Juan 15

U Tunay a Ponan nu Ubas

1Nadid ay kinagi pa ni Jesus, “Hikán u tunay a ponan nu ubas sakay u Ama ko u mággalaga. 2Káttulán na u balang pinget a awan magbunga sakay linisan na u balang pinget a magbunga para mas lalu pa iye a magbunga. 3Táttupadán moy u itáttoldu ko nikam kanya kumán kam a u pinget hide a malinis dán. 4Manatile kam nikán tán manatiliyák be nikam. Awan makapagbunga u essa a pinget ni awan nakakapit tu ponan. Konna bi hod u mangyare, awan kam magbunga ni awan kam manatile nikán.

5Hikán u ponan nu ubas sakay hikam u pinget hide. U tolay a manatile nikán sakay manatiliyák be nikuna ay siya u magbunga ti makpal. Dipo awan kam ti magimet ni hiwalay kam nikán. 6U awan manatile nikán ay konna tu pinget a malanás sakay ibábbut, káttapos ay ipunán a ibut tu apoy para tutudán. 7Ni manatile kam nikán, sakay u upos ko ay manatile be nikam, ay iyatád ko u ánya man a agidán moy. 8Maparangalan u Ama ko ni magbunga kam ti makpal, sakay tu konna he a paraan ay mepeta moy a disepulus takam. 9Mahal takam a konna tu pángmahal nikán nu Ama. Manatile kam tu págmahal ko. 10Ni sássunudán moy u utus ko ay manatile kam tu págmahal ko. Konna nikán, sássunudán ko u utus nu Ama, kanya manatiliyák tu págmahal na.

11Kinagi ko nikam i bagayan iye hide, para makahate kam tu kasayaan ko sakay magin tunay u kasayaan moy. 12Sa iye u utus ko, magmahalan kam: konna tu págmahal ko nikam. 13Awan dán ti págmahal a higit tu págmahal nu essa a tolay a náng-alay tu biyag na para tu amigu na hide. 14Amigu takam ni sunudán moy u utus ko hide. 15Awan takamon ibilang a alipin, dipo awan tukoy nu alipin ni ánya u gággimitán nu amo na. Nan, inturing takamon a amigu ko, dipo kagiyán ko nikam u atanan a nasaneg ko tu Ama. 16Bakán a hikam u nangpile nikán, nan hikán u nangpile nikam, tán maglakad kam sakay magbunga tu bunga hide a manatile a hanggan-hanggan. Ni konna hod, ánya man u agidán moy tu Ama tu ngahan ko ay iyatád na nikam. 17Kanya sa iye u utus ko nikam: magmahalan kam.”

Maiyamut u Iba a Tolay

18Kinagi pa ni Jesus, “Ni maiyamut nikam u tolay hide ti munduway ay isipán moy a hikán pa u naiyamutan de bagu a hikam. 19Ni kaguman kam tu taga-mundu hide ay mahalán dikam. Pero awan di kam kaguman, dipo pinile takam he ti munduway para awan kamon magin konna nide. Kanya u mundu ay maiyamut nikam. 20Diyan moy kalimunan u kinagi ko nikam a awan ti alipin a mas higit tu amo na. Ni dinustaák de ay dustaán dikam be. Sakay ni sinunud de u upos ko ay sunudán di be u kagiyán moy. 21Dustaán dikam dipo maniwala kam nikán sakay dipo awan de tukoy u nangpaangay he nikán. 22Ni awanák he immangay a nagupos nide ay awan nakwa napatunayan a nagkasala hide. Pero nadid ay awan dán hide ti merason tu kasalanan de. 23U maiyamut nikán ay maiyamut be tu Ama ko. 24Ni awanák naggimet tu atubang de ti makataka-taka a awan magimet nu ti deyaman, maare de a kagiyan a awan hide ti kasalanan. Pero nadid te kasalanan hide, ta maski ni netan de u ginimet ko a makataka-taka, ay naiyamut hide nikame ay tu Ama ko. 25Ti ginimet diyan iye ay natupad u nesulat tu Kasulatan a, ‘Maiyamut hide nikán a awan ti rason.’”

26Káttapos ay kinagi ni Jesus, “Paangayán ko nikam u Banal a Ispirito a gábwat tu Ama. Siya u mánggiya nikam, sakay itoldu na nikam u tatahoden. Káddemát na ay siya u mángpatunay ni ti deyaák a talaga. 27Hikam be ay dapat magpatunay tungkul nikán, dipo kaguman takamon sapul pa ti sapul.”

Právě zvoleno:

Juan 15: MBJC

Zvýraznění

Sdílet

Kopírovat