Lukas 9
9
Inutusan ni Jesus u Disepulus na hide a Sapulo ay ti Duwwa
(Mateo 10:5-15; Markos 6:7-13)
1Nadid, dinulaw ni Jesus u sapulo ay ti duwwa a disepulus sakay inatádden na hide ti kapangyariyan a magpalayas ti madukás a ispirito sakay magpapiyya tu tehhod hide a saket. 2Sakay inutusan na hide a angay mangaral tungkul tu pághare nu Diyos sakay magpapiyya tu tehhod hide a saket. 3Kinagi na nide, “Dyan kam magbilon ti maske ánya man tu angayan moy maske sahukod, hembeg, makan, pilak oni paglewasan. 4Sakay máktulos kam tu bilay a mangtanggap nikam, sakay mágyan kam hod mentaras a awan kam pálla lumakad ti banuwanan itod. 5Ni mara awan dikam be tanggapán ti itona a banuwan ay lumakad kam hod. Bagu kam a humektat ay ipagpag moy pa u alikabuk nu tika-tikád moy, bilang paalaala kontara nide.”
6Kanya naglakad u disepulus na hide sakay nangaral tu babaryo hide tungkul tu Maganda a Baheta sakay pinagpiya de u tehhod hide a saket tu luga-lugar a immangayan de.
Naguluwan ti Herodes
(Mateo 14:1-12; Markos 6:14-29)
7Nadid, nabaheta ni Herodes a gobernador ti Galilea u atanan a ginággimet ni Jesus. Naguluwan siya, dipo tehhod a sangan a tolay a nagkagi a nabiyag a huway ti Juan a Mágbawtismo. 8Te nagkagi be a, “Pimmeta ti Elias.” Te nagkagi pa a, “Nabiyag kan a huway u essa tu prupeta hide tu itod pa a panahun.” 9Pero kinagi ni Herodes, “Impaputol ku dán ti Juan. Deya wad iye a lállake? Makpalák dán a nabaheta tungkul nikuna.” Kanya pinilit ni Herodes a ketan ti Jesus.
Pinakan ni Jesus u Limma a Libu a Tolay
(Mateo 14:13-21; Markos 6:30-44; Juan 6:1-14)
10Kássole nu disepulus hide ni Jesus ay imbaheta de nikuna u atanan a ginimet de. Káttapos ay limmakad ti Jesus kaguman na u disepulus na hide a immangay tu banuwan a Betsaida. 11Nikuna matukuyan iye nu tolay hide ay timmagubet hide. Sakay masaya be hide a tinanggap ni Jesus sakay nangaral siya nide tungkul tu pághare nu Diyos. Pinagpiya na be u te saket hide.
12Nikuna mágsasasahám dán u aldew ay ummadene ni Jesus u sapulo ay ti duwwa na a disepulus sakay kinagi de nikuna, “Palakadán mu dán i tolaye hide tánni makapagehyok hide ti makan sakay te mapátdugan hide tu babaryo tu palebut. Katoy kitam ti parangay a lugar.”
13Pero kinagi na nide, “Hikam u mangatád nide ti makan.”
Timmábbeg be u disepulus hide, “Awan kitam ti makan pero tehhod heeh a lilimma a tinapay sakay duduwwa a ikan. Mamale kami beman ti makan para ti tolayan hidenye?” 14(Dipo tehhod a manga limma a libu a kalállakeyan u katoy hod).
Kinagi na tu disepulus na hide, “Pággetnudán moy i tolaye hide ti tág-lalimmapulo.”
15Pinaetnod di ngani hide a atanan. 16Inalap ni Jesus u limma a tinapay sakay u duwwa a ikan. Tummangad siya ti langet sakay nagpasalamat tu Diyos. Hinate-hate na itod sakay inyatád na tu disepulus na hide para itagtag tu katolayan. 17Nakakan hide a atanan sakay nabássog. Káttapos ay inipun nu disepulus na hide u buhay sakay nakaputat pa hide ti sapulo ay ti duwwa a lákba.
Impakapospos ni Pedro u Tungkul ni Jesus
(Mateo 16:13-19; Markos 8:27-29)
18Nadid, essa aldew, mentaras magdasal ti Jesus a maggisessa ay ummadene nikuna u disepulus na hide. Tinanung na hide, “Ánya i kákkagiyánnay nu tolay hide tungkul nikán? Ti deyaák kan?”
