Lukas 11
11
Intoldu ni Jesus ni Kodya a Magdasal
(Mateo 6:9-13; 7:7-11)
1Nadid, ay nagdasal ti Jesus tu essa a lugar. Káttapos na ay kinagi nu essa tu disepulus na hide, “Panginoon, tolduwan mo kame ped a magdasal, konna tu ginimet ni Juan tu disepulus na hide,” 2kinagi na nide, “Ni magdasal kam ay konna he u kagiyán moy,
‘Ama, puriyán nakwa u banal mo a ngahan.
Maghare ka nakwa nikame.’
3Atádden mo kame nakwa ti makan me aldew-aldew.
4Sakay patawadán mo kame tu kasalanan me hide, dipo pappatawadan mi be u nagkasala hide nikame.
Sakay dyan mo kame pabayan a matokso.”
5Sakay kinagi na nide, “Mara ni tehhod a immangay nikam a essa tu barkada moy hide tu bállog nu gibi sakay kinagi na, ‘Barkada, atáddinák mo ped pala ti tállo a tinapay. 6Dimmemát biyay be u essa ko a barkada a gábwat tu lakad na, awanák ti mepakan nikuna!’ 7Sakay tumabbeg u barkada mo a katoy tu disalad nu bilay na ti konna he, ‘Dyanák pay istorbuwán! Nekalang dán i ganábbe sakay mágkatdug kame dán a samáttenaan. Awanák dán makaikat a mangatád niko ti kailangán muwe.’ 8Kagiyán ku nikam, maskin magbarkada pa hide ay awan siya umikat tan mangatad tu agidan mo. Pero dipo mamilit ka ay umikat bila siya tán mangatád maskin ánya u kailangan mo. 9Kanya kagiyán ko nikam; agidán moy tu Diyos u kailangan moy tánni atádden nakam: magehyok kam tánni maketa kam. Magtoktok kam tánni bukasan kam. 10Dipo u magaged ay magkahod, u magehyok ay maketa, sakay ni deya man u tumoktok ay mabukasan. 11Hikam a ama hide, ni mangaged ti ikan u anak moy ay atádden moy beman ti biklat? 12Oni mara mák-aged ti bunay, átadden moy beman siya ti ánnepet? 13Ni hikamon a mágkadukás hide a tolay ay makabeto a mangatád tu mágkaganda hide a bagay tu anak moy, itod pa beman u Ama moy ti langet! Iyatád na u Banal a Ispirito tu mangaged hide nikuna!”
Bakán a Gábwat ni Beelzebul u Kapangyariyan ni Jesus
(Mateo 12:22-30; Markos 3:20-27)
14Tehhod a essa a lállake a pinabangngag nu essa a dimonyo. Nadid pinaibut ni Jesus u demonyo a dahilan nu kákkabulol nu essa a lállake, kanya nakapagupos dán siya kanya nagtaka u katolayan.
15Pero kinagi nu agum, “Ti Beelzebul #11:15 Beelzebul: U essa a ngahan ni Satanas, a puno nu mágkadukás hide a ispirito. a pinuno nu demonyo hide u nangatád nikuna ti kapangyariyan a mágpalayas tu demonyo hide.”
16Te agum be a masoh a mangpurba ni Jesus, kaya kinagi de a, “Mángpeta kapay ti makataka a bagay a mangpatunay a katoy niko u Diyos.” 17Pero tukoy na u áisipán de, kaya kinagi na nide, “U bawat kahariyan a awan ti pamágkaessa ay masida sakay konna bi hod u mangyare tu sabilay a mamágdadema. 18Ni tehhod a gurupo a mamágdadema tu kaharian ni Satanas ay kodya iye a magtulos-tulos? Sakay kagiyán moy a nagpalayasák tu dimonyo hide tu pamamag-itan nu kapangyariyan ni Beelzebul. 19Ni magpalayasák ti dimonyo tu pamamag-itan ni Beelzebul, deya be u mangatád ti kapangyariyan tu disepulus moy hide a makagimet ti konna hod? Hide dán be u mángpatunay a talaga mali kam. 20Pero ni magpalayasák tu demonyo hide ta dipo tu kapangyariyan nu Diyos, iye u mangpatunay a dimmemát dán nikam u pághare nu Diyos.
