Lukas 23

Inyatubang de ti Jesus ni Pilato

(Mateo 27:1-2; 11:14; Markos 15:1-5; Juan 18:28-38)

1Nadid, káttapos hod ay timmaknág hide a atanan sakay inyangay de ti Jesus tu kán Pilato. 2Sakay sinapulan de a sihiyán siya, kinagi de, “Napatunayan me a sássulsulan ni tolayan iye u kalugaran me hide a magribeldi. U tolay hide ay binábbawalan na a magbayad ti buwes para ni Cesar a hare ti Roma. Sakay páppaniwalaán na pa u tolay hide a siya u Cristo, a essa a hare.”

3Tinanung siya ni Pilato, “Hiko beman u hare nu Judio hide?”

“Hiko dán nagkagi ye,” tábbeg ni Jesus.

4Sakay kinagi ni Pilato tu puno nu saserdote hide sakay tu tolay hide, “Awanák ti ketan a kasalanan ni tolayan iye.”

5Pero impilit de a kinagi, “Tinolduwan na u atanan a taga-Judea a kontraán u gubiyerno tam. Nagsapul siya ti Galilea hanggan dán heeh.”

Inyatubang de ti Jesus ni Herodes

6Nikuna masaneg iye ni Pilato, ay tinanung na ni taga-Galilea beman ti Jesus. 7Nikuna matukuyan na a taga-Galilea siya ay impeangay na ni Herodes dipo sakup na u Galilea. Nagkataun be a katoy ti Herodes ti Jerusalem. 8Masaya a tahod ti Herodes nikuna ketan na ti Jesus, dipo nalay na dán siya a gusto a ketan. Dipo tu nabaheta na hide tungkul nikuna, sakay umasa siya a maggimet ti Jesus ti milagro para ketan na. 9Makpal siya a intáttanung ni Jesus, pero awan timmatábbeg.

10U puno nu saserdote hide sakay u maisto hide nu Kautusan ay mágtaknág be hod a awan ti imang a makán sihiyán ni Jesus. 11Dipo ti iye ay sineste sakay ininsulto siya ni Herodes sakay u sundalo na hide. Binaduwan de siya ti pang hare a damit bilang pangseste di nikuna, kattapos ay pinasole di siya ni Pilato. 12Sakay ti aldiwan itod ay nagin barkada dan ni Herodes ti Pilato a date a magkadima.

Hinatulan ti Kamatayan ti Jesus

(Mateo 27:15-26; Markos 15:6-15; Juan 18:39—19:16)

13Inpadulaw ni Pilato u puno nu saserdote hide, u ama-amaan hide nu banuwan sakay u tolay hide. 14Sakay kinagi na nide, “Inyangay moy he nikán i tolayan iye dipo makánsulsulán tu tolay hide. Nadid tinanung ko siya tu atubang moy sakay napatunayan ko a awan tatahoden u isássihe moy hide nikuna. 15Konna bi hod ti Herodes, awan siya ti netan a kasalanan ni Jesus kaya inpesole na siya nikán. Awan siya dapat a hatulan ti kamatayan dipo awan siya ti kasalanan. 16Kaya ipalatigu ko dálla siya sakay palayaán.” 17Kada Kasayaan nu Aldew nu Págtaleb ay kailangan a magpalaya ti Pilato ti essa a pireso a piliyán nu tolay hide.

18Pero sabay-sabay a impákhaw nu tolay hide, “Bunuwan i tolayan ina! Sakay palayaán mo ti Barabas!” 19(Nepireso ti Barabas dipo namuno siya sakay siya u nanggiya tu tolay hide ti Jerusalem a kumontara tu gubiyerno.)

20Tu pagkagusto ni Pilato a mapalaya ti Jesus ay kinagi na a huway tu katolayan, 21pero pimmákhaw u katolayan, “Ipako siya tu kudus! Ipako siya tu kudus!” kagi de. 22Pumentállo a kagiyán nide ni Pilato a, “Ánya beman i ginimet naay a madukás? Awanák ti ketan a dahilan para ipabuno ko siya. Ipalatigu ko dálla siya sakay palayaán.”

23Pero lalu de a inpilit sakay impákhaw a dapat a mepako siya tu kudus. Tu katapusan ay awan nakasuway ti Pilato nide, 24kanya pinagustuwan ni Pilato u kagustuwan nu tolay hide. 25Dipo tu kagustuwan de ay pinalaya na u tolay a nagribelde tu gubiyerno sakay namuno. Káttapos ay inyatád na nide ti Jesus tán gimitán de u gusto de a gimitán nikuna.

Nepako ti Jesus tu Kudus

(Mateo 27:32-44; Markos 15:21-32; Juan 19:17-27)

26Nikuna iyangay di dán ipako ti Jesus ay natagbuwan de ti Simon a taga-Cirene a kággábwat na tu uma. Binehbeh di siya sakay pilit a impabáklay u kudus nikuna sakay pinaunonod de ti Jesus.