19Timmábbeg hide, “Te sangan a magkagi a ti Juan a Mágbawtismo ka kan. Pero kagi be nu agum ay ti Elias ka kan, sakay te nagkagi be a essa ka tu prupeta hide tu itod a panahun a nabiyag a huway.”#9:19 Basaán tu Lukas 9:9; Markos 9:11-13.
20Sakay tinanung na hide a huway, “Ay hikam, ánya be u makagi moy tungkul nikán?” “Hiko u Cristo a inpananto nu Diyos!” Kagi ni Pedro. 21Inpakebibilin ni Jesus a dyan de iye kagi-kagiyán maskin deya.
Impakapospos ni Jesus U Tungkul tu Kákkatay Na
(Mateo 16:20-28; Markos 8:30—9:1)
22Kinagi na pa nide, “Magtiis pa ti dakál a hirap u Anak nu Tolay. Itakwil siya nu puno nu Judio hide, u puno nu saserdote hide sakay u maisto hide nu Kautusan. Ipabuno di siya pero biyagán siya a huway nu Diyos tu katállo a aldew.”
23Sakay kinagi na nide a atanan, “Ni deya man u masoh a sumunud nikán ay kailangan a kalimunan na u para tu sadile na. Báklayán na aldew-aldew u kudus na sakay sumunud nikán.#9:23-27 Basaán tu Mateo 16:24-28; Markos 8:34; 9:1. 24Dipo u tolay a masoh a mángligtas tu sadile na a biyag ay siya i mawananay ti biyag a awan ti kahád. Pero ni deya man u máng-alay tu biyag na alang-alang nikán ay magkahod ti biyag a awan ti kahád. 25Ánya u pakinabang nu tolay ni makao na u atanan a bagay ti munduwáy pero mepahamak labe u biyag na? 26Ni ikasanikiyák moy sakay u upos ko hide, ay ikasanike kam be nu Anak nu Tolay tu kássole na. A tehhod a kapangyariyan iye ay kapareho nu kapangyariyan nu Ama sakay tu banal hide a anghel. 27Kagiyán ko nikam u tatahoden: tehhod he nikam a awan matay mentaras a awan de ketan u pághare nu Diyos.”
U Págbagu nu Idsura ni Jesus
(Mateo 17:1-8; Markos 9:2-8)
28Nadid, kállipas nu manga walo a aldew, káttapos a kagiyán ni Jesus iye hide a bagay ay ingkuyog na di Pedro, Juan sakay ti Santiago, tu bumábbuked para magdasal. 29Mentaras a magdasal ti Jesus ay nagbagu u idsura na. Sakay u damit na ay grabit pudew. 30Káttapos ay bigla dálla a lummitaw u duwwa a lállake a nákpágguhon nikuna, di Moises sakay ti Elias, 31a u hupa de ay makasile be. Pinágguhunan de u tungkul tu adene a kákkatay ni Jesus a mangyare ti Jerusalem.
32Nadid ay mahimbing a tidug di Pedro sakay tu agum na hide. Pero bigla hide a nalukag sakay netan de ti Jesus a makasile u idsura na sakay te mágtaknág a duwwa a lállake tu adeni na. 33Nikuna palakad dán u duwwa a lállake ay kinagi ni Pedro ni Jesus, “Panginoon, maganda bál ta katoy kame he. Maggimet kame ti tállo a sahong: essa para niko, essa para ni Moises, sakay essa be para ni Elias.” Pero u tatahoden ay awan na tukoy u áamet-amitán na.
34Mentaras a magupos ti Pedro ay tinaklábban hide nu panganurin. Kaya neántingan u disepulus na hide. 35Sakay te boses a nagupos tu panganurin, “Iye u Anak ko a pinile ko, sanigán moy siya!”
36Nikuna mawan dán u boses ay netan de a mággisessa dálla ti Jesus. Awan padla kinagi-kagi nu disepulus hide u netan de.
Pinagpiyya ni Jesus u Hinayup a Tolay
(Mateo 17:14-18; Markos 9:14-27)
37Tu kadimadimangan na ay nanegson dán hide sakay tinagbu siya nu tunay ti kakpal a tolay. 38Tu kákpalan nu tolay hide ay tehhod a lállake a pummákhaw, “Maisto,” kagi na, “Kagbiyan mu pay a pagpiyyaán i kaessa-essa kuwáy a anak a lállake!” 39Sináddáp siya ni madukás a ispirito, kaya bigla dálla siya a mágpapákhawán sakay mágpapágpággán hanggan a maghuho u labi na. Pirme na siya a páppasakitan sakay awan na dán gusto a lakadan. 40Nákkekagbiyák dán be tu disepulus mo hide a palayasán u madukás a ispirito, pero awan di kaya.