21Mara ni tehhod a essa a tolay a mabegsák a magbantay tu bilay na sakay kompleto ti armas ay talaga a awan ti makaalap tu kabiyagen na hide.
22Pero ni kalabanan sakay taluwán siya nu mas mabegsák nikuna ay alapán na u armas a áasaan na hide a pangdipensa pate u kabiyagen na hide sakay ipagatád na iye hide.
23U awan mákkaguman nikán ay kontara nikán. U tolay a awan tumulung a pisanán u tolay hide ay siya u máng-adeyo tu tolay hide nikán.”#11:23 Basaán tu Lukas 9:50.
U kássole nu Madukás a Ispirito
(Mateo 12:43-45)
24Sakay kinagi pa ni Jesus, “Ni lummuwas dán tu baggi nu essa a tolay u madukás a ispirito ay máglalebután dán itod tu lugar a awan ti dinom. Sakay magehyok ti imangan na. Ni awan siya ti ketan ay kagiyán na tu sadile na, ‘Soliyák tu ginábwatan ko a bilay.’ 25Sakay ni demáttan na a malinis sakay maayus u bilay ti kássole naan itod, 26ay lumuwas siya a huway sakay magakit pa ti pitto a ispirito a mas madukás pa nan siya. Sumáddáp hide ti tolayan itod sakay mágyan hod. Kaya mas lalo pa a dumukás u kalagayan ni tolayan itod.”
U Tatahodan a Mapalad
27Mentaras a magupos ti Jesus ay te bigla a pimmákhaw a bábbey tu kákpalan sakay kinagi na nikuna, “Pinagpala u bábbey a náng-enak sakay nangpadakál niko!”
28Pero timmábbeg ti Jesus, “Mas mapalad u mágsaneg sakay sumássunud tu upos nu Diyos!”
Nangaged ti Makataka-taka a Bagay u Tolay hide
(Mateo 12:38-42)
29Nikuna kummakpal dán u katolayan ay kinagi ni Jesus, “Grabi't dukás i tolayay nadid a panahun! Magaged hide ti makataka-taka a bagay pero awanák mangpeta nide. Tama dán tu makataka-taka a bagay a nangyare ni Jonas.
30Ni kodya a nagin tanda ti Jonas tu taga-Ninive hide ay konna bi hod u magin tanda nu Anak nu Tolay ti lahiyan iye.
31Tu Aldew nu Pághatul ay tumaknág u Reyna a taga-abagatan, sakay hatulan na ilahe yan iye a dapat a maparusaan. Dipo gábwat siya tu suluk ni munduwáy pero immangay siya tánni mágsaneg tu karunungan ni Solomon; pero mas pa ni Solomon u katoy he!
32Tu Aldew nu Pághatul ay tumaknág be u taga-Ninive hide tán kumontara ti lahiyan iye, dipo nagsise hide nikuna mangaral nide ti Jonas. Sanigán moy katoy he u mas mataas nan ti Jonas.”
U Demlag nu Essa a Tolay
(Mateo 5:15; 6:22-23)
33Sakay kinagi pa ni Jesus, “Awan ti tolay a magtab ti simbuwan sakay itagu na oni taklábban na tu págtakalan. Nan idátton na itod tu talaga a págdattonan tánni mademlagan u tolay a sumáddáp tu bilay.
34U mata mo u pinakangsimbu tu bággi mo. Ni maganda u pangileng mo ay mademlagan u bággi mo. Pero ni mahabuhab u pangileng mo ay madiham labe u bággi mo.
35Kaya pakasiguraduwán mu la, bakay u áakalaán mo a demlag a katoy niko ay kadiklámman bál.
36Dipo ni maganda u katoy tu isip mo ay awan ka maggimet ti madukás. Magdemlag iye a kumán a dáddemlagan nu essa a mademlag a simbuwan.”