27Makpal a tolay u umononod ni Jesus, kaguman be u sangan a bábbey a makánsangitán dipo tu habag di nikuna. 28Pero sinuleg hide ni Jesus sakay kinagi na nide, “Hikam a kabábbiyan ti Jerusalem, dyanák moy sangitan nan u sangitan moy ay u sadile moy sakay u anak moy hide. 29Dipo dumemát u aldew a kagiyán nu tolay hide, ‘Mapalad u baug hide sakay u awan hide ti pasusuwán a anak.’ 30Ti aldiwan itod ay kagiyán nu tolay hide tu buked hide a, ‘Maduhay kamon a buked hide tánni matapuhan kame!’ 31Dipo ni konna he u gimitán tu kayo a maata, ánya wád be u gimitán de tu namadiyan dán?”

32Te duwwa pa a mágbabono a inluwas nu sundalo hide para bunuwán a kaguman ni Jesus. 33Sakay káddemát de tu lugar a kákkagiyán de a Bungo ay impako de ti Jesus tu kudus sakay tu duwwa a tulisan, essa tu kawanan ni Jesus sakay essa be tu kawihe. 34Kinagi ni Jesus, “Ama, patawadán mo hide dipo awan de tukoy u gággagamitán de.”

Sakay namágbunutan u sundalo hide tánni matukuyan de ni hadya tu damit ni Jesus u meangay tu bawat essa nide. 35Mágtáknág hod u tolay hide a mággeleng, mentaras a sássestiyan siya nu puno hide nu banuwan. Kinagi de, “Inligtas na u agum, nadid ni talaga a siya u Cristo a pinile nu Diyos ay iligtas na be i sadile nae!”

36Ininsulto be siya nu sundalo hide, immadene hide sakay inatádden de ti maapsot a alak, 37sakay kinagi de, “Ni hiko ngane u Hare nu Judio hide, iligtas mo i sadile muwe!”

38Tu ontok nu kudus ni Jesus ay te sumássulat: (ti upos a Griego, Latin sakay Hebreo,) “Iye u Hare nu Judio hide.”

39Ininsulto be siya nu essa a tulisan a kasadát na, kinagi na, “Awan beman hiko u Cristo? Iligtas mo i sadile muwe sakay pate hikame!”

40Pero nagkagiyan siya nu kaguman na, “Awan ka dán beman ti ánteng tu Diyos? Pareho kitam a tallo a pinarusaan, 41pero hikita la a duwwa la u dapat maparusaan ti kamatayan dipo tu ginimet ta hide a kasalanan. Pero i tolayan iye ay awan ti ginimet a madukás.” 42Sakay kinagi na pa, “Jesus, alalahanánnák mo ni maghare ka dán.”

43Timmábbeg ti Jesus, “Kagiyán ko niko, nadid be ay ikuyog taka ti Paraiso.”

U Kákkatay ni Jesus

(Mateo 27:45-56; Markos 15:33-41; Juan 19:28-30)

44Nikuna magalas dose dán ti tanghale ay nagdiklam i buuwáy a mundu hanggan ti alas tres ti apon. 45Nawanan ti demlag u aldew, sakay bigla a nahate ti bállog u partisyon a kortina nu templo. 46Pimmákhaw ti mabegsák ti Jesus, “Ama, ipabahala ku dán niko i ispirito kuwáy!” Sakay tu pákkakagi na hod ay nahángsatán dán siya.

47Nikuna ketan nu kapitan nu sundalo hide u nangyare ay nagpure siya tu Diyos. “Talaga a malinis i tolayan iye!” kagi na. 48I nangyariyan itod ay netan nu atanan a tolay a mamággipun sakay mággeleng hod. Nagsole hide a tunay ti lungkut. 49Te taknag tu adeyo u barkada hide ni Jesus pate u kabábbiyan a immunonod nikuna sapul pa ti Galilea. Netan di be iye hide a pangyayare.

U Páglábbáng ni Jesus

(Mateo 27:57-61; Markos 15:42-47; Juan 19:38-42)

50-51Nadid, te essa a lállake a Jose u ngahan na. Taga-Arimatea siya a sakup nu banuwan nu Judea. Mabait sakay malinis iye a tolay sakay kaguman tu maguhay hide tu paghare nu Diyos. Maski ni kagawad siya nu Sanedrin#23:50-51 Sanedrin: siya u pinakamataas ti tungkulin tu korte tu lugar nu ka Judio wan. ay awan siya sang-ayun tu ginimet de ni Jesus. 52Immangay siya tu kán Pilato sakay inaged na u bangkay ni Jesus. 53Nikuna meogsad dán u bangkay ay binalutan na ti damit a lino sakay indátton na tu páglábbánggan a kumán a kuweba awan palla itod napaglalábbángngan. 54Aldew itod nu Pághanda, sakay magsapul dán u Aldew nu Káimang.

55Immunonod ni Jose u bábbey hide a nákkuyog ni Jesus sapul pa ti Galilea, kanya netan de u naglábbángngan, pate u kákkedátton hod nu bangkay ni Jesus. 56Káttapos ay nagsole hide sakay naghanda ti pabango sakay mira.

Nikuna dumemát dán u aldew nu Kaimáng ay immimang hide a konna tu intakda nu Kautusan.

Právě zvoleno:

Lukas 23: MBJC

Zvýraznění

Sdílet

Kopírovat