41Timmábbeg ti Jesus, “Lahe a tunay ti dukás sakay awan ti pánnampalataya! Hanggan nikan takam a pagtiisan?” Sakay kinagi na tu lállake, “Iyangay mo he u anak mo.”
42Mentaras a paadene u anak ay inlugmuk sakay pinagpapágpág dámman siya nu madukás a ispirito, pero pinalayas ni Jesus u madukás a ispirito. Pinagpiyya na sakay tulos na a inyatád tu ama na. 43Sakay nagtaka u katolayan tu netan de a kapangyariyan nu Diyos.
Kinagi a Huway ni Jesus u Tungkul tu Kákkatay na
(Mateo 17:22-23; Markos 9:30-32)
44“Pakasanigán moy sakay pakatandaan i kagiyán kuwáy: u Anak nu Tolay ay itokyon nu tolay hide sakay masakup nu kapangyariyan nu tolay hide.” 45Pero awan di maintendiyan u kinagi na dipo awan pálla impakapospos nu Diyos nide u kahulugan ni itod. Sakay manteng be hide a magtanung ni ánya u gusto a kagiyán nu kinagi na.
U Pinakadakila
(Mateo 18:1-5; Markos 9:33-37)
46Sakay namágtábbegan u disepulus hide ni ti deya u pinakadakila nide. 47Pero tukoy ni Jesus ni ánya u katoy tu isip de, kaya dinulawan na u essa a badit a anak sakay pinataknág na tu háhhawisan na. 48Sakay kinagi na nide, “Ni deya man u mangtanggap ti anakan iye alang-alang nikán ay hikán u tinanggap na, sakay ni deya man u mangtanggap nikán ay mangtanggap be tu nangutus nikán a umangay he. U mapagpakumbaba nikam a atanan ay siya u pinakadakila.”
U Umayun nikitam ay Kaguman tam
(Markos 9:38-40)
49Kinagi ni Juan, “Panginoon, naketa kame ti tolay a magpaibut ti dimonyo hide tu ngahan mo. Sinaway me siya dipo bakán tam siya a kaguman.”
50Pero kinagi ni Jesus, “Dyan moy siya sawayán, dipo u awan kontara nikam ay kaguman moy.”
Awan de Tinanggap ti Jesus tu Essa a Baryo ti Samaria
51Nikuna adene dán a sumole ti Jesus ti langet ay naisip na a angay ti Jerusalem. 52Kanya pinágdipalongo na u sangan a tolay tán angay de ihanda u tulusan na tu essa a lugar ti Samaria. 53Pero awan siya tinanggap nu Samaritano hide dipo nakadisisyon dán siya a tamo ti Jerusalem. 54Nikuna matukuyan itod nu disepulus na a di Santiago sakay ti Juan ay kinagi de nikuna, “Panginoon, masoh ka beman a paudinan me ti apoy tánni matutod hide?”
55Pero inatubang hide ni Jesus sakay pinágngállan na hide. 56Sakay immangay hide tu agum a baryo.
U Kássunud ni Jesus
(Mateo 8:19-22)
57Nadid, mentaras maglakad hide ay tehhod a lállake a nagkagi ni Jesus, “Mákkuyoyugák niko maskin hádya i angayan muway.”
58Timmábbeg ti Jesus nikuna, “Te ábbut a páppágyanan u mágkatapang hide a hayup sakay te lobun u manok hide. Pero u Anak nu Tolay ay awan ti sadile a bilay a matidugan sakay maimangan.”
59Káttapos ay kinagi ni Jesus tu essa, “Mákkuyog ka nikán, bilang disepulus ko.” Pero tummábbeg siya, “Panginoon, pakultadenak mupa a sole ta angay ku pa pelábbáng tama ko.”
60Pero kinagi na nikuna, “Ipebahala mu dán tu patay hide u páglábbáng tu kasapatay de hide. Pero hiko ay angay mo ibaheta u pághare nu Diyos.”
61Te essa be a nagkagi nikuna, “Sumunudák niko Panginoon, pero pakultadenák mu pa a angay iye kagiyán tu pamilya ko.”
62Sakay konna bi he u tábbeg ni Jesus, “U mágsasuleg-sulegán a magaradu ay awan karapat-dapat tu kahariyan nu Diyos.”
Právě zvoleno:
Lukas 9: MBJC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Pahanan Agta New Testament © Philippine Bible Society and Wycliffe Bible Translators, Inc., 2017.
