LIPOH 9
9
Tsingrangba-nü Noa te Zengtacho
1 #
Lip 1.28
Tsingrangba-nü Noa ko atsurüti müwajüpü arüh te yocho, “Suchehng ko limih jeng lieng. 2Kanglungrü, uza ko nguh apümnü nührü drü linung. Arüh apüm nütase pohki linung. 3Nührünü arüh tsunung kohle, ko singvarovasü tsung; Ihnü hiri apüm nührü khyang atsunung jüre. 4#Lev 7.26-27; 17.10-14; 19.26; Azk 12.16; 23; 15.23Ta nührünü akang shuh shüh zeh tütsu; Ihnü hi yatire, tunüo akang tsü ashüh la zehle. 5Khürünü nyitsarü akang khyükhang, abi khingchinung. Kanglungrü khürünü nyitsarü akang khyükhang hütsü süsohnung. 6#Lip 1.26; Nüch 20.13Sünü nyitsarü müpsehnang nyitsarünü abi müpsehsohnung; tunüo nyitsarü tsü Tsingrangba kyocho la thricho.
7 #
Lip 1.28
“Nührü adrong suchehnung, ko nührü trahvati alimih jeng linung.”
8Tsingrangba-nü Noa ko atsurüti te yocho, 9“Ihnü ade nüte, nü chahnü trahchochotite, 10ko akang apüm, kanglungrü apüm, uza apüm nüyola singkong lanü chürorü apüm te azengtaba hi külüpre. 11Nüte azengtaba yu hinü külüpre: Adelü khodesü akang liba apüm kihmülümnü müchangjünung; ko khodesü kihmülümnü limih müchangjünung Ihnü nyengchore. 12Nüte ko akang liba apüm te müchangkaba azengtaba külüpcho amüdhethsa hi linung, 13Ihnü nyükhila I singthsalu yohpüre. Hiba hi limih te Ih azengtaba amüdhethsa linung. 14Khodederü ning tsü Ihnü nyükhinü shütisohnang, ko mürükengkeng chürosohnang, 15Ihnü nüte ko kanglungrü apüm te adelü khodesü kihmülümnü müchangsohnung nyengchocho Ihnü lümchehnung. 16Khode nyükhila mürükengkeng chüronang, Ihnü hütsü ngunung ko Ih ko akang liba apüm te müchangkaba azengtaba lümchehnung. 17Akang liba apüm te nyengchoba amüdhethsa tsü hütsü linung.”
Noa ko Atsurüti
18Singkong lanü chüroba Noa tsurüti tsü Shem, Ham ko Jafet. Ham tsü Kanan au thsacho. 19Noa tsurü arüh asang tsü limih chah nyitsarü apüm jümürü lile.
20Noa tsü luthsarü licho ko akhudiba shükusiluh khyümba tsü abi thsacho. 21Abinü yongkha yongcho ko müchapü atbhüdeng abi shükuh la yüpjocho. 22Kanan au Ham-nü au tbhüdeng liba tsü ngu wünü amunge ani nyüh te yocho. 23Achotsü Shem e Jafet nyünü shü khüdu khyo khang chah thakeh bipü, au tbhüdeng liba tsü müngunung nengdang khanglangnü wünü au chah phakehjücho. 24Khode Noa müdsacho ko atsurü achangbanü abi chah tu nguchicho hütsü müdhecho, 25abinü yocho,
“Kanan chah chokehchola küdung!
Abi ajünirüti yurü kangnung.
26 Abüdongba Shem Tsingrang seing!
Kanan tsü Shem yurü kangnung.
27Tsingrangba-nü Jafet disohng!
Abi chahnü trahchochoti Shem nyitsarü yola lisohng!
Kanan tsü Jafet yurü kangnung.”
28Kihmülüm khanglang Noa kang 350 alaa licho 29ko kang 950 thsade abi sücho.
Dewis Presennol:
LIPOH 9: SANGBSI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.