Gḭ-Néje 9
9
Ala man rəa ar Noe
1Ala tɔr ndia dɔ Noe’g gə dɔ ŋganeeje’g ula dee ne pana: Ojije na̰, ɔsje ne goo na̰ gə́ kédé-kédé, rusuje ne naŋg nee tub-tub . 2Seḭ a toje néɓəl gə néndəb pəd-pəd kəm daje’g lai gə́ dɔ naŋg nee ləm, gə yelje lai gə́ d’aw pən dara’g ləm, gə néje lai gə́ d’aw kəmba dɔ naŋg nee ləma, gə ka̰jije lai gə́ d’aw dan baa-boo-kad’g ləm tɔ, ma m’ɔm dee ji sí’g yəg ya. 3Néje lai gə́ d’aw kəmba lé d’a to gə́ nésɔ sí ya, ma m’ar sí néje neelé lai to gə́ ma m’ar sí mbi kamnaḭje bèe tɔ. 4Nɛ seḭ a sɔje dakasrɔ da gə məsee gə́ to kəmə ləa lé na̰’d el . 5Maji kar sí gərje gao, məs sí gə́ seḭ síje ne kəmba lé m’a dəji sí gée ya, lé to gə́ da kara m’a dəjee gée ya, dəw lé m’a dəji kəmə ləa rɔ dəw maree gə́ to ŋgokea̰ ya.
6Dəw gə́ rara ɓa ila məs dəw maree naŋg lé
Maree kara a kila məsee-yeḛ naŋg ya tɔ,
Mbata Ala ra dəw aree to tana səa pai-pai ya .
7Nɛ seḭ lé maji kar sí ojije na̰, ɔsje goo na̰ gə́ kédé-kédé, gə́ taaje loo pəl-pəl dɔ naŋg nee, ɔsje goo na̰ gə́ kédé-kédé ya .
8Ala ula Noe gə ŋganeeje səa na̰’d tɔɓəi pana: 9Aa ooje, ma lé ma man rɔm m’ar sí-seḭ ləm, m’ar ŋgaka síje gə́ goo sí’g ləm tɔ, 10ma m’ar néje lai gə́ d’aw kəmba gə́ d’aar sə sí na̰’d ya: yelje ləm, gə nékulje ləma, gə daje lai gə́ dɔ naŋg nee ləm tɔ, deḛ lai gə́ d’unda loo mee kəi-kag’d teḛ lé, to deḛ gə́ d’aw dɔ naŋg nee ya. 11Ma man rɔm m’ar sí ya: néje gə́ d’aw kəmba lé mán bélm a tuji dee kára kara gogo el ŋga ləm, mán bélm lé a tuji naŋg nee gogo el ŋga ləm tɔ. 12Ala pana: Nétɔji gə́ ma man ne rɔm m’ar sí-seḭ ləm, m’ar néje lai gə́ d’aw kəmba sə sí na̰’d ləma, m’ar ŋgaka síje saar-saar gə no̰ ləm tɔ ɓa to nee: 13Ma m’ila ŋgaoburandi loo-kil’g lə ndi, yee ɓa gə́ nétɔji manrɔ ləm gə́ to mbunam ma’g gə njé gə́ dɔ naŋg nee’g ya. 14Loo gə́ m’a kar ndi il dɔ njé gə́ naŋg nee’g ndá d’a koo ŋgaoburandi danee’g, 15bèe ɓa m’a kar məəm olé ne dɔ Man gə́ ma man rɔm m’ar sí ləm, m’ar nékundaje lai gə́ d’aw kəmba ləm tɔ ndá manje lé d’a tel to gə́ mán bélm gə mba tuji ne néje lai gə́ d’aw kəmba lé gogo el ŋga. 16Ŋgaoburandi a teḛ dan ndi’g. M’a kée ndá m’a kar məəm olé ne dɔ manrɔ gə́ to gə no̰ gə́ to mbuna Ala’g lé gə nékundaje lai gə́ d’aw kəmba dɔ naŋg nee lé ya. 17Ala ula Noe pana: Yee ɓa gə́ nétɔji manrɔ gə́ ma man ne rɔm m’aree to mbunam-ma’g gə nékundaje lai gə́ dɔ naŋg nee ya.
Noe gə ŋganeeje
18Ŋgalə Noe gə́ d’unda loo mee kəi-kag’d teḛ lé to Sem, gə Kam, gə Japet tɔ. Kam lé ɓa to bɔ Kana̰je. 19Deḛ gə́ munda neelé ɓa to ŋgalə Noe ndá ŋgaka dee-deḛje ɓa taa loo dɔ naŋg nee pəl-pəl tɔ.
20Noe un kudu kwa ndɔ ndá yeḛ maan nduú keneŋ. 21Yeḛ ai mán-nduú neelé aree tɔlee ndá yeḛ ɔr kubu rəa’g to kudee dum ba mee kəi-kubu’g ləa. 22Kam, gə́ to bɔ Kana̰je lé oo bɔbeeje gə́ to kudee dum ndá aw raga aw pa taree ar ŋgakea̰je gə́ joo lé d’oo. 23Yen ŋga Sem gə Japet d’un kubu gə́ boi yul d’wa dɔ dam dee’g njaa rəm ne gə gir dee gir dee ndá d’ila dɔ bɔ deeje gə́ to kudee dum’g lé. Kəm dee gə́ to gə́ kédé lé ɓa ar dee d’oo ne kudu bɔ deeje gə́ to dum lé el. 24Loo gə́ mán-nduú tən rɔ Noe’g aree teḛ kəmee ndá yeḛ oo ta né gə́ ŋgonee gə́ ndɔḭ ra səa lé.
25Yeḛ pana:
Ndɔl a kwa dɔ Kana̰!
Yeḛ a to ɓər lə ɓərje lə ŋgakea̰je.
26Yeḛ pa tɔɓəi pana:
Maji kar dɔ Njesigənea̰ Ala lə Sem ai səgərə,
Kar Kana̰ to ɓər lə dee ya!
27Maji kar nékiŋgaje lə Japet taa rəa pəl-pəl ləm,
Karee si mee kəi-kubuje’g lə Sem ləm tɔ
Ndá kar Kana̰ to ɓər lə dee ya.
28Loo gə́ mán bélmje lé godo ndá Noe si kəmba gée’g as ləbee tɔl munda gə dəa rɔ-mi (350) ya ɓəi. 29Ndɔje lai gə́ Noe si ne kəmba lé aḭ ləb tɔl jinaikara gə dəa rɔ-mi (950) ɓa yeḛ wəi ɓəi.
Právě zvoleno:
Gḭ-Néje 9: SBA2015
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ngambai Bible © Alliance Biblique du Tchad 1989, 2015.