Nágngállan ni Jesus u Pariseo hide Sakay u Maisto hide nu Kautusan dipo tu Madukás de a Gimet
(Mateo 23:1-36; Markos 12:38-40)
37Nikuna matapos ti Jesus a nagtoldu ay inakit siya nu essa a Pariseo a kuman tu bilay na. Kaya nákkuyog siya sakay nákpággatubang tu lamisaan. 38Nagtaka u Pariseo nikuna ketan na ti Jesus a kimman a awan naguges tu kamát na. 39Kinagi nikuna nu Panginoon, “Hikam a Pariseo hide, áugisan moy u luwas nu baso sakay u penggan pero u puso moy ay makasadile sakay putat ti kadukássan! 40Awan kam ti tukoy! Awan beman u Diyos a nanggimet tu katoy tu luwas ay siya labe u nanggimet tu katoy tu disalad? 41Kaya tulungan moy u magkahirap hide tu kailangan de tán magin malinis kam tu atubang nu Diyos.
42Hikam a Pariseo hide ay kakagbi dipo maparusaan kam! Sássunudán moy u Kautusan nu Diyos a mangatád tu kasapulo a parte nu kabiyagen moy a konna tu mula-mula moy, sakay pangrikadu. Pero sa iye i nalimunan moyay a gimitán, u awan págdaya tu tolay hide sakay u tama a págmahal tu Diyos. Tama la a iyatád tu Diyos u parte na tu nabuhas moy, pero dyan moy kalimunan u mas mahalaga nan tu Kautusan.
43Kakagbi kam Pariseo hide! Dipo masássohán kam a umetnod tu pangbisita hide a pággetnudan tu sinagoga! Gugusto moy be a igalang dikam sakay batiyán tu matolay a lugar. 44Kakagbi kam! Dipo kumán kam a páglábbángngan a awan ti tanda kaya mágkagemmakan kam nu tolay hide a awan de mamalayan.”
45Kinagi nu essa tu maisto hide nu Kautusan, “Maisto, ti kinagi muwe ay pati hikame ay ininsulto mo.”
46Tinábbeg siya ni Jesus, “Kakagbi kam be maisto hide nu Kautusan! Páppadággiyan moy u tolay hide tu mágkahirap moy hide a Kautusan, pero mismo hikam ay awan moy hide tattulungan para sunudan i kautusanan iye. 47Kakagbi kam dipo hikam ay maparusaan! Dipo hikam i mággagimitánnay tu mágkaganda a páglábbángngan nu prupeta hide a binuno nu ninunu moy hide. 48Dipo ti ginimet moyan itod ay hikam labe i nagpatunayay a immayun kam tu ginimet nu ninunu moy hide, dipo hide u nangbuno tu prupeta hide sakay hikam be u nággimet tu páglábbángngan de. 49Iye be u mangpatunay a tatahoden u kinagi nu Diyos sigun tu Karunungan na, ‘Paangayán ko nide u prupeta sakay u disepulus ko hide a magtoldu tu tolay hide. Pero bunuwán de u agum sakay pasakitan de u agum.’ 50Kaya u tolay hide nadid u maparusaan dipo tu pángbuno nu nuno de hide tu prupeta hide sapul lalangán i munduwáy, 51sapul tu pángbuno ni Cain ni Abel hanggan ni Zacarias a binuno tu sállat nu Templo a págtutudan ti alay. Hikam a mabiyag nadid u maparusaan dipo tu ginimet de.”
52“Kakagbi kam maisto hide nu Kautusan! Inatádden kam ti tungkulin a ipangaral u upos nu Diyos, pero awan moy la impangaral dipo awan kam maniwala nikuna nan bawalan moy pabe u tolay hide a masoh a maniwala.”
53Sakay limmakad ti Jesus ti lugaran itod. Sapul hod ay naiyamut dán nikuna u maisto hide nu Kautusan sakay u Pariseo hide. Tináttanung di siya tungkul tu sari-sare a bagay, 54tán madakáp de siya nite makagi siya a maare de a ibintang nikuna.#11:54 Basaán tu Markos 12:13.
Právě zvoleno:
Lukas 11: MBJC
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
Pahanan Agta New Testament © Philippine Bible Society and Wycliffe Bible Translators, Inc., 2017.
