LIPOH 12
12
Tsingrangba-nü Abram Dsicho
1 #
R. Ngu 7.2-3; Ibr 11.8; Gal 3.8 Abüdongba-nü Abram te yocho, “Nü limih, nü tsutpurü ko nü kuh pehjüng, ko Ihnü nüte ngusohnung limih khüdulang shemüsung. 2Ko Ihnü nü khyang khütang trahchosohnung ko yucho arangcheh khüdu kangsohnung; nü neng disohnung ko nüh amüwajüba kangsohnung Ihnü nüh müwajünung.
3“Nüh müwajürü Ihnü müwajünung,
Ta nüh chokehcholarü Ihnü chokehcholanung.
Ko nüh khu Ihnü yucho apüm müwajünung.”
4Abram kang nyührepü münga thsade, Abüdongba-nü yocho kyo Haran lanü shemüsucho; ko Lot abi yola wücho. 5Abi yola anitpü Sarai, ani tsurü Lot ko akuthsi apüm ko Haran la lide nübülungcho kulirü atümung nüpü Kanan lang shemüsucho.
6Khode arüh Kanan chihcho, Abram-nü limih tsü bong dhingnü ro Shekem müdüm More-la liba amüsa langsing#12.6: Amüsa Langsing: Hi amüsa singdong khüduepü Kanan-rünü hiba singyingte Ashera tsingrang mübü licho. chii rocho. Hütsütade hütsüba lih la tsü Kanan-rü lii yacho. 7#R. Ngu 7.5; Gal 3.16Ko Abüdongba-nü Abram te chüro yocho, “Ihnü nü majüh khyang jünung liba limih tsü hi lile.” Hütsüta Abram-nü abi te chüro nguba Abüdongba khyang hütsüla bholu khüdu külüpcho. 8Hütsüpü abinü kihjinglang azong lih Bethel yangdi nyüchürolang jowücho ko nyüzüdulang Bethel ko nyüchürolang Ai nyüh kahla shükuh thsacho. Hütsülasü abinü bholu khüdu külüpcho ko Abüdongba mübücho. 9Hütsüta abinü Kanan kihjinglang müdüm khüdu lanü khüdu shehmüi wücho.
Abram Ijip la
10Ta Kanan la yangkong licho ko hütsüba yangkong tsü dirachonü azachah shulüm Ijip lang alinung jowücho. 11Ijip lurü khunung thsade, abinü anitpü Sarai te yocho, “Nüh atsah atsa khingkurüe. 12Ijip-rünü nüh ngude, arühnü nüh I nitpüepü lüm Ih müpsehnung ko nüh khyünung. 13#Lip 20.2; 26.7Arüh te nüh I nirüepü young; hütsütakhang nü nengdangnü arühnü Ih mümüpsehnung ko tsa bichinung.” 14Khode abi Ijip chihcho, Ijiprünü anitpü tsü dee tsa ngucho. 15Khode yangthsaba thsazirünü abükyü tsü ngucho, yangthsaba te abükyü tsacho tsü yocho; achotsü abükyü tsü yangthsaba kulang nowücho. 16Abükyü khyanglangnü yangthsabanü Abram tsa bichicho ko abi khyang san ko miza, misü ko gadu, kulirü ko ut hiri jücho.
17Ta yangthsabanü Sarai khyücho khu Abüdongba-nü abi chah ko abi kukhi chah dhsara amütsa küdusohcho. 18Achotsü yangthsabanü Abram dsiro abi te tsingdhingcho, “Nühnü I chah hi tu nguchicho? Tuepü nühnü abükyü tsü nü nitpüepü Ite müyocho? 19Tuepü nü niepü yocho ko I nitpü thsanung khyüsohcho? Nü nitpü hila lile; abükyü khyüng ko tsipehng!” 20Yangthsabanü anyitsarü khyang yuzengjücho ko arühnü arüh lih lanü Abram ko anitpü ko abi kuthsi apüm zeh iipehcho.
Dewis Presennol:
LIPOH 12: SANGBSI
Uwcholeuo
Rhanna
Copi
Eisiau i'th uchafbwyntiau gael eu cadw ar draws dy holl ddyfeisiau? Cofrestra neu mewngofnoda
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.