋᐊᔮᐙᒡ᙮ ᒉᑲᑉ ᐃᑕᔥ ᐅᑮ ᑲᓇᐌᓂᒫᐞ ᐃᐃ ᑯᑕᒃ ᓬᐁᐸᓅᓐ ᐅᑕᐗᑳᓂᓂ᙮
37ᒉᑲᑉ ᐄᓴᓐ ᐅᑮ ᐅᑖᐱᓈᓐ ᐊᔥᑳᑎᑯ ᐗᑎᑾᓇᓐ ᐁᑮ ᐅᑎᓇᕽ ᐊᓵᑏᐙᑎᑯᕽ, ᐊᓬᒫᓐᑦ ᑎᓄᐙᑎᑯᕽ, ᓂᐲᐙᑎᑯᕽ ᑲᔦ᙮ ᒦᑕᔥ ᑳᐃᔑ ᐯᐯᔖᐱᔕᑳᑯᐱᑑᒡ ᐃᓂ ᐗᑎᑾᓇᓐ᙮ ᑮᐯᐯᔑᓈᑾᓅᓐ ᐃᑕᔥ ᐃᓂ ᐗᑎᑾᓇᓐ ᐁᑮ ᓈᑾᑭᓐ ᐁᔑ ᒥᑎᑯᐗᑭᓐ᙮ 38ᒦᐗᓐ ᐃᑕᔥ ᐅᓄ ᐗᑎᑾᓇᓐ ᑳᑮ ᐱᔕᑳᑯᐱᑑᒡ ᑳᑮ ᐊᑑᒡ ᐁᔑ ᓂᑖ ᒥᓂᑴᓂᒡ ᐊᐗᑳᓇᐞ᙮ ᑮᐱ ᐊᑕ ᒥᓂᑴᓂᒡ ᐃᓴ ᑯ ᑮᓂᑖ ᐊᐗᑳᓀᓯᑫᐗᐞ ᐁᑮ ᐋᒪᓅᓱᓂᒡ᙮ 39ᒦᑕᔥ ᐃᑭ ᐊᐗᑳᓇᒃ ᑳᑕᔑ ᐊᐗᑳᓀᓯᑫᐙᒡ ᐃᐃᒫ ᐁᔑ ᐊᑌᓂᑭᓐ ᐗᑎᑾᓇᓐ᙮ ᐊᐗᑳᓇᒃ ᐃᑕᔥ ᐅᑮ ᓂᑖᐎᑭᐋᐙᐞ ᐊᐗᑳᓀᓴᐞ ᑳᐯᐯᔑᓯᓂᒡ, ᑳᒪᓯᓂᓯᓂᒡ, ᑲᔦ ᑕᔥ ᑳᐹᐹᑌᐎᓯᓂᒡ᙮
40ᒦᑕᔥ ᒉᑲᑉ ᐯᐸᑳᓐ ᐅᑮ ᐃᔑ ᐊᓵᐞ ᒫᓇᑎᑾᐞ, ᒫᓇᒑᓂᔕᐞ ᑲᔦ᙮ ᒦᔥ ᑲᔦ ᑳᐃᔑᒋᑫᒡ ᐁᑮ ᐃᓈᓴᒥᑳᐸᐎᐋᒡ ᐁᔑᐊᔮᓂᒡ ᐃᓇᑫ ᓬᐁᐸᓅᓐ ᐅᑕᐗᑳᓂᒥᓂ ᑳᒪᓯᓂᓯᓂᒡ, ᑳᒪᑲᑌᐎ ᓈᑯᓯᓂᒡ ᑲᔦ᙮ ᒦᑕᔥ ᐅᐅ ᓇᑫ ᑳᐃᔑ ᓀᓈᐎᓈᒡ ᐐᓐ ᐃᑯ ᐅᑕᐗᑳᓇᐞ, ᐃᓂ ᑕᔥ ᑲᔦ ᓬᐁᐸᓅᓐ ᐅᑕᐗᑳᓂᓂ᙮
41ᐊᐲ ᑕᔥ ᐁᐊᐗᑳᓀᓯᑫᓂᒡ ᑳᓲᑳᑎᓯᓂᒡ ᐊᐗᑳᓇᐞ, ᒦ ᓴ ᐃ ᑳᐃᔑ ᐊᑑᒡ ᐃᓂ ᐗᑎᑾᓇᓐ ᐁᔑ ᒥᓂᑴᓂᒡ ᐊᐗᑳᓇᐞ᙮ ᒦᑕᔥ ᐃᐃᒫ ᑳᑕᔑ ᐋᒪᓅᓱᓂᒡ ᒣᑴᔭᐄ ᐁᐊᐗᑳᓀᓯᑫᓂᒡ᙮ 42ᑳᐐᓐ ᐃᑕᔥ ᐐᓐ ᒣᒉᑖᑯᓯᓂᒡ ᐊᐗᑳᓇᐞ ᐃᐃᒫ ᐅᑮ ᐊᑑᓰᓇᓐ ᐃᓂ ᐗᑎᑾᓇᓐ᙮ ᒦᔥ ᐃᐃ ᓇᑫ ᓬᐁᐸᓅᓐ ᑳᐅᒋ ᒦᓈᒡ ᐊᐗᑳᓂᓂ ᑳᒪᒉᑖᑯᓯᓂᒡ, ᐐᓐ ᐃᑕᔥ ᐐᓐ ᒉᑲᑉ ᑲᑭᓇ ᒣᓄᐌᐊᔮᓂᒡ ᐁᑮ ᐊᔮᐙᒡ᙮ 43ᒦᑕᔥ ᐅᐅ ᓇᑫ ᒉᑲᑉ ᑳᑮ ᐊᓂ ᐅᒋ ᐌᓅᑎᓯᒡ ᐁᑮ ᐊᔮᐙᒡ ᓃᐱᐗᐞ ᐊᐗᑳᓇᐞ, ᒫᔑ ᒥᑕᑎᒨᐞ ᑲᔦ, ᐱᒀᐎᑲᓀ ᒥᑕᑎᒨᐞ ᑲᔦ᙮ ᑮᐹᑏᓄᐗᐞ ᑲᔦ ᐅᑕᓄᑮᐋᑲᓇᐞ ᐁᓂᓃᐎᓂᒡ, ᐁᑴᐎᓂᒡ ᑲᔦ᙮
Dewis Presennol:
ᒉᓂᓯᔅ 30: OJBS
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Ojibwe Shorter Bible (Syllabic Script) © 2008 Canadian Bible Society