Luk 24
24
Jises amak ja
(Metiu 28:1-10; Mak 16:1-8; Jon 20:1-10)
1Len ta amunyau ano, ya ma ndra wahun ta len ma bwena ta wik ari ja, oro badih mene andrei ndrelekei hawe suluw, oro mene amekes badeh, oro ala mada lek. 2Oro ala badeh, anyolom bek ta mada lek ndratundruwiy ndra len. 3Eme oro ala bolon badeh, oro banyolom Laban Jises bare aliy bwe. 4Eme ya oro lomondra solo-an solo-an ta aliy le badeh, oro anyolom lau la-uh asini awin lomadan labai i buku kalik ame ales are ka-u oro. 5Eme oro badih dah, anoh labai badeh, oro aluh ala andri bada munyak. Eme uru lau ma la-uh dah, tiye i toro anya, “Ado anya kame kanyolom ndramak mulin udu ndrahu lau amak dah ta sah? 6Ado ndramani sahou mene iy tiye tado udu Galili ja? Iy bado dah bwe; Iy ndramak ja! 7Nadu Ndramak Awas mene atehei iy i mine iri lau ndra-in ta karei ma lomondra ndra-in, ya iri atahi iy i bada kei tondreh, ma iy imek. Ya eme na len taloh ja badeh, iy ndramak ja ndrame loken.” 8Ano badeh, oro baralomondrani ai.
9Ano oro ado mada lek ame hamon badeh, oro asehek i toro lau ta Jises ma ronoh ari hawe asehek i tiri lau rayah ja. 10Oro badih nane badeh, Mariya Makdala, Jo-ana hawe Mariya tine Jemis ma hawe oro lau rayah are hawe oro asehek nyala oro aposel. 11Arile, oro batehei budon toro handru bala ta sahou toro badih nane bwe, tasah oro anya sahou toro badeh, ari moson bwe. 12Ya eme Pita suri iy ma sakaliye ili mada lek. Eme iy aluh anya kanyolom kili badeh, atou le kolau le udu api. Ya eme iy eme len badeh, lomondra i tan le, ta lakou nane asahan dah.
Udu san ili kon Ema-us
(Mak 16:12-13)
13Eme na le len doh badeh, uru lau ta Jises la-uh badeh, adek ado san ala kon Ema-us. San doh, udu Jerusalem ili Ema-us badeh, i buku none kilomita ronoh ari. 14Uru adek san asehek nyala lakou mari mene ndra-au. 15Uru asehek nyala uru ala le, eme Jises asahan hawe uru. 16Arile, uru baseleyani se iy bwai.
17Eme iy tiye i turu anya, “Ah asehek nyala ah ta sasah nane adek san dah?” Eme uru ado rasi, ma mada uru i andri ta tikisiy. 18Eme iy ari nyaran Kliyopas anya, “Ou dah, lau badu leheleh barame Jerusalem ai, ya ou tanam lakou mari mene asahan doh bwe?”
19Eme iy anya, “Saba lakou asahan deh?”
Eme uru anya, “Aru badeh, asehek nyala Jises badu Nasaret. Iy badeh, propet. Iy asehek sahou badeh, sahou tan nyarahan labai, ma iy badeh, udu mwasin labai udu mada iri lau mari, ma udu mada Kindrei, ta bolo lahou tan mari iy amekes. 20Eme ya iri tinan tiri pris tahi, ma hawe iri lau ta atondrok ahi, atehei iy ili mine iri lau ta bahun badu Rom, ma atahi iy i bada kei tondreh. 21Arile, ahi badeh, abudon boto-on tan anya, iy le kameh winiyan sebenei iri lau badu Isra-el ado mwasin. Ya eme idah, i bada len taloh ai, ta lakou mari mene asahan. 22Ma laba tinan ja badeh, oro badih rayah badu hawe aso badeh, mesekei boho aso asak handru ta aliy. Oro badeh, ala mada lek na mandraben nane anya katou iy, 23arile oro batou iy bado aliy bwe. Eme oro ame badeh, tandra-un nyala aso mari ta aliy, ma oro tiye badeh, anya oro atou oro angelo ale. Ya eme oro angelo tiye i toro anya, ‘Jises ndramak ja.’ 24Eme oro lau taso rayah ja ala atou, i le buku aliy. I buku none oro nane ndrasehek, oro banyolom iy bwe.”
