Genesis 12
12
Bangara Sa Keleike Abarami
1Iaova sa voy te kue Abarami, <<Re mo kesini mo vodu vatasuku, oyra toram no oyra boysi te tamam mo zo la te keike vodu aro me vatereni amo.
2<<Aro me vazadeve sokutu arasumam re me keike tubi poyua boysi,
No aro me manani amo re;
Aro me vamajele taritongom,
No te kue re me tae me mana te kue oyra boysi taba.
3Aro me manani oyra boysi ka manani amo re,
No ka oye sa doynguni amo re, aro me doynguni;
No taba boysi te vodu ni te lua moyra pale mana
Me tae voy me te kue re,>> sa voy.
4Si Abarami sa kesini ngoyni sa kue, sa seva Iaova sa soynani moyna oye; no Lote sa zo koype oye. Abarami sa 75 avea sada oye sa kesini Harani. 5Oye sa koype ona quolekutae oye Serai, no toytu lata oye Lote, no taba oyra doyra pita pupura, taba oyra tutupari no taba oyra boysi oye sa quqene Harani, no oyra ka tasoybaka la moyra la te vodu ni Kenani, no oyra ka la doka Kenani.
6Abarami sa paqolotae te vodu noyene no oye sa me doka te azu taboyna ni More te kumala ni Sekemu. Te sada noyene oyra boysi ni Kenani ka kuo te vodu ta. 7Iaova sa takabula me te kue Abarami no sa voy, <<Goyti to vodu aro me koyna oyra sokutu arasumam re.>> Si te ngoyni noyene Abarami sa vadere koyna Iaova, keike sara taboyna, bati oye sa takabula moyna te kue oye.
8Sa kesini ngoyni ta, oye sa zo nukoro voy la te oyra supu neva sa pukae me ngada te kumala ni Betele no sa vadere ona toypaka pua, te kumala ni Betele te neva sa jolupua ngada no Ai te neva sa pukae me ngada soy. No te ngoyni noyene oye sa vadere koyna Iaova keike sara taboyna, no sa keleke taritongoa Iaova. 9No Abarami sa zo nukoro no sa zo voy la Neqeve.
Abarami Sa kuo te Vodu ni Ijipi
10Te sada noyene sada saqosaqo sa doka te vodu, no Abarami sa zo juolo voy la te vodu ni Ijipi me la kuo ne ngoyni bati sada saqosaqo sa karapota varoka. 11Sada Abarami sa vatanga me paru Ijipi, sa voy goyti oye te kue Serai ona quolekutae, <<Vanata! Aro ko utini re ko quole kaluole. 12Sada oyra boysi ni Ijipi ka mia amo re, oyra moyra voy goyti <Goyti ona quolekutae Abarami.> Sinani oyra moyra voyevale aqo ro no moyra vatu amo re soy. 13Re mo soynani oyra re ko vaviniqu ro, soy oyra moyra vakoypo aqo ro, no oyra moyra vamoyo aqo ro me tu bati re ko vaviniqu ro,>> sa voy.
14Sada Abarami sa me doka Ijipi, oyra boysi ni Ijipi ka mia Serai sa quole kaluole sua. 15Sada oyra boysi matamata te buoe lata Pero ka mia oye, oyra ka la va aseni Pero, quole goyti sa kaluole sua, no oyra ka koype poka la oye te ona pade buoe. 16No bati oye sa noyne Serai si oye sa vakoypo vanoyi Abarami, no sa koyna oye oyra vaua sipi no qoti, bulumakao, oyra dongki leike no quole, oyra sika leike no sika quole, no oyra kamele soy.
17Ba Iaova sa paqani oyra moro taka varoka te kue Pero no oyra boysi te ona pupu, bati Pero sa pale Serai, quolekutae te Abarami. 18No Pero sa keleke Abarami no sa tanani oye. <<Ata pita re ko joyjuni te kue ro? Be sa voy re kama soynani moyna mo aqo ro oye sa mo quolekutae ne? 19Ata voy te soy re ko soynani aqo ro, oye sa vavinim, ko voy, soy oye aro ko pale oye me qo quolekutae ne? Sa voy ta oye si, goyti mo quolekutae re. Mo koype oye mo zo to!>> sa voy. 20Sinani Pero sa voytuni oyra ona boysi, no oyra ka koype la Abarami, no oyra ka peqani va zo oye, no ona quolekutae, no pisipita taba oye sa tugnene soy.
Právě zvoleno:
Genesis 12: BAA
Zvýraznění
Sdílet
Kopírovat
Chceš mít své zvýrazněné verše uložené na všech zařízeních? Zaregistruj se nebo se přihlas
© 2024, Islands Bible Ministries. All rights reserved.