Gḭ-Néje 6
6
Ala wɔji-kwɔji tuji dəwje
1Loo gə́ dəwje d’un kudu kɔs goo na̰ gə́ kédé-kédé dɔ naŋg nee ləm, d’oji ne ŋganje gə́ dené ləm tɔ ndá 2ŋgan-Alaje gə́ diŋgam d’oo to gə́ ŋgan dəwje gə́ dené lé ma̰də kəm dee’g ndá deḛ mbər njé gə́ na̰je mbuna dee-deḛ lai gə́ taa kəm dee lé, taa deḛ gə́ denéje lə dee. 3Yen ŋga Njesigənea̰ pa pana: Ndiləm a si mee dəw’g saar-saar gə no̰ el mbata dəw lé to gə́ dakasrɔ ba ndá ndɔje gə́ ka̰ si kəmba ləa d’a kas ləb tɔl dəa rɔ-joo ba ŋga. 4Mee ndəaje’g neelé dəwje gə́ ŋgal pur-pur d’isi dɔ naŋg nee ya gə goo kɔm gə́ ŋgan-Alaje gə́ diŋgam d’ɔm na̰’d gə ŋgan dəwje gə́ dené ar dee d’oji ne ŋganje lé. Deḛ nja to dəwje gə́ ləw gə́ to ɓəl kədm-kədm gə́ ri dee ɓar yaa̰ .
5Njesigənea̰ oo to gə́ meeyèr lə dəwje gə́ dɔ naŋg nee to yaa̰ ləm, takə̰jije gə́ meḛ dee’g lai lé wɔji dɔ né gə́ majel ya goo kára ba gə ndɔ dee ndɔ dee ləm tɔ . 6Njesigənea̰ ndiŋga rəa dɔ kunda gə́ yeḛ unda dəw dɔ naŋg neelé ndá ar mée ea̰ tɔ. 7Njesigənea̰ pa pana: M’a tuji dəw gə́ m’undá dɔ naŋg neelé karee udu, un kudee dɔ dəw’g saar teḛ ne dɔ nékulje’g ləm, gə daje gə́ d’ag naŋg gə ta mee dee ləma, gə yelje gə́ d’aw pə̰ dara’d gə́ tar ləm tɔ mbata ma m’ndiŋga rɔm dɔ kunda gə́ ma m’unda dee lé. 8Nɛ Noe lé taa kəm Njesigənea̰ rəgm ya.
Ala wɔji-kwɔji kaji Noe
9Aa ooje, ŋgaka Noe ɓa to nee. Noe lé to nje néra gə́ danasur ləm, gə njegelgodo ləm tɔ mee ndɔje gə́ yeḛ si ne kəmba lé ya, Noe lé aa dɔ ta lə Ala kər-kər tɔ . 10Noe lé oji ŋganje gə́ diŋgam munda: Sem, gə Kam, gə Japet tɔ.
11Dɔ naŋg tel to asəna gə né gə́ ndum kəm Ala’g lé ləm, néra gə́ kərm-kərm taa naŋg nee pəl-pəl ləm tɔ. 12Ala aa loo oo naŋg nee ndá aa oo, to asəna gə né gə́ ndum ya. Mbata darɔ dəwje lai tuji rəw-kaw deḛ gə́ dɔ naŋg nee pugudu-pugudu. 13Bèe ɓa Ala ula Noe pana: ndɔ gə́ rudu dəwje lai gə́ dɔ naŋg nee a gə kun ɗiao lé ma m’wɔji mba̰, mbata deḛ d’ar néra gə́ kərm-kərm taa loo dɔ naŋg nee pəl-pəl, aa oo, m’a kar dee tuji gə naŋg nee bura ya. 14Maji kari ra kəi-kag gə kag gə́ ɓaree goper. Kəi-kag neelé i a gaŋg mee ɓəd-ɓəd gə́ ŋgan kəije ndá i a rḛdə mée gə giree gə tibi né gə́ to asəna gə tibi ɓida bèe. 15Aa oo, rəbee gə́ i a gə rəa ne ɓa to nee: Ŋgal kəi-kag lé a k’as kəmkil dəw tɔl munda (300) ləm, tadee a k’as kəmkil dəw rɔ-mi (50) ləma, dəree gə́ ḭ gə́ tar lé a k’as kəmkil dəw rɔ-munda (30) ləm tɔ. 16Kəi-kag neelé i a ra kəmbolè kára keneŋ ndá kḭ dɔ kəmbolè’d gə́ par gə́ ŋgəŋgəree gə́ tar lé a k’as kəmkil dəw kára (1). I a ra tarəw kar kəi-kag’d kára ba. Tɔɓəi i a gaŋg mee kəi-kag lé gə goo ŋgalee as mee kəi munda dɔ na̰’d, yee gə́ gelee gə́ bər ləm, gə yee gə́ njekɔm’g joo ləma, gə yee gə́ njekɔm’g munda ləm tɔ. 17Ma nja m’a kar mán bélm ree taa loo pəl-pəl dɔ naŋg nee gə mba tuji nékundaje lai gə́ d’aw kəmba gin dara’g lé, néje lai-lai gə́ dɔ naŋg nee lé d’a tuji ya. 18Nɛ ma man rɔm m’ari ya. I seḭ gə ŋganije gə́ diŋgam gə dené ləi gə denéje lə ŋganije gə́ diŋgam lé a ka̰dje mee kəi-kag’d neelé na̰’d ya. 19Néje lai gə́ d’aw kəmba’g əsé dan nékundaje’g lai lé i a kwa dee joo-joo gə gel dee gel dee mba kar dee d’andə səi mee kəi-kag’d ɓó gə kar dee d’aji səi na̰’d tɔ, bɔ da gə ko̰ da lé i a kwa dee joo-joo bèe. 20Yelje gə gel dee gel dee ləm, nékulje gə gel dee gel dee ləma, daje lai gə́ d’ag naŋg gə gel dee gel dee ləm tɔ lé d’a ree rɔi’g joo-joo gə gel dee gel dee gə mba kari aji dee ne. 21Maji kari odo nésɔje lai-lai gə́ kəm sɔ lé unda kul rɔi’g mba karee to gə́ nésɔi ləm, gə nésɔ dee-deḛ ləm tɔ. 22Yee ɓa gə́ né gə́ Noe ra. Yeḛ ra néje lai gə́ Ala un ndia aree lé aree ɔr rɔd ya .
Právě zvoleno:
Gḭ-Néje 6: SBA2015
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Ngambai Bible © Alliance Biblique du Tchad 1989, 2015.