25Eme iy tiye turu anya, “Ah badeh, ndra bwe oh, ma ndrine ah badeh, edek amunum labai ta budon handru ta lakou mari mene iri propet asehek! 26Idoh mwasin o? Ta Krais mene bwese maha-an doh, ya eme iy winiyan ili bolo lomadan tan.” 27Eme iy asehek nyala lakou mari udu bolo sahou ta Kindrei i turu aleu labai, udu ndra kabatana Moses hawe tarou tiri propet, ano i turu.
28Ya eme oro adek ame mirihik ta kon nane oro anya ka aliy badeh, Jises edek ales ili. 29Arile, uru anya, “Ei, ou anya a heh? Ou amadin hawe aru na ben dan op, mirihik kon eben ai.” Eme iy eme hamon hawe uru.
30Eme Jises manyah hawe uru udu andri ndrahu nyamon badeh, andrei jabi ramen ma edeu wurah i ta aliy. Ano iy boso-ei ma edeu i nuru. 31Eme mada uru aleu, ma uru baraseleyani iy ai. Arile, bwe adeh, iy ndramai ta mada uru ai. 32Eme uru asehek i turu ari ari anya, “Sahou tan doh mene adeh, mesekei aru abadok ma sekesek adeh! Na len mene, iy edek san hawe talu asehek sahou mari badu bolo sahou ta Kindrei aleu eme ta talu.”
33Eme uru suri uru suwi suwi ala Jerusalem. Eme uru ala badeh, ndruni oro lau ma ronoh ari ta Jises hawe lau rayah are hawe oro atukum. 34Eme oro anya, “Handru! Handru! Laban badeh, ndramak handru, iy badeh, asahan hawe Saimon.” 35Ano, uru asehek nyala oro ta lakou mene asahan san hawe uru, ma hawe asehek ta uru seleyani iy badeh, udu ta iy abo-os jabi ramen.
Jises asahan hawe oro lau tan
(Metiu 28:16-20; Mak 16:14-18; Jon 20:19-23)
36Ya oro asehek nyala lakou doh, kahis le badeh, Jises amwenen asahan alih toro ma tiye anya, “Mondrei kudu hawe ado.”
37Eme oro anya oro atou nyam, ma oro toroyani oro. 38Eme iy tiye i toro anya, “Ado anoh ta sasah? I buku sah ado lomondra i buku badeh, udu ndrine ado? 39Ado kanyolom minek hawe katik se. Idah jo amwenen! Ado ndranyolom ai, nyam badeh, salin bwe, hawe iy ndruwin le, arile jo badeh, salik udu aliy.”
[ 40Eme iy tiye sahou ano badeh, iy leheya minen hawe katin i toro.] 41Eme ya oro sekesek tinan labai, arile budon toro androndro kahis le. Eme iy ndremenya oro anya, “Ado ari nyamon udu aliy deh bwe?” 42Eme oro atehei ni sese ame-er i minen, 43eme iy aimon udu mada oro mari atou.
44Eme iy tiye i toro, “Lakou mene jo udu ndra hawe ado asehek anya: Lakou mari mene ndratorowenei ta nyalak udu bolo tarou malen ta Moses, hawe udu bolo sahou tiri propet, ma hawe udu bolo buk Wari badeh, ndrasahan handru na dah.”
45Ano, iy amekes budon toro aleu na sahou ta Kindrei. 46Eme iy asehek i toro anya, “Sahou mene ndratorowenei asah i buku doh: Krais badeh, bwese maha ma iy imek, ya na len taloh ja kameh iy amak ja. 47Ma sahou ta nyalan winiyan tubuni ndrine iri, ma winiyan sikine karei ma lomondra ndra-in tiri iu, na boto-on ta nyaran. Ya sahou doh badeh, kudu Jerusalem bwena, ano katiye kili bolo kon munyak tinan mari. 48Ya ado dah badeh, kasehek nyala lakou mari ado ndratou dah. 49Ma jo kameh suni lakou mene tama mene tandrakan ta aliy badeh kameh, ewek tado. Arile, ado badeh, kado kon tinan dah kado, winiya ado le barakohok boto-on badu loken.”
Jises iu i loken
(Mak 16:19-20; Aposel 1:9-12)
50Ano iy kuhi oro ame len ta kon tinan ame loboho Betani, ano iy suruni minen i loke ma iy edeu nyosowan i la-u oro. 51Eme iy edeu nyosowan i la-u oro le badeh, ma Kindrei andrei iy iu i loken bolo kandrah. 52Eme oro atudun nyaran, ano oro ma sekesek au a hamon ala Jerusalem. 53Ya eme na len mari badeh, oro are asiu tinan ta Kindrei adeu wurah i tan.
Dewis Presennol:
Luk 24: lidNTpo
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
© 2001, Wycliffe Bible Translators, Inc. All rights reserved.